നാരായണീയം ദശക 27 – ക്ഷീരാബ്ധിമഥനം തഥാ കൂര്മാവതാരമ്

ദൂർവാസാസ്സുരവനിതാപ്തദിവ്യമാല്യം
ശക്രായ സ്വയമുപദായ തത്ര ഭൂയഃ ।
നാഗേംദ്രപ്രതിമൃദിതേ ശശാപ ശക്രം
കാ ക്ഷാംതിസ്ത്വദിതരദേവതാംശജാനാമ് ॥1॥

ശാപേന പ്രഥിതജരേഽഥ നിര്ജരേംദ്രേ
ദേവേഷ്വപ്യസുരജിതേഷു നിഷ്പ്രഭേഷു ।
ശർവാദ്യാഃ കമലജമേത്യ സർവദേവാ
നിർവാണപ്രഭവ സമം ഭവംതമാപുഃ ॥2॥

ബ്രഹ്മാദ്യൈഃ സ്തുതമഹിമാ ചിരം തദാനീം
പ്രാദുഷ്ഷന് വരദ പുരഃ പരേണ ധാമ്നാ ।
ഹേ ദേവാ ദിതിജകുലൈർവിധായ സംധിം
പീയൂഷം പരിമഥതേതി പര്യശാസ്ത്വമ് ॥3॥

സംധാനം കൃതവതി ദാനവൈഃ സുരൌഘേ
മംഥാനം നയതി മദേന മംദരാദ്രിമ് ।
ഭ്രഷ്ടേഽസ്മിന് ബദരമിവോദ്വഹന് ഖഗേംദ്രേ
സദ്യസ്ത്വം വിനിഹിതവാന് പയഃപയോധൌ ॥4॥

ആധായ ദ്രുതമഥ വാസുകിം വരത്രാം
പാഥോധൌ വിനിഹിതസർവബീജജാലേ ।
പ്രാരബ്ധേ മഥനവിധൌ സുരാസുരൈസ്തൈ-
ർവ്യാജാത്ത്വം ഭുജഗമുഖേഽകരോസ്സുരാരീന് ॥5॥

ക്ഷുബ്ധാദ്രൌ ക്ഷുഭിതജലോദരേ തദാനീം
ദുഗ്ധാബ്ധൌ ഗുരുതരഭാരതോ നിമഗ്നേ ।
ദേവേഷു വ്യഥിതതമേഷു തത്പ്രിയൈഷീ
പ്രാണൈഷീഃ കമഠതനും കഠോരപൃഷ്ഠാമ് ॥6॥

വജ്രാതിസ്ഥിരതരകര്പരേണ വിഷ്ണോ
വിസ്താരാത്പരിഗതലക്ഷയോജനേന ।
അംഭോധേഃ കുഹരഗതേന വര്ഷ്മണാ ത്വം
നിര്മഗ്നം ക്ഷിതിധരനാഥമുന്നിനേഥ ॥7॥

ഉന്മഗ്നേ ഝടിതി തദാ ധരാധരേംദ്രേ
നിര്മേഥുര്ദൃഢമിഹ സമ്മദേന സർവേ ।
ആവിശ്യ ദ്വിതയഗണേഽപി സര്പരാജേ
വൈവശ്യം പരിശമയന്നവീവൃധസ്താന് ॥8॥

ഉദ്ദാമഭ്രമണജവോന്നമദ്ഗിരീംദ്ര-
ന്യസ്തൈകസ്ഥിരതരഹസ്തപംകജം ത്വാമ് ।
അഭ്രാംതേ വിധിഗിരിശാദയഃ പ്രമോദാ-
ദുദ്ഭ്രാംതാ നുനുവുരുപാത്തപുഷ്പവര്ഷാഃ ॥9॥

ദൈത്യൌഘേ ഭുജഗമുഖാനിലേന തപ്തേ
തേനൈവ ത്രിദശകുലേഽപി കിംചിദാര്തേ ।
കാരുണ്യാത്തവ കില ദേവ വാരിവാഹാഃ
പ്രാവര്ഷന്നമരഗണാന്ന ദൈത്യസംഘാന് ॥10॥

ഉദ്ഭ്രാമ്യദ്ബഹുതിമിനക്രചക്രവാലേ
തത്രാബ്ധൌ ചിരമഥിതേഽപി നിർവികാരേ ।
ഏകസ്ത്വം കരയുഗകൃഷ്ടസര്പരാജഃ
സംരാജന് പവനപുരേശ പാഹി രോഗാത് ॥11॥