മാംഗല്യ സ്തവഃ

ദാല്ഭ്യഃ
കാര്യാരംഭേഷു സർവേഷു ദുഃസ്വപ്നേഷു ച സത്തമ ।
അമാംഗല്യേഷു ദൃഷ്ടേഷു യജ്ജപ്തവ്യം തദുച്യതാമ് ॥ 1 ॥

യേനാരംഭാശ്ച സിദ്ധ്യംതി ദുഃസ്വപ്നശ്ചോപശാമ്യതി ।
അമംഗലാനാം ദൃഷ്ടാനാം പരിഹാരശ്ച ജായതേ ॥ 2 ॥

ശ്രീ പുലസ്ത്യഃ:
ജനാര്ദനം ഭൂതപതിം ജഗദ്ഗുരും സ്മരന് മനുഷ്യഃ സതതം മഹാമുനേ ।
ദുഷ്ടാന്യശേഷണ്യപഹംതി സാധയതി അശേഷകാര്യാണി ച യാന്യഭീപ്സതി ॥ 3 ॥

ശൃണുഷ്വ ചാന്യത് ഗദതോ മമാഖിലം വദാമി യത് തേ ദ്വിജവര്യ! മംഗലമ് ।
സർവാര്ഥസിദ്ധിം പ്രദദാതി യത് സദാ നിഹംത്യ്ശേഷാണി ച പാതകാനി ॥ 4 ॥

പ്രതിഷ്ടിതം യത്ര ജഗച്ചരാചരം ജഗത്ത്രയേ യോ ജഗതശ്ച ഹേതുഃ ।
ജഗച്ച പാത്യത്തി ച യഃ സ സർവദാ മമാസ്തു മാംഗല്യവിവൃദ്ധയേ ഹരിഃ ॥ 5 ॥

വ്യോമാംബുവായ്വഗ്നിമഹീസ്വരൂപൈഃ വിസ്താരവാന് യോഽണുതരോഽണുഭാവാത് ।
അസ്ഥൂലസൂക്ഷ്മഃ സതതം പരേശ്വരോ മമാസ്തു മാംഗല്യവിവൃദ്ധയേ ഹരിഃ ॥ 6 ॥

യസ്മാത് പരസ്മാത് പുരുഷാദനംതാത് അനാദിമധ്യാദധികം ന കിംചിത് ।
സ ഹേതുഹേതുഃ പരമേശ്വരേശ്വരഃ മമാസ്തു മാംഗല്യവിവൃദ്ധയേ ഹരിഃ ॥ 7 ॥

ഹിരണ്യഗര്ഭാച്യുതരുദ്രരൂപീ സൃജത്യശേഷം പരിപാതി ഹംതി ।
ഗുണാഗ്രണീര്യോ ഭഗവാന് സ സർവദാ മമാസ്തു മാംഗല്യവിവൃദ്ധയേ ഹരിഃ ॥ 8 ॥

പരഃ സുരാണാം പരമോഽസുരാണാം പരോ യതീനാം പരമോ മുനീനാമ് ।
പരഃ സമസ്തസ്യ ച യഃ സ സർവദാ മമാസ്തു മാംഗല്യവിവൃദ്ധയേ ഹരിഃ ॥ 9 ॥

ധ്യാതോ മുനീനാമപകല്മഷൈര്യോ ദദാതി മുക്തിം പരമേശ്വരേശ്വരഃ ।
മനോഭിരാമഃ പുരുഷഃ സ സർവദാ മമാസ്തു മാംഗല്യവിവൃദ്ധയേ ഹരിഃ ॥ 10 ॥

സുരേംദ്രവൈവസ്വതവിത്തപാംബുപസ്വരൂപരൂപീ പരിപാതി യോ ജഗത് ।
സ ശുദ്ധശുദ്ധഃ പരമേശ്വരേശ്വരോ മമാസ്തു മാംഗല്യവിവൃദ്ധയേ ഹരിഃ ॥ 11 ॥

യന്നാമസംകീര്തനതോ വിമുച്യതേ ഹ്യനേകജന്മാര്ജിതപാപസംചയാത് ।
പാപേംധനാഗ്നിഃ സ സദൈവ നിര്മലോ മമാസ്തു മാംഗല്യവിവൃദ്ധയേ ഹരിഃ ॥ 12 ॥

യേനോദ്ധൃതേയം ധരണീ രസാതലാത് അശേഷസൃഷ്ടിസ്ഥിതികാരണാദികമ് ।
ബിഭര്തി വിശ്വം ജഗതഃ സ മൂലം മമാസ്തു മാംഗല്യവിവൃദ്ധയേ ഹരിഃ ॥ 13 ॥

പാദേഷു വേദാ ജഠരേ ചരാചരം രോമസ്വശേഷാ മുനയോ മുഖേ മഖാഃ ।
യസ്യേശ്വരേശസ്യ സ സർവദാ പ്രഭുഃ മമാസ്തു മാംഗല്യവിവൃദ്ധയേ ഹരിഃ ॥ 14 ॥

സമസ്ത യജ്ഞാംഗമയം വപുഃ പ്രഭോഃ യസ്യാംഗമീശേശ്വരസംസ്തുതസ്യ ।
വരാഹരൂപീ ഭഗവാന് സ സർവദാ മമാസ്തു മാംഗല്യവിവൃദ്ധയേ ഹരിഃ ॥ 15 ॥

വിക്ഷോഭ്യ സർവോദധിതോയസംഭവം ദധാര ധാത്രീം ജഗതശ്ച യോ ഭുവമ് ।
യജ്ഞേശ്വരോ യജ്ഞപുമാന് സ സർവദാ മമാസ്തു മാംഗല്യവിവൃദ്ധയേ ഹരിഃ ॥ 16 ॥

പാതാലമൂലേശ്വരഭോഗിസംഹതോ വിന്യസ്യ പാദൌ പൃതിവീം ച ബിഭ്രതഃ ।
യസ്യോപമാനം ന ബഭൂവ സോഽച്യുതോ മമാസ്തു മാംഗല്യവിവൃദ്ധയേ ഹരിഃ ॥ 17 ॥

സഘര്ഘരം യസ്യ ച ബൃംഹിതം മുഹുഃ സനംദനാദ്യൈര്ജനലോകസംശ്രിതൈഃ ।
ശ്രുതം ജയേത്യുക്തിപരൈഃ സ സർവദാ മമാസ്തു മാംഗല്യവിവൃദ്ധയേ ഹരിഃ ॥ 18 ॥

ഏകാര്ണവാദ് യസ്യ മഹീയസൌ മഹീം ആദായ വേഗേന ഖമുത്പതിഷ്യതഃ ।
നതം വപുര്യോഗിവരൈഃ സ സർവദാ മമാസ്തു മാംഗല്യവിവൃദ്ധയേ ഹരിഃ ॥ 19 ॥

ഹതോ ഹിരണ്യാക്ഷമഹാസുരഃ പുരാ പുരാണപുംസാ പരമേണ യേന ।
വരാഹരൂപഃ സ പതിഃ പ്രജാപതിഃ മമാസ്തു മാംഗല്യവിവൃദ്ധയേ ഹരിഃ ॥ 20 ॥

ദംഷ്ട്രാകരാലം സുരഭീതിനാശകം കൃതം വപുര്ദിവ്യനൃസിംഹരൂപിണാ ।
ത്രാതും ജഗത് യേന സ സർവദാ പ്രഭുഃ മമാസ്തു മാംഗല്യവിവൃദ്ധയേ ഹരിഃ ॥ 21 ॥

ദൈത്യേംദ്രവക്ഷഃസ്ഥലദാരദാരുണൈഃ
കരേരുഹൈര്യഃ ക്രകചാനുകാരിഭിഃ ।
വിച്ഛേദ ലോകസ്യ ഭയാനി സോഽച്യുതോ
മമാസ്തു മാംഗല്യവിവൃദ്ധയേ ഹരിഃ ॥ 22 ॥

ദംതാംതദീപ്തദ്യുതിനിര്മലാനി യഃ ചകാര സർവാണി ദിശാം മുഖാനി ।
നിനാദവിത്രാസിതദാനവോ ഹ്യസൌ മമാസ്തു മാംഗല്യവിവൃദ്ധയേ ഹരിഃ ॥ 23 ॥

യന്നാമസംകീര്തനതോ മഹാഭയാത് വിമോക്ഷമാപ്നോതി ന സംശയം നരഃ ।
സ സർവലോകാര്തിഹരോ നൃകേസരീ മമാസ്തു മാംഗല്യവിവൃദ്ധയേ ഹരിഃ ॥ 24 ॥

സടാകരാലഭ്രമണാനിലാഹതാഃ സ്ഫുടംതി യസ്യാംബുധരാഃ സമംതതഃ ।
സ ദിവ്യസിംഹഃ സ്ഫുരിതാനലേക്ഷണോ മമാസ്തു മാംഗല്യവിവൃദ്ധയേ ഹരിഃ ॥ 25 ॥

യദീക്ഷണജ്യോതിഷി രശ്മിമംഡലം പ്രലീനമീഷന്ന രരാജ ഭാസ്വതഃ ।
കുതഃ ശശാംകസ്യ സ ദിവ്യരൂപധൃക് മമാസ്തു മാംഗല്യവിവൃദ്ധയേ ഹരിഃ ॥ 26 ॥

അശേഷദേവേശനരേശ്വരേശ്വരൈഃ സദാ സ്തുതം യച്ചരിതം മഹാദ്ഭുതമ് ।
സ സർവലോകാര്തിഹരോ മഹാഹരിഃ മമാസ്തു മാംഗല്യവിവൃദ്ധയേ ഹരിഃ ॥ 27 ॥

ദ്രവംതി ദൈത്യാഃ പ്രണമംതി ദേവതാഃ നശ്യംതി രക്ഷാംസി അപയാംതി ചാരയഃ ।
യത്കീര്തനാത് സോഽദ്ഭുതരൂപകേസരീ മമാസ്തു മാംഗല്യവിവൃദ്ധയേ ഹരിഃ ॥ 28 ॥

ഋക്പാവിതം യോ യജുഷാ ഹി ശ്രീമത് സാമധ്വനിധ്വസ്തസമസ്തപാതകമ് ।
ചക്രേ ജഗത് വാമനകഃ സ സർവദാ മമാസ്തു മാംഗല്യവിവൃദ്ധയേ ഹരിഃ ॥ 29 ॥

യത്പാദവിന്യാസപവിത്രതാം മഹീ യയൌ വിയച്ചര്ഗ്യജുഷാമുദീരണാത് ।
സ വാമനോ ദിവ്യശരീരരൂപദൃം മമാസ്തു മാംഗല്യവിവൃദ്ധയേ ഹരിഃ ॥ 30 ॥

യസ്മിന് പ്രയാതേഽസുരഭൂഭൃതോഽധ്വരാത് നനാമ ഖേദാദവനിഃ സസാഗരാ ।
സ വാമനഃ സർവജഗന്മയഃ സദാ മമാസ്തു മാംഗല്യവിവൃദ്ധയേ ഹരിഃ ॥ 31 ॥

മഹാദ്ഭുതേ ദൈത്യപതേര്മഹാധ്വരേ യസ്മിന് പ്രവിഷ്ടേ ക്ഷുഭിതം മഹാസുരൈഃ ।
സ വാമനോഽംതസ്ഥിതസപ്തലോകധൃം മമാസ്തു മാംഗല്യവിവൃദ്ധയേ ഹരിഃ ॥ 32 ॥

സംഘൈഃ സുരാണാം ദിവി ഭൂതലസ്ഥിതൈഃ തഥാ മനുഷ്യൈര്ഗഗനേ ച ഖേചരൈഃ ।
സ്തുതഃ ക്രമാദ് യഃ പ്രച്ചാര സർവദാ മമാസ്തു മാംഗല്യവിവൃദ്ധയേ ഹരിഃ ॥ 33 ॥

ക്രാംത്വാ ധരിത്രീം ഗഗനം തഥാ ദിവം മരുത്പതേര്യഃ പ്രദദൌ ത്രിവിഷ്ടപമ് ।
സ ദേവദേവോ ഭുവനേശ്വരേശ്വരോ മമാസ്തു മാംഗല്യവിവൃദ്ധയേ ഹരിഃ ॥ 34 ॥

അനുഗ്രഹം ചാപി ബലേരനുത്ത്മം ചകാര യശ്ചേംദ്രപദോപമം ക്ഷണാത് ।
സുരാംശ്ച യജ്ഞാംശഭുജഃ സ സർവദാ മമാസ്തു മാംഗല്യവിവൃദ്ധയേ ഹരിഃ ॥ 35 ॥

രസാതലാദ് യേന പുരാ സമാഹൃതാഃ സമസ്തവേദാ ജലചാരരിരൂപിണാ ।
സ കൈടഭാരിമധുഹാഽംബുശായീ മമാസ്തു മാംഗല്യവിവൃദ്ധയേ ഹരിഃ ॥ 36 ॥

നിഃക്ഷത്രിയം യശ്ച ചകാര മേദിനീം അനേകശോ ബാഹുവനം തഥാഽച്ഛിനത് ।
യഃ കാര്തവീര്യസ്യ സ ഭാര്ഗവോത്തമോ മമാസ്തു മാംഗല്യവിവൃദ്ധയേ ഹരിഃ ॥ 37 ॥

നിഹത്യ യോ വാലിനമുഗ്രവിക്രമം
നിബദ്ധ്യ സേതും ജലധൌ ദശാനനമ് ।
ജഘാന ചാന്യാന് രജനീചരാന് അസൌ
മമാസ്തു മാംഗല്യവിവൃദ്ധയേ ഹരിഃ ॥ 38 ॥

ചിക്ഷേപ ബാലഃ ശകടം, ബഭംജ യോ യമാര്ജുനം, കംസമരിം ജഘാന ച ।
മമര്ദ ചാണൂരമുഖാന് സ സർവദാ മമാസ്തു മാംഗല്യവിവൃദ്ധയേ ഹരിഃ ॥ 39 ॥

പ്രാതഃ സഹസ്രാംശുമരീചിനിര്മലം കരേണ ബിഭ്രത് ഭഗവാന് സുദര്ശനമ് ।
കൌമോദകീ ചാപി ഗദാമനംതോ മമാസ്തു മാംഗല്യവിവൃദ്ധയേ ഹരിഃ ॥ 40 ॥

ഹിമേംദുകുംദസ്ഫടികാഭനിര്മലം മുഖാനിലാപൂരിതമീശ്വരേശ്വരഃ ।
മധ്യാഹ്നകാലേഽപി സ ശന്ഖമുദ്വഹന് മമാസ്തു മാംഗല്യവിവൃദ്ധയേ ഹരിഃ ॥ 41 ॥

തഥാപരാഹ്ണേ പ്രവികാസി പംകജം വക്ഷസ്ഥലേന ശ്രിയമുദ്വഹന് ഹരിഃ ।
വിസ്താരിപദ്മായതപത്രലോചനോ മമാസ്തു മാംഗല്യവിവൃദ്ധയേ ഹരിഃ ॥ 42 ॥

സർവേഷു കാലേഷു സമസ്തദേശേഷു അശേഷകാര്യേഷു തഥേശ്വരേശ്വരഃ ।
സർവൈഃ സ്വരൂപൈര്ഭഗവാന് അനാദിമാന് മമാസ്തു മാംഗല്യവിവൃദ്ധയേ ഹരിഃ ॥ 43 ॥

ഏതത് പഠന് ദാല്ഭ്യ സമസ്തപാപൈഃ
വിമുച്യതേ വിഷ്ണുപരോ മനുഷ്യഃ ।
സിദ്ധ്യംതി കാര്യാണി തഥാഽസ്യ സർവാന്
അര്ഥാനവാപ്നോതി യഥേച്ഛതേ താന് ॥ 44 ॥

ദുഃസ്വപ്നഃ പ്രശമമുപൈതി പഠ്യമാനേ
സ്തോത്രേഽസ്മിന് ശ്രവണവിധൌ സദോദ്യതസ്യ ।
പ്രാരംഭോ ദ്രുതമുപയാതി സിദ്ധിമീശഃ
പാപാനി ക്ഷപയതി ചാസ്യ ദേവദേവഃ ॥ 45 ॥

മാംഗല്യം പരമപദം സദാഽര്ഥസിദ്ധിം
നിർവിഘ്നാമധികഫലാം ശ്രിയം ദദാതി ।
കിം ലോകേ തദിഹ പരത്ര ചാപി പുംസാം
യദ്വിഷ്ണുപ്രവണധിയാം ന ദാല്ഭ്യ! സാധ്യമ് ॥ 46 ॥

ദേവേംദ്രസ്ത്രിഭുവനമര്ഥമേകപിംഗഃ
സംസിദ്ധിം ത്രിഭുവനഗാം ച കാര്തവീര്യഃ ।
വൈദേഹഃ പരമപദം പ്രസാദ്യ വിഷ്ണും
സംപ്രാപ്താഃ സകലഫലപ്രദോ ഹി വിഷ്ണുഃ ॥ 47 ॥

സർവാരംഭേഷു ദാല്ഭ്യൈതദ് ദുഃസ്വപ്നേഷു ച പംഡിതഃ ।
ജപേദേകമനാ വിഷ്ണൌ തഥാഽമംഗല്യദര്ശനേ ॥ 48 ॥

ശമം പ്രയാംതി ദുഷ്ടാനി ഗ്രഹപീഡാശ്ച ദാരുണാഃ ।
കര്മാരംഭാശ്ച സിദ്ധ്യംതി പുണ്യമാപ്നോതി ചോത്തമമ് ॥ 49 ॥

ഹരിര്ദദാതി ഭദ്രാണി മംഗല്യസ്തുതിസംസ്തുതഃ ।
കരോത്യഖിലരൂപൈസ്തു രക്ഷാമക്ഷതശക്തിഭൃത് ॥ 50 ॥

॥ ശ്രീവിഷ്ണുധര്മോത്തരാംതര്ഗതഃ മാംഗല്യസ്തവഃ സംപൂര്ണഃ ॥