ଶ୍ରୀ ଦୁର୍ଗା ଚଂଦ୍ରକଳା ସ୍ତୁତି

ଧ୍ୟାନମ୍
ଉମାକାଂତେ ରମାକାଂତେ ଏଷାମାସୀ-ନ୍ମତିସ୍ସମା ।
ନମାମି ଦୀକ୍ଷିତେଂଦ୍ରାଂ ସ୍ତାନ୍ ନୟଷଟ୍କ-ଵିଶାରଦାମ୍ ॥

ଵେଧୋହରୀଶ୍ଵରସ୍ତୁତ୍ୟାଂ ଵିହର୍ତ୍ରୀଂ ଵିଂଧ୍ୟଭୂଧରେ ।
ହରପ୍ରାଣେଶ୍ଵରୀଂ ଵଂଦେ ହଂତ୍ରୀଂ ଵିବୁଧଵିଦ୍ଵିଷାମ୍ ॥ 1 ॥

ଅଭ୍ୟର୍ଥନେନ ସରସୀରୁହସଂଭଵସ୍ୟ
ତ୍ୟକ୍ତ୍ଵୋଦିତା ଭଗଵଦକ୍ଷିପିଧାନଲୀଲାମ୍ ।
ଵିଶ୍ଵେଶ୍ଵରୀ ଵିପଦପାକମନେ ପୁରସ୍ତାତ୍
ମାତା ମମାସ୍ତୁ ମଧୁକୈଟଭୟୋର୍ନିହଂତ୍ରୀ ॥ 2 ॥

ପ୍ରାଙ୍ନିର୍ଜରେଷୁ ନିହତୈର୍ନିଜଶକ୍ତିଲେଶୈଃ
ଏକୀଭଵଦ୍ଭିରୁଦିତାଽଖିଲଲୋକଗୁପ୍ତ୍ୟୈ ।
ସଂପନ୍ନଶସ୍ତ୍ରନିକରା ଚ ତଦାୟୁଧସ୍ଥୈଃ
ମାତା ମମାସ୍ତୁ ମହିଷାଂତକରୀ ପୁରସ୍ତାତ୍ ॥ 3 ॥

ପ୍ରାଲେୟଶୈଲତନୟା ତନୁକାଂତିସଂପତ୍
କୋଶୋଦିତା କୁଵଲୟଚ୍ଛଵିଚାରୁଦେହା ।
ନାରାୟଣୀ ନମଦଭୀପ୍ସିତକଲ୍ପଵଲ୍ଲୀ
ସୁପ୍ରୀତିମାଵହତୁ ଶୁଂଭନିଶୁଂଭହଂତ୍ରୀ ॥ 4 ॥

ଵିଶ୍ଵେଶ୍ଵରୀତି ମହିଷାଂତକରୀତି ୟସ୍ୟାଃ
ନାରାୟଣୀତ୍ୟପି ଚ ନାମଭିରଂକିତାନି ।
ସୂକ୍ତାନି ପଂକଜଭୁଵା ଚ ସୁରର୍ଷିଭିଶ୍ଚ
ଦୃଷ୍ଟାନି ପାଵକମୁଖୈଶ୍ଚ ଶିଵାଂ ଭଜେ ତାମ୍ ॥ 5 ॥

ଉତ୍ପତ୍ତିଦୈତ୍ୟହନନସ୍ତଵନାତ୍ମକାନି
ସଂରକ୍ଷକାଣ୍ୟଖିଲଭୂତହିତାୟ ୟସ୍ୟାଃ ।
ସୂକ୍ତାନ୍ୟଶେଷନିଗମାଂତଵିଦଃ ପଠଂତି
ତାଂ ଵିଶ୍ଵମାତରମଜସ୍ରମଭିଷ୍ଟଵୀମି ॥ 6 ॥

ୟେ ଵୈପ୍ରଚିତ୍ତପୁନରୁତ୍ଥିତଶୁଂଭମୁଖ୍ୟୈଃ
ଦୁର୍ଭିକ୍ଷଘୋରସମୟେନ ଚ କାରିତାସୁ ।
ଆଵିଷ୍କୃତାସ୍ତ୍ରିଜଗଦାର୍ତିଷୁ ରୂପଭେଦାଃ
ତୈରଂବିକା ସମଭିରକ୍ଷତୁ ମାଂ ଵିପଦ୍ଭ୍ୟଃ ॥ 7 ॥

ସୂକ୍ତଂ ୟଦୀୟମରଵିଂଦଭଵାଦି ଦୃଷ୍ଟଂ
ଆଵର୍ତ୍ୟ ଦେଵ୍ୟନୁପଦଂ ସୁରଥଃ ସମାଧିଃ ।
ଦ୍ଵାଵପ୍ୟଵାପତୁରଭୀଷ୍ଟମନନ୍ୟଲଭ୍ୟଂ
ତାମାଦିଦେଵତରୁଣୀଂ ପ୍ରଣମାମି ମୂର୍ଧ୍ନା ॥ 8 ॥

ମାହିଷ୍ମତୀତନୁଭଵଂ ଚ ରୁରୁଂ ଚ ହଂତୁଂ
ଆଵିଷ୍କୃତୈର୍ନିଜରସାଦଵତାରଭେଦୈଃ ।
ଅଷ୍ଟାଦଶାହତନଵାହତକୋଟିସଂଖ୍ୟୈଃ
ଅଂବା ସଦା ସମଭିରକ୍ଷତୁ ମାଂ ଵିପଦ୍ଭ୍ୟଃ ॥ 9 ॥

ଏତଚ୍ଚରିତ୍ରମଖିଲଂ ଲିଖିତଂ ହି ୟସ୍ୟାଃ
ସଂପୂଜିତଂ ସଦନ ଏଵ ନିଵେଶିତଂ ଵା ।
ଦୁର୍ଗଂ ଚ ତାରୟତି ଦୁସ୍ତରମପ୍ୟଶେଷଂ
ଶ୍ରେୟଃ ପ୍ରୟଚ୍ଛତି ଚ ସର୍ଵମୁମାଂ ଭଜେ ତାମ୍ ॥ 10 ॥

ୟତ୍ପୂଜନସ୍ତୁତିନମସ୍କୃତିଭିର୍ଭଵଂତି
ପ୍ରୀତାଃ ପିତାମହରମେଶହରାସ୍ତ୍ରୟୋଽପି ।
ତେଷାମପି ସ୍ଵକଗୁଣୈର୍ଦଦତୀ ଵପୂଂଷି
ତାମୀଶ୍ଵରସ୍ୟ ତରୁଣୀଂ ଶରଣଂ ପ୍ରପଦ୍ୟେ ॥ 11 ॥

କାଂତାରମଧ୍ୟଦୃଢଲଗ୍ନତୟାଽଵସନ୍ନାଃ
ମଗ୍ନାଶ୍ଚ ଵାରିଧିଜଲେ ରିପୁଭିଶ୍ଚ ରୁଦ୍ଧାଃ ।
ୟସ୍ୟାଃ ପ୍ରପଦ୍ୟ ଚରଣୌ ଵିପଦସ୍ତରଂତି
ସା ମେ ସଦାଽସ୍ତୁ ହୃଦି ସର୍ଵଜଗତ୍ସଵିତ୍ରୀ ॥ 12 ॥

ବଂଧେ ଵଧେ ମହତି ମୃତ୍ୟୁଭୟେ ପ୍ରସକ୍ତେ
ଵିତ୍ତକ୍ଷୟେ ଚ ଵିଵିଧେ ୟ ମହୋପତାପେ ।
ୟତ୍ପାଦପୂଜନମିହ ପ୍ରତିକାରମାହୁଃ
ସା ମେ ସମସ୍ତଜନନୀ ଶରଣଂ ଭଵାନୀ ॥ 13 ॥

ବାଣାସୁରପ୍ରହିତପନ୍ନଗବଂଧମୋକ୍ଷଃ
ତଦ୍ବାହୁଦର୍ପଦଲନାଦୁଷୟା ଚ ୟୋଗଃ ।
ପ୍ରାଦ୍ୟୁମ୍ନିନା ଦ୍ରୁତମଲଭ୍ୟତ ୟତ୍ପ୍ରସାଦାତ୍
ସା ମେ ଶିଵା ସକଲମପ୍ୟଶୁଭଂ କ୍ଷିଣୋତୁ ॥ 14 ॥

ପାପଃ ପୁଲସ୍ତ୍ୟତନୟଃ ପୁନରୁତ୍ଥିତୋ ମାଂ
ଅଦ୍ୟାପି ହର୍ତୁମୟମାଗତ ଇତ୍ୟୁଦୀତମ୍ ।
ୟତ୍ସେଵନେନ ଭୟମିଂଦିରୟାଽଵଧୂତଂ
ତାମାଦିଦେଵତରୁଣୀଂ ଶରଣଂ ଗତୋଽସ୍ମି ॥ 15 ॥

ୟଦ୍ଧ୍ୟାନଜଂ ସୁଖମଵାପ୍ୟମନଂତପୁଣ୍ୟୈଃ
ସାକ୍ଷାତ୍ତମଚ୍ୟୁତ ପରିଗ୍ରହମାଶ୍ଵଵାପୁଃ ।
ଗୋପାଂଗନାଃ କିଲ ୟଦର୍ଚନପୁଣ୍ୟମାତ୍ରାଃ
ସା ମେ ସଦା ଭଗଵତୀ ଭଵତୁ ପ୍ରସନ୍ନା ॥ 16 ॥

ରାତ୍ରିଂ ପ୍ରପଦ୍ୟ ଇତି ମଂତ୍ରଵିଦଃ ପ୍ରପନ୍ନାନ୍
ଉଦ୍ବୋଧ୍ୟ ମୃତ୍ୟୁଵଧିମନ୍ୟଫଲୈଃ ପ୍ରଲୋଭ୍ୟ ।
ବୁଦ୍ଧ୍ଵା ଚ ତଦ୍ଵିମୁଖତାଂ ପ୍ରତନଂ ନୟଂତୀଂ
ଆକାଶମାଦିଜନନୀଂ ଜଗତାଂ ଭଜେ ତାମ୍ ॥ 17 ॥

ଦେଶକାଲେଷୁ ଦୁଷ୍ଟେଷୁ ଦୁର୍ଗାଚଂଦ୍ରକଲାସ୍ତୁତିଃ ।
ସଂଧ୍ୟୟୋରନୁସଂଧେୟା ସର୍ଵାପଦ୍ଵିନିଵୃତ୍ତୟେ ॥ 18 ॥

ଇତି ଶ୍ରୀମଦପୟ୍ୟଦୀକ୍ଷିତଵିରଚିତା ଦୁର୍ଗାଚଂଦ୍ରକଳାସ୍ତୁତିଃ ॥