ഗീതഗോവിംദം സപ്തമഃ സര്ഗഃ – നാഗര നാരയണഃ

॥ സപ്തമഃ സര്ഗഃ ॥
॥ നാഗരനാരായണഃ ॥

അത്രാംതരേ ച കുലടാകുലവര്ത്മപാത-സംജാതപാതക ഇവ സ്ഫുടലാംഛനശ്രീഃ ।
വൃംദാവനാംതരമദീപയദംശുജാലൈ-ര്ദിക്സുംദരീവദനചംദനബിംദുരിംദുഃ ॥ 40 ॥

പ്രസരതി ശശധരബിംബേ വിഹിതവിലംബേ ച മാധവേ വിധുരാ ।
വിരചിതവിവിധവിലാപം സാ പരിതാപം ചകാരോച്ചൈഃ ॥ 41 ॥

॥ ഗീതം 13 ॥

കഥിതസമയേഽപി ഹരിരഹഹ ന യയൌ വനമ് ।
മമ വിഫലമിദമമലരൂപമപി യൌവനമ് ॥
യാമി ഹേ കമിഹ ശരണം സഖീജനവചനവംചിതാ ॥ 1 ॥

യദനുഗമനായ നിശി ഗഹനമപി ശീലിതമ് ।
തേന മമ ഹൃദയമിദമസമശരകീലിതമ് ॥ 2 ॥

മമ മരണമേവ വരമതിവിതഥകേതനാ ।
കിമിഹ വിഷഹാമി വിരഹാനലചേതനാ ॥ 3 ॥

മാമഹഹ വിധുരയതി മധുരമധുയാമിനീ ।
കാപി ഹരിമനുഭവതി കൃതസുകൃതകാമിനീ ॥ 4 ॥

അഹഹ കലയാമി വലയാദിമണീഭൂഷണമ് ।
ഹരിവിരഹദഹനവഹനേന ബഹുദൂഷണമ് ॥ 5 ॥

കുസുമസുകുമാരതനുമതനുശരലീലയാ ।
സ്രഗപി ഹൃദി ഹംതി മാമതിവിഷമശീലയാ ॥ 6 ॥

അഹമിഹ നിവസാമി നഗണിതവനവേതസാ ।
സ്മരതി മധുസൂദനോ മാമപി ന ചേതസാ ॥ 7 ॥

ഹരിചരണശരണജയദേവകവിഭാരതീ ।
വസതു ഹൃദി യുവതിരിവ കോമലകലാവതീ ॥ 8 ॥

തത്കിം കാമപി കാമിനീമഭിസൃതഃ കിം വാ കലാകേലിഭി-ര്ബദ്ധോ ബംധുഭിരംധകാരിണി വനോപാംതേ കിമു ഭ്രാമ്യതി ।
കാംതഃ ക്ലാംതമനാ മനാഗപി പഥി പ്രസ്ഥാതുമേവാക്ഷമഃ സംകേതീകൃതമംജുവംജുലലതാകുംജേഽപി യന്നാഗതഃ ॥ 42 ॥

അഥാഗതാം മാധവമംതരേണ സഖീമിയം വീക്ഷ്യ വിഷാദമൂകാമ് ।
വിശംക്മാനാ രമിതം കയാപി ജനാര്ദനം ദൃഷ്ടവദേതദാഹ ॥ 43 ॥

॥ ഗീതം 14 ॥

സ്മരസമരോചിതവിരചിതവേശാ ।
ഗലിതകുസുമദരവിലുലിതകേശാ ॥
കാപി മധുരിപുണാ വിലസതി യുവതിരധികഗുണാ ॥ 1 ॥

ഹരിപരിരംഭണവലിതവികാരാ ।
കുചകലശോപരി തരലിതഹാരാ ॥ 2 ॥

വിചലദലകലലിതാനനചംദ്രാ ।
തദധരപാനരഭസകൃതതംദ്രാ ॥ 3 ॥

ചംചലകുംഡലദലിതകപോലാ ।
മുഖരിതരസനജഘനഗലിതലോലാ ॥ 4 ॥

ദയിതവിലോകിതലജ്ജിതഹസിതാ ।
ബഹുവിധകൂജിതരതിരസരസിതാ ॥ 5 ॥

വിപുലപുലകപൃഥുവേപഥുഭംഗാ ।
ശ്വസിതനിമീലിതവികസദനംഗാ ॥ 6 ॥

ശ്രമജലകണഭരസുഭഗശരീരാ ।
പരിപതിതോരസി രതിരണധീരാ ॥ 7 ॥

ശ്രീജയദേവഭണിതഹരിരമിതമ് ।
കലികലുഷം ജനയതു പരിശമിതമ് ॥ 8 ॥

വിരഹപാംഡുമുരാരിമുഖാംബുജ-ദ്യുതിരിയം തിരയന്നപി ചേതനാമ് ।
വിധുരതീവ തനോതി മനോഭുവഃ സഹൃദയേ ഹൃദയേ മദനവ്യഥാമ് ॥ 44 ॥

॥ ഗീതം 15 ॥

സമുദിതമദനേ രമണീവദനേ ചുംബനവലിതാധരേ ।
മൃഗമദതിലകം ലിഖതി സപുലകം മൃഗമിവ രജനീകരേ ॥
രമതേ യമുനാപുലിനവനേ വിജയീ മുരാരിരധുനാ ॥ 1 ॥

ഘനചയരുചിരേ രചയതി ചികുരേ തരലിതതരുണാനനേ ।
കുരബകകുസുമം ചപലാസുഷമം രതിപതിമൃഗകാനനേ ॥ 2 ॥

ഘടയതി സുഘനേ കുചയുഗഗഗനേ മൃഗമദരുചിരൂഷിതേ ।
മണിസരമമലം താരകപടലം നഖപദശശിഭൂഷിതേ ॥ 3 ॥

ജിതബിസശകലേ മൃദുഭുജയുഗലേ കരതലനലിനീദലേ ।
മരകതവലയം മധുകരനിചയം വിതരതി ഹിമശീതലേ ॥ 4 ॥

രതിഗൃഹജഘനേ വിപുലാപഘനേ മനസിജകനകാസനേ ।
മണിമയരസനം തോരണഹസനം വികിരതി കൃതവാസനേ ॥ 5 ॥

ചരണകിസലയേ കമലാനിലയേ നഖമണിഗണപൂജിതേ ।
ബഹിരപവരണം യാവകഭരണം ജനയതി ഹൃദി യോജിതേ ॥ 6 ॥

രമയതി സദൃശം കാമപി സുഭൃശം ഖലഹലധരസോദരേ ।
കിമഫലമവസം ചിരമിഹ വിരസം വദ സഖി വിടപോദരേ ॥ 7 ॥

ഇഹ രസഭണനേ കൃതഹരിഗുണനേ മധുരിപുപദസേവകേ ।
കലിയുഗചരിതം ന വസതു ദുരിതം കവിനൃപജയദേവകേ ॥ 8 ॥

നായാതഃ സഖി നിര്ദയോ യദി ശഠസ്ത്വം ദൂതി കിം ദൂയസേ സ്വച്ഛംദം ബഹുവല്ലഭഃ സ രമതേ കിം തത്ര തേ ദൂഷണമ് ।
പശ്യാദ്യ പ്രിയസമ്ഗമായ ദയിതസ്യാകൃഷ്യമാണം ഗണൈ-രുത്കംഠാര്തിഭരാദിവ സ്ഫുടദിദം ചേതഃ സ്വയം യാസ്യതി ॥ 45 ॥

॥ ഗീതം 16 ॥

അനിലതരലകുവലയനയനേന ।
തപതി ന സാ കിസലയശയനേന ॥
സഖി യാ രമിതാ വനമാലിനാ ॥ 1 ॥

വികസിതസരസിജലലിതമുഖേന ।
സ്ഫുടതി ന സാ മനസിജവിശിഖേന ॥ 2 ॥

അമൃതമധുരമൃദുതരവചനേന ।
ജ്വലതി ന സാ മലയജപവനേന ॥ 3 ॥

സ്ഥലജലരുഹരുചികരചരണേന ।
ലുഠതി ന സാ ഹിമകരകിരണേന ॥ 4 ॥

സജലജലദസമുദയരുചിരേണ ।
ദലതി ന സാ ഹൃദി ചിരവിരഹേണ ॥ 5 ॥

കനകനികഷരുചിശുചിവസനേന ।
ശ്വസതി ന സാ പരിജനഹസനേന ॥ 6 ॥

സകലഭുവനജനവരതരുണേന ।
വഹതി ന സാ രുജമതികരുണേന ॥ 7 ॥

ശ്രീജയദേവഭണിതവചനേന ।
പ്രവിശതു ഹരിരപി ഹൃദയമനേന ॥ 8 ॥

മനോഭവാനംദന ചംദനാനില പ്രസീദ രേ ദക്ഷിണ മുംച വാമതാമ് ।
ക്ഷണം ജഗത്പ്രാണ വിധായ മാധവം പുരോ മമ പ്രാണഹരോ ഭവിഷ്യസി ॥ 46 ॥

രിപുരിവ സഖീസംവാസോഽയം ശിഖീവ ഹിമാനിലോ വിഷമിവ സുധാരശ്മിര്യസ്മിംദുനോതി മനോഗതേ ।
ഹൃദയമദയേ തസ്മിന്നേവം പുനർവലതേ ബലാത് കുവലയദൃശാം വാമഃ കാമോ നികാമനിരംകുശഃ ॥ 47 ॥

ബാധാം വിധേഹി മലയാനില പംചബാണ പ്രാണാന്ഗൃഹാണ ന ഗൃഹം പുനരാശ്രയിഷ്യേ ।
കിം തേ കൃതാംതഭഗിനി ക്ഷമയാ തരംഗൈ-രംഗാനി സിംച മമ ശാമ്യതു ദേഹദാഹഃ ॥ 48 ॥

പ്രാതര്നീലനിചോലമച്യുതമുരസ്സംവീതപീതാംബരമ്
രധായാശ്കിതം വിലോക്യ ഹസതി സ്വൈരം സഖീമംഡലേ ।
വ്രീഡാചംചലമംചലം നയനയോരാധായ രാധാനനേ
സ്വാദുസ്മേരമുഖോഽയമസ്തു ജഗദാനംദായ നംദാത്മജഃ॥ (കസ്മിംശ്ചന പാഠാംതരേ ഇദം പദ്യം വിദ്യതേ)

॥ ഇതി ഗീതഗോവിംദേ വിപ്രലബ്ധാവര്ണനേ നാഗനാരായണോ നാമ സപ്തമഃ സര്ഗഃ ॥