നാരായണീയം ദശക 55 – കാലിയനര്തനമ്

അഥ വാരിണി ഘോരതരം ഫണിനം
പ്രതിവാരയിതും കൃതധീര്ഭഗവന് ।
ദ്രുതമാരിഥ തീരഗനീപതരും
വിഷമാരുതശോഷിതപര്ണചയമ് ॥1॥

അധിരുഹ്യ പദാംബുരുഹേണ ച തം
നവപല്ലവതുല്യമനോജ്ഞരുചാ ।
ഹ്രദവാരിണി ദൂരതരം ന്യപതഃ
പരിഘൂര്ണിതഘോരതരംഗ്ഗണേ ॥2॥

ഭുവനത്രയഭാരഭൃതോ ഭവതോ
ഗുരുഭാരവികംപിവിജൃംഭിജലാ ।
പരിമജ്ജയതി സ്മ ധനുശ്ശതകം
തടിനീ ഝടിതി സ്ഫുടഘോഷവതീ ॥3॥

അഥ ദിക്ഷു വിദിക്ഷു പരിക്ഷുഭിത-
ഭ്രമിതോദരവാരിനിനാദഭരൈഃ ।
ഉദകാദുദഗാദുരഗാധിപതി-
സ്ത്വദുപാംതമശാംതരുഷാഽംധമനാഃ ॥4॥

ഫണശൃംഗസഹസ്രവിനിസ്സൃമര-
ജ്വലദഗ്നികണോഗ്രവിഷാംബുധരമ് ।
പുരതഃ ഫണിനം സമലോകയഥാ
ബഹുശൃംഗിണമംജനശൈലമിവ ॥5॥

ജ്വലദക്ഷി പരിക്ഷരദുഗ്രവിഷ-
ശ്വസനോഷ്മഭരഃ സ മഹാഭുജഗഃ ।
പരിദശ്യ ഭവംതമനംതബലം
സമവേഷ്ടയദസ്ഫുടചേഷ്ടമഹോ ॥6॥

അവിലോക്യ ഭവംതമഥാകുലിതേ
തടഗാമിനി ബാലകധേനുഗണേ ।
വ്രജഗേഹതലേഽപ്യനിമിത്തശതം
സമുദീക്ഷ്യ ഗതാ യമുനാം പശുപാഃ ॥7॥

അഖിലേഷു വിഭോ ഭവദീയ ദശാ-
മവലോക്യ ജിഹാസുഷു ജീവഭരമ് ।
ഫണിബംധനമാശു വിമുച്യ ജവാ-
ദുദഗമ്യത ഹാസജുഷാ ഭവതാ ॥8॥

അധിരുഹ്യ തതഃ ഫണിരാജഫണാന്
നനൃതേ ഭവതാ മൃദുപാദരുചാ ।
കലശിംജിതനൂപുരമംജുമില-
ത്കരകംകണസംകുലസംക്വണിതമ് ॥9॥

ജഹൃഷുഃ പശുപാസ്തുതുഷുര്മുനയോ
വവൃഷുഃ കുസുമാനി സുരേംദ്രഗണാഃ ।
ത്വയി നൃത്യതി മാരുതഗേഹപതേ
പരിപാഹി സ മാം ത്വമദാംതഗദാത് ॥10॥