ഗീതഗോവിംദം അഷ്ടമഃ സര്ഗഃ – വിലക്ഷ്യ ലക്ഷ്മീപതിഃ

॥ അഷ്ടമഃ സര്ഗഃ ॥
॥ വിലക്ഷ്യലക്ഷ്മീപതിഃ ॥

അഥ കഥമപി യാമിനീം വിനീയ സ്മരശരജര്ജരിതാപി സാ പ്രഭാതേ ।
അനുനയവചനം വദംതമഗ്രേ പ്രണതമപി പ്രിയമാഹ സാഭ്യസൂയമ് ॥ 49 ॥

॥ ഗീതം 17 ॥

രജനിജനിതഗുരുജാഗരരാഗകഷായിതമലസനിവേശമ് ।
വഹതി നയനമനുരാഗമിവ സ്ഫുടമുദിതരസാഭിനിവേശമ് ॥
ഹരിഹരി യാഹി മാധവ യാഹി കേശവ മാ വദ കൈതവവാദം താമനുസര സരസീരുഹലോചന യാ തവ ഹരതി വിഷാദമ് ॥ 50 ॥

കജ്ജലമലിനവിലോചനചുംബനവിരചിതനീലിമരൂപമ് ।
ദശനവസനമരുണം തവ കൃഷ്ണ തനോതി തനോരനുരൂപമ് ॥ 2 ॥

വപുരനുഹരതി തവ സ്മരസംഗരഖരനഖരക്ഷതരേഖമ് ।
മരകതശകലകലിതകലധൌതലിപിരേവ രതിജയലേഖമ് ॥ 3 ॥

ചരണകമലഗലദലക്തകസിക്തമിദം തവ ഹൃദയമുദാരമ് ।
ദര്ശയതീവ ബഹിര്മദനദ്രുമനവകിസലയപരിവാരമ് ॥ 4 ॥

ദശനപദം ഭവദധരഗതം മമ ജനയതി ചേതസി ഖേദമ് ।
കഥയതി കഥമധുനാപി മയാ സഹ തവ വപുരേതദഭേദമ് ॥ 5 ॥

ബഹിരിവ മലിനതരം തവ കൃഷ്ണ മനോഽപി ഭവിഷ്യതി നൂനമ് ।
കഥമഥ വംചയസേ ജനമനുഗതമസമശരജ്വരദൂനമ് ॥ 6 ॥

ഭ്രമതി ഭവാനബലാകവലായ വനേഷു കിമത്ര വിചിത്രമ് ।
പ്രഥയതി പൂതനികൈവ വധൂവധനിര്ദയബാലചരിത്രമ് ॥ 7 ॥

ശ്രീജയദേവഭണിതരതിവംചിതഖംഡിതയുവതിവിലാപമ് ।
ശൃണുത സുധാമധുരം വിബുധാ വിബുധാലയതോഽപി ദുരാപമ് ॥ 8 ॥

തദേവം പശ്യംത്യാഃ പ്രസരദനുരാഗം ബഹിരിവ പ്രിയാപാദാലക്തച്ഛുരിതമരുണച്ഛായഹൃദയമ് ।
മമാദ്യ പ്രഖ്യാതപ്രണയഭരഭംഗേന കിതവ ത്വദാലോകഃ ശോകാദപി കിമപി ലജ്ജാം ജനയതി ॥ 50 ॥

॥ ഇതി ഗീതഗോവിംദേ ഖംഡിതാവര്ണനേ വിലക്ഷ്യലക്ഷ്മീപതിര്നാമ അഷ്ഠമഃ സര്ഗഃ ॥