ଦେଵୀ ମାହାତ୍ମ୍ୟଂ ଦୁର୍ଗା ସପ୍ତଶତି ଚତୁର୍ଥୋଽଧ୍ୟାୟଃ

ଶକ୍ରାଦିସ୍ତୁତିର୍ନାମ ଚତୁର୍ଧୋଽଧ୍ୟାୟଃ ॥

ଧ୍ୟାନଂ
କାଲାଭ୍ରାଭାଂ କଟାକ୍ଷୈର୍ ଅରି କୁଲ ଭୟଦାଂ ମୌଳି ବଦ୍ଧେଂଦୁ ରେଖାଂ
ଶଂଖ-ଚକ୍ରଂ କୃପାଣଂ ତ୍ରିଶିଖମପି କରୈ-ରୁଦ୍ଵହଂତୀଂ ତ୍ରିନେ଱୍ତ୍ରମ୍ ।
ସିଂହ ସ୍କଂଦାଧିରୂଢାଂ ତ୍ରିଭୁଵନ-ମଖିଲଂ ତେଜସା ପୂରୟଂତୀଂ
ଧ୍ୟାୟେ-ଦ୍ଦୁର୍ଗାଂ ଜୟାଖ୍ୟାଂ ତ୍ରିଦଶ-ପରିଵୃତାଂ ସେଵିତାଂ ସିଦ୍ଧି କାମୈଃ ॥

ଋଷିରୁଵାଚ ॥1॥

ଶକ୍ରାଦୟଃ ସୁରଗଣା ନିହତେଽତିଵୀର୍ୟେ
ତସ୍ମିଂଦୁରାତ୍ମନି ସୁରାରିବଲେ ଚ ଦେଵ୍ୟା ।
ତାଂ ତୁଷ୍ଟୁଵୁଃ ପ୍ରଣତିନମ୍ରଶିରୋଧରାଂସା
ଵାଗ୍ଭିଃ ପ୍ରହର୍ଷପୁଲକୋଦ୍ଗମଚାରୁଦେହାଃ ॥ 2 ॥

ଦେଵ୍ୟା ୟୟା ତତମିଦଂ ଜଗଦାତ୍ମଶକ୍ତ୍ୟା
ନିଃଶେଷଦେଵଗଣଶକ୍ତିସମୂହମୂର୍ତ୍ୟା ।
ତାମଂବିକାମଖିଲଦେଵମହର୍ଷିପୂଜ୍ୟାଂ
ଭକ୍ତ୍ୟା ନତାଃ ସ୍ମ ଵିଦଧାତୁଶୁଭାନି ସା ନଃ ॥3॥

ୟସ୍ୟାଃ ପ୍ରଭାଵମତୁଲଂ ଭଗଵାନନଂତୋ
ବ୍ରହ୍ମା ହରଶ୍ଚ ନହି ଵକ୍ତୁମଲଂ ବଲଂ ଚ ।
ସା ଚଂଡିକାଽଖିଲ ଜଗତ୍ପରିପାଲନାୟ
ନାଶାୟ ଚାଶୁଭଭୟସ୍ୟ ମତିଂ କରୋତୁ ॥4॥

ୟା ଶ୍ରୀଃ ସ୍ଵୟଂ ସୁକୃତିନାଂ ଭଵନେଷ୍ଵଲକ୍ଷ୍ମୀଃ
ପାପାତ୍ମନାଂ କୃତଧିୟାଂ ହୃଦୟେଷୁ ବୁଦ୍ଧିଃ ।
ଶ୍ରଦ୍ଥା ସତାଂ କୁଲଜନପ୍ରଭଵସ୍ୟ ଲଜ୍ଜା
ତାଂ ତ୍ଵାଂ ନତାଃ ସ୍ମ ପରିପାଲୟ ଦେଵି ଵିଶ୍ଵମ୍ ॥5॥

କିଂ ଵର୍ଣୟାମ ତଵରୂପ ମଚିଂତ୍ୟମେତତ୍
କିଂଚାତିଵୀର୍ୟମସୁରକ୍ଷୟକାରି ଭୂରି ।
କିଂ ଚାହଵେଷୁ ଚରିତାନି ତଵାତ୍ଭୁତାନି
ସର୍ଵେଷୁ ଦେଵ୍ୟସୁରଦେଵଗଣାଦିକେଷୁ । ॥6॥

ହେତୁଃ ସମସ୍ତଜଗତାଂ ତ୍ରିଗୁଣାପି ଦୋଷୈଃ
ନ ଜ୍ଞାୟସେ ହରିହରାଦିଭିରଵ୍ୟପାରା ।
ସର୍ଵାଶ୍ରୟାଖିଲମିଦଂ ଜଗଦଂଶଭୂତଂ
ଅଵ୍ୟାକୃତା ହି ପରମା ପ୍ରକୃତିସ୍ତ୍ଵମାଦ୍ୟା ॥6॥

ୟସ୍ୟାଃ ସମସ୍ତସୁରତା ସମୁଦୀରଣେନ
ତୃପ୍ତିଂ ପ୍ରୟାତି ସକଲେଷୁ ମଖେଷୁ ଦେଵି ।
ସ୍ଵାହାସି ଵୈ ପିତୃ ଗଣସ୍ୟ ଚ ତୃପ୍ତି ହେତୁ
ରୁଚ୍ଚାର୍ୟସେ ତ୍ଵମତ ଏଵ ଜନୈଃ ସ୍ଵଧାଚ ॥8॥

ୟା ମୁକ୍ତିହେତୁରଵିଚିଂତ୍ୟ ମହାଵ୍ରତା ତ୍ଵଂ
ଅଭ୍ୟସ୍ୟସେ ସୁନିୟତେଂଦ୍ରିୟତତ୍ଵସାରୈଃ ।
ମୋକ୍ଷାର୍ଥିଭିର୍ମୁନିଭିରସ୍ତସମସ୍ତଦୋଷୈ
ର୍ଵିଦ୍ୟାଽସି ସା ଭଗଵତୀ ପରମା ହି ଦେଵି ॥9॥

ଶବ୍ଦାତ୍ମିକା ସୁଵିମଲର୍ଗ୍ୟଜୁଷାଂ ନିଧାନଂ
ମୁଦ୍ଗୀଥରମ୍ୟପଦପାଠଵତାଂ ଚ ସାମ୍ନାମ୍ ।
ଦେଵୀ ତ୍ରୟୀ ଭଗଵତୀ ଭଵଭାଵନାୟ
ଵାର୍ତାସି ସର୍ଵ ଜଗତାଂ ପରମାର୍ତିହଂତ୍ରୀ ॥10॥

ମେଧାସି ଦେଵି ଵିଦିତାଖିଲଶାସ୍ତ୍ରସାରା
ଦୁର୍ଗାଽସି ଦୁର୍ଗଭଵସାଗରସନୌରସଂଗା ।
ଶ୍ରୀଃ କୈଟ ଭାରିହୃଦୟୈକକୃତାଧିଵାସା
ଗୌରୀ ତ୍ଵମେଵ ଶଶିମୌଳିକୃତ ପ୍ରତିଷ୍ଠା ॥11॥

ଈଷତ୍ସହାସମମଲଂ ପରିପୂର୍ଣ ଚଂଦ୍ର
ବିଂବାନୁକାରି କନକୋତ୍ତମକାଂତିକାଂତମ୍ ।
ଅତ୍ୟଦ୍ଭୁତଂ ପ୍ରହୃତମାତ୍ତରୁଷା ତଥାପି
ଵକ୍ତ୍ରଂ ଵିଲୋକ୍ୟ ସହସା ମହିଷାସୁରେଣ ॥12॥

ଦୃଷ୍ଟ୍ଵାତୁ ଦେଵି କୁପିତଂ ଭ୍ରୁକୁଟୀକରାଳ
ମୁଦ୍ୟଚ୍ଛଶାଂକସଦୃଶଚ୍ଛଵି ୟନ୍ନ ସଦ୍ୟଃ ।
ପ୍ରାଣାନ୍ ମୁମୋଚ ମହିଷସ୍ତଦତୀଵ ଚିତ୍ରଂ
କୈର୍ଜୀଵ୍ୟତେ ହି କୁପିତାଂତକଦର୍ଶନେନ । ॥13॥

ଦେଵିପ୍ରସୀଦ ପରମା ଭଵତୀ ଭଵାୟ
ସଦ୍ୟୋ ଵିନାଶୟସି କୋପଵତୀ କୁଲାନି ।
ଵିଜ୍ଞାତମେତଦଧୁନୈଵ ୟଦସ୍ତମେତତ୍
ନ୍ନୀତଂ ବଲଂ ସୁଵିପୁଲଂ ମହିଷାସୁରସ୍ୟ ॥14॥

ତେ ସମ୍ମତା ଜନପଦେଷୁ ଧନାନି ତେଷାଂ
ତେଷାଂ ୟଶାଂସି ନ ଚ ସୀଦତି ଧର୍ମଵର୍ଗଃ ।
ଧନ୍ୟାସ୍ତ​ଏଵ ନିଭୃତାତ୍ମଜଭୃତ୍ୟଦାରା
ୟେଷାଂ ସଦାଭ୍ୟୁଦୟଦା ଭଵତୀ ପ୍ରସନ୍ନା॥15॥

ଧର୍ମ୍ୟାଣି ଦେଵି ସକଲାନି ସଦୈଵ କର୍ମାନି
ଣ୍ୟତ୍ୟାଦୃତଃ ପ୍ରତିଦିନଂ ସୁକୃତୀ କରୋତି ।
ସ୍ଵର୍ଗଂ ପ୍ରୟାତି ଚ ତତୋ ଭଵତୀ ପ୍ରସାଦା
ଲ୍ଲୋକତ୍ରୟେଽପି ଫଲଦା ନନୁ ଦେଵି ତେନ ॥16॥

ଦୁର୍ଗେ ସ୍ମୃତା ହରସି ଭୀତି ମଶେଶ ଜଂତୋଃ
ସ୍ଵସ୍ଥୈଃ ସ୍ମୃତା ମତିମତୀଵ ଶୁଭାଂ ଦଦାସି ।
ଦାରିଦ୍ର୍ୟଦୁଃଖଭୟହାରିଣି କା ତ୍ଵଦନ୍ୟା
ସର୍ଵୋପକାରକରଣାୟ ସଦାର୍ଦ୍ରଚିତ୍ତା ॥17॥

ଏଭିର୍ହତୈର୍ଜଗଦୁପୈତି ସୁଖଂ ତଥୈତେ
କୁର୍ଵଂତୁ ନାମ ନରକାୟ ଚିରାୟ ପାପମ୍ ।
ସଂଗ୍ରାମମୃତ୍ୟୁମଧିଗମ୍ୟ ଦିଵଂପ୍ରୟାଂତୁ
ମତ୍ଵେତି ନୂନମହିତାନ୍ଵିନିହଂସି ଦେଵି ॥18॥

ଦୃଷ୍ଟ୍ଵୈଵ କିଂ ନ ଭଵତୀ ପ୍ରକରୋତି ଭସ୍ମ
ସର୍ଵାସୁରାନରିଷୁ ୟତ୍ପ୍ରହିଣୋଷି ଶସ୍ତ୍ରମ୍ ।
ଲୋକାନ୍ପ୍ରୟାଂତୁ ରିପଵୋଽପି ହି ଶସ୍ତ୍ରପୂତା
ଇତ୍ଥଂ ମତିର୍ଭଵତି ତେଷ୍ଵହି ତେଽଷୁସାଧ୍ଵୀ ॥19॥

ଖଡ୍ଗ ପ୍ରଭାନିକରଵିସ୍ଫୁରଣୈସ୍ତଧୋଗ୍ରୈଃ
ଶୂଲାଗ୍ରକାଂତିନିଵହେନ ଦୃଶୋଽସୁରାଣାମ୍ ।
ୟନ୍ନାଗତା ଵିଲୟମଂଶୁମଦିଂଦୁଖଂଡ
ୟୋଗ୍ୟାନନଂ ତଵ ଵିଲୋକ ୟତାଂ ତଦେତତ୍ ॥20॥

ଦୁର୍ଵୃତ୍ତ ଵୃତ୍ତ ଶମନଂ ତଵ ଦେଵି ଶୀଲଂ
ରୂପଂ ତଥୈତଦଵିଚିଂତ୍ୟମତୁଲ୍ୟମନ୍ୟୈଃ ।
ଵୀର୍ୟଂ ଚ ହଂତୃ ହୃତଦେଵପରାକ୍ରମାଣାଂ
ଵୈରିଷ୍ଵପି ପ୍ରକଟିତୈଵ ଦୟା ତ୍ଵୟେତ୍ଥମ୍ ॥21॥

କେନୋପମା ଭଵତୁ ତେଽସ୍ୟ ପରାକ୍ରମସ୍ୟ
ରୂପଂ ଚ ଶତୃଭୟ କାର୍ୟତିହାରି କୁତ୍ର ।
ଚିତ୍ତେକୃପା ସମରନିଷ୍ଟୁରତା ଚ ଦୃଷ୍ଟା
ତ୍ଵୟ୍ୟେଵ ଦେଵି ଵରଦେ ଭୁଵନତ୍ରୟେଽପି ॥22॥

ତ୍ରୈଲୋକ୍ୟମେତଦଖିଲଂ ରିପୁନାଶନେନ
ତ୍ରାତଂ ତ୍ଵୟା ସମରମୂର୍ଧନି ତେଽପି ହତ୍ଵା ।
ନୀତା ଦିଵଂ ରିପୁଗଣା ଭୟମପ୍ୟପାସ୍ତଂ
ଅସ୍ମାକମୁନ୍ମଦସୁରାରିଭଵଂ ନମସ୍ତେ ॥23॥

ଶୂଲେନ ପାହି ନୋ ଦେଵି ପାହି ଖଡ୍ଗେନ ଚାଂଭିକେ ।
ଘଂଟାସ୍ଵନେନ ନଃ ପାହି ଚାପଜ୍ୟାନିସ୍ଵନେନ ଚ ॥24॥

ପ୍ରାଚ୍ୟାଂ ରକ୍ଷ ପ୍ରତୀଚ୍ୟାଂ ଚ ଚଂଡିକେ ରକ୍ଷ ଦକ୍ଷିଣେ ।
ଭ୍ରାମଣେନାତ୍ମଶୂଲସ୍ୟ ଉତ୍ତରସ୍ୟାଂ ତଥେଶ୍ଵରୀ॥25॥

ସୌମ୍ୟାନି ୟାନି ରୂପାଣି ତ୍ରୈଲୋକ୍ୟେ ଵିଚରଂତିତେ ।
ୟାନି ଚାତ୍ୟଂତ ଘୋରାଣି ତୈରକ୍ଷାସ୍ମାଂସ୍ତଥାଭୁଵମ୍ ॥26॥

ଖଡ୍ଗଶୂଲଗଦାଦୀନି ୟାନି ଚାସ୍ତ୍ରାଣି ତେଽଂବିକେ ।
କରପଲ୍ଲଵସଂଗୀନି ତୈରସ୍ମାନ୍ରକ୍ଷ ସର୍ଵତଃ ॥27॥

ଋଷିରୁଵାଚ ॥28॥

ଏଵଂ ସ୍ତୁତା ସୁରୈର୍ଦିଵ୍ୟୈଃ କୁସୁମୈର୍ନଂଦନୋଦ୍ଭଵୈଃ ।
ଅର୍ଚିତା ଜଗତାଂ ଧାତ୍ରୀ ତଥା ଗଂଧାନୁ ଲେପନୈଃ ॥29॥

ଭକ୍ତ୍ୟା ସମସ୍ତୈସ୍ରି ଶୈର୍ଦିଵ୍ୟୈର୍ଧୂପୈଃ ସୁଧୂପିତା ।
ପ୍ରାହ ପ୍ରସାଦସୁମୁଖୀ ସମସ୍ତାନ୍ ପ୍ରଣତାନ୍ ସୁରାନ୍। ॥30॥

ଦେଵ୍ୟୁଵାଚ ॥31॥

ଵ୍ରିୟତାଂ ତ୍ରିଦଶାଃ ସର୍ଵେ ୟଦସ୍ମତ୍ତୋଽଭିଵାଂଛିତମ୍ ॥32॥

ଦେଵା ଊଚୁ ॥33॥

ଭଗଵତ୍ୟା କୃତଂ ସର୍ଵଂ ନ କିଂଚିଦଵଶିଷ୍ୟତେ ।
ୟଦୟଂ ନିହତଃ ଶତ୍ରୁ ରସ୍ମାକଂ ମହିଷାସୁରଃ ॥34॥

ୟଦିଚାପି ଵରୋ ଦେୟ ସ୍ତ୍ଵୟାଽସ୍ମାକଂ ମହେଶ୍ଵରି ।
ସଂସ୍ମୃତା ସଂସ୍ମୃତା ତ୍ଵଂ ନୋ ହିଂ ସେଥାଃପରମାପଦଃ॥35॥

ୟଶ୍ଚ ମର୍ତ୍ୟଃ ସ୍ତଵୈରେଭିସ୍ତ୍ଵାଂ ସ୍ତୋଷ୍ୟତ୍ୟମଲାନନେ ।
ତସ୍ୟ ଵିତ୍ତର୍ଦ୍ଧିଵିଭଵୈର୍ଧନଦାରାଦି ସଂପଦାମ୍ ॥36॥

ଵୃଦ୍ଦୟେଽ ସ୍ମତ୍ପ୍ରସନ୍ନା ତ୍ଵଂ ଭଵେଥାଃ ସର୍ଵଦାଂଭିକେ ॥37॥

ଋଷିରୁଵାଚ ॥38॥

ଇତି ପ୍ରସାଦିତା ଦେଵୈର୍ଜଗତୋଽର୍ଥେ ତଥାତ୍ମନଃ ।
ତଥେତ୍ୟୁକ୍ତ୍ଵା ଭଦ୍ରକାଳୀ ବଭୂଵାଂତର୍ହିତା ନୃପ ॥39॥

ଇତ୍ୟେତତ୍କଥିତଂ ଭୂପ ସଂଭୂତା ସା ୟଥାପୁରା ।
ଦେଵୀ ଦେଵଶରୀରେଭ୍ୟୋ ଜଗତ୍ପ୍ରୟହିତୈଷିଣୀ ॥40॥

ପୁନଶ୍ଚ ଗୌରୀ ଦେହାତ୍ସା ସମୁଦ୍ଭୂତା ୟଥାଭଵତ୍ ।
ଵଧାୟ ଦୁଷ୍ଟ ଦୈତ୍ୟାନାଂ ତଥା ଶୁଂଭନିଶୁଂଭୟୋଃ ॥41॥

ରକ୍ଷଣାୟ ଚ ଲୋକାନାଂ ଦେଵାନାମୁପକାରିଣୀ ।
ତଚ୍ଛୃ ଣୁଷ୍ଵ ମୟାଖ୍ୟାତଂ ୟଥାଵତ୍କଥୟାମିତେ
ହ୍ରୀଂ ଓଂ ॥42॥

॥ ଜୟ ଜୟ ଶ୍ରୀ ମାର୍କଂଡେୟ ପୁରାଣେ ସାଵର୍ନିକେ ମନ୍ଵଂତରେ ଦେଵି ମହତ୍ମ୍ୟେ ଶକ୍ରାଦିସ୍ତୁତିର୍ନାମ ଚତୁର୍ଧୋଽଧ୍ୟାୟଃ ସମାପ୍ତମ୍ ॥

ଆହୁତି
ହ୍ରୀଂ ଜୟଂତୀ ସାଂଗାୟୈ ସାୟୁଧାୟୈ ସଶକ୍ତିକାୟୈ ସପରିଵାରାୟୈ ସଵାହନାୟୈ ଶ୍ରୀ ମହାଲକ୍ଷ୍ମ୍ୟୈ ଲକ୍ଷ୍ମୀ ବୀଜାଦିଷ୍ଟାୟୈ ମହାହୁତିଂ ସମର୍ପୟାମି ନମଃ ସ୍ଵାହା ॥