മൃതസംജീവന കവച സ്തോത്രമ്

ഏവമാരാധ്യ ഗൌരീശം ദേവം മൃത്യുംജയേശ്വരമ് ।
മൃതസംജീവനം നാമ്നാ കവചം പ്രജപേത് സദാ ॥ 1 ॥

സാരാത്സാരതരം പുണ്യം ഗുഹ്യാദ്ഗുഹ്യതരം ശുഭമ് ।
മഹാദേവസ്യ കവചം മൃതസംജീവനാമകമ് ॥ 2 ॥

സമാഹിതമനാ ഭൂത്വാ ശൃണുഷ്വ കവചം ശുഭമ് ।
ശൃത്വൈതദ്ദിവ്യ കവചം രഹസ്യം കുരു സർവദാ ॥ 3 ॥

വരാഭയകരോ യജ്വാ സർവദേവനിഷേവിതഃ ।
മൃത്യുംജയോ മഹാദേവഃ പ്രാച്യാം മാം പാതു സർവദാ ॥ 4 ॥

ദധാനഃ ശക്തിമഭയാം ത്രിമുഖം ഷഡ്ഭുജഃ പ്രഭുഃ ।
സദാശിവോഽഗ്നിരൂപീ മാമാഗ്നേയ്യാം പാതു സർവദാ ॥ 5 ॥

അഷ്ടാദശഭുജോപേതോ ദംഡാഭയകരോ വിഭുഃ ।
യമരൂപീ മഹാദേവോ ദക്ഷിണസ്യാം സദാവതു ॥ 6 ॥

ഖഡ്ഗാഭയകരോ ധീരോ രക്ഷോഗണനിഷേവിതഃ ।
രക്ഷോരൂപീ മഹേശോ മാം നൈരൃത്യാം സർവദാവതു ॥ 7 ॥

പാശാഭയഭുജഃ സർവരത്നാകരനിഷേവിതഃ ।
വരുണാത്മാ മഹാദേവഃ പശ്ചിമേ മാം സദാവതു ॥ 8 ॥

ഗദാഭയകരഃ പ്രാണനായകഃ സർവദാഗതിഃ ।
വായവ്യാം മാരുതാത്മാ മാം ശംകരഃ പാതു സർവദാ ॥ 9 ॥

ശംഖാഭയകരസ്ഥോ മാം നായകഃ പരമേശ്വരഃ ।
സർവാത്മാംതരദിഗ്ഭാഗേ പാതു മാം ശംകരഃ പ്രഭുഃ ॥ 10 ॥

ശൂലാഭയകരഃ സർവവിദ്യാനാമധിനായകഃ ।
ഈശാനാത്മാ തഥൈശാന്യാം പാതു മാം പരമേശ്വരഃ ॥ 11 ॥

ഊര്ധ്വഭാഗേ ബ്രഹ്മരൂപീ വിശ്വാത്മാധഃ സദാവതു ।
ശിരോ മേ ശംകരഃ പാതു ലലാടം ചംദ്രശേഖരഃ ॥ 12 ॥

ഭ്രൂമധ്യം സർവലോകേശസ്ത്രിനേത്രോ ലോചനേഽവതു ।
ഭ്രൂയുഗ്മം ഗിരിശഃ പാതു കര്ണൌ പാതു മഹേശ്വരഃ ॥ 13 ॥

നാസികാം മേ മഹാദേവ ഓഷ്ഠൌ പാതു വൃഷധ്വജഃ ।
ജിഹ്വാം മേ ദക്ഷിണാമൂര്തിര്ദംതാന്മേ ഗിരിശോഽവതു ॥ 14 ॥

മൃത്യുംജയോ മുഖം പാതു കംഠം മേ നാഗഭൂഷണഃ ।
പിനാകി മത്കരൌ പാതു ത്രിശൂലി ഹൃദയം മമ ॥ 15 ॥

പംചവക്ത്രഃ സ്തനൌ പാതു ഉദരം ജഗദീശ്വരഃ ।
നാഭിം പാതു വിരൂപാക്ഷഃ പാര്ശ്വൌ മേ പാർവതീപതിഃ ॥ 16 ॥

കടദ്വയം ഗിരീശോ മേ പൃഷ്ഠം മേ പ്രമഥാധിപഃ ।
ഗുഹ്യം മഹേശ്വരഃ പാതു മമോരൂ പാതു ഭൈരവഃ ॥ 17 ॥

ജാനുനീ മേ ജഗദ്ധര്താ ജംഘേ മേ ജഗദംബികാ ।
പാദൌ മേ സതതം പാതു ലോകവംദ്യഃ സദാശിവഃ ॥ 18 ॥

ഗിരിശഃ പാതു മേ ഭാര്യാം ഭവഃ പാതു സുതാന്മമ ।
മൃത്യുംജയോ മമായുഷ്യം ചിത്തം മേ ഗണനായകഃ ॥ 19 ॥

സർവാംഗം മേ സദാ പാതു കാലകാലഃ സദാശിവഃ ।
ഏതത്തേ കവചം പുണ്യം ദേവതാനാം ച ദുര്ലഭമ് ॥ 20 ॥

മൃതസംജീവനം നാമ്നാ മഹാദേവേന കീര്തിതമ് ।
സഹസ്രാവര്തനം ചാസ്യ പുരശ്ചരണമീരിതമ് ॥ 21 ॥

യഃ പഠേച്ചൃണുയാന്നിത്യം ശ്രാവയേത്സു സമാഹിതഃ ।
സ കാലമൃത്യും നിര്ജിത്യ സദായുഷ്യം സമശ്നുതേ ॥ 22 ॥

ഹസ്തേന വാ യദാ സ്പൃഷ്ട്വാ മൃതം സംജീവയത്യസൌ ।
ആധയോവ്യാധയസ്തസ്യ ന ഭവംതി കദാചന ॥ 23 ॥

കാലമൃത്യുമപി പ്രാപ്തമസൌ ജയതി സർവദാ ।
അണിമാദിഗുണൈശ്വര്യം ലഭതേ മാനവോത്തമഃ ॥ 24 ॥

യുദ്ധാരംഭേ പഠിത്വേദമഷ്ടാവിംശതിവാരകമ് ।
യുദ്ധമധ്യേ സ്ഥിതഃ ശത്രുഃ സദ്യഃ സർവൈര്ന ദൃശ്യതേ ॥ 25 ॥

ന ബ്രഹ്മാദീനി ചാസ്ത്രാണി ക്ഷയം കുർവംതി തസ്യ വൈ ।
വിജയം ലഭതേ ദേവയുദ്ധമധ്യേഽപി സർവദാ ॥ 26 ॥

പ്രാതരുത്ഥായ സതതം യഃ പഠേത്കവചം ശുഭമ് ।
അക്ഷയ്യം ലഭതേ സൌഖ്യമിഹലോകേ പരത്ര ച ॥ 27 ॥

സർവവ്യാധിവിനിര്മുക്തഃ സർവരോഗവിവര്ജിതഃ ।
അജരാമരണോ ഭൂത്വാ സദാ ഷോഡശവാര്ഷികഃ ॥ 28 ॥

വിചരത്യഖിലാന്ലോകാന്പ്രാപ്യ ഭോഗാംശ്ച ദുര്ലഭാന് ।
തസ്മാദിദം മഹാഗോപ്യം കവചം സമുദാഹൃതമ് ॥ 29 ॥

മൃതസംജീവനം നാമ്നാ ദേവതൈരപി ദുര്ലഭമ് ॥ 30 ॥

ഇതി വസിഷ്ഠ കൃത മൃതസംജീവന കവച സ്തോത്രമ് ॥