ଶ୍ରୀ ଦୁର୍ଗା ଅଥର୍ଵଶୀର୍ଷମ୍

ଓଂ ସର୍ଵେ ଵୈ ଦେଵା ଦେଵୀମୁପତସ୍ଥୁଃ କାସି ତ୍ଵଂ ମହାଦେଵୀତି ॥ 1 ॥

ସାଽବ୍ରଵୀଦହଂ ବ୍ରହ୍ମସ୍ଵରୂପିଣୀ ।
ମତ୍ତଃ ପ୍ରକୃତିପୁରୁଷାତ୍ମକଂ ଜଗତ୍ ।
ଶୂନ୍ୟଂ ଚାଶୂନ୍ୟଂ ଚ ॥ 2 ॥

ଅହମାନଂଦାନାନଂଦୌ ।
ଅହଂ-ଵିଁଜ୍ଞାନାଵିଜ୍ଞାନେ ।
ଅହଂ ବ୍ରହ୍ମାବ୍ରହ୍ମଣି ଵେଦିତଵ୍ୟେ ।
ଅହଂ ପଂଚଭୂତାନ୍ୟପଂଚଭୂତାନି ।
ଅହମଖିଲଂ ଜଗତ୍ ॥ 3 ॥

ଵେଦୋଽହମଵେଦୋଽହମ୍ ।
ଵିଦ୍ୟାଽହମଵିଦ୍ୟାଽହମ୍ ।
ଅଜାଽହମନଜାଽହମ୍ ।
ଅଧଶ୍ଚୋର୍ଧ୍ଵଂ ଚ ତିର୍ୟକ୍ଚାହମ୍ ॥ 4 ॥

ଅହଂ ରୁଦ୍ରେଭିର୍ଵସୁଭିଶ୍ଚରାମି ।
ଅହମାଦିତ୍ୟୈରୁତ ଵିଶ୍ଵଦେଵୈଃ ।
ଅହଂ ମିତ୍ରାଵରୁଣାଵୁଭୌ ବିଭର୍ମି ।
ଅହମିଂଦ୍ରାଗ୍ନୀ ଅହମଶ୍ଵିନାଵୁଭୌ ॥ 5 ॥

ଅହଂ ସୋମଂ ତ୍ଵଷ୍ଟାରଂ ପୂଷଣଂ ଭଗଂ ଦଧାମି ।
ଅହଂ-ଵିଁଷ୍ଣୁମୁରୁକ୍ରମଂ ବ୍ରହ୍ମାଣମୁତ ପ୍ରଜାପତିଂ ଦଧାମି ॥ 6 ॥

ଅ⁠॒ହଂ ଦ⁠॑ଧାମି⁠॒ ଦ୍ରଵି⁠॑ଣଂ ହ⁠॒ଵିଷ୍ମ⁠॑ତେ ସୁପ୍ରା⁠॒ଵ୍ୟେ⁠॒3 ୟଜ⁠॑ମାନାୟ ସୁନ୍ଵ⁠॒ତେ ।
ଅ⁠॒ହଂ ରାଷ୍ଟ୍ରୀ⁠॑ ସଂ⁠॒ଗମ⁠॑ନୀ⁠॒ ଵସୂ⁠॑ନାଂ ଚିକି⁠॒ତୁଷୀ⁠॑ ପ୍ରଥ⁠॒ମା ୟ⁠॒ଜ୍ଞିୟା⁠॑ନାମ୍ ।
ଅ⁠॒ହଂ ସୁ⁠॑ଵେ ପି⁠॒ତର⁠॑ମସ୍ୟ ମୂ⁠॒ର୍ଧନ୍ମମ⁠॒ ୟୋନି⁠॑ର⁠॒ପ୍ସ୍ଵଂତଃ ସ⁠॑ମୁ⁠॒ଦ୍ରେ ।
ୟ ଏଵଂ-ଵେଁଦ । ସ ଦେଵୀଂ ସଂପଦମାପ୍ନୋତି ॥ 7 ॥

ତେ ଦେଵା ଅବ୍ରୁଵନ୍ –
ନମୋ ଦେଵ୍ୟୈ ମହାଦେଵ୍ୟୈ ଶିଵାୟୈ ସତତଂ ନମଃ ।
ନମଃ ପ୍ରକୃତ୍ୟୈ ଭଦ୍ରାୟୈ ନିୟତାଃ ପ୍ରଣତାଃ ସ୍ମ ତାମ୍ ॥ 8 ॥

ତାମ⁠॒ଗ୍ନିଵ⁠॑ର୍ଣାଂ⁠॒ ତପ⁠॑ସା ଜ୍ଵଲଂ⁠॒ତୀଂ-ଵୈଁ⁠॑ରୋଚ⁠॒ନୀଂ କ⁠॑ର୍ମଫ⁠॒ଲେଷୁ⁠॒ ଜୁଷ୍ଟା⁠᳚ମ୍ ।
ଦୁ⁠॒ର୍ଗାଂ ଦେ⁠॒ଵୀଂ ଶର⁠॑ଣଂ ପ୍ରପ⁠॑ଦ୍ୟାମହେଽସୁରାନ୍ନାଶୟିତ୍ର୍ୟୈ ତେ ନମଃ ॥ 9 ॥

(ଋ.ଵେ.8.100.11)
ଦେ⁠॒ଵୀଂ-ଵାଁଚ⁠॑ମଜନୟଂତ ଦେ⁠॒ଵାସ୍ତାଂ-ଵିଁ⁠॒ଶ୍ଵରୂ⁠॑ପାଃ ପ⁠॒ଶଵୋ⁠॑ ଵଦଂତି ।
ସା ନୋ⁠॑ ମଂ⁠॒ଦ୍ରେଷ⁠॒ମୂର୍ଜଂ⁠॒ ଦୁହା⁠॑ନା ଧେ⁠॒ନୁର୍ଵାଗ⁠॒ସ୍ମାନୁପ⁠॒ ସୁଷ୍ଟୁ⁠॒ତୈତୁ⁠॑ ॥ 10 ॥

କାଲରାତ୍ରୀଂ ବ୍ରହ୍ମସ୍ତୁତାଂ-ଵୈଁଷ୍ଣଵୀଂ ସ୍କଂଦମାତରମ୍ ।
ସରସ୍ଵତୀମଦିତିଂ ଦକ୍ଷଦୁହିତରଂ ନମାମଃ ପାଵନାଂ ଶିଵାମ୍ ॥ 11 ॥

ମହାଲକ୍ଷ୍ମ୍ୟୈ ଚ ଵିଦ୍ମହେ ସର୍ଵଶକ୍ତ୍ୟୈ ଚ ଧୀମହି ।
ତନ୍ନୋ ଦେଵୀ ପ୍ରଚୋଦୟାତ୍ ॥ 12 ॥

ଅଦିତିର୍​ହ୍ୟଜନିଷ୍ଟ ଦକ୍ଷ ୟା ଦୁହିତା ତଵ ।
ତାଂ ଦେଵା ଅନ୍ଵଜାୟଂତ ଭଦ୍ରା ଅମୃତବଂଧଵଃ ॥ 13 ॥

କାମୋ ୟୋନିଃ କମଲା ଵଜ୍ରପାଣି-
ର୍ଗୁହା ହସା ମାତରିଶ୍ଵାଭ୍ରମିଂଦ୍ରଃ ।
ପୁନର୍ଗୁହା ସକଲା ମାୟୟା ଚ
ପୁରୂଚ୍ୟୈଷା ଵିଶ୍ଵମାତାଦିଵିଦ୍ୟୋମ୍ ॥ 14 ॥

ଏଷାଽଽତ୍ମଶକ୍ତିଃ ।
ଏଷା ଵିଶ୍ଵମୋହିନୀ ।
ପାଶାଂକୁଶଧନୁର୍ବାଣଧରା ।
ଏଷା ଶ୍ରୀମହାଵିଦ୍ୟା ।
ୟ ଏଵଂ-ଵେଁଦ ସ ଶୋକଂ ତରତି ॥ 15 ॥

ନମସ୍ତେ ଅସ୍ତୁ ଭଗଵତି ମାତରସ୍ମାନ୍ପାହି ସର୍ଵତଃ ॥ 16 ॥

ସୈଷାଷ୍ଟୌ ଵସଵଃ ।
ସୈଷୈକାଦଶ ରୁଦ୍ରାଃ ।
ସୈଷା ଦ୍ଵାଦଶାଦିତ୍ୟାଃ ।
ସୈଷା ଵିଶ୍ଵେଦେଵାଃ ସୋମପା ଅସୋମପାଶ୍ଚ ।
ସୈଷା ୟାତୁଧାନା ଅସୁରା ରକ୍ଷାଂସି ପିଶାଚା ୟକ୍ଷା ସିଦ୍ଧାଃ ।
ସୈଷା ସତ୍ତ୍ଵରଜସ୍ତମାଂସି ।
ସୈଷା ବ୍ରହ୍ମଵିଷ୍ଣୁରୁଦ୍ରରୂପିଣୀ ।
ସୈଷା ପ୍ରଜାପତୀଂଦ୍ରମନଵଃ ।
ସୈଷା ଗ୍ରହନକ୍ଷତ୍ରଜ୍ୟୋତୀଂଷି । କଲାକାଷ୍ଠାଦିକାଲରୂପିଣୀ ।
ତାମହଂ ପ୍ରଣୌମି ନିତ୍ୟମ୍ ।
ପାପାପହାରିଣୀଂ ଦେଵୀଂ ଭୁକ୍ତିମୁକ୍ତିପ୍ରଦାୟିନୀମ୍ ।
ଅନଂତାଂ-ଵିଁଜୟାଂ ଶୁଦ୍ଧାଂ ଶରଣ୍ୟାଂ ଶିଵଦାଂ ଶିଵାମ୍ ॥ 17 ॥

ଵିୟଦୀକାରସଂ​ୟୁଁକ୍ତଂ-ଵୀଁତିହୋତ୍ରସମନ୍ଵିତମ୍ ।
ଅର୍ଧେଂଦୁଲସିତଂ ଦେଵ୍ୟା ବୀଜଂ ସର୍ଵାର୍ଥସାଧକମ୍ ॥ 18 ॥

ଏଵମେକାକ୍ଷରଂ ବ୍ରହ୍ମ ୟତୟଃ ଶୁଦ୍ଧଚେତସଃ ।
ଧ୍ୟାୟଂତି ପରମାନଂଦମୟା ଜ୍ଞାନାଂବୁରାଶୟଃ ॥ 19 ॥

ଵାଙ୍ମାୟା ବ୍ରହ୍ମସୂସ୍ତସ୍ମାତ୍ ଷଷ୍ଠଂ-ଵଁକ୍ତ୍ରସମନ୍ଵିତମ୍ ।
ସୂର୍ୟୋଽଵାମଶ୍ରୋତ୍ରବିଂଦୁସଂ​ୟୁଁକ୍ତଷ୍ଟାତ୍ତୃତୀୟକଃ ।
ନାରାୟଣେନ ସମ୍ମିଶ୍ରୋ ଵାୟୁଶ୍ଚାଧରୟୁକ୍ତତଃ ।
ଵିଚ୍ଚେ ନଵାର୍ଣକୋଽର୍ଣଃ ସ୍ୟାନ୍ମହଦାନଂଦଦାୟକଃ ॥ 20 ॥

ହୃତ୍ପୁଂଡରୀକମଧ୍ୟସ୍ଥାଂ ପ୍ରାତଃସୂର୍ୟସମପ୍ରଭାମ୍ ।
ପାଶାଂକୁଶଧରାଂ ସୌମ୍ୟାଂ-ଵଁରଦାଭୟହସ୍ତକାମ୍ ।
ତ୍ରିନେତ୍ରାଂ ରକ୍ତଵସନାଂ ଭକ୍ତକାମଦୁଘାଂ ଭଜେ ॥ 21 ॥

ନମାମି ତ୍ଵାଂ ମହାଦେଵୀଂ ମହାଭୟଵିନାଶିନୀମ୍ ।
ମହାଦୁର୍ଗପ୍ରଶମନୀଂ ମହାକାରୁଣ୍ୟରୂପିଣୀମ୍ ॥ 22 ॥

ୟସ୍ୟାଃ ସ୍ଵରୂପଂ ବ୍ରହ୍ମାଦୟୋ ନ ଜାନଂତି ତସ୍ମାଦୁଚ୍ୟତେ ଅଜ୍ଞେୟା ।
ୟସ୍ୟା ଅଂତୋ ନ ଲଭ୍ୟତେ ତସ୍ମାଦୁଚ୍ୟତେ ଅନଂତା ।
ୟସ୍ୟା ଲକ୍ଷ୍ୟଂ ନୋପଲକ୍ଷ୍ୟତେ ତସ୍ମାଦୁଚ୍ୟତେ ଅଲକ୍ଷ୍ୟା ।
ୟସ୍ୟା ଜନନଂ ନୋପଲଭ୍ୟତେ ତସ୍ମାଦୁଚ୍ୟତେ ଅଜା ।
ଏକୈଵ ସର୍ଵତ୍ର ଵର୍ତତେ ତସ୍ମାଦୁଚ୍ୟତେ ଏକା ।
ଏକୈଵ ଵିଶ୍ଵରୂପିଣୀ ତସ୍ମାଦୁଚ୍ୟତେ ନୈକା ।
ଅତ ଏଵୋଚ୍ୟତେ ଅଜ୍ଞେୟାନଂତାଲକ୍ଷ୍ୟାଜୈକା ନୈକେତି ॥ 23 ॥

ମଂତ୍ରାଣାଂ ମାତୃକା ଦେଵୀ ଶବ୍ଦାନାଂ ଜ୍ଞାନରୂପିଣୀ ।
ଜ୍ଞାନାନାଂ ଚିନ୍ମୟାତୀତା ଶୂନ୍ୟାନାଂ ଶୂନ୍ୟସାକ୍ଷିଣୀ ।
ୟସ୍ୟାଃ ପରତରଂ ନାସ୍ତି ସୈଷା ଦୁର୍ଗା ପ୍ରକୀର୍ତିତା ॥ 24 ॥

ତାଂ ଦୁର୍ଗାଂ ଦୁର୍ଗମାଂ ଦେଵୀଂ ଦୁରାଚାରଵିଘାତିନୀମ୍ ।
ନମାମି ଭଵଭୀତୋଽହଂ ସଂସାରାର୍ଣଵତାରିଣୀମ୍ ॥ 25 ॥

ଇଦମଥର୍ଵଶୀର୍​ଷଂ-ୟୋଁଽଧୀତେ ସ ପଂଚାଥର୍ଵଶୀର୍​ଷଜପଫଲମାପ୍ନୋତି ।
ଇଦମଥର୍ଵଶୀର୍​ଷମଜ୍ଞାତ୍ଵା ୟୋଽର୍ଚାଂ ସ୍ଥାପୟତି ।
ଶତଲକ୍ଷଂ ପ୍ରଜପ୍ତ୍ଵାଽପି ସୋଽର୍ଚାସିଦ୍ଧିଂ ନ ଵିଂଦତି ।
ଶତମଷ୍ଟୋତ୍ତରଂ ଚାସ୍ୟ ପୁରଶ୍ଚର୍ୟାଵିଧିଃ ସ୍ମୃତଃ ।
ଦଶଵାରଂ ପଠେଦ୍ୟସ୍ତୁ ସଦ୍ୟଃ ପାପୈଃ ପ୍ରମୁଚ୍ୟତେ ।
ମହାଦୁର୍ଗାଣି ତରତି ମହାଦେଵ୍ୟାଃ ପ୍ରସାଦତଃ । 26 ॥

ସାୟମଧୀୟାନୋ ଦିଵସକୃତଂ ପାପଂ ନାଶୟତି ।
ପ୍ରାତରଧୀୟାନୋ ରାତ୍ରିକୃତଂ ପାପଂ ନାଶୟତି ।
ସାୟଂ ପ୍ରାତଃ ପ୍ରୟୁଂଜାନୋ ଅପାପୋ ଭଵତି ।
ନିଶୀଥେ ତୁରୀୟସଂଧ୍ୟାୟାଂ ଜପ୍ତ୍ଵା ଵାକ୍ସିଦ୍ଧିର୍ଭଵତି ।
ନୂତନାୟାଂ ପ୍ରତିମାୟାଂ ଜପ୍ତ୍ଵା ଦେଵତାସାନ୍ନିଧ୍ୟଂ ଭଵତି ।
ପ୍ରାଣପ୍ରତିଷ୍ଠାୟାଂ ଜପ୍ତ୍ଵା ପ୍ରାଣାନାଂ ପ୍ରତିଷ୍ଠା ଭଵତି ।
ଭୌମାଶ୍ଵିନ୍ୟାଂ ମହାଦେଵୀସନ୍ନିଧୌ ଜପ୍ତ୍ଵା ମହାମୃତ୍ୟୁଂ ତରତି ।
ସ ମହାମୃତ୍ୟୁଂ ତରତି ।
ୟ ଏଵଂ-ଵେଁଦ ।
ଇତ୍ୟୁପନିଷତ୍ ॥ 27 ॥

ଇତି ଦେଵ୍ୟଥର୍ଵଶୀର୍​ଷମ୍ ।