ମଣିଦ୍ଵୀପ ଵର୍ଣନ – 1 (ଦେଵୀ ଭାଗଵତମ୍)
(ଶ୍ରୀଦେଵୀଭାଗଵତଂ, ଦ୍ଵାଦଶ ସ୍କଂଧଂ, ଦଶମୋଽଧ୍ୟାୟଃ, , ମଣିଦ୍ଵୀପ ଵର୍ଣନ – 1)
ଵ୍ୟାସ ଉଵାଚ –
ବ୍ରହ୍ମଲୋକାଦୂର୍ଧ୍ଵଭାଗେ ସର୍ଵଲୋକୋଽସ୍ତି ୟଃ ଶ୍ରୁତଃ ।
ମଣିଦ୍ଵୀପଃ ସ ଏଵାସ୍ତି ୟତ୍ର ଦେଵୀ ଵିରାଜତେ ॥ 1 ॥
ସର୍ଵସ୍ମାଦଧିକୋ ୟସ୍ମାତ୍ସର୍ଵଲୋକସ୍ତତଃ ସ୍ମୃତଃ ।
ପୁରା ପରାଂବୟୈଵାୟଂ କଲ୍ପିତୋ ମନସେଚ୍ଛୟା ॥ 2 ॥
ସର୍ଵାଦୌ ନିଜଵାସାର୍ଥଂ ପ୍ରକୃତ୍ୟା ମୂଲଭୂତୟା ।
କୈଲାସାଦଧିକୋ ଲୋକୋ ଵୈକୁଂଠାଦପି ଚୋତ୍ତମଃ ॥ 3 ॥
ଗୋଲୋକାଦପି ସର୍ଵସ୍ମାତ୍ସର୍ଵଲୋକୋଽଧିକଃ ସ୍ମୃତଃ ।
ନୈତତ୍ସମଂ ତ୍ରିଲୋକ୍ୟାଂ ତୁ ସୁଂଦରଂ ଵିଦ୍ୟତେ କ୍ଵଚିତ୍ ॥ 4 ॥
ଛତ୍ରୀଭୂତଂ ତ୍ରିଜଗତୋ ଭଵସଂତାପନାଶକମ୍ ।
ଛାୟାଭୂତଂ ତଦେଵାସ୍ତି ବ୍ରହ୍ମାଂଡାନାଂ ତୁ ସତ୍ତମ ॥ 5 ॥
ବହୁୟୋଜନଵିସ୍ତୀର୍ଣୋ ଗଂଭୀରସ୍ତାଵଦେଵ ହି ।
ମଣିଦ୍ଵୀପସ୍ୟ ପରିତୋ ଵର୍ତତେ ତୁ ସୁଧୋଦଧିଃ ॥ 6 ॥
ମରୁତ୍ସଂଘଟ୍ଟନୋତ୍କୀର୍ଣତରଂଗ ଶତସଂକୁଲଃ ।
ରତ୍ନାଚ୍ଛଵାଲୁକାୟୁକ୍ତୋ ଝଷଶଂଖସମାକୁଲଃ ॥ 7 ॥
ଵୀଚିସଂଘର୍ଷସଂଜାତଲହରୀକଣଶୀତଲଃ ।
ନାନାଧ୍ଵଜସମାୟୁକ୍ତା ନାନାପୋତଗତାଗତୈଃ ॥ 8 ॥
ଵିରାଜମାନଃ ପରିତସ୍ତୀରରତ୍ନଦ୍ରୁମୋ ମହାନ୍ ।
ତଦୁତ୍ତରମୟୋଧାତୁନିର୍ମିତୋ ଗଗନେ ତତଃ ॥ 9 ॥
ସପ୍ତୟୋଜନଵିସ୍ତୀର୍ଣଃ ପ୍ରାକାରୋ ଵର୍ତତେ ମହାନ୍ ।
ନାନାଶସ୍ତ୍ରପ୍ରହରଣା ନାନାୟୁଦ୍ଧଵିଶାରଦାଃ ॥ 10 ॥
ରକ୍ଷକା ନିଵସଂତ୍ୟତ୍ର ମୋଦମାନାଃ ସମଂତତଃ ।
ଚତୁର୍ଦ୍ଵାରସମାୟୁକ୍ତୋ ଦ୍ଵାରପାଲଶତାନ୍ଵିତଃ ॥ 11 ॥
ନାନାଗଣୈଃ ପରିଵୃତୋ ଦେଵୀଭକ୍ତିୟୁତୈର୍ନୃପ ।
ଦର୍ଶନାର୍ଥଂ ସମାୟାଂତି ୟେ ଦେଵା ଜଗଦୀଶିତୁଃ ॥ 12 ॥
ତେଷାଂ ଗଣା ଵସଂତ୍ୟତ୍ର ଵାହନାନି ଚ ତତ୍ର ହି ।
ଵିମାନଶତସଂଘର୍ଷଘଂଟାସ୍ଵନସମାକୁଲଃ ॥ 13 ॥
ହୟହେଷାଖୁରାଘାତବଧିରୀକୃତଦିଂମୁଖଃ ।
ଗଣୈଃ କିଲକିଲାରାଵୈର୍ଵେତ୍ରହସ୍ତୈଶ୍ଚ ତାଡିତାଃ ॥ 14 ॥
ସେଵକା ଦେଵସଂଗାନାଂ ଭ୍ରାଜଂତେ ତତ୍ର ଭୂମିପ ।
ତସ୍ମିଂକୋଲାହଲେ ରାଜନ୍ନଶବ୍ଦଃ କେନଚିତ୍କ୍ଵଚିତ୍ ॥ 15 ॥
କସ୍ୟଚିଚ୍ଛ୍ରୂୟତେଽତ୍ୟଂତଂ ନାନାଧ୍ଵନିସମାକୁଲେ ।
ପଦେ ପଦେ ମିଷ୍ଟଵାରିପରିପୂର୍ଣସରାନ୍ସି ଚ ॥ 16 ॥
ଵାଟିକା ଵିଵିଧା ରାଜନ୍ ରତ୍ନଦ୍ରୁମଵିରାଜିତାଃ ।
ତଦୁତ୍ତରଂ ମହାସାରଧାତୁନିର୍ମିତମଂଡଲଃ ॥ 17 ॥
ସାଲୋଽପରୋ ମହାନସ୍ତି ଗଗନସ୍ପର୍ଶି ୟଚ୍ଛିରଃ ।
ତେଜସା ସ୍ୟାଚ୍ଛତଗୁଣଃ ପୂର୍ଵସାଲାଦୟଂ ପରଃ ॥ 18 ॥
ଗୋପୁରଦ୍ଵାରସହିତୋ ବହୁଵୃକ୍ଷସମନ୍ଵିତଃ ।
ୟା ଵୃକ୍ଷଜାତୟଃ ସଂତି ସର୍ଵାସ୍ତାସ୍ତତ୍ର ସଂତି ଚ ॥ 19 ॥
ନିରଂତରଂ ପୁଷ୍ପୟୁତାଃ ସଦା ଫଲସମନ୍ଵିତାଃ ।
ନଵପଲ୍ଲଵସଂୟୁକ୍ତାଃ ପରସୌରଭସଂକୁଲାଃ ॥ 20 ॥
ପନସା ବକୁଲା ଲୋଧ୍ରାଃ କର୍ଣିକାରାଶ୍ଚ ଶିଂଶପାଃ ।
ଦେଵଦାରୁକାଂଚନାରା ଆମ୍ରାଶ୍ଚୈଵ ସୁମେରଵଃ ॥ 21 ॥
ଲିକୁଚା ହିଂଗୁଲାଶ୍ଚୈଲା ଲଵଂଗାଃ କଟ୍ଫଲାସ୍ତଥା ।
ପାଟଲା ମୁଚୁକୁଂଦାଶ୍ଚ ଫଲିନ୍ୟୋ ଜଘନେଫଲାଃ ॥ 22 ॥
ତାଲାସ୍ତମାଲାଃ ସାଲାଶ୍ଚ କଂକୋଲା ନାଗଭଦ୍ରକାଃ ।
ପୁନ୍ନାଗାଃ ପୀଲଵଃ ସାଲ୍ଵକା ଵୈ କର୍ପୂରଶାଖିନଃ ॥ 23 ॥
ଅଶ୍ଵକର୍ଣା ହସ୍ତିକର୍ଣାସ୍ତାଲପର୍ଣାଶ୍ଚ ଦାଡିମାଃ ।
ଗଣିକା ବଂଧୁଜୀଵାଶ୍ଚ ଜଂବୀରାଶ୍ଚ କୁରଂଡକାଃ ॥ 24 ॥
ଚାଂପେୟା ବଂଧୁଜୀଵାଶ୍ଚ ତଥା ଵୈ କନକଦ୍ରୁମାଃ ।
କାଲାଗୁରୁଦ୍ରୁମାଶ୍ଚୈଵ ତଥା ଚଂଦନପାଦପାଃ ॥ 25 ॥
ଖର୍ଜୂରା ୟୂଥିକାସ୍ତାଲପର୍ଣ୍ୟଶ୍ଚୈଵ ତଥେକ୍ଷଵଃ ।
କ୍ଷୀରଵୃକ୍ଷାଶ୍ଚ ଖଦିରାଶ୍ଚିଂଚାଭଲ୍ଲାତକାସ୍ତଥା ॥ 26 ॥
ରୁଚକାଃ କୁଟଜା ଵୃକ୍ଷା ବିଲ୍ଵଵୃକ୍ଷାସ୍ତଥୈଵ ଚ ।
ତୁଲସୀନାଂ ଵନାନ୍ୟେଵଂ ମଲ୍ଲିକାନାଂ ତଥୈଵ ଚ ॥ 27 ॥
ଇତ୍ୟାଦିତରୁଜାତୀନାଂ ଵନାନ୍ୟୁପଵନାନି ଚ ।
ନାନାଵାପୀଶତୈର୍ୟୁକ୍ତାନ୍ୟେଵଂ ସଂତି ଧରାଧିପ ॥ 28 ॥
କୋକିଲାରାଵସଂୟୁକ୍ତା ଗୁନ୍ଜଦ୍ଭ୍ରମରଭୂଷିତାଃ ।
ନିର୍ୟାସସ୍ରାଵିଣଃ ସର୍ଵେ ସ୍ନିଗ୍ଧଚ୍ଛାୟାସ୍ତରୂତ୍ତମାଃ ॥ 29 ॥
ନାନାଋତୁଭଵା ଵୃକ୍ଷା ନାନାପକ୍ଷିସମାକୁଲାଃ ।
ନାନାରସସ୍ରାଵିଣୀଭିର୍ନଦୀଭିରତିଶୋଭିତାଃ ॥ 30 ॥
ପାରାଵତଶୁକଵ୍ରାତସାରିକାପକ୍ଷମାରୁତୈଃ ।
ହଂସପକ୍ଷସମୁଦ୍ଭୂତ ଵାତଵ୍ରାତୈଶ୍ଚଲଦ୍ଦ୍ରୁମମ୍ ॥ 31 ॥
ସୁଗଂଧଗ୍ରାହିପଵନପୂରିତଂ ତଦ୍ଵନୋତ୍ତମମ୍ ।
ସହିତଂ ହରିଣୀୟୂଥୈର୍ଧାଵମାନୈରିତସ୍ତତଃ ॥ 32 ॥
ନୃତ୍ୟଦ୍ବର୍ହିକଦଂବସ୍ୟ କେକାରାଵୈଃ ସୁଖପ୍ରଦୈଃ ।
ନାଦିତଂ ତଦ୍ଵନଂ ଦିଵ୍ୟଂ ମଧୁସ୍ରାଵି ସମଂତତଃ ॥ 33 ॥
କାଂସ୍ୟସାଲାଦୁତ୍ତରେ ତୁ ତାମ୍ରସାଲଃ ପ୍ରକୀର୍ତିତଃ ।
ଚତୁରସ୍ରସମାକାର ଉନ୍ନତ୍ୟା ସପ୍ତୟୋଜନଃ ॥ 34 ॥
ଦ୍ଵୟୋସ୍ତୁ ସାଲୟୋର୍ମଧ୍ୟେ ସଂପ୍ରୋକ୍ତା କଲ୍ପଵାଟିକା ।
ୟେଷାଂ ତରୂଣାଂ ପୁଷ୍ପାଣି କାଂଚନାଭାନି ଭୂମିପ ॥ 35 ॥
ପତ୍ରାଣି କାଂଚନାଭାନି ରତ୍ନବୀଜଫଲାନି ଚ ।
ଦଶୟୋଜନଗଂଧୋ ହି ପ୍ରସର୍ପତି ସମଂତତଃ ॥ 36 ॥
ତଦ୍ଵନଂ ରକ୍ଷିତଂ ରାଜନ୍ଵସଂତେନର୍ତୁନାନିଶମ୍ ।
ପୁଷ୍ପସିଂହାସନାସୀନଃ ପୁଷ୍ପଚ୍ଛତ୍ରଵିରାଜିତଃ ॥ 37 ॥
ପୁଷ୍ପଭୂଷାଭୂଷିତଶ୍ଚ ପୁଷ୍ପାସଵଵିଘୂର୍ଣିତଃ ।
ମଧୁଶ୍ରୀର୍ମାଧଵଶ୍ରୀଶ୍ଚ ଦ୍ଵେ ଭାର୍ୟେ ତସ୍ୟ ସମ୍ମତେ ॥ 38 ॥
କ୍ରୀଡତଃ ସ୍ମେରଵଦନେ ସୁମସ୍ତବକକଂଦୁକୈଃ ।
ଅତୀଵ ରମ୍ୟଂ ଵିପିନଂ ମଧୁସ୍ରାଵି ସମଂତତଃ ॥ 39 ॥
ଦଶୟୋଜନପର୍ୟଂତଂ କୁସୁମାମୋଦଵାୟୁନା ।
ପୂରିତଂ ଦିଵ୍ୟଗଂଧର୍ଵୈଃ ସାଂଗନୈର୍ଗାନଲୋଲୁପୈଃ ॥ 40 ॥
ଶୋଭିତଂ ତଦ୍ଵନଂ ଦିଵ୍ୟଂ ମତ୍ତକୋକିଲନାଦିତମ୍ ।
ଵସଂତଲକ୍ଷ୍ମୀସଂୟୁକ୍ତଂ କାମିକାମପ୍ରଵର୍ଧନମ୍ ॥ 41 ॥
ତାମ୍ରସାଲାଦୁତ୍ତରତ୍ର ସୀସସାଲଃ ପ୍ରକୀର୍ତିତଃ ।
ସମୁଚ୍ଛ୍ରାୟଃ ସ୍ମୃତୋଽପ୍ୟସ୍ୟ ସପ୍ତୟୋଜନସଂଖ୍ୟୟା ॥ 42 ॥
ସଂତାନଵାଟିକାମଧ୍ୟେ ସାଲୟୋସ୍ତୁ ଦ୍ଵୟୋର୍ନୃପ ।
ଦଶୟୋଜନଗଂଧସ୍ତୁ ପ୍ରସୂନାନାଂ ସମଂତତଃ ॥ 43 ॥
ହିରଣ୍ୟାଭାନି କୁସୁମାନ୍ୟୁତ୍ଫୁଲ୍ଲାନି ନିରଂତରମ୍ ।
ଅମୃତଦ୍ରଵସଂୟୁକ୍ତଫଲାନି ମଧୁରାଣି ଚ ॥ 44 ॥
ଗ୍ରୀଷ୍ମର୍ତୁର୍ନାୟକସ୍ତସ୍ୟା ଵାଟିକାୟା ନୃପୋତ୍ତମ ।
ଶୁକ୍ରଶ୍ରୀଶ୍ଚ ଶୁଚିଶ୍ରୀଶ୍ଚ ଦ୍ଵେ ଭାର୍ୟେ ତସ୍ୟ ସମ୍ମତେ ॥ 45 ॥
ସଂତାପତ୍ରସ୍ତଲୋକାସ୍ତୁ ଵୃକ୍ଷମୂଲେଷୁ ସଂସ୍ଥିତାଃ ।
ନାନାସିଦ୍ଧୈଃ ପରିଵୃତୋ ନାନାଦେଵୈଃ ସମନ୍ଵିତଃ ॥ 46 ॥
ଵିଲାସିନୀନାଂ ବୃଂଦୈସ୍ତୁ ଚଂଦନଦ୍ରଵପଂକିଲୈଃ ।
ପୁଷ୍ପମାଲାଭୂଷିତୈସ୍ତୁ ତାଲଵୃଂତକରାଂବୁଜୈଃ ॥ 47 ॥
[ପାଠଭେଦଃ- ପ୍ରାକାରଃ]
ପ୍ରକାରଃ ଶୋଭିତୋ ଏଜଚ୍ଛୀତଲାଂବୁନିଷେଵିଭିଃ ।
ସୀସସାଲାଦୁତ୍ତରତ୍ରାପ୍ୟାରକୂଟମୟଃ ଶୁଭଃ ॥ 48 ॥
ପ୍ରାକାରୋ ଵର୍ତତେ ରାଜନ୍ମୁନିୟୋଜନଦୈର୍ଘ୍ୟଵାନ୍ ।
ହରିଚଂଦନଵୃକ୍ଷାଣାଂ ଵାଟୀ ମଧ୍ୟେ ତୟୋଃ ସ୍ମୃତା ॥ 49 ॥
ସାଲୟୋରଧିନାଥସ୍ତୁ ଵର୍ଷର୍ତୁର୍ମେଘଵାହନଃ ।
ଵିଦ୍ୟୁତ୍ପିଂଗଲନେତ୍ରଶ୍ଚ ଜୀମୂତକଵଚଃ ସ୍ମୃତଃ ॥ 50 ॥
ଵଜ୍ରନିର୍ଘୋଷମୁଖରଶ୍ଚେଂଦ୍ରଧନ୍ଵା ସମଂତତଃ ।
ସହସ୍ରଶୋ ଵାରିଧାରା ମୁଂଚନ୍ନାସ୍ତେ ଗଣାଵୃତଃ ॥ 51 ॥
ନଭଃ ଶ୍ରୀଶ୍ଚ ନଭସ୍ୟଶ୍ରୀଃ ସ୍ଵରସ୍ୟା ରସ୍ୟମାଲିନୀ ।
ଅଂବା ଦୁଲା ନିରତ୍ନିଶ୍ଚାଭ୍ରମଂତୀ ମେଘୟଂତିକା ॥ 52 ॥
ଵର୍ଷୟଂତୀ ଚିବୁଣିକା ଵାରିଧାରା ଚ ସମ୍ମତାଃ ।
ଵର୍ଷର୍ତୋର୍ଦ୍ଵାଦଶ ପ୍ରୋକ୍ତାଃ ଶକ୍ତୟୋ ମଦଵିହ୍ଵଲାଃ ॥ 53 ॥
ନଵପଲ୍ଲଵଵୃକ୍ଷାଶ୍ଚ ନଵୀନଲତିକାନ୍ଵିତାଃ ।
ହରିତାନି ତୃଣାନ୍ୟେଵ ଵେଷ୍ଟିତା ୟୈର୍ଧରାଽଖିଲା ॥ 54 ॥
ନଦୀନଦପ୍ରଵାହାଶ୍ଚ ପ୍ରଵହଂତି ଚ ଵେଗତଃ ।
ସରାଂସି କଲୁଷାଂବୂନି ରାଗିଚିତ୍ତସମାନି ଚ ॥ 55 ॥
ଵସଂତି ଦେଵାଃ ସିଦ୍ଧାଶ୍ଚ ୟେ ଦେଵୀକର୍ମକାରିଣଃ ।
ଵାପୀକୂପତଡାଗାଶ୍ଚ ୟେ ଦେଵ୍ୟର୍ଥଂ ସମର୍ପିତାଃ ॥ 56 ॥
ତେ ଗଣା ନିଵସଂତ୍ୟତ୍ର ସଵିଲାସାଶ୍ଚ ସାଂଗନାଃ ।
ଆରକୂଟମୟାଦଗ୍ରେ ସପ୍ତୟୋଜନଦୈର୍ଘ୍ୟଵାନ୍ ॥ 57 ॥
ପଂଚଲୋହାତ୍ମକଃ ସାଲୋ ମଧ୍ୟେ ମଂଦାରଵାଟିକା ।
ନାନାପୁଷ୍ପଲତାକୀର୍ଣା ନାନାପଲ୍ଲଵଶୋଭିତା ॥ 58 ॥
ଅଧିଷ୍ଠାତାଽତ୍ର ସଂପ୍ରୋକ୍ତଃ ଶରଦୃତୁରନାମୟଃ ।
ଇଷଲକ୍ଷ୍ମୀରୂର୍ଜଲକ୍ଷ୍ମୀର୍ଦ୍ଵେ ଭାର୍ୟେ ତସ୍ୟ ସମ୍ମତେ ॥ 59 ॥
ନାନାସିଦ୍ଧା ଵସଂତ୍ୟତ୍ର ସାଂଗନାଃ ସପରିଚ୍ଛଦାଃ ।
ପଂଚଲୋହମୟାଦଗ୍ରେ ସପ୍ତୟୋଜନଦୈର୍ଘ୍ୟଵାନ୍ ॥ 60 ॥
ଦୀପ୍ୟମାନୋ ମହାଶୃଂଗୈର୍ଵର୍ତତେ ରୌପ୍ୟସାଲକଃ ।
ପାରିଜାତାଟଵୀମଧ୍ୟେ ପ୍ରସୂନସ୍ତବକାନ୍ଵିତା ॥ 61 ॥
ଦଶୟୋଜନଗଂଧୀନି କୁସୁମାନି ସମଂତତଃ ।
ମୋଦୟଂତି ଗଣାନ୍ସର୍ଵାନ୍ୟେ ଦେଵୀକର୍ମକାରିଣଃ ॥ 62 ॥
ତତ୍ରାଧିନାଥଃ ସଂପ୍ରୋକ୍ତୋ ହେମଂତର୍ତୁର୍ମହୋଜ୍ଜ୍ଵଲଃ ।
ସଗଣଃ ସାୟୁଧଃ ସର୍ଵାନ୍ ରାଗିଣୋ ରଂଜୟନ୍ନପଃ ॥ 63 ॥
ସହଶ୍ରୀଶ୍ଚ ସହସ୍ୟଶ୍ରୀର୍ଦ୍ଵେ ଭାର୍ୟେ ତସ୍ୟ ସମ୍ମତେ ।
ଵସଂତି ତତ୍ର ସିଦ୍ଧାଶ୍ଚ ୟେ ଦେଵୀଵ୍ରତକାରିଣଃ ॥ 64 ॥
ରୌପ୍ୟସାଲମୟାଦଗ୍ରେ ସପ୍ତୟୋଜନଦୈର୍ଘ୍ୟଵାନ୍ ।
ସୌଵର୍ଣସାଲଃ ସଂପ୍ରୋକ୍ତସ୍ତପ୍ତହାଟକକଲ୍ପିତଃ ॥ 65 ॥
ମଧ୍ୟେ କଦଂବଵାଟୀ ତୁ ପୁଷ୍ପପଲ୍ଲଵଶୋଭିତା ।
କଦଂବମଦିରାଧାରାଃ ପ୍ରଵର୍ତଂତେ ସହସ୍ରଶଃ ॥ 66 ॥
ୟାଭିର୍ନିପୀତପୀତାଭିର୍ନିଜାନଂଦୋଽନୁଭୂୟତେ ।
ତତ୍ରାଧିନାଥଃ ସଂପ୍ରୋକ୍ତଃ ଶୈଶିରର୍ତୁର୍ମହୋଦୟଃ ॥ 67 ॥
ତପଃଶ୍ରୀଶ୍ଚ ତପସ୍ୟଶ୍ରୀର୍ଦ୍ଵେ ଭାର୍ୟେ ତସ୍ୟ ସମ୍ମତେ ।
ମୋଦମାନଃ ସହୈତାଭ୍ୟାଂ ଵର୍ତତେ ଶିଶିରାକୃତିଃ ॥ 68 ॥
ନାନାଵିଲାସସଂୟୁକ୍ତୋ ନାନାଗଣସମାଵୃତଃ ।
ନିଵସଂତି ମହାସିଦ୍ଧା ୟେ ଦେଵୀଦାନକାରିଣଃ ॥ 69 ॥
ନାନାଭୋଗସମୁତ୍ପନ୍ନମହାନଂଦସମନ୍ଵିତାଃ ।
ସାଂଗନାଃ ପରିଵାରୈସ୍ତୁ ସଂଘଶଃ ପରିଵାରିତାଃ ॥ 70 ॥
ସ୍ଵର୍ଣସାଲମୟାଦଗ୍ରେ ମୁନିୟୋଜନଦୈର୍ଘ୍ୟଵାନ୍ ।
ପୁଷ୍ପରାଗମୟଃ ସାଲଃ କୁଂକୁମାରୁଣଵିଗ୍ରହଃ ॥ 71 ॥
ପୁଷ୍ପରାଗମୟୀ ଭୂମିର୍ଵନାନ୍ୟୁପଵନାନି ଚ ।
ରତ୍ନଵୃକ୍ଷାଲଵାଲାଶ୍ଚ ପୁଷ୍ପରାଗମୟାଃ ସ୍ମୃତାଃ ॥ 72 ॥
ପ୍ରାକାରୋ ୟସ୍ୟ ରତ୍ନସ୍ୟ ତଦ୍ରତ୍ନରଚିତା ଦ୍ରୁମାଃ ।
ଵନଭୂଃ ପକ୍ଷିନଶ୍ଚୈଵ ରତ୍ନଵର୍ଣଜଲାନି ଚ ॥ 73 ॥
ମଂଡପା ମଂଡପସ୍ତଂଭାଃ ସରାନ୍ସି କମଲାନି ଚ ।
ପ୍ରାକାରେ ତତ୍ର ୟଦ୍ୟତ୍ସ୍ୟାତ୍ତତ୍ସର୍ଵଂ ତତ୍ସମଂ ଭଵେତ୍ ॥ 74 ॥
ପରିଭାଷେୟମୁଦ୍ଦିଷ୍ଟା ରତ୍ନସାଲାଦିଷୁ ପ୍ରଭୋ ।
ତେଜସା ସ୍ୟାଲ୍ଲକ୍ଷଗୁଣଃ ପୂର୍ଵସାଲାତ୍ପରୋ ନୃପ ॥ 75 ॥
ଦିକ୍ପାଲା ନିଵସଂତ୍ୟତ୍ର ପ୍ରତିବ୍ରହ୍ମାନ୍ଡଵର୍ତିନାମ୍ ।
ଦିକ୍ପାଲାନାଂ ସମଷ୍ଟ୍ୟାତ୍ମରୂପାଃ ସ୍ଫୂର୍ଜଦ୍ଵରାୟୁଧାଃ ॥ 76 ॥
ପୂର୍ଵାଶାୟାଂ ସମୁତ୍ତୁଂଗଶୃଂଗା ପୂରମରାଵତୀ ।
ନାନୋପଵନସଂୟୁକ୍ତା ମହେଂଦ୍ରସ୍ତତ୍ର ରାଜତେ ॥ 77 ॥
ସ୍ଵର୍ଗଶୋଭା ଚ ୟା ସ୍ଵର୍ଗେ ୟାଵତୀ ସ୍ୟାତ୍ତତୋଽଧିକା ।
ସମଷ୍ଟିଶତନେତ୍ରସ୍ୟ ସହସ୍ରଗୁଣତଃ ସ୍ମୃତା ॥ 78 ॥
ଐରାଵତସମାରୂଢୋ ଵଜ୍ରହସ୍ତଃ ପ୍ରତାପଵାନ୍ ।
ଦେଵସେନାପରିଵୃତୋ ରାଜତେଽତ୍ର ଶତକ୍ରତୁଃ ॥ 79 ॥
ଦେଵାଂଗନାଗଣୟୁତା ଶଚୀ ତତ୍ର ଵିରାଜତେ ।
ଵହ୍ନିକୋଣେ ଵହ୍ନିପୁରୀ ଵହ୍ନିପୂଃ ସଦୃଶୀ ନୃପ ॥ 80 ॥
ସ୍ଵାହାସ୍ଵଧାସମାୟୁକ୍ତୋ ଵହ୍ନିସ୍ତତ୍ର ଵିରାଜତେ ।
ନିଜଵାହନଭୂଷାଢ୍ୟୋ ନିଜଦେଵଗଣୈର୍ଵୃତଃ ॥ 81 ॥
ୟାମ୍ୟାଶାୟାଂ ୟମପୁରୀ ତତ୍ର ଦଂଡଧରୋ ମହାନ୍ ।
ସ୍ଵଭଟୈର୍ଵେଷ୍ଟିତୋ ରାଜନ୍ ଚିତ୍ରଗୁପ୍ତପୁରୋଗମୈଃ ॥ 82 ॥
ନିଜଶକ୍ତିୟୁତୋ ଭାସ୍ଵତ୍ତନୟୋଽସ୍ତି ୟମୋ ମହାନ୍ ।
ନୈରୃତ୍ୟାଂ ଦିଶି ରାକ୍ଷସ୍ୟାଂ ରାକ୍ଷସୈଃ ପରିଵାରିତଃ ॥ 83 ॥
ଖଡ୍ଗଧାରୀ ସ୍ଫୁରନ୍ନାସ୍ତେ ନିରୃତିର୍ନିଜଶକ୍ତିୟୁକ୍ ।
ଵାରୁଣ୍ୟାଂ ଵରୁଣୋ ରାଜା ପାଶଧାରୀ ପ୍ରତାପଵାନ୍ ॥ 84 ॥
ମହାଝଶସମାରୂଢୋ ଵାରୁଣୀମଧୁଵିହ୍ଵଲଃ ।
ନିଜଶକ୍ତିସମାୟୁକ୍ତୋ ନିଜୟାଦୋଗଣାନ୍ଵିତଃ ॥ 85 ॥
ସମାସ୍ତେ ଵାରୁଣେ ଲୋକେ ଵରୁଣାନୀରତାକୁଲଃ ।
ଵାୟୁକୋଣେ ଵାୟୁଲୋକୋ ଵାୟୁସ୍ତତ୍ରାଧିତିଷ୍ଠତି ॥ 86 ॥
ଵାୟୁସାଧନସଂସିଦ୍ଧୟୋଗିଭିଃ ପରିଵାରିତଃ ।
ଧ୍ଵଜହସ୍ତୋ ଵିଶାଲାକ୍ଷୋ ମୃଗଵାହନସଂସ୍ଥିତଃ ॥ 87 ॥
ମରୁଦ୍ଗଣୈଃ ପରିଵୃତୋ ନିଜଶକ୍ତିସମନ୍ଵିତଃ ।
ଉତ୍ତରସ୍ୟାଂ ଦିଶି ମହାନ୍ୟକ୍ଷଲୋକୋଽସ୍ତି ଭୂମିପ ॥ 88 ॥
ୟକ୍ଷାଧିରାଜସ୍ତତ୍ରାଽଽସ୍ତେ ଵୃଦ୍ଧିଋଦ୍ଧ୍ୟାଦିଶକ୍ତିଭିଃ ।
ନଵଭିର୍ନିଧିଭିର୍ୟୁକ୍ତସ୍ତୁଂଦିଲୋ ଧନନାୟକଃ ॥ 89 ॥
ମଣିଭଦ୍ରଃ ପୂର୍ଣଭଦ୍ରୋ ମଣିମାନ୍ମଣିକଂଧରଃ ।
ମଣିଭୂଷୋ ମଣିସ୍ରଗ୍ଵୀ ମଣିକାର୍ମୁକଧାରକଃ ॥ 90 ॥
ଇତ୍ୟାଦିୟକ୍ଷସେନାନୀସହିତୋ ନିଜଶକ୍ତିୟୁକ୍ ।
ଈଶାନକୋଣେ ସଂପ୍ରୋକ୍ତୋ ରୁଦ୍ରଲୋକୋ ମହତ୍ତରଃ ॥ 91 ॥
ଅନର୍ଘ୍ୟରତ୍ନଖଚିତୋ ୟତ୍ର ରୁଦ୍ରୋଽଧିଦୈଵତମ୍ ।
ମନ୍ୟୁମାଂଦୀପ୍ତନୟନୋ ବଦ୍ଧପୃଷ୍ଠମହେଷୁଧିଃ ॥ 92 ॥
ସ୍ଫୂର୍ଜଦ୍ଧନୁର୍ଵାମହସ୍ତୋଽଧିଜ୍ୟଧନ୍ଵଭିରାଵୃତଃ ।
ସ୍ଵସମାନୈରସଂଖ୍ୟାତରୁଦ୍ରୈଃ ଶୂଲଵରାୟୁଧୈଃ ॥ 93 ॥
ଵିକୃତାସ୍ୟୈଃ କରାଲାସ୍ୟୈର୍ଵମଦ୍ଵହ୍ନିଭିରାସ୍ୟତଃ ।
ଦଶହସ୍ତୈଃ ଶତକରୈଃ ସହସ୍ରଭୁଜସଂୟୁତୈଃ ॥ 94 ॥
ଦଶପାଦୈର୍ଦଶଗ୍ରୀଵୈସ୍ତ୍ରିନେତ୍ରୈରୁଗ୍ରମୂର୍ତିଭିଃ ।
ଅଂତରିକ୍ଷଚରା ୟେ ଚ ୟେ ଚ ଭୂମିଚରାଃ ସ୍ମୃତାଃ ॥ 95 ॥
ରୁଦ୍ରାଧ୍ୟାୟେ ସ୍ମୃତା ରୁଦ୍ରାସ୍ତୈଃ ସର୍ଵୈଶ୍ଚ ସମାଵୃତଃ ।
ରୁଦ୍ରାଣୀକୋଟିସହିତୋ ଭଦ୍ରକାଲ୍ୟାଦିମାତୃଭିଃ ॥ 96 ॥
ନାନାଶକ୍ତିସମାଵିଷ୍ଟଡାମର୍ୟାଦିଗଣାଵୃତଃ ।
ଵୀରଭଦ୍ରାଦିସହିତୋ ରୁଦ୍ରୋ ରାଜନ୍ଵିରାଜତେ ॥ 97 ॥
ମୁଂଡମାଲାଧରୋ ନାଗଵଲୟୋ ନାଗକଂଧରଃ ।
ଵ୍ୟାଘ୍ରଚର୍ମପରୀଧାନୋ ଗଜଚର୍ମୋତ୍ତରୀୟକଃ ॥ 98 ॥
ଚିତାଭସ୍ମାଂଗଲିପ୍ତାଂଗଃ ପ୍ରମଥାଦିଗଣାଵୃତଃ ।
ନିନଦଡ୍ଡମରୁଧ୍ଵାନୈର୍ବଧିରୀକୃତଦିଂମୁଖଃ ॥ 99 ॥
ଅଟ୍ଟହାସାସ୍ଫୋଟଶବ୍ଦୈଃ ସଂତ୍ରାସିତନଭସ୍ତଲଃ ।
ଭୂତସଂଘସମାଵିଷ୍ଟୋ ଭୂତାଵାସୋ ମହେଶ୍ଵରଃ ॥ 100 ॥
ଈଶାନଦିକ୍ପତିଃ ସୋଽୟଂ ନାମ୍ନା ଚେଶାନ ଏଵ ଚ ॥ 101 ॥
ଇତି ଶ୍ରୀଦେଵୀଭାଗଵତେ ମହାପୁରାଣେ ଦ୍ଵାଦଶସ୍କଂଧେ ମଣିଦ୍ଵୀପଵର୍ଣନଂ ନାମ ଦଶମୋଽଧ୍ୟାୟଃ ॥
ବାରମ୍ବାର ପଚରାଯାଉଥିବା ପ୍ରଶ୍ନ
What is ମଣିଦ୍ଵୀପ ଵର୍ଣନ - 1 (ଦେଵୀ ଭାଗଵତମ୍)?
ମଣିଦ୍ଵୀପ ଵର୍ଣନ - 1 (ଦେଵୀ ଭାଗଵତମ୍) is a Devi Stotrams available on Bhakti Granth in the selected language or script.
Which language or script is this version in?
This edition is published in Odia. Use the language selector to view another available edition.
Can I read ମଣିଦ୍ଵୀପ ଵର୍ଣନ - 1 (ଦେଵୀ ଭାଗଵତମ୍) online?
Yes. The imported text is available directly on this page for online reading and recitation.
Can I download ମଣିଦ୍ଵୀପ ଵର୍ଣନ - 1 (ଦେଵୀ ଭାଗଵତମ୍) as a PDF?
If a verified PDF resource was found on the source page, a PDF download button is automatically connected to this page.
How can I share this page?
Use Copy Link, WhatsApp or Facebook in the sticky sharing bar provided by the Bhakti Granth theme.
Are there related devotional texts on Bhakti Granth?
Yes. The Bhakti Granth theme automatically connects texts through language and topic relationships to strengthen navigation and topical coverage.