ଦେଵୀ ମାହାତ୍ମ୍ୟଂ ଦୁର୍ଗା ସପ୍ତଶତି ଅଷ୍ଟମୋଽଧ୍ୟାୟଃ

ରକ୍ତବୀଜଵଧୋ ନାମ ଅଷ୍ଟମୋଧ୍ୟାୟ ॥

ଧ୍ୟାନଂ
ଅରୁଣାଂ କରୁଣା ତରଂଗିତାକ୍ଷୀଂ ଧୃତପାଶାଂକୁଶ ପୁଷ୍ପବାଣଚାପାମ୍ ।
ଅଣିମାଧିଭିରାଵୃତାଂ ମୟୂଖୈ ରହମିତ୍ୟେଵ ଵିଭାଵୟେ ଭଵାନୀମ୍ ॥

ଋଷିରୁଵାଚ ॥1॥

ଚଂଡେ ଚ ନିହତେ ଦୈତ୍ୟେ ମୁଂଡେ ଚ ଵିନିପାତିତେ ।
ବହୁଳେଷୁ ଚ ସୈନ୍ୟେଷୁ କ୍ଷୟିତେଷ୍ଵସୁରେଶ୍ଵରଃ ॥ 2 ॥

ତତଃ କୋପପରାଧୀନଚେତାଃ ଶୁଂଭଃ ପ୍ରତାପଵାନ୍ ।
ଉଦ୍ୟୋଗଂ ସର୍ଵ ସୈନ୍ୟାନାଂ ଦୈତ୍ୟାନାମାଦିଦେଶ ହ ॥3॥

ଅଦ୍ୟ ସର୍ଵ ବଲୈର୍ଦୈତ୍ୟାଃ ଷଡଶୀତିରୁଦାୟୁଧାଃ ।
କଂବୂନାଂ ଚତୁରଶୀତିର୍ନିର୍ୟାଂତୁ ସ୍ଵବଲୈର୍ଵୃତାଃ ॥4॥

କୋଟିଵୀର୍ୟାଣି ପଂଚାଶଦସୁରାଣାଂ କୁଲାନି ଵୈ ।
ଶତଂ କୁଲାନି ଧୌମ୍ରାଣାଂ ନିର୍ଗଚ୍ଛଂତୁ ମମାଜ୍ଞୟା ॥5॥

କାଲକା ଦୌର୍ହୃଦା ମୌର୍ଵାଃ କାଳିକେୟାସ୍ତଥାସୁରାଃ ।
ୟୁଦ୍ଧାୟ ସଜ୍ଜା ନିର୍ୟାଂତୁ ଆଜ୍ଞୟା ତ୍ଵରିତା ମମ ॥6॥

ଇତ୍ୟାଜ୍ଞାପ୍ୟାସୁରାପତିଃ ଶୁଂଭୋ ଭୈରଵଶାସନଃ ।
ନିର୍ଜଗାମ ମହାସୈନ୍ୟସହସ୍ତ୍ରୈର୍ଭହୁଭିର୍ଵୃତଃ ॥7॥

ଆୟାଂତଂ ଚଂଡିକା ଦୃଷ୍ଟ୍ଵା ତତ୍ସୈନ୍ୟମତିଭୀଷଣମ୍ ।
ଜ୍ୟାସ୍ଵନୈଃ ପୂରୟାମାସ ଧରଣୀଗଗନାଂତରମ୍ ॥8॥

ତତଃସିଂହୋ ମହାନାଦମତୀଵ କୃତଵାନ୍ନୃପ ।
ଘଂଟାସ୍ଵନେନ ତାନ୍ନାଦାନଂବିକା ଚୋପବୃଂହୟତ୍ ॥9॥

ଧନୁର୍ଜ୍ୟାସିଂହଘଂଟାନାଂ ନାଦାପୂରିତଦିଙ୍ମୁଖା ।
ନିନାଦୈର୍ଭୀଷଣୈଃ କାଳୀ ଜିଗ୍ୟେ ଵିସ୍ତାରିତାନନା ॥10॥

ତଂ ନିନାଦମୁପଶ୍ରୁତ୍ୟ ଦୈତ୍ୟ ସୈନ୍ୟୈଶ୍ଚତୁର୍ଦିଶମ୍ ।
ଦେଵୀ ସିଂହସ୍ତଥା କାଳୀ ସରୋଷୈଃ ପରିଵାରିତାଃ॥11॥

ଏତସ୍ମିନ୍ନଂତରେ ଭୂପ ଵିନାଶାୟ ସୁରଦ୍ଵିଷାମ୍ ।
ଭଵାୟାମରସିଂହନାମତିଵୀର୍ୟବଲାନ୍ଵିତାଃ ॥12॥

ବ୍ରହ୍ମେଶଗୁହଵିଷ୍ଣୂନାଂ ତଥେଂଦ୍ରସ୍ୟ ଚ ଶକ୍ତୟଃ ।
ଶରୀରେଭ୍ୟୋଵିନିଷ୍କ୍ରମ୍ୟ ତଦ୍ରୂପୈଶ୍ଚଂଡିକାଂ ୟୟୁଃ ॥13॥

ୟସ୍ୟ ଦେଵସ୍ୟ ୟଦ୍ରୂପଂ ୟଥା ଭୂଷଣଵାହନମ୍ ।
ତଦ୍ଵଦେଵ ହି ତଚ୍ଚକ୍ତିରସୁରାନ୍ୟୋଦ୍ଧୁମାୟମୌ ॥14॥

ହଂସୟୁକ୍ତଵିମାନାଗ୍ରେ ସାକ୍ଷସୂତ୍ରକ ମଂଡଲୁଃ ।
ଆୟାତା ବ୍ରହ୍ମଣଃ ଶକ୍ତିବ୍ରହ୍ମାଣୀ ତ୍ୟଭିଧୀୟତେ ॥15॥

ମହେଶ୍ଵରୀ ଵୃଷାରୂଢା ତ୍ରିଶୂଲଵରଧାରିଣୀ ।
ମହାହିଵଲୟା ପ୍ରାପ୍ତାଚଂଦ୍ରରେଖାଵିଭୂଷଣା ॥16॥

କୌମାରୀ ଶକ୍ତିହସ୍ତା ଚ ମୟୂରଵରଵାହନା ।
ୟୋଦ୍ଧୁମଭ୍ୟାୟୟୌ ଦୈତ୍ୟାନଂବିକା ଗୁହରୂପିଣୀ ॥17॥

ତଥୈଵ ଵୈଷ୍ଣଵୀ ଶକ୍ତିର୍ଗରୁଡୋପରି ସଂସ୍ଥିତା ।
ଶଂଖଚକ୍ରଗଧାଶାଂଖର୍ ଖଡ୍ଗହସ୍ତାଭ୍ୟୁପାୟୟୌ ॥18॥

ୟଜ୍ଞଵାରାହମତୁଲଂ ରୂପଂ ୟା ଭିଭ୍ରତୋ ହରେଃ ।
ଶକ୍ତିଃ ସାପ୍ୟାୟୟୌ ତତ୍ର ଵାରାହୀଂ ବିଭ୍ରତୀ ତନୁମ୍ ॥19॥

ନାରସିଂହୀ ନୃସିଂହସ୍ୟ ବିଭ୍ରତୀ ସଦୃଶଂ ଵପୁଃ ।
ପ୍ରାପ୍ତା ତତ୍ର ସଟାକ୍ଷେପକ୍ଷିପ୍ତନକ୍ଷତ୍ର ସଂହତିଃ ॥20॥

ଵଜ୍ର ହସ୍ତା ତଥୈଵୈଂଦ୍ରୀ ଗଜରାଜୋ ପରିସ୍ଥିତା ।
ପ୍ରାପ୍ତା ସହସ୍ର ନୟନା ୟଥା ଶକ୍ରସ୍ତଥୈଵ ସା ॥21॥

ତତଃ ପରିଵୃତ୍ତସ୍ତାଭିରୀଶାନୋ ଦେଵ ଶକ୍ତିଭିଃ ।
ହନ୍ୟଂତାମସୁରାଃ ଶୀଘ୍ରଂ ମମ ପ୍ରୀତ୍ୟାହ ଚଂଡିକାଂ ॥22॥

ତତୋ ଦେଵୀ ଶରୀରାତ୍ତୁ ଵିନିଷ୍କ୍ରାଂତାତିଭୀଷଣା ।
ଚଂଡିକା ଶକ୍ତିରତ୍ୟୁଗ୍ରା ଶିଵାଶତନିନାଦିନୀ ॥23॥

ସା ଚାହ ଧୂମ୍ରଜଟିଲଂ ଈଶାନମପରାଜିତା ।
ଦୂତତ୍ଵଂ ଗଚ୍ଛ ଭଗଵନ୍ ପାର୍ଶ୍ଵଂ ଶୁଂଭନିଶୁଂଭୟୋଃ ॥24॥

ବ୍ରୂହି ଶୁଂଭଂ ନିଶୁଂଭଂ ଚ ଦାନଵାଵତିଗର୍ଵିତୌ ।
ୟେ ଚାନ୍ୟେ ଦାନଵାସ୍ତତ୍ର ୟୁଦ୍ଧାୟ ସମୁପସ୍ଥିତାଃ ॥25॥

ତ୍ରୈଲୋକ୍ୟମିଂଦ୍ରୋ ଲଭତାଂ ଦେଵାଃ ସଂତୁ ହଵିର୍ଭୁଜଃ ।
ୟୂୟଂ ପ୍ରୟାତ ପାତାଳଂ ୟଦି ଜୀଵିତୁମିଚ୍ଛଥ ॥26॥

ବଲାଵଲେପାଦଥ ଚେଦ୍ଭଵଂତୋ ୟୁଦ୍ଧକାଂକ୍ଷିଣଃ ।
ତଦା ଗଚ୍ଛତ ତୃପ୍ୟଂତୁ ମଚ୍ଛିଵାଃ ପିଶିତେନ ଵଃ ॥27॥

ୟତୋ ନିୟୁକ୍ତୋ ଦୌତ୍ୟେନ ତୟା ଦେଵ୍ୟା ଶିଵଃ ସ୍ଵୟମ୍ ।
ଶିଵଦୂତୀତି ଲୋକେଽସ୍ମିଂସ୍ତତଃ ସା ଖ୍ୟାତି ମାଗତା ॥28॥

ତେଽପି ଶ୍ରୁତ୍ଵା ଵଚୋ ଦେଵ୍ୟାଃ ଶର୍ଵାଖ୍ୟାତଂ ମହାସୁରାଃ ।
ଅମର୍ଷାପୂରିତା ଜଗ୍ମୁର୍ୟତ୍ର କାତ୍ୟାୟନୀ ସ୍ଥିତା ॥29॥

ତତଃ ପ୍ରଥମମେଵାଗ୍ରେ ଶରଶକ୍ତ୍ୟୃଷ୍ଟିଵୃଷ୍ଟିଭିଃ ।
ଵଵର୍ଷୁରୁଦ୍ଧତାମର୍ଷାଃ ସ୍ତାଂ ଦେଵୀମମରାରୟଃ ॥30॥

ସା ଚ ତାନ୍ ପ୍ରହିତାନ୍ ବାଣାନ୍ ଂଛୂଲଶକ୍ତିପରଶ୍ଵଧାନ୍ ।
ଚିଚ୍ଛେଦ ଲୀଲୟାଧ୍ମାତଧନୁର୍ମୁକ୍ତୈର୍ମହେଷୁଭିଃ ॥31॥

ତସ୍ୟାଗ୍ରତସ୍ତଥା କାଳୀ ଶୂଲପାତଵିଦାରିତାନ୍ ।
ଖଟ୍ଵାଂଗପୋଥିତାଂଶ୍ଚାରୀନ୍କୁର୍ଵଂତୀ ଵ୍ୟଚରତ୍ତଦା ॥32॥

କମଂଡଲୁଜଲାକ୍ଷେପହତଵୀର୍ୟାନ୍ ହତୌଜସଃ ।
ବ୍ରହ୍ମାଣୀ ଚାକରୋଚ୍ଛତ୍ରୂନ୍ୟେନ ୟେନ ସ୍ମ ଧାଵତି ॥33॥

ମାହେଶ୍ଵରୀ ତ୍ରିଶୂଲେନ ତଥା ଚକ୍ରେଣ ଵୈଷ୍ଣଵୀ ।
ଦୈତ୍ୟାଙ୍ଜଘାନ କୌମାରୀ ତଥା ଶତ୍ୟାତି କୋପନା ॥34॥

ଐଂଦ୍ରୀ କୁଲିଶପାତେନ ଶତଶୋ ଦୈତ୍ୟଦାନଵାଃ ।
ପେତୁର୍ଵିଦାରିତାଃ ପୃଥ୍ଵ୍ୟାଂ ରୁଧିରୌଘପ୍ରଵର୍ଷିଣଃ ॥35॥

ତୁଂଡପ୍ରହାରଵିଧ୍ଵସ୍ତା ଦଂଷ୍ଟ୍ରା ଗ୍ରକ୍ଷତ ଵକ୍ଷସଃ ।
ଵାରାହମୂର୍ତ୍ୟା ନ୍ୟପତଂଶ୍ଚକ୍ରେଣ ଚ ଵିଦାରିତାଃ ॥36॥

ନଖୈର୍ଵିଦାରିତାଂଶ୍ଚାନ୍ୟାନ୍ ଭକ୍ଷୟଂତୀ ମହାସୁରାନ୍ ।
ନାରସିଂହୀ ଚଚାରାଜୌ ନାଦା ପୂର୍ଣଦିଗଂବରା ॥37॥

ଚଂଡାଟ୍ଟହାସୈରସୁରାଃ ଶିଵଦୂତ୍ୟଭିଦୂଷିତାଃ ।
ପେତୁଃ ପୃଥିଵ୍ୟାଂ ପତିତାଂସ୍ତାଂଶ୍ଚଖାଦାଥ ସା ତଦା ॥38॥

ଇତି ମାତୃ ଗଣଂ କ୍ରୁଦ୍ଧଂ ମର୍ଦ ୟଂତଂ ମହାସୁରାନ୍ ।
ଦୃଷ୍ଟ୍ଵାଭ୍ୟୁପାୟୈର୍ଵିଵିଧୈର୍ନେଶୁର୍ଦେଵାରିସୈନିକାଃ ॥39॥

ପଲାୟନପରାଂଦୃଷ୍ଟ୍ଵା ଦୈତ୍ୟାନ୍ମାତୃଗଣାର୍ଦିତାନ୍ ।
ୟୋଦ୍ଧୁମଭ୍ୟାୟୟୌ କ୍ରୁଦ୍ଧୋ ରକ୍ତବୀଜୋ ମହାସୁରଃ ॥40॥

ରକ୍ତବିଂଦୁର୍ୟଦା ଭୂମୌ ପତତ୍ୟସ୍ୟ ଶରୀରତଃ ।
ସମୁତ୍ପତତି ମେଦିନ୍ୟାଂ ତତ୍ପ୍ରମାଣୋ ମହାସୁରଃ ॥41॥

ୟୁୟୁଧେ ସ ଗଦାପାଣିରିଂଦ୍ରଶକ୍ତ୍ୟା ମହାସୁରଃ ।
ତତଶ୍ଚୈଂଦ୍ରୀ ସ୍ଵଵଜ୍ରେଣ ରକ୍ତବୀଜମତାଡୟତ୍ ॥42॥

କୁଲିଶେନାହତସ୍ୟାଶୁ ବହୁ ସୁସ୍ରାଵ ଶୋଣିତମ୍ ।
ସମୁତ୍ତସ୍ଥୁସ୍ତତୋ ୟୋଧାସ୍ତଦ୍ରପାସ୍ତତ୍ପରାକ୍ରମାଃ ॥43॥

ୟାଵଂତଃ ପତିତାସ୍ତସ୍ୟ ଶରୀରାଦ୍ରକ୍ତବିଂଦଵଃ ।
ତାଵଂତଃ ପୁରୁଷା ଜାତାଃ ସ୍ତଦ୍ଵୀର୍ୟବଲଵିକ୍ରମାଃ ॥44॥

ତେ ଚାପି ୟୁୟୁଧୁସ୍ତତ୍ର ପୁରୁଷା ରକ୍ତ ସଂଭଵାଃ ।
ସମଂ ମାତୃଭିରତ୍ୟୁଗ୍ରଶସ୍ତ୍ରପାତାତିଭୀଷଣଂ ॥45॥

ପୁନଶ୍ଚ ଵଜ୍ର ପାତେନ କ୍ଷତ ମଶ୍ୟ ଶିରୋ ୟଦା ।
ଵଵାହ ରକ୍ତଂ ପୁରୁଷାସ୍ତତୋ ଜାତାଃ ସହସ୍ରଶଃ ॥46॥

ଵୈଷ୍ଣଵୀ ସମରେ ଚୈନଂ ଚକ୍ରେଣାଭିଜଘାନ ହ ।
ଗଦୟା ତାଡୟାମାସ ଐଂଦ୍ରୀ ତମସୁରେଶ୍ଵରମ୍॥47॥

ଵୈଷ୍ଣଵୀ ଚକ୍ରଭିନ୍ନସ୍ୟ ରୁଧିରସ୍ରାଵ ସଂଭଵୈଃ ।
ସହସ୍ରଶୋ ଜଗଦ୍ଵ୍ୟାପ୍ତଂ ତତ୍ପ୍ରମାଣୈର୍ମହାସୁରୈଃ ॥48॥

ଶକ୍ତ୍ୟା ଜଘାନ କୌମାରୀ ଵାରାହୀ ଚ ତଥାସିନା ।
ମାହେଶ୍ଵରୀ ତ୍ରିଶୂଲେନ ରକ୍ତବୀଜଂ ମହାସୁରମ୍ ॥49॥

ସ ଚାପି ଗଦୟା ଦୈତ୍ୟଃ ସର୍ଵା ଏଵାହନତ୍ ପୃଥକ୍ ।
ମାତୄଃ କୋପସମାଵିଷ୍ଟୋ ରକ୍ତବୀଜୋ ମହାସୁରଃ ॥50॥

ତସ୍ୟାହତସ୍ୟ ବହୁଧା ଶକ୍ତିଶୂଲାଦି ଭିର୍ଭୁଵିଃ ।
ପପାତ ୟୋ ଵୈ ରକ୍ତୌଘସ୍ତେନାସଂଚତଶୋଽସୁରାଃ ॥51॥

ତୈଶ୍ଚାସୁରାସୃକ୍ସଂଭୂତୈରସୁରୈଃ ସକଲଂ ଜଗତ୍ ।
ଵ୍ୟାପ୍ତମାସୀତ୍ତତୋ ଦେଵା ଭୟମାଜଗ୍ମୁରୁତ୍ତମମ୍ ॥52॥

ତାନ୍ ଵିଷଣ୍ଣା ନ୍ ସୁରାନ୍ ଦୃଷ୍ଟ୍ଵା ଚଂଡିକା ପ୍ରାହସତ୍ଵରମ୍ ।
ଉଵାଚ କାଳୀଂ ଚାମୁଂଡେ ଵିସ୍ତୀର୍ଣଂ ଵଦନଂ କୁରୁ ॥53॥

ମଚ୍ଛସ୍ତ୍ରପାତସଂଭୂତାନ୍ ରକ୍ତବିଂଦୂନ୍ ମହାସୁରାନ୍ ।
ରକ୍ତବିଂଦୋଃ ପ୍ରତୀଚ୍ଛ ତ୍ଵଂ ଵକ୍ତ୍ରେଣାନେନ ଵେଗିନା ॥54॥

ଭକ୍ଷୟଂତୀ ଚର ରଣୋ ତଦୁତ୍ପନ୍ନାନ୍ମହାସୁରାନ୍ ।
ଏଵମେଷ କ୍ଷୟଂ ଦୈତ୍ୟଃ କ୍ଷେଣ ରକ୍ତୋ ଗମିଷ୍ୟତି ॥55॥

ଭକ୍ଷ୍ୟ ମାଣା ସ୍ତ୍ଵୟା ଚୋଗ୍ରା ନ ଚୋତ୍ପତ୍ସ୍ୟଂତି ଚାପରେ ।
ଇତ୍ୟୁକ୍ତ୍ଵା ତାଂ ତତୋ ଦେଵୀ ଶୂଲେନାଭିଜଘାନ ତମ୍ ॥56॥

ମୁଖେନ କାଳୀ ଜଗୃହେ ରକ୍ତବୀଜସ୍ୟ ଶୋଣିତମ୍ ।
ତତୋଽସାଵାଜଘାନାଥ ଗଦୟା ତତ୍ର ଚଂଡିକାଂ ॥57॥

ନ ଚାସ୍ୟା ଵେଦନାଂ ଚକ୍ରେ ଗଦାପାତୋଽଲ୍ପିକାମପି ।
ତସ୍ୟାହତସ୍ୟ ଦେହାତ୍ତୁ ବହୁ ସୁସ୍ରାଵ ଶୋଣିତମ୍ ॥58॥

ୟତସ୍ତତସ୍ତଦ୍ଵକ୍ତ୍ରେଣ ଚାମୁଂଡା ସଂପ୍ରତୀଚ୍ଛତି ।
ମୁଖେ ସମୁଦ୍ଗତା ୟେଽସ୍ୟା ରକ୍ତପାତାନ୍ମହାସୁରାଃ ॥59॥

ତାଂଶ୍ଚଖାଦାଥ ଚାମୁଂଡା ପପୌ ତସ୍ୟ ଚ ଶୋଣିତମ୍ ॥60॥

ଦେଵୀ ଶୂଲେନ ଵଜ୍ରେଣ ବାଣୈରସିଭିର୍ ଋଷ୍ଟିଭିଃ ।
ଜଘାନ ରକ୍ତବୀଜଂ ତଂ ଚାମୁଂଡା ପୀତ ଶୋଣିତମ୍ ॥61॥

ସ ପପାତ ମହୀପୃଷ୍ଠେ ଶସ୍ତ୍ରସଂଘସମାହତଃ ।
ନୀରକ୍ତଶ୍ଚ ମହୀପାଲ ରକ୍ତବୀଜୋ ମହାସୁରଃ ॥62॥

ତତସ୍ତେ ହର୍ଷ ମତୁଲଂ ଅଵାପୁସ୍ତ୍ରିଦଶା ନୃପ ।
ତେଷାଂ ମାତୃଗଣୋ ଜାତୋ ନନର୍ତାସୃଂଂଗମଦୋଦ୍ଧତଃ ॥63॥

॥ ସ୍ଵସ୍ତି ଶ୍ରୀ ମାର୍କଂଡେୟ ପୁରାଣେ ସାଵର୍ନିକେ ମନ୍ଵଂତରେ ଦେଵି ମହତ୍ମ୍ୟେ ରକ୍ତବୀଜଵଧୋନାମ ଅଷ୍ଟମୋଧ୍ୟାୟ ସମାପ୍ତମ୍ ॥

ଆହୁତି
ଓଂ ଜୟଂତୀ ସାଂଗାୟୈ ସଶକ୍ତିକାୟୈ ସପରିଵାରାୟୈ ସଵାହନାୟୈ ରକ୍ତାକ୍ଷ୍ୟୈ ଅଷ୍ଟମାତୃ ସହିତାୟୈ ମହାହୁତିଂ ସମର୍ପୟାମି ନମଃ ସ୍ଵାହା ॥