ଦେଵ୍ୟପରାଧ କ୍ଷମାପଣ ସ୍ତୋତ୍ରମ୍

ନ ମଂତ୍ରଂ ନୋ ୟଂତ୍ରଂ ତଦପି ଚ ନ ଜାନେ ସ୍ତୁତିମହୋ
ନ ଚାହ୍ଵାନଂ ଧ୍ୟାନଂ ତଦପି ଚ ନ ଜାନେ ସ୍ତୁତିକଥାଃ ।
ନ ଜାନେ ମୁଦ୍ରାସ୍ତେ ତଦପି ଚ ନ ଜାନେ ଵିଲପନଂ
ପରଂ ଜାନେ ମାତସ୍ତ୍ଵଦନୁସରଣଂ କ୍ଲେଶହରଣମ୍ ॥ 1 ॥

ଵିଧେରଜ୍ଞାନେନ ଦ୍ରଵିଣଵିରହେଣାଲସତୟା
ଵିଧେୟାଶକ୍ୟତ୍ଵାତ୍ତଵ ଚରଣୟୋର୍ୟା ଚ୍ୟୁତିରଭୂତ୍ ।
ତଦେତତ୍ କ୍ଷଂତଵ୍ୟଂ ଜନନି ସକଲୋଦ୍ଧାରିଣି ଶିଵେ
କୁପୁତ୍ରୋ ଜାୟେତ କ୍ଵଚିଦପି କୁମାତା ନ ଭଵତି ॥ 2 ॥

ପୃଥିଵ୍ୟାଂ ପୁତ୍ରାସ୍ତେ ଜନନି ବହଵଃ ସଂତି ସରଲାଃ
ପରଂ ତେଷାଂ ମଧ୍ୟେ ଵିରଲତରଲୋଽହଂ ତଵ ସୁତଃ ।
ମଦୀୟୋଽୟଂ ତ୍ୟାଗଃ ସମୁଚିତମିଦଂ ନୋ ତଵ ଶିଵେ
କୁପୁତ୍ରୋ ଜାୟେତ କ୍ଵଚିଦପି କୁମାତା ନ ଭଵତି ॥ 3 ॥

ଜଗନ୍ମାତର୍ମାତସ୍ତଵ ଚରଣସେଵା ନ ରଚିତା
ନ ଵା ଦତ୍ତଂ ଦେଵି ଦ୍ରଵିଣମପି ଭୂୟସ୍ତଵ ମୟା ।
ତଥାପି ତ୍ଵଂ ସ୍ନେହଂ ମୟି ନିରୁପମଂ ୟତ୍ପ୍ରକୁରୁଷେ
କୁପୁତ୍ରୋ ଜାୟେତ କ୍ଵଚିଦପି କୁମାତା ନ ଭଵତି ॥ 4 ॥

ପରିତ୍ୟକ୍ତା ଦେଵାନ୍ଵିଵିଧଵିଧିସେଵାକୁଲତୟା
ମୟା ପଂଚାଶୀତେରଧିକମପନୀତେ ତୁ ଵୟସି ।
ଇଦାନୀଂ ଚେନ୍ମାତସ୍ତଵ ୟଦି କୃପା ନାପି ଭଵିତା
ନିରାଲଂବୋ ଲଂବୋଦରଜନନି କଂ ୟାମି ଶରଣମ୍ ॥ 5 ॥

ଶ୍ଵପାକୋ ଜଲ୍ପାକୋ ଭଵତି ମଧୁପାକୋପମଗିରା
ନିରାତଂକୋ ରଂକୋ ଵିହରତି ଚିରଂ କୋଟିକନକୈଃ ।
ତଵାପର୍ଣେ କର୍ଣେ ଵିଶତି ମନୁଵର୍ଣେ ଫଲମିଦଂ
ଜନଃ କୋ ଜାନୀତେ ଜନନି ଜପନୀୟଂ ଜପଵିଧୌ ॥ 6 ॥

ଚିତାଭସ୍ମାଲେପୋ ଗରଳମଶନଂ ଦିକ୍ପଟଧରୋ
ଜଟାଧାରୀ କଂଠେ ଭୁଜଗପତିହାରୀ ପଶୁପତିଃ ।
କପାଲୀ ଭୂତେଶୋ ଭଜତି ଜଗଦୀଶୈକପଦଵୀଂ
ଭଵାନୀ ତ୍ଵତ୍ପାଣିଗ୍ରହଣପରିପାଟୀ ଫଲମିଦମ୍ ॥ 7 ॥

ନ ମୋକ୍ଷସ୍ୟାକାଂକ୍ଷା ନ ଚ ଵିଭଵଵାଂଛାପି ଚ ନ ମେ
ନ ଵିଜ୍ଞାନାପେକ୍ଷା ଶଶିମୁଖି ସୁଖେଚ୍ଛାପି ନ ପୁନଃ ।
ଅତସ୍ତ୍ଵାଂ ସଂୟାଚେ ଜନନି ଜନନଂ ୟାତୁ ମମ ଵୈ
ମୃଡାନୀ ରୁଦ୍ରାଣୀ ଶିଵ ଶିଵ ଭଵାନୀତି ଜପତଃ ॥ 8 ॥

ନାରାଧିତାସି ଵିଧିନା ଵିଵିଧୋପଚାରୈଃ
କିଂ ରୂକ୍ଷଚିଂତନପରୈର୍ନ କୃତଂ ଵଚୋଭିଃ ।
ଶ୍ୟାମେ ତ୍ଵମେଵ ୟଦି କିଂଚନ ମୟ୍ୟନାଥେ
ଧତ୍ସେ କୃପାମୁଚିତମଂବ ପରଂ ତଵୈଵ ॥ 9 ॥

ଆପତ୍ସୁ ମଗ୍ନଃ ସ୍ମରଣଂ ତ୍ଵଦୀୟଂ
କରୋମି ଦୁର୍ଗେ କରୁଣାର୍ଣଵେ ଶିଵେ ।
ନୈତଚ୍ଛଠତ୍ଵଂ ମମ ଭାଵୟେଥାଃ
କ୍ଷୁଧାତୃଷାର୍ତାଃ ଜନନୀଂ ସ୍ମରଂତି ॥ 10 ॥

ଜଗଦଂବ ଵିଚିତ୍ରମତ୍ର କିଂ
ପରିପୂର୍ଣା କରୁଣାସ୍ତି ଚେନ୍ମୟି ।
ଅପରାଧପରଂପରାଵୃତଂ
ନ ହି ମାତା ସମୁପେକ୍ଷତେ ସୁତମ୍ ॥ 11 ॥

ମତ୍ସମଃ ପାତକୀ ନାସ୍ତି ପାପଘ୍ନୀ ତ୍ଵତ୍ସମା ନ ହି ।
ଏଵଂ ଜ୍ଞାତ୍ଵା ମହାଦେଵୀ ୟଥା ୟୋଗ୍ୟଂ ତଥା କୁରୁ ॥ 12 ॥

ଇତି ଶ୍ରୀମଚ୍ଛଂକରାଚାର୍ୟ ଵିରଚିତଂ ଦେଵ୍ୟପରାଧକ୍ଷମାପଣ ସ୍ତୋତ୍ରମ୍ ।