ମଣିଦ୍ଵୀପ ଵର୍ଣନ – 2 (ଦେଵୀ ଭାଗଵତମ୍)
(ଶ୍ରୀଦେଵୀଭାଗଵତଂ, ଦ୍ଵାଦଶ ସ୍କଂଧଂ, ଏକାଦଶୋଽଧ୍ୟାୟଃ, ମଣିଦ୍ଵୀପ ଵର୍ଣନ – 2)
ଵ୍ୟାସ ଉଵାଚ ।
ପୁଷ୍ପରାଗମୟାଦଗ୍ରେ କୁଂକୁମାରୁଣଵିଗ୍ରହଃ ।
ପଦ୍ମରାଗମୟଃ ସାଲୋ ମଧ୍ୟେ ଭୂଶ୍ଚୈଵତାଦୃଶୀ ॥ 1 ॥
ଦଶୟୋଜନଵାଂଦୈର୍ଘ୍ୟେ ଗୋପୁରଦ୍ଵାରସଂୟୁତଃ ।
ତନ୍ମଣିସ୍ତଂଭସଂୟୁକ୍ତା ମଂଡପାଃ ଶତଶୋ ନୃପ ॥ 2 ॥
ମଧ୍ୟେ ଭୁଵିସମାସୀନାଶ୍ଚତୁଃଷଷ୍ଟିମିତାଃ କଲାଃ ।
ନାନାୟୁଧଧରାଵୀରା ରତ୍ନଭୂଷଣଭୂଷିତାଃ ॥ 3 ॥
ପ୍ରତ୍ୟେକଲୋକସ୍ତାସାଂ ତୁ ତତ୍ତଲ୍ଲୋକସ୍ୟନାୟକାଃ ।
ସମଂତାତ୍ପଦ୍ମରାଗସ୍ୟ ପରିଵାର୍ୟସ୍ଥିତାଃ ସଦା ॥ 4 ॥
ସ୍ଵସ୍ଵଲୋକଜନୈର୍ଜୁଷ୍ଟାଃ ସ୍ଵସ୍ଵଵାହନହେତିଭିଃ ।
ତାସାଂ ନାମାନି ଵକ୍ଷ୍ୟାମି ଶୃଣୁ ତ୍ଵଂ ଜନମେଜୟ ॥ 5 ॥
ପିଂଗଳାକ୍ଷୀ ଵିଶାଲାକ୍ଷୀ ସମୃଦ୍ଧି ଵୃଦ୍ଧିରେଵ ଚ ।
ଶ୍ରଦ୍ଧା ସ୍ଵାହା ସ୍ଵଧାଭିଖ୍ୟା ମାୟା ସଂଜ୍ଞା ଵସୁଂଧରା ॥ 6 ॥
ତ୍ରିଲୋକଧାତ୍ରୀ ସାଵିତ୍ରୀ ଗାୟତ୍ରୀ ତ୍ରିଦଶେଶ୍ଵରୀ ।
ସୁରୂପା ବହୁରୂପା ଚ ସ୍କଂଦମାତାଽଚ୍ୟୁତପ୍ରିୟା ॥ 7 ॥
ଵିମଲା ଚାମଲା ତଦ୍ଵଦରୁଣୀ ପୁନରାରୁଣୀ ।
ପ୍ରକୃତିର୍ଵିକୃତିଃ ସୃଷ୍ଟିଃ ସ୍ଥିତିଃ ସଂହୃତିରେଵ ଚ ॥ 8 ॥
ସଂଧ୍ୟାମାତା ସତୀ ହଂସୀ ମର୍ଦିକା ଵଜ୍ରିକା ପରା ।
ଦେଵମାତା ଭଗଵତୀ ଦେଵକୀ କମଲାସନା ॥ 9 ॥
ତ୍ରିମୁଖୀ ସପ୍ତମୁଖ୍ୟନ୍ୟା ସୁରାସୁରଵିମର୍ଦିନୀ ।
ଲଂବୋଷ୍ଟୀ ଚୋର୍ଧ୍ଵକେଶୀ ଚ ବହୁଶୀର୍ଷା ଵୃକୋଦରୀ ॥ 10 ॥
ରଥରେଖାହ୍ଵୟା ପଶ୍ଚାଚ୍ଛଶିରେଖା ତଥା ପରା ।
ଗଗନଵେଗା ପଵନଵେଗା ଚୈଵ ତତଃ ପରମ୍ ॥ 11 ॥
ଅଗ୍ରେ ଭୁଵନପାଲା ସ୍ୟାତ୍ତତ୍ପଶ୍ଚାନ୍ମଦନାତୁରା ।
ଅନଂଗାନଂଗମଥନା ତଥୈଵାନଂଗମେଖଲା ॥ 12 ॥
ଅନଂଗକୁସୁମା ପଶ୍ଚାଦ୍ଵିଶ୍ଵରୂପା ସୁରାଦିକା ।
କ୍ଷୟଂକରୀ ଭଵେଚ୍ଛକ୍ତି ରକ୍ଷୋଭ୍ୟା ଚ ତତଃ ପରମ୍ ॥ 13 ॥
ସତ୍ୟଵାଦିନ୍ୟଥ ପ୍ରୋକ୍ତା ବହୁରୂପା ଶୁଚିଵ୍ରତା ।
ଉଦାରାଖ୍ୟା ଚ ଵାଗୀଶୀ ଚତୁଷ୍ଷଷ୍ଟିମିତାଃ ସ୍ମୃତାଃ ॥ 14 ॥
ଜ୍ଵଲଜ୍ଜିହ୍ଵାନନାଃ ସର୍ଵାଵମଂତ୍ୟୋ ଵହ୍ନିମୁଲ୍ବଣମ୍ ।
ଜଲଂ ପିବାମଃ ସକଲଂ ସଂହରାମୋଵିଭାଵସୁମ୍ ॥ 15 ॥
ପଵନଂ ସ୍ତଂଭୟାମୋଦ୍ୟ ଭକ୍ଷୟାମୋଽଖିଲଂ ଜଗତ୍ ।
ଇତି ଵାଚଂ ସଂଗିରତେ କ୍ରୋଧ ସଂରକ୍ତଲୋଚନାଃ ॥ 16 ॥
ଚାପବାଣଧରାଃ ସର୍ଵାୟୁଦ୍ଧାୟୈଵୋତ୍ସୁକାଃ ସଦା ।
ଦଂଷ୍ଟ୍ରା କଟକଟାରାଵୈର୍ବଧିରୀକୃତ ଦିଙ୍ମୁଖାଃ ॥ 17 ॥
ପିଂଗୋର୍ଧ୍ଵକେଶ୍ୟଃ ସଂପ୍ରୋକ୍ତାଶ୍ଚାପବାଣକରାଃ ସଦା ।
ଶତାକ୍ଷୌହିଣିକା ସେନାପ୍ୟେକୈକସ୍ୟାଃ ପ୍ରକୀର୍ତିତା ॥ 18 ॥
ଏକୈକ ଶକ୍ତେଃ ସାମର୍ଥ୍ୟଂ ଲକ୍ଷବ୍ରହ୍ମାଂଡନାଶନେ ।
ଶତାକ୍ଷୌହିଣିକାସେନା ତାଦୃଶୀ ନୃପ ସତ୍ତମ ॥ 19 ॥
କିଂ ନ କୁର୍ୟାଜ୍ଜଗତ୍ୟସ୍ମିନ୍ନଶକ୍ୟଂ ଵକ୍ତୁମେଵ ତତ୍ ।
ସର୍ଵାପି ୟୁଦ୍ଧସାମଗ୍ରୀ ତସ୍ମିନ୍ସାଲେ ସ୍ଥିତା ମୁନେ ॥ 20 ॥
ରଥାନାଂ ଗଣନା ନାସ୍ତି ହୟାନାଂ କରିଣାଂ ତଥା ॥
ଶସ୍ତ୍ରାଣାଂ ଗଣନା ତଦ୍ଵଦ୍ଗଣାନାଂ ଗଣନା ତଥା ॥ 21 ॥
ପଦ୍ମରାଗମୟାଦଗ୍ରେ ଗୋମେଦମଣିନିର୍ମିତଃ ।
ଦଶୟୋଜନଦୈର୍ଘ୍ୟେଣ ପ୍ରାକାରୋ ଵର୍ତତେ ମହାନ୍ ॥ 22 ॥
ଭାସ୍ଵଜ୍ଜପାପ୍ରସୂନାଭୋ ମଧ୍ୟଭୂସ୍ତସ୍ୟ ତାଦୃଶୀ ।
ଗୋମେଦକଲ୍ପିତାନ୍ୟେଵ ତଦ୍ଵାସି ସଦନାନି ଚ ॥ 23 ॥
ପକ୍ଷିଣଃ ସ୍ତଂଭଵର୍ୟାଶ୍ଚ ଵୃକ୍ଷାଵାପ୍ୟଃ ସରାଂସି ଚ ।
ଗୋମେଦକଲ୍ପିତା ଏଵ କୁଂକୁମାରୁଣଵିଗ୍ରହାଃ ॥ 24 ॥
ତନ୍ମଧ୍ୟସ୍ଥା ମହାଦେଵ୍ୟୋ ଦ୍ଵାତ୍ରିଂଶଚ୍ଛକ୍ତୟଃ ସ୍ମୃତାଃ ।
ନାନା ଶସ୍ତ୍ରପ୍ରହରଣା ଗୋମେଦମଣିଭୂଷିତାଃ ॥ 25 ॥
ପ୍ରତ୍ୟେକ ଲୋକ ଵାସିନ୍ୟଃ ପରିଵାର୍ୟ ସମଂତତଃ ।
ଗୋମେଦସାଲେ ସନ୍ନଦ୍ଧା ପିଶାଚଵଦନା ନୃପ ॥ 26 ॥
ସ୍ଵର୍ଲୋକଵାସିଭିର୍ନିତ୍ୟଂ ପୂଜିତାଶ୍ଚକ୍ରବାହଵଃ ।
କ୍ରୋଧରକ୍ତେକ୍ଷଣା ଭିଂଧି ପଚ ଚ୍ଛିଂଧି ଦହେତି ଚ ॥ 27 ॥
ଵଦଂତି ସତତଂ ଵାଚଂ ୟୁଦ୍ଧୋତ୍ସୁକହୃଦଂତରାଃ ।
ଏକୈକସ୍ୟା ମହାଶକ୍ତେର୍ଦଶାକ୍ଷୌହିଣିକା ମତା ॥ 28 ॥
ସେନା ତତ୍ରାପ୍ୟେକଶକ୍ତିର୍ଲକ୍ଷବ୍ରହ୍ମାଂଡନାଶିନୀ ।
ତାଦୃଶୀନାଂ ମହାସେନା ଵର୍ଣନୀୟା କଥଂ ନୃପ ॥ 29 ॥
ରଥାନାଂ ନୈଵ ଗଣାନା ଵାହନାନାଂ ତଥୈଵ ଚ ।
ସର୍ଵୟୁଦ୍ଧସମାରଂଭସ୍ତତ୍ର ଦେଵ୍ୟା ଵିରାଜତେ ॥ 30 ॥
ତାସାଂ ନାମାନି ଵକ୍ଷ୍ୟାମି ପାପନାଶକରାଣି ଚ ।
ଵିଦ୍ୟା ହ୍ରୀ ପୁଷ୍ଟ ୟଃ ପ୍ରଜ୍ଞା ସିନୀଵାଲୀ କୁହୂସ୍ତଥା ॥ 31 ॥
ରୁଦ୍ରାଵୀର୍ୟା ପ୍ରଭାନଂଦା ପୋଷିଣୀ ଋଦ୍ଧିଦା ଶୁଭା ।
କାଲରାତ୍ରିର୍ମହାରାତ୍ରିର୍ଭଦ୍ରକାଲୀ କପର୍ଦିନୀ ॥ 32 ॥
ଵିକୃତିର୍ଦଂଡିମୁଂଡିନ୍ୟୌ ସେଂଦୁଖଂଡା ଶିଖଂଡିନୀ ।
ନିଶୁଂଭଶୁଂଭମଥିନୀ ମହିଷାସୁରମର୍ଦିନୀ ॥ 33 ॥
ଇଂଦ୍ରାଣୀ ଚୈଵ ରୁଦ୍ରାଣୀ ଶଂକରାର୍ଧଶରୀରିଣୀ ।
ନାରୀ ନାରାୟଣୀ ଚୈଵ ତ୍ରିଶୂଲିନ୍ୟପି ପାଲିନୀ ॥ 34 ॥
ଅଂବିକାହ୍ଲାଦିନୀ ପଶ୍ଚାଦିତ୍ୟେଵଂ ଶକ୍ତୟଃ ସ୍ମୃତାଃ ।
ୟଦ୍ୟେତାଃ କୁପିତା ଦେଵ୍ୟସ୍ତଦା ବ୍ରହ୍ମାଂଡନାଶନମ୍ ॥ 35 ॥
ପରାଜୟୋ ନ ଚୈତାସାଂ କଦାଚିତ୍କ୍ଵଚିଦସ୍ତି ହି ।
ଗୋମେଦକମୟାଦଗ୍ରେ ସଦ୍ଵଜ୍ରମଣିନିର୍ମିତଃ ॥ 36 ॥
ଦଶୟୋଜନ ତୁଂଗୋଽସୌ ଗୋପୁରଦ୍ଵାରସଂୟୁତଃ ।
କପାଟଶୃଂଖଲାବଦ୍ଧୋ ନଵଵୃକ୍ଷ ସମୁଜ୍ଜ୍ଵଲଃ ॥ 37 ॥
ସାଲସ୍ତନ୍ମଧ୍ୟଭୂମ୍ୟାଦି ସର୍ଵଂ ହୀରମୟଂ ସ୍ମୃତମ୍ ।
ଗୃହାଣିଵୀଥୟୋ ରଥ୍ୟା ମହାମାର୍ଗାଂ ଗଣାନି ଚ ॥ 38 ॥
ଵୃକ୍ଷାଲଵାଲ ତରଵଃ ସାରଂଗା ଅପି ତାଦୃଶାଃ ।
ଦୀର୍ଘିକାଶ୍ରେଣୟୋଵାପ୍ୟସ୍ତଡାଗାଃ କୂପ ସଂୟୁତାଃ ॥ 39 ॥
ତତ୍ର ଶ୍ରୀଭୁଵନେଶ୍ଵର୍ୟା ଵସଂତି ପରିଚାରିକାଃ ।
ଏକୈକା ଲକ୍ଷଦାସୀଭିଃ ସେଵିତା ମଦଗର୍ଵିତାଃ ॥ 40 ॥
ତାଲଵୃଂତଧରାଃ କାଶ୍ଚିଚ୍ଚଷକାଢ୍ୟ କରାଂବୁଜାଃ ।
କାଶ୍ଚିତ୍ତାଂବୂଲପାତ୍ରାଣି ଧାରୟଂତ୍ୟୋଽତିଗର୍ଵିତାଃ ॥ 41 ॥
କାଶ୍ଚିତ୍ତଚ୍ଛତ୍ରଧାରିଣ୍ୟଶ୍ଚାମରାଣାଂ ଵିଧାରିକାଃ ।
ନାନା ଵସ୍ତ୍ରଧରାଃ କାଶ୍ଚିତ୍କାଶ୍ଚିତ୍ପୁଷ୍ପ କରାଂବୁଜାଃ ॥ 42 ॥
ନାନାଦର୍ଶକରାଃ କାଶ୍ଚିତ୍କାଶ୍ଚିତ୍କୁଂକୁମଲେପନମ୍ ।
ଧାରୟଂତ୍ୟଃ କଜ୍ଜଲଂ ଚ ସିଂଦୂର ଚଷକଂ ପରାଃ ॥ 43 ॥
କାଶ୍ଚିଚ୍ଚିତ୍ରକ ନିର୍ମାତ୍ର୍ୟଃ ପାଦ ସଂଵାହନେ ରତାଃ ।
କାଶ୍ଚିତ୍ତୁ ଭୂଷାକାରିଣ୍ୟୋ ନାନା ଭୂଷାଧରାଃ ପରାଃ ॥ 44 ॥
ପୁଷ୍ପଭୂଷଣ ନିର୍ମାତ୍ର୍ୟଃ ପୁଷ୍ପଶୃଂଗାରକାରିକାଃ ।
ନାନା ଵିଲାସଚତୁରା ବହ୍ଵ୍ୟ ଏଵଂ ଵିଧାଃ ପରାଃ ॥ 45 ॥
ନିବଦ୍ଧ ପରିଧାନୀୟା ୟୁଵତ୍ୟଃ ସକଲା ଅପି ।
ଦେଵୀ କୃପା ଲେଶଵଶାତ୍ତୁଚ୍ଛୀକୃତ ଜଗତ୍ତ୍ରୟାଃ ॥ 46 ॥
ଏତା ଦୂତ୍ୟଃ ସ୍ମୃତା ଦେଵ୍ୟଃ ଶୃଂଗାରମଦଗର୍ଵିତାଃ ।
ତାସାଂ ନାମାନି ଵକ୍ଷ୍ୟାମି ଶୃଣୁ ମେ ନୃପସତ୍ତମ ॥ 47 ॥
ଅନଂଗରୂପା ପ୍ରଥମାପ୍ୟନଂଗମଦନା ପରା ।
ତୃତୀୟାତୁ ତତଃ ପ୍ରୋକ୍ତା ସୁଂଦରୀ ମଦନାତୁରା ॥ 48 ॥
ତତୋ ଭୁଵନଵେଗାସ୍ୟାତ୍ତଥା ଭୁଵନପାଲିକା ।
ସ୍ୟାତ୍ସର୍ଵଶିଶିରାନଂଗଵେଦନାନଂଗମେଖଲା ॥ 49 ॥
ଵିଦ୍ୟୁଦ୍ଦାମସମାନାଂଗ୍ୟଃ କ୍ଵଣତ୍କାଂଚୀଗୁଣାନ୍ଵିତାଃ ।
ରଣନ୍ମଂଜୀରଚରଣା ବହିରଂତରିତସ୍ତତଃ ॥ 50 ॥
ଧାଵମାନାସ୍ତୁ ଶୋଭଂତେ ସର୍ଵା ଵିଦ୍ୟୁଲ୍ଲତୋପମାଃ ।
କୁଶଲାଃ ସର୍ଵକାର୍ୟେଷୁ ଵେତ୍ରହସ୍ତାଃ ସମଂତତଃ ॥ 51 ॥
ଅଷ୍ଟଦିକ୍ଷୁତଥୈତାସାଂ ପ୍ରାକାରାଦ୍ବହିରେଵ ଚ ।
ସଦନାନି ଵିରାଜଂତେ ନାନା ଵାହନହେତିଭିଃ ॥ 52 ॥
ଵଜ୍ରସାଲାଦଗ୍ରଭାଗେ ସାଲୋ ଵୈଦୂର୍ୟନିର୍ମିତଃ ।
ଦଶୟୋଜନତୁଂଗୋଽସୌ ଗୋପୁରଦ୍ଵାରଭୂଷିତଃ ॥ 53 ॥
ଵୈଦୂର୍ୟଭୂମିଃ ସର୍ଵାପିଗୃହାଣି ଵିଵିଧାନି ଚ ।
ଵୀଥ୍ୟୋ ରଥ୍ୟା ମହାମାର୍ଗାଃ ସର୍ଵେ ଵେଦୂର୍ୟନିର୍ମିତାଃ ॥ 54 ॥
ଵାପୀ କୂପ ତଡାଗାଶ୍ଚ ସ୍ରଵଂତୀନାଂ ତଟାନି ଚ ।
ଵାଲୁକା ଚୈଵ ସର୍ଵାଽପି ଵୈଦୂର୍ୟମଣିନିର୍ମିତା ॥ 55 ॥
ତତ୍ରାଷ୍ଟଦିକ୍ଷୁପରିତୋ ବ୍ରାହ୍ମ୍ୟାଦୀନାଂ ଚ ମଂଡଲମ୍ ।
ନିଜୈର୍ଗଣୈଃ ପରିଵୃତଂ ଭ୍ରାଜତେ ନୃପସତ୍ତମ ॥ 56 ॥
ପ୍ରତିବ୍ରହ୍ମାଂଡମାତୃଣାଂ ତାଃ ସମଷ୍ଟୟ ଈରିତାଃ ।
ବ୍ରାହ୍ମୀ ମାହେଶ୍ଵରୀ ଚୈଵ କୌମାରୀ ଵୈଷ୍ଣଵୀ ତଥା ॥57 ॥
ଵାରାହୀ ଚ ତଥେଂଦ୍ରାଣୀ ଚାମୁଂଡାଃ ସପ୍ତମାତରଃ ।
ଅଷ୍ଟମୀ ତୁ ମହାଲକ୍ଷ୍ମୀର୍ନାମ୍ନା ପ୍ରୋକ୍ତାସ୍ତୁ ମାତରଃ ॥ 58 ॥
ବ୍ରହ୍ମରୁଦ୍ରାଦିଦେଵାନାଂ ସମାକାରା ସ୍ତୁତାଃ ସ୍ମୃତାଃ ।
ଜଗତ୍କଳ୍ୟାଣକାରିଣ୍ୟଃ ସ୍ଵସ୍ଵସେନାସମାଵୃତାଃ ॥ 59 ॥
ତତ୍ସାଲସ୍ୟ ଚତୁର୍ଦ୍ଵାର୍ଷୁ ଵାହନାନି ମହେଶିତୁଃ ।
ସଜ୍ଜାନି ନୃପତେ ସଂତି ସାଲଂକାରାଣି ନିତ୍ୟଶଃ ॥ 60 ॥
ଦଂତିନଃ କୋଟିଶୋ ଵାହାଃ କୋଟିଶଃ ଶିବିକାସ୍ତଥା ।
ହଂସାଃ ସିଂହାଶ୍ଚ ଗରୁଡା ମୟୂରା ଵୃଷଭାସ୍ତଥା ॥ 61 ॥
ତୈର୍ୟୁକ୍ତାଃ ସ୍ୟଂଦନାସ୍ତଦ୍ଵତ୍କୋଟିଶୋ ନୃପନଂଦନ ।
ପାର୍ଷ୍ଣିଗ୍ରାହସମାୟୁକ୍ତା ଧ୍ଵଜୈରାକାଶଚୁଂବିନଃ ॥ 62 ॥
କୋଟିଶସ୍ତୁ ଵିମାନାନି ନାନା ଚିହ୍ନାନ୍ଵିତାନି ଚ ।
ନାନା ଵାଦିତ୍ରୟୁକ୍ତାନି ମହାଧ୍ଵଜୟୁତାନି ଚ ॥ 63 ॥
ଵୈଦୂର୍ୟମଣି ସାଲସ୍ୟାପ୍ୟଗ୍ରେ ସାଲଃ ପରଃ ସ୍ମୃତଃ ।
ଦଶୟୋଜନ ତୁଂଗୋଽସାଵିଂଦ୍ରନୀଲାଶ୍ମନିର୍ମିତଃ ॥ 64 ॥
ତନ୍ମଧ୍ୟ ଭୂସ୍ତଥା ଵୀଥ୍ୟୋ ମହାମାର୍ଗା ଗୃହାଣି ଚ ।
ଵାପୀ କୂପ ତଡାଗାଶ୍ଚ ସର୍ଵେ ତନ୍ମଣିନିର୍ମିତାଃ ॥ 65 ॥
ତତ୍ର ପଦ୍ମ ତୁ ସଂପ୍ରୋକ୍ତଂ ବହୁୟୋଜନ ଵିସ୍ତୃତମ୍ ।
ଷୋଡଶାରଂ ଦୀପ୍ୟମାନଂ ସୁଦର୍ଶନମିଵାପରମ୍ ॥ 66 ॥
ତତ୍ର ଷୋଡଶଶକ୍ତୀନାଂ ସ୍ଥାନାନି ଵିଵିଧାନି ଚ ।
ସର୍ଵୋପସ୍କରୟୁକ୍ତାନି ସମୃଦ୍ଧାନି ଵସଂତି ହି ॥ 67 ॥
ତାସାଂ ନାମାନି ଵକ୍ଷ୍ୟାମି ଶୃଣୁ ମେ ନୃପସତ୍ତମ ।
କରାଳୀ ଵିକରାଳୀ ଚ ତଥୋମା ଚ ସରସ୍ଵତୀ ॥ 68 ॥
ଶ୍ରୀ ଦୁର୍ଗୋଷା ତଥା ଲକ୍ଷ୍ମୀଃ ଶ୍ରୁତିଶ୍ଚୈଵ ସ୍ମୃତିର୍ଧୃତିଃ ।
ଶ୍ରଦ୍ଧା ମେଧା ମତିଃ କାଂତିରାର୍ୟା ଷୋଡଶଶକ୍ତୟଃ ॥ 69 ॥
ନୀଲଜୀମୂତସଂକାଶାଃ କରଵାଲ କରାଂବୁଜାଃ ।
ସମାଃ ଖେଟକଧାରିଣ୍ୟୋ ୟୁଦ୍ଧୋପକ୍ରାଂତ ମାନସାଃ ॥ 70 ॥
ସେନାନ୍ୟଃ ସକଲା ଏତାଃ ଶ୍ରୀଦେଵ୍ୟା ଜଗଦୀଶିତୁଃ ।
ପ୍ରତିବ୍ରହ୍ମାଂଡସଂସ୍ଥାନାଂ ଶକ୍ତୀନାଂ ନାୟିକାଃ ସ୍ମୃତାଃ ॥ 71 ॥
ବ୍ରହ୍ମାଂଡକ୍ଷୋଭକାରିଣ୍ୟୋ ଦେଵୀ ଶକ୍ତ୍ୟୁପବୃଂହିତାଃ ।
ନାନା ରଥସମାରୂଢା ନାନା ଶକ୍ତିଭିରନ୍ଵିତାଃ ॥ 72 ॥
ଏତତ୍ପରାକ୍ରମଂ ଵକ୍ତୁଂ ସହସ୍ରାସ୍ୟୋଽପି ନ କ୍ଷମଃ ।
ଇଂଦ୍ରନୀଲମହାସାଲାଦଗ୍ରେ ତୁ ବହୁଵିସ୍ତୃତଃ ॥ 73 ॥
ମୁକ୍ତାପ୍ରାକାର ଉଦିତୋ ଦଶୟୋଜନ ଦୈର୍ଘ୍ୟଵାନ୍ ।
ମଧ୍ୟଭୂଃ ପୂର୍ଵଵତ୍ପ୍ରୋକ୍ତା ତନ୍ମଧ୍ୟେଽଷ୍ଟଦଳାଂବୁଜମ୍ ॥ 74 ॥
ମୁକ୍ତାମଣିଗଣାକୀର୍ଣଂ ଵିସ୍ତୃତଂ ତୁ ସକେସରମ୍ ।
ତତ୍ର ଦେଵୀସମାକାରା ଦେଵ୍ୟାୟୁଧଧରାଃ ସଦା ॥ 75 ॥
ସଂପ୍ରୋକ୍ତା ଅଷ୍ଟମଂତ୍ରିଣ୍ୟୋ ଜଗଦ୍ଵାର୍ତାପ୍ରବୋଧିକାଃ ।
ଦେଵୀସମାନଭୋଗାସ୍ତା ଇଂଗିତଜ୍ଞାସ୍ତୁପଂଡିତାଃ ॥ 76 ॥
କୁଶଲାଃ ସର୍ଵକାର୍ୟେଷୁ ସ୍ଵାମିକାର୍ୟପରାୟଣାଃ ।
ଦେଵ୍ୟଭିପ୍ରାୟ ବୋଧ୍ୟସ୍ତାଶ୍ଚତୁରା ଅତିସୁଂଦରାଃ ॥ 77 ॥
ନାନା ଶକ୍ତିସମାୟୁକ୍ତାଃ ପ୍ରତିବ୍ରହ୍ମାଂଡଵର୍ତିନାମ୍ ।
ପ୍ରାଣିନାଂ ତାଃ ସମାଚାରଂ ଜ୍ଞାନଶକ୍ତ୍ୟାଵିଦଂତି ଚ ॥ 78 ॥
ତାସାଂ ନାମାନି ଵକ୍ଷ୍ୟାମି ମତ୍ତଃ ଶୃଣୁ ନୃପୋତ୍ତମ ।
ଅନଂଗକୁସୁମା ପ୍ରୋକ୍ତାପ୍ୟନଂଗକୁସୁମାତୁରା ॥ 79 ॥
ଅନଂଗମଦନା ତଦ୍ଵଦନଂଗମଦନାତୁରା ।
ଭୁଵନପାଲା ଗଗନଵେଗା ଚୈଵ ତତଃ ପରମ୍ ॥ 80 ॥
ଶଶିରେଖା ଚ ଗଗନରେଖା ଚୈଵ ତତଃ ପରମ୍ ।
ପାଶାଂକୁଶଵରାଭୀତିଧରା ଅରୁଣଵିଗ୍ରହାଃ ॥ 81 ॥
ଵିଶ୍ଵସଂବଂଧିନୀଂ ଵାର୍ତାଂ ବୋଧୟଂତି ପ୍ରତିକ୍ଷଣମ୍ ।
ମୁକ୍ତାସାଲାଦଗ୍ରଭାଗେ ମହାମାରକତୋ ପରଃ ॥ 82 ॥
ସାଲୋତ୍ତମଃ ସମୁଦ୍ଦିଷ୍ଟୋ ଦଶୟୋଜନ ଦୈର୍ଘ୍ୟଵାନ୍ ।
ନାନା ସୌଭାଗ୍ୟସଂୟୁକ୍ତୋ ନାନା ଭୋଗସମନ୍ଵିତଃ ॥ 83 ॥
ମଧ୍ୟଭୂସ୍ତାଦୃଶୀ ପ୍ରୋକ୍ତା ସଦନାନି ତଥୈଵ ଚ ।
ଷଟ୍କୋଣମତ୍ରଵିସ୍ତୀର୍ଣଂ କୋଣସ୍ଥା ଦେଵତାଃ ଶୃଣୁଃ ॥ 84 ॥
ପୂର୍ଵକୋଣେ ଚତୁର୍ଵକ୍ତ୍ରୋ ଗାୟତ୍ରୀ ସହିତୋ ଵିଧିଃ ।
କୁଂଡିକାକ୍ଷଗୁଣାଭୀତି ଦଂଡାୟୁଧଧରଃ ପରଃ ॥ 85 ॥
ତଦାୟୁଧଧରା ଦେଵୀ ଗାୟତ୍ରୀ ପରଦେଵତା ।
ଵେଦାଃ ସର୍ଵେ ମୂର୍ତିମଂତଃ ଶାସ୍ତ୍ରାଣି ଵିଵିଧାନି ଚ ॥ 86 ॥
ସ୍ମୃତୟଶ୍ଚ ପୁରାଣାନି ମୂର୍ତିମଂତି ଵସଂତି ହି ।
ୟେ ବ୍ରହ୍ମଵିଗ୍ରହାଃ ସଂତି ଗାୟତ୍ରୀଵିଗ୍ରହାଶ୍ଚ ୟେ ॥ 87 ॥
ଵ୍ୟାହୃତୀନାଂ ଵିଗ୍ରହାଶ୍ଚ ତେ ନିତ୍ୟଂ ତତ୍ର ସଂତି ହି ।
ରକ୍ଷଃ କୋଣେ ଶଂଖଚକ୍ରଗଦାଂବୁଜ କରାଂବୁଜା ॥ 88 ॥
ସାଵିତ୍ରୀ ଵର୍ତତେ ତତ୍ର ମହାଵିଷ୍ଣୁଶ୍ଚ ତାଦୃଶଃ ।
ୟେ ଵିଷ୍ଣୁଵିଗ୍ରହାଃ ସଂତି ମତ୍ସ୍ୟକୂର୍ମାଦୟୋଖିଲାଃ ॥ 89 ॥
ସାଵିତ୍ରୀ ଵିଗ୍ରହା ୟେ ଚ ତେ ସର୍ଵେ ତତ୍ର ସଂତି ହି ।
ଵାୟୁକୋଣେ ପରଶ୍ଵକ୍ଷମାଲାଭୟଵରାନ୍ଵିତଃ ॥ 90 ॥
ମହାରୁଦ୍ରୋ ଵର୍ତତେଽତ୍ର ସରସ୍ଵତ୍ୟପି ତାଦୃଶୀ ।
ୟେ ୟେ ତୁ ରୁଦ୍ରଭେଦାଃ ସ୍ୟୁର୍ଦକ୍ଷିଣାସ୍ୟାଦୟୋ ନୃପ ॥ 91 ॥
ଗୌରୀ ଭେଦାଶ୍ଚ ୟେ ସର୍ଵେ ତେ ତତ୍ର ନିଵସଂତି ହି ।
ଚତୁଃଷଷ୍ଟ୍ୟାଗମା ୟେ ଚ ୟେ ଚାନ୍ୟେପ୍ୟାଗମାଃ ସ୍ମୃତାଃ ॥ 92 ॥
ତେ ସର୍ଵେ ମୂର୍ତିମଂତଶ୍ଚ ତତ୍ର ଵୈ ନିଵସଂତି ହି ।
ଅଗ୍ନିକୋଣେ ରତ୍ନକୁଂଭଂ ତଥା ମଣିକରଂଡକମ୍ ॥ 93 ॥
ଦଧାନୋ ନିଜହସ୍ତାଭ୍ୟାଂ କୁବେରୋ ଧନଦାୟକଃ ।
ନାନା ଵୀଥୀ ସମାୟୁକ୍ତୋ ମହାଲକ୍ଷ୍ମୀସମନ୍ଵିତଃ ॥ 94 ॥
ଦେଵ୍ୟା ନିଧିପତିସ୍ତ୍ଵାସ୍ତେ ସ୍ଵଗୁଣୈଃ ପରିଵେଷ୍ଟିତଃ ।
ଵାରୁଣେ ତୁ ମହାକୋଣେ ମଦନୋ ରତିସଂୟୁତଃ ॥ 95 ॥
ପାଶାଂକୁଶଧନୁର୍ବାଣଧରୋ ନିତ୍ୟଂ ଵିରାଜତେ ।
ଶୃଂଗାରମୂର୍ତିମଂତସ୍ତୁ ତତ୍ର ସନ୍ନିହିତାଃ ସଦା ॥ 96 ॥
ଈଶାନକୋଣେ ଵିଘ୍ନେଶୋ ନିତ୍ୟଂ ପୁଷ୍ଟିସମନ୍ଵିତଃ ।
ପାଶାଂକୁଶଧରୋ ଵୀରୋ ଵିଘ୍ନହର୍ତା ଵିରାଜତେ ॥ 97 ॥
ଵିଭୂତୟୋ ଗଣେଶସ୍ୟ ୟାୟାଃ ସଂତି ନୃପୋତ୍ତମ ।
ତାଃ ସର୍ଵା ନିଵସଂତ୍ୟତ୍ର ମହୈଶ୍ଵର୍ୟସମନ୍ଵିତାଃ ॥ 98 ॥
ପ୍ରତିବ୍ରହ୍ମାଂଡସଂସ୍ଥାନାଂ ବ୍ରହ୍ମାଦୀନାଂ ସମଷ୍ଟୟଃ ।
ଏତେ ବ୍ରହ୍ମାଦୟଃ ପ୍ରୋକ୍ତାଃ ସେଵଂତେ ଜଗଦୀଶ୍ଵରୀମ୍ ॥ 99 ॥
ମହାମାରକତସ୍ୟାଗ୍ରେ ଶତୟୋଜନ ଦୈର୍ଘ୍ୟଵାନ୍ ।
ପ୍ରଵାଲଶାଲୋସ୍ତ୍ୟପରଃ କୁଂକୁମାରୁଣଵିଗ୍ରହଃ ॥ 100 ॥
ମଧ୍ୟଭୂସ୍ତାଦୃଶୀ ପ୍ରୋକ୍ତା ସଦନାନି ଚ ପୂର୍ଵଵତ୍ ।
ତନ୍ମଧ୍ୟେ ପଂଚଭୂତାନାଂ ସ୍ଵାମିନ୍ୟଃ ପଂଚ ସଂତି ଚ ॥ 101 ॥
ହୃଲ୍ଲେଖା ଗଗନା ରକ୍ତା ଚତୁର୍ଥୀ ତୁ କରାଳିକା ।
ମହୋଚ୍ଛୁଷ୍ମା ପଂଚମୀ ଚ ପଂଚଭୂତସମପ୍ରଭାଃ ॥ 102 ॥
ପାଶାଂକୁଶଵରାଭୀତିଧାରିଣ୍ୟୋମିତଭୂଷଣାଃ ।
ଦେଵୀ ସମାନଵେଷାଢ୍ୟା ନଵୟୌଵନଗର୍ଵିତାଃ ॥ 103 ॥
ପ୍ରଵାଲଶାଲାଦଗ୍ରେ ତୁ ନଵରତ୍ନ ଵିନିର୍ମିତଃ ।
ବହୁୟୋଜନଵିସ୍ତୀର୍ଣୋ ମହାଶାଲୋଽସ୍ତି ଭୂମିପ ॥ 104 ॥
ତତ୍ର ଚାମ୍ନାୟଦେଵୀନାଂ ସଦନାନି ବହୂନ୍ୟପି ।
ନଵରତ୍ନମୟାନ୍ୟେଵ ତଡାଗାଶ୍ଚ ସରାଂସି ଚ ॥ 105 ॥
ଶ୍ରୀଦେଵ୍ୟା ୟେଽଵତାରାଃ ସ୍ୟୁସ୍ତେ ତତ୍ର ନିଵସଂତି ହି ।
ମହାଵିଦ୍ୟା ମହାଭେଦାଃ ସଂତି ତତ୍ରୈଵ ଭୂମିପ ॥ 106 ॥
ନିଜାଵରଣଦେଵୀଭିର୍ନିଜଭୂଷଣଵାହନୈଃ ।
ସର୍ଵଦେଵ୍ୟୋ ଵିରାଜଂତେ କୋଟିସୂର୍ୟସମପ୍ରଭାଃ ॥ 107 ॥
ସପ୍ତକୋଟି ମହାମଂତ୍ରଦେଵତାଃ ସଂତି ତତ୍ର ହି ।
ନଵରତ୍ନମୟାଦଗ୍ରେ ଚିଂତାମଣିଗୃହଂ ମହତ୍ ॥ 108 ॥
ତତ୍ର ତ୍ୟଂ ଵସ୍ତୁ ମାତ୍ରଂ ତୁ ଚିଂତାମଣି ଵିନିର୍ମିତମ୍ ।
ସୂର୍ୟୋଦ୍ଗାରୋପଲୈସ୍ତଦ୍ଵଚ୍ଚଂଦ୍ରୋଦ୍ଗାରୋପଲୈସ୍ତଥା ॥ 109 ॥
ଵିଦ୍ୟୁତ୍ପ୍ରଭୋପଲୈଃ ସ୍ତଂଭାଃ କଲ୍ପିତାସ୍ତୁ ସହସ୍ରଶଃ ।
ୟେଷାଂ ପ୍ରଭାଭିରଂତସ୍ଥଂ ଵସ୍ତୁ କିଂଚିନ୍ନ ଦୃଶ୍ୟତେ ॥ 110 ॥
ଇତି ଶ୍ରୀଦେଵୀଭାଗଵତେ ମହାପୁରାଣେ ଦ୍ଵାଦଶସ୍କଂଧେ ଏକାଦଶୋଽଧ୍ୟାୟଃ ।
ବାରମ୍ବାର ପଚରାଯାଉଥିବା ପ୍ରଶ୍ନ
What is ମଣିଦ୍ଵୀପ ଵର୍ଣନ - 2 (ଦେଵୀ ଭାଗଵତମ୍)?
ମଣିଦ୍ଵୀପ ଵର୍ଣନ - 2 (ଦେଵୀ ଭାଗଵତମ୍) is a Devi Stotrams available on Bhakti Granth in the selected language or script.
Which language or script is this version in?
This edition is published in Odia. Use the language selector to view another available edition.
Can I read ମଣିଦ୍ଵୀପ ଵର୍ଣନ - 2 (ଦେଵୀ ଭାଗଵତମ୍) online?
Yes. The imported text is available directly on this page for online reading and recitation.
Can I download ମଣିଦ୍ଵୀପ ଵର୍ଣନ - 2 (ଦେଵୀ ଭାଗଵତମ୍) as a PDF?
If a verified PDF resource was found on the source page, a PDF download button is automatically connected to this page.
How can I share this page?
Use Copy Link, WhatsApp or Facebook in the sticky sharing bar provided by the Bhakti Granth theme.
Are there related devotional texts on Bhakti Granth?
Yes. The Bhakti Granth theme automatically connects texts through language and topic relationships to strengthen navigation and topical coverage.