ନିର୍ଗୁଣ ମାନସ ପୂଜା

ଶିଷ୍ୟ ଉଵାଚ
ଅଖଂଡେ ସଚ୍ଚିଦାନଂଦେ ନିର୍ଵିକଲ୍ପୈକରୂପିଣି ।
ସ୍ଥିତେଽଦ୍ଵିତୀୟଭାଵେଽପି କଥଂ ପୂଜା ଵିଧୀୟତେ ॥ 1 ॥

ପୂର୍ଣସ୍ୟାଵାହନଂ କୁତ୍ର ସର୍ଵାଧାରସ୍ୟ ଚାସନମ୍ ।
ସ୍ଵଚ୍ଛସ୍ୟ ପାଦ୍ୟମର୍ଘ୍ୟଂ ଚ ଶୁଦ୍ଧସ୍ୟାଚମନଂ କୁତଃ ॥ 2 ॥

ନିର୍ମଲସ୍ୟ କୁତଃ ସ୍ନାନଂ ଵାସୋ ଵିଶ୍ଵୋଦରସ୍ୟ ଚ ।
ଅଗୋତ୍ରସ୍ୟ ତ୍ଵଵର୍ଣସ୍ୟ କୁତସ୍ତସ୍ୟୋପଵୀତକମ୍ ॥ 3 ॥

ନିର୍ଲେପସ୍ୟ କୁତୋ ଗଂଧଃ ପୁଷ୍ପଂ ନିର୍ଵାସନସ୍ୟ ଚ ।
ନିର୍ଵିଶେଷସ୍ୟ କା ଭୂଷା କୋଽଲଂକାରୋ ନିରାକୃତେଃ ॥ 4 ॥

ନିରଂଜନସ୍ୟ କିଂ ଧୂପୈର୍ଦୀପୈର୍ଵା ସର୍ଵସାକ୍ଷିଣଃ ।
ନିଜାନଂଦୈକତୃପ୍ତସ୍ୟ ନୈଵେଦ୍ୟଂ କିଂ ଭଵେଦିହ ॥ 5 ॥

ଵିଶ୍ଵାନଂଦୟିତୁସ୍ତସ୍ୟ କିଂ ତାଂବୂଲଂ ପ୍ରକଲ୍ପତେ ।
ସ୍ଵୟଂପ୍ରକାଶଚିଦ୍ରୂପୋ ୟୋଽସାଵର୍କାଦିଭାସକଃ ॥ 6 ॥

ଗୀୟତେ ଶ୍ରୁତିଭିସ୍ତସ୍ୟ ନୀରାଜନଵିଧିଃ କୁତଃ ।
ପ୍ରଦକ୍ଷିଣମନଂତସ୍ୟ ପ୍ରଣାମୋଽଦ୍ଵୟଵସ୍ତୁନଃ ॥ 7 ॥

ଵେଦଵାଚାମଵେଦ୍ୟସ୍ୟ କିଂ ଵା ସ୍ତୋତ୍ରଂ ଵିଧୀୟତେ ।
ଅଂତର୍ବହିଃ ସଂସ୍ଥିତସ୍ୟ ଉଦ୍ଵାସନଵିଧିଃ କୁତଃ ॥ 8 ॥

ଶ୍ରୀ ଗୁରୁରୁଵାଚ
ଆରାଧୟାମି ମଣିସଂନିଭମାତ୍ମଲିଂଗମ୍
ମାୟାପୁରୀହୃଦୟପଂକଜସଂନିଵିଷ୍ଟମ୍ ।
ଶ୍ରଦ୍ଧାନଦୀଵିମଲଚିତ୍ତଜଲାଭିଷେକୈ-
ର୍ନିତ୍ୟଂ ସମାଧିକୁସୁମୈର୍ନପୁନର୍ଭଵାୟ ॥ 9 ॥

ଅୟମେକୋଽଵଶିଷ୍ଟୋଽସ୍ମୀତ୍ୟେଵମାଵାହୟେଚ୍ଛିଵମ୍ ।
ଆସନଂ କଲ୍ପୟେତ୍ପଶ୍ଚାତ୍ସ୍ଵପ୍ରତିଷ୍ଠାତ୍ମଚିଂତନମ୍ ॥ 10 ॥

ପୁଣ୍ୟପାପରଜଃସଂଗୋ ମମ ନାସ୍ତୀତି ଵେଦନମ୍ ।
ପାଦ୍ୟଂ ସମର୍ପୟେଦ୍ଵିଦ୍ଵନ୍ସର୍ଵକଲ୍ମଷନାଶନମ୍ ॥ 11 ॥

ଅନାଦିକଲ୍ପଵିଧୃତମୂଲାଜ୍ଞାନଜଲାଂଜଲିମ୍ ।
ଵିସୃଜେଦାତ୍ମଲିଂଗସ୍ୟ ତଦେଵାର୍ଘ୍ୟସମର୍ପଣମ୍ ॥ 12 ॥

ବ୍ରହ୍ମାନଂଦାବ୍ଧିକଲ୍ଲୋଲକଣକୋଟ୍ୟଂଶଲେଶକମ୍ ।
ପିବଂତୀଂଦ୍ରାଦୟ ଇତି ଧ୍ୟାନମାଚମନଂ ମତମ୍ ॥ 13 ॥

ବ୍ରହ୍ମାନଂଦଜଲେନୈଵ ଲୋକାଃ ସର୍ଵେ ପରିପ୍ଲୁତାଃ ।
ଅଚ୍ଛେଦ୍ୟୋଽୟମିତି ଧ୍ୟାନମଭିଷେଚନମାତ୍ମନଃ ॥ 14 ॥

ନିରାଵରଣଚୈତନ୍ୟଂ ପ୍ରକାଶୋଽସ୍ମୀତି ଚିଂତନମ୍ ।
ଆତ୍ମଲିଂଗସ୍ୟ ସଦ୍ଵସ୍ତ୍ରମିତ୍ୟେଵଂ ଚିଂତୟେନ୍ମୁନିଃ ॥ 15 ॥

ତ୍ରିଗୁଣାତ୍ମାଶେଷଲୋକମାଲିକାସୂତ୍ରମସ୍ମ୍ୟହମ୍ ।
ଇତି ନିଶ୍ଚୟମେଵାତ୍ର ହ୍ୟୁପଵୀତଂ ପରଂ ମତମ୍ ॥ 16 ॥

ଅନେକଵାସନାମିଶ୍ରପ୍ରପଂଚୋଽୟଂ ଧୃତୋ ମୟା ।
ନାନ୍ୟେନେତ୍ୟନୁସଂଧାନମାତ୍ମନଶ୍ଚଂଦନଂ ଭଵେତ୍ ॥ 17 ॥

ରଜଃସତ୍ତ୍ଵତମୋଵୃତ୍ତିତ୍ୟାଗରୂପୈସ୍ତିଲାକ୍ଷତୈଃ ।
ଆତ୍ମଲିଂଗଂ ୟଜେନ୍ନିତ୍ୟଂ ଜୀଵନ୍ମୁକ୍ତିପ୍ରସିଦ୍ଧୟେ ॥ 18 ॥

ଈଶ୍ଵରୋ ଗୁରୁରାତ୍ମେତି ଭେଦତ୍ରୟଵିଵର୍ଜିତୈଃ ।
ବିଲ୍ଵପତ୍ରୈରଦ୍ଵିତୀୟୈରାତ୍ମଲିଂଗଂ ୟଜେଚ୍ଛିଵମ୍ ॥ 19 ॥

ସମସ୍ତଵାସନାତ୍ୟାଗଂ ଧୂପଂ ତସ୍ୟ ଵିଚିଂତୟେତ୍ ।
ଜ୍ୟୋତିର୍ମୟାତ୍ମଵିଜ୍ଞାନଂ ଦୀପଂ ସଂଦର୍ଶୟେଦ୍ବୁଧଃ ॥ 20 ॥

ନୈଵେଦ୍ୟମାତ୍ମଲିଂଗସ୍ୟ ବ୍ରହ୍ମାଂଡାଖ୍ୟଂ ମହୋଦନମ୍ ।
ପିବାନଂଦରସଂ ସ୍ଵାଦୁ ମୃତ୍ୟୁରସ୍ୟୋପସେଚନମ୍ ॥ 21 ॥

ଅଜ୍ଞାନୋଚ୍ଛିଷ୍ଟକରସ୍ୟ କ୍ଷାଲନଂ ଜ୍ଞାନଵାରିଣା ।
ଵିଶୁଦ୍ଧସ୍ୟାତ୍ମଲିଂଗସ୍ୟ ହସ୍ତପ୍ରକ୍ଷାଲନଂ ସ୍ମରେତ୍ ॥ 22 ॥

ରାଗାଦିଗୁଣଶୂନ୍ୟସ୍ୟ ଶିଵସ୍ୟ ପରମାତ୍ମନଃ ।
ସରାଗଵିଷୟାଭ୍ୟାସତ୍ୟାଗସ୍ତାଂବୂଲଚର୍ଵଣମ୍ ॥ 23 ॥

ଅଜ୍ଞାନଧ୍ଵାଂତଵିଧ୍ଵଂସପ୍ରଚଂଡମତିଭାସ୍କରମ୍ ।
ଆତ୍ମନୋ ବ୍ରହ୍ମତାଜ୍ଞାନଂ ନୀରାଜନମିହାତ୍ମନଃ ॥ 24 ॥

ଵିଵିଧବ୍ରହ୍ମସଂଦୃଷ୍ଟିର୍ମାଲିକାଭିରଲଂକୃତମ୍ ।
ପୂର୍ଣାନଂଦାତ୍ମତାଦୃଷ୍ଟିଂ ପୁଷ୍ପାଂଜଲିମନୁସ୍ମରେତ୍ ॥ 25 ॥

ପରିଭ୍ରମଂତି ବ୍ରହ୍ମାଂଡସହସ୍ରାଣି ମୟୀଶ୍ଵରେ ।
କୂଟସ୍ଥାଚଲରୂପୋଽହମିତି ଧ୍ୟାନଂ ପ୍ରଦକ୍ଷିଣମ୍ ॥ 26 ॥

ଵିଶ୍ଵଵଂଦ୍ୟୋଽହମେଵାସ୍ମି ନାସ୍ତି ଵଂଦ୍ୟୋ ମଦନ୍ୟତଃ ।
ଇତ୍ୟାଲୋଚନମେଵାତ୍ର ସ୍ଵାତ୍ମଲିଂଗସ୍ୟ ଵଂଦନମ୍ ॥ 27 ॥

ଆତ୍ମନଃ ସତ୍କ୍ରିୟା ପ୍ରୋକ୍ତା କର୍ତଵ୍ୟାଭାଵଭାଵନା ।
ନାମରୂପଵ୍ୟତୀତାତ୍ମଚିଂତନଂ ନାମକୀର୍ତନମ୍ ॥ 28 ॥

ଶ୍ରଵଣଂ ତସ୍ୟ ଦେଵସ୍ୟ ଶ୍ରୋତଵ୍ୟାଭାଵଚିଂତନମ୍ ।
ମନନଂ ତ୍ଵାତ୍ମଲିଂଗସ୍ୟ ମଂତଵ୍ୟାଭାଵଚିଂତନମ୍ ॥ 29 ॥

ଧ୍ୟାତଵ୍ୟାଭାଵଵିଜ୍ଞାନଂ ନିଦିଧ୍ୟାସନମାତ୍ମନଃ ।
ସମସ୍ତଭ୍ରାଂତିଵିକ୍ଷେପରାହିତ୍ୟେନାତ୍ମନିଷ୍ଠତା ॥ 30 ॥

ସମାଧିରାତ୍ମନୋ ନାମ ନାନ୍ୟଚ୍ଚିତ୍ତସ୍ୟ ଵିଭ୍ରମଃ ।
ତତ୍ରୈଵ ବହ୍ମଣି ସଦା ଚିତ୍ତଵିଶ୍ରାଂତିରିଷ୍ୟତେ ॥ 31 ॥

ଏଵଂ ଵେଦାଂତକଲ୍ପୋକ୍ତସ୍ଵାତ୍ମଲିଂଗପ୍ରପୂଜନମ୍ ।
କୁର୍ଵନ୍ନା ମରଣଂ ଵାପି କ୍ଷଣଂ ଵା ସୁସମାହିତଃ ॥ 32 ॥

ସର୍ଵଦୁର୍ଵାସନାଜାଲଂ ପଦପାଂସୁମିଵ ତ୍ୟଜେତ୍ ।
ଵିଧୂୟାଜ୍ଞାନଦୁଃଖୌଘଂ ମୋକ୍ଷାନଂଦଂ ସମଶ୍ନୁତେ ॥ 33 ॥