ഗീതഗോവിംദം നവമഃ സര്ഗഃ – മംദ മുകുംദഃ

॥ നവമഃ സര്ഗഃ ॥
॥ മംദമുകുംദഃ ॥

താമഥ മന്മഥഖിന്നാം രതിരസഭിന്നാം വിഷാദസംപന്നാമ് ।
അനുചിംതിതഹരിചരിതാം കലഹാംതരിതമുവാച സഖീ ॥ 51 ॥

॥ ഗീതം 18 ॥

ഹരിരഭിസരതി വഹതി മധുപവനേ ।
കിമപരമധികസുഖം സഖി ഭുവനേ ॥
മാധവേ മാ കുരു മാനിനി മാനമയേ ॥ 1 ॥

താലഫലാദപി ഗുരുമതിസരസമ് ।
കിം വിഫലീകുരുഷേ കുചകലശമ് ॥ 2 ॥

കതി ന കഥിതമിദമനുപദമചിരമ് ।
മാ പരിഹര ഹരിമതിശയരുചിരമ് ॥ 3 ॥

കിമിതി വിഷീദസി രോദിഷി വികലാ ।
വിഹസതി യുവതിസഭാ തവ സകലാ ॥ 4 ॥

സജലനലിനീദലശീതലശയനേ ।
ഹരിമവലോക്യ സഫലയ് നയനേ ॥ 5 ॥

ജനയസി മനസി കിമിതി ഗുരുഖേദമ് ।
ശൃണു മമ വചനമനീഹിതഭേദമ് ॥ 6 ॥

ഹരിരുപയാതു വദതു ബഹുമധുരമ് ।
കിമിതി കരോഷി ഹൃദയമതിവിധുരമ് ॥ 7 ॥

ശ്രീജയദേവഭണിതമതിലലിതമ് ।
സുഖയതു രസികജനം ഹരിചരിതമ് ॥ 8 ॥

സ്നിഗ്ധേ യത്പരുഷാസി യത്പ്രണമതി സ്തബ്ധാസി യദ്രാഗിണി ദ്വേഷസ്ഥാസി യദുന്മുഖേ വിമുഖതാം യാതാസി തസ്മിന്പ്രിയേ ।
യുക്തം തദ്വിപരീതകാരിണി തവ ശ്രീഖംഡചര്ചാ വിഷം ശീതാംശുസ്തപനോ ഹിമം ഹുതവഹഃ ക്രീഡാമുദോ യാതനാഃ ॥ 52 ॥

॥ ഇതി ഗീതഗോവിംദേ കലഹാംതരിതാവര്ണനേ മംദമുകുംദോ നാമ നവമഃ സര്ഗഃ ॥