ശ്രീ ബഗളാമുഖീ സ്തോത്രമ് – 1

ഓം അസ്യ ശ്രീബഗളാമുഖീസ്തോത്രസ്യ
നാരദൃഷിഃ
ശ്രീ ബഗളാമുഖീ ദേവതാ
മമ സന്നിഹിതാനാം വിരോധിനാം വാങ്മുഖ-പദബുദ്ധീനാം സ്തംഭനാര്ഥേ സ്തോത്രപാഠേ വിനിയോഗഃ

മധ്യേസുധാബ്ധി മണിമംടപ രത്നവേദി
സിംഹാസനോപരിഗതാം പരിപീതവര്ണാമ് ।
പീതാംബരാഭരണ മാല്യവിഭൂഷിതാംഗീം
ദേവീം ഭജാമി ധൃതമുദ്ഗരവൈരി ജിഹ്വാമ് ॥ 1 ॥

ജിഹ്വാഗ്രമാദായ കരേണ ദേവീം
വാമേന ശത്രൂന് പരിപീഡയംതീമ് ।
ഗദാഭിഘാതേന ച ദക്ഷിണേന
പീതാംബരാഢ്യാം ദ്വിഭുജാം ഭജാമി ॥ 2 ॥

ചലത്കനകകുംഡലോല്ലസിതചാരുഗംഡസ്ഥലാം
ലസത്കനകചംപക ദ്യുതിമദിംദുബിംബാനനാമ് ।
ഗദാഹത വിപക്ഷകാം കലിതലോലജിഹ്വാംചലാം
സ്മരാമി ബഗളാമുഖീം വിമുഖവാങ്മനസ്സ്തംഭിനീമ് ॥ 3 ॥

പീയൂഷോ ദധിമധ്യചാരു വിലസ ദ്രക്തോത്പലേ മംടപേ
സത്സിംഹാസന മൌളിപാതിതരിപും പ്രേതാസനാധ്യാസിനീമ് ।
സ്വര്ണാഭാം കരപീഡിതാരിരസനാം ഭ്രാമ്യദ്ഗദാം വിഭ്രമാം
ഇത്ഥം ധ്യായതി യാംതി തസ്യ വിലയം സദ്യോഥ സർവാപദഃ ॥ 4 ॥

ദേവിത്ത്വച്ചരണാംബുജാര്ചനകൃതേ യഃ പീത പുഷ്പാംജലീന്
ഭക്ത്യാ വാമകരേ നിധായ ച മനും മംത്രീ മനോജ്ഞാക്ഷരമ് ।
പീഠധ്യാനപരോഽഥ കുംഭകവശാദ്ബീജം സ്മരേത്പാര്ഥിവ-
സ്തസ്യാമിത്രമുഖസ്യ വാചി ഹൃദയേ ജാഡ്യം ഭവേത്തത്‍ക്ഷണാത് ॥ 5 ॥

വാദീ മൂകതി കംകതി ക്ഷിതിപതിർവൈശ്വാനരശ്ശീതിതി
ക്രോധീശാമ്യതി ദുര്ജനസ്സുജനതി ക്ഷിപ്രാനുഗഃ ഖംജതി ।
ഗർവീ ഖർവതി സർവവിച്ച ജഡതി ത്വദ്യംത്രണാ യംത്രിതഃ
ശ്രീനിത്യേ ബഗളാമുഖി പ്രതിദിനം കല്യാണി തുഭ്യം നമഃ ॥ 6 ॥

മംത്രസ്താവദയം വിപക്ഷദലനേ സ്തോത്രം പവിത്രം ച തേ
യംത്രം വാദിനിയംത്രണം ത്രിജഗതാം ജൈത്രം ച ചിത്രം ച തേ ।
മാതഃ ശ്രീബഗളേതി നാമ ലലിതം യസ്യാസ്തി ജംതോര്മുഖേ
ത്വന്നാമഗ്രഹണേന സംസദി മുഖ സ്തംഭോ ഭവേദ്വാദിനാമ് ॥ 7 ॥

ദുഷ്ടസ്തംഭനമുഗ്രവിഘ്നശമനം ദാരിദ്ര്യവിദ്രാവണം
ഭൂഭൃദ്ഭീശമനം ചലന്മൃഗദൃശാം ചേതസ്സമാകര്ഷണമ് ।
സൌഭാഗ്യൈകനികേതനം സമദൃശഃ കാരുണ്യപൂര്ണാമൃതം
മൃത്യോര്മാരണമാവിരസ്തു പുരതോ മാതസ്ത്വദീയം വപുഃ ॥ 8 ॥

മാതര്ഭംജയ മേ വിപക്ഷവദനാം ജിഹ്വാം ച സംകീലയ
ബ്രാഹ്മീം മുദ്രയ നാശയാശുധിഷണാമുഗ്രാം ഗതിം സ്തംഭയ ।
ശത്രൂംശ്ചൂര്ണയ ദേവി തീക്ഷ്ണഗദയാ ഗൌരാംഗി പീതാംബരേ
വിഘ്നൌഘം ബഗളേ ഹര പ്രണമതാം കാരുണ്യപൂര്ണേക്ഷണേ ॥ 9 ॥

മാതര്ഭൈരവി ഭദ്രകാളി വിജയേ വാരാഹി വിശ്വാശ്രയേ
ശ്രീവിദ്യേ സമയേ മഹേശി ബഗളേ കാമേശി രാമേ രമേ ।
മാതംഗി ത്രിപുരേ പരാത്പരതരേ സ്വര്ഗാപവര്ഗപ്രദേ
ദാസോഽഹം ശരണാഗതഃ കരുണയാ വിശ്വേശ്വരി ത്രാഹിമാമ് ॥ 10 ॥

സംരംഭേ സൌരസംഘേ പ്രഹരണസമയേ ബംധനേവാരിമധ്യേ
വിദ്യാവാദേവിവാദേ പ്രതികൃതിനൃപതൌ ദിവ്യകാലേ നിശായാമ് ।
വശ്യേ വാ സ്തംഭനേ വാ രിപുവധസമയേ നിര്ജനേ വാ വനേ വാ
ഗച്ഛംസ്തിഷ്ഠംസ്ത്രികാലം യദി പഠതി ശിവം പ്രാപ്നുയാദാശു ധീരഃ ॥ 11 ॥

ത്വം വിദ്യാ പരമാ ത്രിലോകജനനീ വിഘ്നൌഘസംഛേദിനീ
യോഷാകര്ഷണകാരിണീ ത്രിജഗതാമാനംദസംവര്ധിനീ ।
ദുസ്ഫോടോച്ചാടനകാരിണീ ജനമനസ്സംമോഹസംദായിനീ
ജിഹ്വാകീലനഭൈരവീ വിജയതേ ബ്രഹ്മാസ്ത്രമംത്രോ യഥാ ॥ 12 ॥

വിദ്യാലക്ഷ്മീസ്സർവസൌഭാഗ്യമായുഃ
പുത്രൈഃ പൌത്രൈഃ സർവസാമ്രാജ്യസിദ്ധിഃ ।
മാനോ ഭോഗോ വശ്യമാരോഗ്യസൌഖ്യം
പ്രാപ്തം തത്തദ്ഭൂതലേഽസ്മിന്നരേണ ॥ 13 ॥

യത്കൃതം ച ജപം ഹോമം ഗദിതം പരമേശ്വരീ ।
ദുഷ്ടാനാം നിഗ്രഹാര്ഥായ തദ്ഗൃഹാണ നമോഽസ്തു തേ ॥ 14 ॥

പീതാംബരാം താം ദ്വിഭുജാം ത്രിനേത്രാം ഗാത്രഗോജ്ജ്വലാമ് ।
ശിലാമുദ്ഗരഹസ്താം ച സ്മരേത്താം ബഗളാമുഖീമ് ॥ 15 ॥

ബ്രഹ്മാസ്ത്രമിതി വിഖ്യാതം ത്രിഷു ലോകേഷു വിശ്രുതമ് ।
ഗുരുഭക്തായ ദാതവ്യം നദേയം യസ്യ കസ്യചിത് ॥ 16 ॥

നിത്യം സ്തോത്രമിദം പവിത്രമിഹ യോ ദേവ്യാഃ പഠത്യാദരാത്
ധൃത്വായംത്രമിദം തഥൈവ സമരേ ബാഹൌ കരേ വാ ഗളേ ।
രാജാനോഽപ്യരയോ മദാംധകരിണസ്സര്പാ മൃഗേംദ്രാദികാഃ
തേ വൈ യാംതി വിമോഹിതാ രിപുഗണാ ലക്ഷ്മീഃ സ്ഥിരാസ്സിദ്ധയഃ ॥ 17 ॥

ഇതി ശ്രീ രുദ്രയാമളേ തംത്രേ ശ്രീ ബഗളാമുഖീ സ്തോത്രമ് ॥