ശ്രീ ഹരി വായു സ്തുതി

അഥ നഖസ്തുതിഃ
പാംത്വസ്മാന് പുരുഹൂതവൈരിബലവന്മാതംഗമാദ്യദ്ഘടാ-
-കുംഭോച്ചാദ്രിവിപാടനാധികപടു പ്രത്യേക വജ്രായിതാഃ ।
ശ്രീമത്കംഠീരവാസ്യപ്രതതസുനഖരാ ദാരിതാരാതിദൂര-
-പ്രധ്വസ്തധ്വാംതശാംതപ്രവിതതമനസാ ഭാവിതാ ഭൂരിഭാഗൈഃ ॥ 1 ॥

ലക്ഷ്മീകാംത സമംതതോഽപി കലയന് നൈവേശിതുസ്തേ സമം
പശ്യാമ്യുത്തമവസ്തു ദൂരതരതോപാസ്തം രസോ യോഽഷ്ടമഃ ।
യദ്രോഷോത്കര ദക്ഷ നേത്ര കുടില പ്രാംതോത്ഥിതാഗ്നി സ്ഫുരത്
ഖദ്യോതോപമ വിസ്ഫുലിംഗഭസിതാ ബ്രഹ്മേശശക്രോത്കരാഃ ॥ 2 ॥

അഥ വായുസ്തുതിഃ
ശ്രീമദ്വിഷ്ണ്വംഘ്രിനിഷ്ഠാതിഗുണഗുരുതമശ്രീമദാനംദതീര്ഥ-
-ത്രൈലോക്യാചാര്യപാദോജ്ജ്വലജലജലസത്പാംസവോഽസ്മാന് പുനംതു ।
വാചാം യത്ര പ്രണേത്രീ ത്രിഭുവനമഹിതാ ശാരദാ ശാരദേംദു-
-ജ്യോത്സ്നാഭദ്രസ്മിതശ്രീധവളിതകകുഭാ പ്രേമഭാരം ബഭാര ॥ 1 ॥

ഉത്കംഠാകുംഠകോലാഹലജവവിജിതാജസ്രസേവാനുവൃദ്ധ-
-പ്രാജ്ഞാത്മജ്ഞാനധൂതാംധതമസസുമനോമൌലിരത്നാവളീനാമ് ।
ഭക്ത്യുദ്രേകാവഗാഢപ്രഘടനസധടാത്കാരസംഘൃഷ്യമാണ-
പ്രാംതപ്രാഗ്ര്യാംഘ്രിപീഠോത്ഥിതകനകരജഃപിംജരാരംജിതാശാഃ ॥ 2 ॥

ജന്മാധിവ്യാധ്യുപാധിപ്രതിഹതിവിരഹപ്രാപകാണാം ഗുണാനാം
അഗ്ര്യാണാമര്പകാണാം ചിരമുദിതചിദാനംദസംദോഹദാനാമ് ।
ഏതേഷാമേഷ ദോഷപ്രമുഷിതമനസാം ദ്വേഷിണാം ദൂഷകാണാം
ദൈത്യാനാമാര്തിമംധേ തമസി വിദധതാം സംസ്തവേ നാസ്മി ശക്തഃ ॥ 3 ॥

അസ്യാവിഷ്കര്തുകാമം കലിമലകലുഷേഽസ്മിന് ജനേ ജ്ഞാനമാര്ഗം
വംദ്യം ചംദ്രേംദ്രരുദ്രദ്യുമണിഫണിവയോനായകാദ്യൈരിഹാദ്യ ।
മധ്വാഖ്യം മംത്രസിദ്ധം കിമുത കൃതവതോ മാരുതസ്യാവതാരം
പാതാരം പാരമേഷ്ട്യം പദമപവിപദഃ പ്രാപ്തുരാപന്നപുംസാമ് ॥ 4 ॥

ഉദ്യദ്വിദ്യുത്പ്രചംഡാം നിജരുചിനികരവ്യാപ്തലോകാവകാശോ
ബിഭ്രദ്ഭീമോ ഭുജേ യോഽഭ്യുദിതദിനകരാഭാംഗദാഢ്യ പ്രകാംഡേ ।
വീര്യോദ്ധാര്യാം ഗദാഗ്ര്യാമയമിഹ സുമതിം വായുദേവോ വിദധ്യാത്
അധ്യാത്മജ്ഞാനനേതാ യതിവരമഹിതോ ഭൂമിഭൂഷാമണിര്മേ ॥ 5 ॥

സംസാരോത്താപനിത്യോപശമദസദയസ്നേഹഹാസാംബുപൂര-
-പ്രോദ്യദ്വിദ്യാനവദ്യദ്യുതിമണികിരണശ്രേണിസംപൂരിതാശഃ ।
ശ്രീവത്സാംകാധിവാസോചിതതരസരളശ്രീമദാനംദതീര്ഥ-
-ക്ഷീരാംഭോധിർവിഭിംദ്യാദ്ഭവദനഭിമതം ഭൂരി മേ ഭൂതിഹേതുഃ ॥ 6 ॥

മൂര്ധന്യേഷോഽംജലിര്മേ ദൃഢതരമിഹ തേ ബധ്യതേ ബംധപാശ-
-ച്ഛേത്രേ ദാത്രേ സുഖാനാം ഭജതി ഭുവി ഭവിഷ്യദ്വിധാത്രേ ദ്യുഭര്ത്രേ ।
അത്യംതം സംതതം ത്വം പ്രദിശ പദയുഗേ ഹംത സംതാപഭാജാ-
-മസ്മാകം ഭക്തിമേകാം ഭഗവത ഉത തേ മാധവസ്യാഥ വായോഃ ॥ 7 ॥

സാഭ്രോഷ്ണാഭീശുശുഭ്രപ്രഭമഭയ നഭോ ഭൂരിഭൂഭൃദ്വിഭൂതി-
-ഭ്രാജിഷ്ണുര്ഭൂരൃഭൂണാം ഭവനമപി വിഭോഽഭേദി ബഭ്രേ ബഭൂവേ ।
യേന ഭ്രൂവിഭ്രമസ്തേ ഭ്രമയതു സുഭൃശം ബഭ്രുവദ്ദുര്ഭൃതാശാന്
ഭ്രാംതിര്ഭേദാവഭാസസ്ത്വിതി ഭയമഭിഭൂര്ഭോക്ഷ്യതോ മായിഭിക്ഷൂന് ॥ 8 ॥

യേഽമും ഭാവം ഭജംതേ സുരമുഖസുജനാരാധിതം തേ തൃതീയം
ഭാസംതേ ഭാസുരൈസ്തേ സഹചരചലിതൈശ്ചാമരൈശ്ചാരുവേഷാഃ ।
വൈകുംഠേ കംഠലഗ്നസ്ഥിരശുചിവിലസത്കാംതിതാരുണ്യലീലാ-
ലാവണ്യാപൂര്ണകാംതാകുചഭരസുലഭാശ്ലേഷസമ്മോദസാംദ്രാഃ ॥ 9 ॥

ആനംദാന്മംദമംദാ ദദതി ഹി മരുതഃ കുംദമംദാരനംദ്യാ-
-വര്താമോദാന് ദധാനാ മൃദുപദമുദിതോദ്ഗീതകൈഃ സുംദരീണാമ് ।
വൃംദൈരാവംദ്യമുക്തേംദ്വഹിമഗുമദനാഹീംദ്രദേവേംദ്രസേവ്യേ
മൌകുംദേ മംദിരേഽസ്മിന്നവിരതമുദയന്മോദിനാം ദേവദേവ ॥ 10 ॥

ഉത്തപ്താഽത്യുത്കടത്വിട് പ്രകടകടകടധ്വാനസംഘട്ടനോദ്യ-
-ദ്വിദ്യുദ്വ്യൂഢസ്ഫുലിംഗപ്രകരവികിരണോത്ക്വാഥിതേ ബാധിതാംഗാന് ।
ഉദ്ഗാഢം പാത്യമാനാ തമസി തത ഇതഃ കിംകരൈഃ പംകിലേ തേ
പംക്തിര്ഗ്രാവ്ണാം ഗരിമ്ണാ ഗ്ലപയതി ഹി ഭവദ്വേഷിണോ വിദ്വദാദ്യ ॥ 11 ॥

അസ്മിന്നസ്മദ്ഗുരൂണാം ഹരിചരണചിരധ്യാനസന്മംഗലാനാം
യുഷ്മാകം പാര്ശ്വഭൂമിം ധൃതരണരണികസ്വര്ഗിസേവ്യാം പ്രപന്നഃ ।
യസ്തൂദാസ്തേ സ ആസ്തേഽധിഭവമസുലഭക്ലേശനിര്മൂകമസ്ത-
-പ്രായാനംദം കഥംചിന്ന വസതി സതതം പംചകഷ്ടേഽതികഷ്ടേ ॥ 12 ॥

ക്ഷുത് ക്ഷാമാന് രൂക്ഷരക്ഷോരദഖരനഖരക്ഷുണ്ണവിക്ഷോഭിതാക്ഷാ-
-നാമഗ്നാനാംധകൂപേ ക്ഷുരമുഖമുഖരൈഃ പക്ഷിഭിർവിക്ഷതാംഗാന് ।
പൂയാസൃങ്മൂത്രവിഷ്ഠാകൃമികുലകലിലേ തത്ക്ഷണക്ഷിപ്തശക്ത്യാ-
-ദ്യസ്ത്രവ്രാതാര്ദിതാംസ്ത്വദ്ദ്വിഷ ഉപജിഹതേ വജ്രകല്പാ ജലൂകാഃ ॥ 13 ॥

മാതര്മേ മാതരിശ്വന് പിതരതുലഗുരോ ഭ്രാതരിഷ്ടാപ്തബംധോ
സ്വാമിന് സർവാംതരാത്മന്നജര ജരയിതര്ജന്മമൃത്യാമയാനാമ് ।
ഗോവിംദേ ദേഹി ഭക്തിം ഭവതി ച ഭഗവന്നൂര്ജിതാം നിര്നിമിത്താം
നിർവ്യാജാം നിശ്ചലാം സദ്ഗുണഗണബൃഹതീം ശാശ്വതീമാശു ദേവ ॥ 14 ॥

വിഷ്ണോരത്ത്യുത്തമത്വാദഖിലഗുണഗണൈസ്തത്ര ഭക്തിം ഗരിഷ്ഠാം
ആശ്ലിഷ്ടേ ശ്രീധരാഭ്യാമമുമഥ പരിവാരാത്മനാ സേവകേഷു ।
യഃ സംധത്തേ വിരിംചശ്വസനവിഹഗപാനംതരുദ്രേംദ്രപൂർവേ-
-ഷ്വാധ്യായംസ്താരതമ്യം സ്ഫുടമവതി സദാ വായുരസ്മദ്ഗുരുസ്തമ് ॥ 15 ॥

തത്ത്വജ്ഞാന് മുക്തിഭാജഃ സുഖയിസി ഹി ഗുരോ യോഗ്യതാതാരതമ്യാ-
-ദാധത്സേ മിശ്രബുദ്ധിംസ്ത്രിദിവനിരയഭൂഗോചരാന് നിത്യബദ്ധാന് ।
താമിസ്രാംധാദികാഖ്യേ തമസി സുബഹുലം ദുഃഖയസ്യന്യഥാജ്ഞാന്
വിഷ്ണോരാജ്ഞാഭിരിത്ഥം ശൃതിശതമിതിഹാസാദി ചാകര്ണയാമഃ ॥ 16 ॥

വംദേഽഹം തം ഹനൂമാനിതി മഹിതമഹാപൌരുഷോ ബാഹുശാലീ
ഖ്യാതസ്തേഽഗ്ര്യോഽവതാരഃ സഹിത ഇഹ ബഹുബ്രഹ്മചര്യാദിധര്മൈഃ ।
സസ്നേഹാനാം സഹസ്വാനഹരഹരഹിതം നിര്ദഹന് ദേഹഭാജാം
അംഹോമോഹാപഹോ യഃ സ്പൃഹയതി മഹതീം ഭക്തിമദ്യാപി രാമേ ॥ 17 ॥

പ്രാക്പംചാശത്സഹസ്രൈർവ്യവഹിതമഹിതം യോജനൈഃ പർവതം ത്വം
യാവത്സംജീവനാദ്യൌഷധനിധിമധികപ്രാണ ലംകാമനൈഷിഃ ।
അദ്രാക്ഷീദുത്പതംതം തത ഉത ഗിരിമുത്പാടയംതം ഗൃഹീത്വാ
യാംതം ഖേ രാഘവാംഘ്രൌ പ്രണതമപി തദൈകക്ഷണേ ത്വാം ഹി ലോകഃ ॥ 18 ॥

ക്ഷിപ്തഃ പശ്ചാത്സത്സലീലം ശതമതുലമതേ യോജനാനാം സ ഉച്ച-
-സ്താവദ്വിസ്താരവംശ്ചാപ്യുപലലവ ഇവ വ്യഗ്രബുദ്ധ്യാ ത്വയാഽതഃ ।
സ്വസ്വസ്ഥാനസ്ഥിതാതിസ്ഥിരശകലശിലാജാലസംശ്ലേഷനഷ്ട-
-ഛ്ഛേദാംകഃ പ്രാഗിവാഭൂത് കപിവരവപുഷസ്തേ നമഃ കൌശലായ ॥ 19 ॥

ദൃഷ്ട്വാ ദുഷ്ടാധിപോരഃ സ്ഫുടിതകനകസദ്വര്മ ഘൃഷ്ടാസ്ഥികൂടം
നിഷ്പിഷ്ടം ഹാടകാദ്രിപ്രകടതടതടാകാതിശംകോ ജനോഽഭൂത് ।
യേനാഽജൌ രാവണാരിപ്രിയനടനപടുര്മുഷ്ടിരിഷ്ടം പ്രദേഷ്ടും
കിം നേഷ്ടേ മേ സ തേഽഷ്ടാപദകടകതടിത്കോടിഭാമൃഷ്ടകാഷ്ഠഃ ॥ 20 ॥

ദേവ്യാദേശപ്രണീതിദൃഹിണഹരവരാവധ്യരക്ഷോവിഘാതാ-
-ദ്യാസേവോദ്യദ്ദയാര്ദ്രഃ സഹഭുജമകരോദ്രാമനാമാ മുകുംദഃ ।
ദുഷ്പ്രാപേ പാരമേഷ്ഠ്യേ കരതലമതുലം മൂര്ധിവിന്യസ്യ ധന്യം
തന്വന്ഭൂയഃ പ്രഭൂതപ്രണയവികസിതാബ്ജേക്ഷണസ്ത്വേക്ഷമാണഃ ॥ 21 ॥

ജഘ്നേ നിഘ്നേന വിഘ്നോ ബഹുലബലബകധ്വംസനാദ്യേന ശോച-
-ദ്വിപ്രാനുക്രോശപാശൈരസുവിധൃതിസുഖസ്യൈകചക്രാജനാനാമ് ।
തസ്മൈ തേ ദേവ കുര്മഃ കുരുകുലപതയേ കര്മണാ ച പ്രണാമാന്
കിര്മീരം ദുര്മതീനാം പ്രഥമമഥ ച യോ നര്മണാ നിര്മമാഥ ॥ 22 ॥

നിര്മൃദ്നന്നത്യയത്നം വിജരവര ജരാസംധകായാസ്ഥിസംധീന്
യുദ്ധേ ത്വം സ്വധ്വരേ വാ പശുമിവ ദമയന് വിഷ്ണുപക്ഷദ്വിഡീശമ് ।
യാവത്പ്രത്യക്ഷഭൂതം നിഖിലമഖഭുജം തര്പയാമാസിഥാസൌ
താവത്യാഽയോജി തൃപ്ത്യാ കിമു വദ ഭഗവന് രാജസൂയാശ്വമേധേ ॥ 23 ॥

ക്ഷ്വേലാക്ഷീണാട്ടഹാസം തവ രണമരിഹന്നുദ്ഗദോദ്ദാമബാഹോഃ
ബഹ്വക്ഷൌഹിണ്യനീകക്ഷപണസുനിപുണം യസ്യ സർവോത്തമസ്യ ।
ശുശ്രൂഷാര്ഥം ചകര്ഥ സ്വയമയമഥ സംവക്തുമാനംദതീര്ഥ-
-ശ്രീമന്നാമന്സമര്ഥസ്ത്വമപി ഹി യുവയോഃ പാദപദ്മം പ്രപദ്യേ ॥ 24 ॥

ദൃഹ്യംതീം ഹൃദൃഹം മാം ദൃതമനില ബലാദ്ദ്രാവയംതീമവിദ്യാ-
-നിദ്രാം വിദ്രാവ്യ സദ്യോരചനപടുമഥാഽപാദ്യ വിദ്യാസമുദ്ര ।
വാഗ്ദേവീ സാ സുവിദ്യാദ്രവിണദ വിദിതാ ദ്രൌപദീ രുദ്രപത്ന്യാ-
-ദുദ്രിക്താ ദ്രാഗഭദ്രാദ്രഹയതു ദയിതാ പൂർവഭീമാഽജ്ഞയാ തേ ॥ 25 ॥

യാഭ്യാം ശുശ്രൂഷുരാസീഃ കുരുകുലജനനേ ക്ഷത്രവിപ്രോദിതാഭ്യാം
ബ്രഹ്മഭ്യാം ബൃംഹിതാഭ്യാം ചിതസുഖവപുഷാ കൃഷ്ണനാമാസ്പദാഭ്യാമ് ।
നിര്ഭേദാഭ്യാം വിശേഷാദ്വിവചനവിഷയാഭ്യാമമൂഭ്യാമുഭാഭ്യാം
തുഭ്യം ച ക്ഷേമദേഭ്യഃ സരിസിജവിലസല്ലോചനേഭ്യോ നമോഽസ്തു ॥ 26 ॥

ഗച്ഛന് സൌഗംധികാര്ഥം പഥി സ ഹനുമതഃ പുച്ഛമച്ഛസ്യ ഭീമഃ
പ്രോദ്ധര്തും നാശകത്സ ത്വമുമുരുവപുഷാ ഭീഷയാമാസ ചേതി ।
പൂര്ണജ്ഞാനൌജസോസ്തേ ഗുരുതമ വപുഷോഃ ശ്രീമദാനംദതീര്ഥ
ക്രീഡാമാത്രം തദേതത് പ്രമദദ സുധിയാം മോഹക ദ്വേഷഭാജാമ് ॥ 27 ॥

ബഹ്വീഃ കോടീരടീകഃ കുടലകടുമതീനുത്കടാടോപകോപാന്
ദ്രാക്ച ത്വം സത്വരത്വാച്ചരണദ ഗദയാ പോഥയാമാസിഥാരീന് ।
ഉന്മഥ്യാതഥ്യമിഥ്യാത്വവചനവചനാനുത്പഥസ്ഥാംസ്തഥാഽന്യാന്
പ്രായച്ഛഃ സ്വപ്രിയായൈ പ്രിയതമകുസുമം പ്രാണ തസ്മൈ നമസ്തേ ॥ 28 ॥

ദേഹാദുത്ക്രാമിതാനാമധിപതിരസതാമക്രമാദ്വക്രബുദ്ധിഃ
ക്രുദ്ധഃ ക്രോധൈകവശ്യഃ ക്രിമിരിവ മണിമാന് ദുഷ്കൃതീ നിഷ്ക്രിയാര്ഥമ് ।
ചക്രേ ഭൂചക്രമേത്യ ക്രകചമിവ സതാം ചേതസഃ കഷ്ടശാസ്ത്രം
ദുസ്തര്കം ചക്രപാണേര്ഗുണഗണവിരഹം ജീവതാം ചാധികൃത്യ ॥ 29 ॥

തദ്ദുഷ്പ്രേക്ഷാനുസാരാത്കതിപയകുനരൈരാദൃതോഽന്യൈർവിസൃഷ്ടോ
ബ്രഹ്മാഽഹം നിര്ഗുണോഽഹം വിതഥമിദമിതി ഹ്യേഷ പാഷംഡവാദഃ ।
തദ്യുക്ത്യാഭാസജാലപ്രസരവിഷതരൂദ്ദാഹദക്ഷപ്രമാണ-
-ജ്വാലാമാലാധരാഗ്നിഃ പവന വിജയതേ തേഽവതാരസ്തൃതീയഃ ॥ 30 ॥

ആക്രോശംതോ നിരാശാ ഭയഭരവിവശസ്വാശയാശ്ഛിന്നദര്പാ
വാശംതോ ദേശനാശസ്വിതി ബത കുധിയാം നാശമാശാദശാഽശു ।
ധാവംതോഽശ്ലീലശീലാ വിതഥശപഥശാപാശിവാഃ ശാംതശൌര്യാ-
-സ്ത്വദ്വ്യാഖ്യാസിംഹനാദേ സപദി ദദൃശിരേ മായിഗോമായവസ്തേ ॥ 31 ॥

ത്രിഷ്വപ്യേവാവതാരേഷ്വരിഭിരപഘൃണം ഹിംസിതോ നിർവികാരഃ
സർവജ്ഞഃ സർവശക്തിഃ സകലഗുണഗണാപൂര്ണരൂപപ്രഗല്ഭഃ ।
സ്വച്ഛഃ സ്വച്ഛംദമൃത്യുഃ സുഖയസി സുജനം ദേവ കിം ചിത്രമത്ര
ത്രാതാ യസ്യ ത്രിധാമാ ജഗദുത വശഗം കിംകരാഃ ശംകരാദ്യാഃ ॥ 32 ॥

ഉദ്യന്മംദസ്മിതശ്രീമൃദു മധുമധുരാലാപപീയൂഷധാരാ-
-പൂരാസേകോപശാംതാസുഖസുജനമനോലോചനാപീയമാനമ് ।
സംദ്രക്ഷ്യേ സുംദരം സംദുഹദിഹ മഹദാനംദമാനംദതീര്ഥ
ശ്രീമദ്വക്ത്രേംദുബിംബം ദുരതനുദുദിതം നിത്യദാഽഹം കദാ നു ॥ 33 ॥

പ്രാചീനാചീര്ണപുണ്യോച്ചയചതുരതരാചാരതശ്ചാരുചിത്താ-
-നത്യുച്ചാം രോചയംതീം ശ്രുതിചിതവചനാം ശ്രാവകാംശ്ചോദ്യചുംചൂന് ।
വ്യാഖ്യാമുത്ഖാതദുഃഖാം ചിരമുചിതമഹാചാര്യ ചിംതാരതാംസ്തേ
ചിത്രാം സച്ഛാസ്ത്രകര്താശ്ചരണപരിചരാംഛ്രാവയാസ്മാംശ്ച കിംചിത് ॥ 34 ॥

പീഠേ രത്നോകപക്ലൃപ്തേ രുചിരരുചിമണിജ്യോതിഷാ സന്നിഷണ്ണം
ബ്രഹ്മാണം ഭാവിനം ത്വാം ജ്വലതി നിജപദേ വൈദികാദ്യാ ഹി വിദ്യാഃ ।
സേവംതേ മൂര്തിമത്യഃ സുചരിത ചരിതം ഭാതി ഗംധർവ ഗീതം
പ്രത്യേകം ദേവസംസത്സ്വപി തവ ഭഗവന്നര്തിതദ്യോവധൂഷു ॥ 35 ॥

സാനുക്രോശൈരജസ്രം ജനിമൃതിനിരയാദ്യൂര്മിമാലാവിലേഽസ്മിന്
സംസാരാബ്ധൌ നിമഗ്നാന് ശരണമശരണാനിച്ഛതോ വീക്ഷ്യ ജംതൂന് ।
യുഷ്മാഭിഃ പ്രാര്ഥിതഃ സന് ജലനിധിശയനഃ സത്യവത്യാം മഹര്ഷേ-
-ർവ്യക്തശ്ചിന്മാത്രമൂര്തിര്ന ഖലു ഭഗവതഃ പ്രാകൃതോ ജാതു ദേഹഃ ॥ 36 ॥

അസ്തവ്യസ്തം സമസ്തശ്രുതിഗതമധമൈ രത്നപൂഗം യഥാഽംധൈ-
-രര്ഥം ലോകോപകൃത്യൈ ഗുണഗണനിലയഃ സൂത്രയാമാസ കൃത്സ്നമ് ।
യോഽസൌ വ്യാസാഭിധാനസ്തമഹമഹരഹര്ഭക്തിതസ്ത്വത്പ്രസാദാത്
സദ്യോ വിദ്യോപലബ്ധ്യൈ ഗുരുതമമഗുരും ദേവദേവം നമാമി ॥ 37 ॥

ആജ്ഞാമന്യൈരധാര്യാം ശിരസി പരിസരദ്രശ്മികോടീരകോടൌ
കൃഷ്ണസ്യാക്ലിഷ്ടകര്മാ ദധദനുസരാണാദര്ഥിതോ ദേവസംഘൈഃ ।
ഭൂമാവാഗത്യ ഭൂമന്നസുകരമകരോര്ബ്രഹ്മസൂത്രസ്യ ഭാഷ്യം
ദുര്ഭാഷ്യം വ്യസ്യ ദസ്യോര്മണിമത ഉദിതം വേദസദ്യുക്തിഭിസ്ത്വമ് ॥ 38 ॥

ഭൂത്വാ ക്ഷേത്രേ വിശുദ്ധേ ദ്വിജഗണനിലയേ രൌപ്യപീഠാഭിധാനേ
തത്രാപി ബ്രഹ്മജാതിസ്ത്രിഭുവനവിശദേ മധ്യഗേഹാഖ്യഗേഹേ ।
പാരിവ്രാജ്യാധിരാജഃ പുനരപി ബദരീം പ്രാപ്യ കൃഷ്ണം ച നത്വാ
കൃത്വാ ഭാഷ്യാണി സമ്യഗ് വ്യതനുത ച ഭവാന് ഭാരതാര്ഥപ്രകാശമ് ॥ 39 ॥

വംദേ തം ത്വാം സുപൂര്ണപ്രമതിമനുദിനാസേവിതം ദേവവൃംദൈഃ
വംദേ വംദാരുമീശേ ശ്രിയ ഉത നിയതം ശ്രീമദാനംദതീര്ഥമ് ।
വംദേ മംദാകിനീസത്സരിദമലജലാസേകസാധിക്യസംഗം
വംദേഽഹം ദേവ ഭക്ത്യാ ഭവഭയദഹനം സജ്ജനാന്മോദയംതമ് ॥ 40 ॥

സുബ്രഹ്മണ്യാഖ്യസൂരേഃ സുത ഇതി സുഭൃശം കേശവാനംദതീര്ഥ-
ശ്രീമത്പാദാബ്ജഭക്തഃ സ്തുതിമകൃത ഹരേർവായുദേവസ്യ ചാസ്യ ।
തത്പാദാര്ചാദരേണ ഗ്രഥിതപദലസന്മാലയാ ത്വേതയാ യേ
സംരാധ്യാമൂ നമംതി പ്രതതമതിഗുണാ മുക്തിമേതേ വ്രജംതി ॥ 41 ॥

അഥ ശ്രീനഖസ്തുതിഃ
പാംത്വസ്മാന് പുരുഹൂതവൈരിബലവന്മാതംഗമാദ്യദ്ഘടാ
കുംഭോച്ചാദ്രിവിപാടനാധികപടുപ്രത്യേകവജ്രായിതാഃ ।
ശ്രീമത്കംഠീരവാസ്യ പ്രതത സുനഖരാ ദാരിതാരാതിദൂര-
പ്രധ്വസ്തധ്വാംതശാംതപ്രവിതതമനസാ ഭാവിതാ നാകിവൃംദൈഃ ॥ 1 ॥

ലക്ഷ്മീകാംത സമംതതോഽവികലയന് നൈവേശിതുസ്തേ സമം
പശ്യാമ്യുത്തമവസ്തു ദൂരതരതോഽപാസ്തം രസോ യോഽഷ്ടമഃ ।
യദ്രോഷോത്കരദക്ഷനേത്രകുടിലപ്രാംതോത്ഥിതാഗ്നിസ്ഫുരത്
ഖദ്യോതോപമവിസ്ഫുലിംഗഭസിതാ ബ്രഹ്മേശശക്രോത്കരാഃ ॥ 2 ॥

ഇതി ശ്രീത്രിവിക്രമപംഡിതാചാര്യ വിരചിതാ വായുസ്തുതിഃ സമാപ്താ ॥