നാരായണീയം ദശക 21 – നവ വര്ഷാഃ തഥാ സപ്തദ്വീപാഃ

മധ്യോദ്ഭവേ ഭുവ ഇലാവൃതനാമ്നി വര്ഷേ
ഗൌരീപ്രധാനവനിതാജനമാത്രഭാജി ।
ശർവേണ മംത്രനുതിഭിഃ സമുപാസ്യമാനം
സംകര്ഷണാത്മകമധീശ്വര സംശ്രയേ ത്വാമ് ॥1॥

ഭദ്രാശ്വനാമക ഇലാവൃതപൂർവവര്ഷേ
ഭദ്രശ്രവോഭിഃ ഋഷിഭിഃ പരിണൂയമാനമ് ।
കല്പാംതഗൂഢനിഗമോദ്ധരണപ്രവീണം
ധ്യായാമി ദേവ ഹയശീര്ഷതനും ഭവംതമ് ॥2॥

ധ്യായാമി ദക്ഷിണഗതേ ഹരിവര്ഷവര്ഷേ
പ്രഹ്ലാദമുഖ്യപുരുഷൈഃ പരിഷേവ്യമാണമ് ।
ഉത്തുംഗശാംതധവലാകൃതിമേകശുദ്ധ-
ജ്ഞാനപ്രദം നരഹരിം ഭഗവന് ഭവംതമ് ॥3॥

വര്ഷേ പ്രതീചി ലലിതാത്മനി കേതുമാലേ
ലീലാവിശേഷലലിതസ്മിതശോഭനാംഗമ് ।
ലക്ഷ്മ്യാ പ്രജാപതിസുതൈശ്ച നിഷേവ്യമാണം
തസ്യാഃ പ്രിയായ ധൃതകാമതനും ഭജേ ത്വാമ് ॥4॥

രമ്യേ ഹ്യുദീചി ഖലു രമ്യകനാമ്നി വര്ഷേ
തദ്വര്ഷനാഥമനുവര്യസപര്യമാണമ് ।
ഭക്തൈകവത്സലമമത്സരഹൃത്സു ഭാംതം
മത്സ്യാകൃതിം ഭുവനനാഥ ഭജേ ഭവംതമ് ॥5॥

വര്ഷം ഹിരണ്മയസമാഹ്വയമൌത്തരാഹ-
മാസീനമദ്രിധൃതികര്മഠകാമഠാംഗമ് ।
സംസേവതേ പിതൃഗണപ്രവരോഽര്യമാ യം
തം ത്വാം ഭജാമി ഭഗവന് പരചിന്മയാത്മന് ॥6॥

കിംചോത്തരേഷു കുരുഷു പ്രിയയാ ധരണ്യാ
സംസേവിതോ മഹിതമംത്രനുതിപ്രഭേദൈഃ ।
ദംഷ്ട്രാഗ്രഘൃഷ്ടഘനപൃഷ്ഠഗരിഷ്ഠവര്ഷ്മാ
ത്വം പാഹി ബിജ്ഞനുത യജ്ഞവരാഹമൂര്തേ ॥7॥

യാമ്യാം ദിശം ഭജതി കിംപുരുഷാഖ്യവര്ഷേ
സംസേവിതോ ഹനുമതാ ദൃഢഭക്തിഭാജാ ।
സീതാഭിരാമപരമാദ്ഭുതരൂപശാലീ
രാമാത്മകഃ പരിലസന് പരിപാഹി വിഷ്ണോ ॥8॥

ശ്രീനാരദേന സഹ ഭാരതഖംഡമുഖ്യൈ-
സ്ത്വം സാംഖ്യയോഗനുതിഭിഃ സമുപാസ്യമാനഃ ।
ആകല്പകാലമിഹ സാധുജനാഭിരക്ഷീ
നാരായണോ നരസഖഃ പരിപാഹി ഭൂമന് ॥9॥

പ്ലാക്ഷേഽര്കരൂപമയി ശാല്മല ഇംദുരൂപം
ദ്വീപേ ഭജംതി കുശനാമനി വഹ്നിരൂപമ് ।
ക്രൌംചേഽംബുരൂപമഥ വായുമയം ച ശാകേ
ത്വാം ബ്രഹ്മരൂപമപി പുഷ്കരനാമ്നി ലോകാഃ ॥10॥

സർവൈര്ധ്രുവാദിഭിരുഡുപ്രകരൈര്ഗ്രഹൈശ്ച
പുച്ഛാദികേഷ്വവയവേഷ്വഭികല്പ്യമാനൈഃ ।
ത്വം ശിംശുമാരവപുഷാ മഹതാമുപാസ്യഃ
സംധ്യാസു രുംധി നരകം മമ സിംധുശായിന് ॥11॥

പാതാലമൂലഭുവി ശേഷതനും ഭവംതം
ലോലൈകകുംഡലവിരാജിസഹസ്രശീര്ഷമ് ।
നീലാംബരം ധൃതഹലം ഭുജഗാംഗനാഭി-
ര്ജുഷ്ടം ഭജേ ഹര ഗദാന് ഗുരുഗേഹനാഥ ॥12॥