ശ്രീ മധ്വാചാര്യ കൃത ദ്വാദശ സ്തോത്ര – ചതുര്ഥസ്തോത്രമ്

അഥ ചതുര്ഥസ്തോത്രമ്

നിജപൂര്ണസുഖാമിതബോധതനുഃ പരശക്തിരനംതഗുണഃ പരമഃ ।
അജരാമരണഃ സകലാര്തിഹരഃ കമലാപതിരീഡ്യതമോഽവതു നഃ ॥ 1॥

യദസുപ്തിഗതോഽപി ഹരിഃ സുഖവാന് സുഖരൂപിണമാഹുരതോ നിഗമാഃ ।
സ്വമതിപ്രഭവം ജഗദസ്യ യതഃ പരബോധതനും ച തതഃ ഖപതിമ് ॥ 2॥ (സുമതിപ്രഭവമ്)
ബഹുചിത്രജഗത് ബഹുധാകരണാത്പരശക്തിരനംതഗുണഃ പരമഃ ।
സുഖരൂപമമുഷ്യപദം പരമം സ്മരതസ്തു ഭവിഷ്യതി തത്സതതമ് ॥ 3॥

സ്മരണേ ഹി പരേശിതുരസ്യ വിഭോര്മലിനാനി മനാംസി കുതഃ കരണമ് ।
വിമലം ഹി പദം പരമം സ്വരതം തരുണാര്കസവര്ണമജസ്യ ഹരേഃ ॥ 4॥

വിമലൈഃ ശ്രുതിശാണനിശാതതമൈഃ സുമനോഽസിഭിരാശു നിഹത്യ ദൃഢമ് ।
ബലിനം നിജവൈരിണമാത്മതമോഭിദമീശമനംതമുപാസ്വ ഹരിമ് ॥ 5॥

ന ഹി വിശ്വസൃജോ വിഭുശംഭുപുരംദര സൂര്യമുഖാനപരാനപരാന് ।
സൃജതീഡ്യതമോഽവതി ഹംതി നിജം പദമാപയതി പ്രണതാം സ്വധിയാ ॥ 6॥

പരമോഽപി രമേശിതുരസ്യ സമോ ന ഹി കശ്ചിദഭൂന്ന ഭവിഷ്യതി ച ।
ക്വചിദദ്യതനോഽപി ന പൂര്ണസദാഗണിതേഡ്യഗുണാനുഭവൈകതനോഃ ॥ 7॥

ഇതി ദേവവരസ്യ ഹരേഃ സ്തവനം കൃതവാന് മുനിരുത്തമമാദരതഃ ।
സുഖതീര്ഥപദാഭിഹിതഃ പഠതസ്തദിദം ഭവതി ധ്രുവമുച്ചസുഖമ് ॥ 8॥

ഇതി ശ്രീമദാനംദതീര്ഥഭഗവത്പാദാചാര്യ വിരചിതം
ദ്വാദശസ്തോത്രേഷു ചതുര്ഥസ്തോത്രം സംപൂര്ണമ്