ചര്ചാ സ്തവഃ

പംചസ്തവി – 2 ചര്ചാസ്തവഃ >>

സൌംദര്യവിഭ്രമഭുവോ ഭുവനാധിപത്യ-
-സംകല്പകല്പതരവസ്ത്രിപുരേ ജയംതി ।
ഏതേ കവിത്വകുമദപ്രകരാവബോധ-
-പൂര്ണേംദവസ്ത്വയി ജഗജ്ജനനി പ്രണാമാഃ ॥ 1 ॥

ദേവി സ്തുതിവ്യതികരേ കൃതബുദ്ധയസ്തേ
വാചസ്പതി പ്രഭൃതയോഽപി ജഡീ ഭവംതി ।
തസ്മാന്നിസര്ഗജഡിമാ കതമോഽഹമത്ര
സ്തോത്രം തവ ത്രിപുരതാപനപത്നി കര്തുമ് ॥ 2 ॥

മാതസ്തഥാപി ഭവതീം ഭവതീവ്രതാപ-
-വിച്ഛിത്തയേ സ്തുതിമഹാര്ണവ കര്ണധാരഃ ।
സ്തോതും ഭവാനി സ ഭവച്ചരണാരവിംദ-
-ഭക്തിഗ്രഹഃ കിമപി മാം മുഖരീ കരോതി ॥ 3 ॥

സൂതേ ജഗംതി ഭവതീ ഭവതീ ബിഭര്തി
ജാഗര്തി തത്ക്ഷയകൃതേ ഭവതീ ഭവാനി ।
മോഹം ഭിനത്തി ഭവതീ ഭവതീ രുണദ്ധി
ലീലായിതം ജയതി ചിത്രമിദം ഭവത്യാഃ ॥ 4 ॥

യസ്മിന്മനാഗപി നവാംബുജപത്രഗൌരീം
ഗൌരീം പ്രസാദമധുരാം ദൃശമാദധാസി ।
തസ്മിന്നിരംതരമനംഗശരാവകീര്ണ-
-സീമംതിനീനയനസംതതയഃ പതംതി ॥ 5 ॥

പൃഥ്വീഭുജോഽപ്യുദയനപ്രഭവസ്യ തസ്യ
വിദ്യാധര പ്രണതി ചുംബിത പാദപീഠഃ ।
തച്ചക്രവര്തിപദവീപ്രണയഃ സ ഏഷഃ
ത്വത്പാദപംകജരജഃ കണജഃ പ്രസാദഃ ॥ 6 ॥

ത്വത്പാദപംകജരജ പ്രണിപാതപൂർവൈഃ
പുണ്യൈരനല്പമതിഭിഃ കൃതിഭിഃ കവീംദ്രൈഃ ।
ക്ഷീരക്ഷപാകരദുകൂലഹിമാവദാതാ
കൈരപ്യവാപി ഭുവനത്രിതയേഽപി കീര്തിഃ ॥ 7 ॥

കല്പദ്രുമപ്രസവകല്പിതചിത്രപൂജാം
ഉദ്ദീപിത പ്രിയതമാമദരക്തഗീതിമ് ।
നിത്യം ഭവാനി ഭവതീമുപവീണയംതി
വിദ്യാധരാഃ കനകശൈലഗുഹാഗൃഹേഷു ॥ 8 ॥

ലക്ഷ്മീവശീകരണകര്മണി കാമിനീനാം
ആകര്ഷണവ്യതികരേഷു ച സിദ്ധമംത്രഃ ।
നീരംധ്രമോഹതിമിരച്ഛിദുരപ്രദീപോ
ദേവി ത്വദംഘ്രിജനിതോ ജയതി പ്രസാദഃ ॥ 9 ॥

ദേവി ത്വദംഘ്രിനഖരത്നഭുവോ മയൂഖാഃ
പ്രത്യഗ്രമൌക്തികരുചോ മുദമുദ്വഹംതി ।
സേവാനതിവ്യതികരേ സുരസുംദരീണാം
സീമംതസീമ്നി കുസുമസ്തബകായിതം യൈഃ ॥ 10 ॥

മൂര്ധ്നി സ്ഫുരത്തുഹിനദീധിതിദീപ്തിദീപ്തം
മധ്യേ ലലാടമമരായുധരശ്മിചിത്രമ് ।
ഹൃച്ചക്രചുംബി ഹുതഭുക്കണികാനുകാരി
ജ്യോതിര്യദേതദിദമംബ തവ സ്വരൂപമ് ॥ 11 ॥

രൂപം തവ സ്ഫുരിതചംദ്രമരീചിഗൌരം
ആലോകതേ ശിരസി വാഗധിദൈവതം യഃ ।
നിഃസീമസൂക്തിരചനാമൃതനിര്ഝരസ്യ
തസ്യ പ്രസാദമധുരാഃ പ്രസരംതി വാചഃ ॥ 12 ॥

സിംദൂരപാംസുപടലച്ഛുരിതാമിവ ദ്യാം
ത്വത്തേജസാ ജതുരസസ്നപിതാമിവോർവീമ് ।
യഃ പശ്യതി ക്ഷണമപി ത്രിപുരേ വിഹായ
വ്രീഡാം മൃഡാനി സുദൃശസ്തമനുദ്രവംതി ॥ 13 ॥

മാതര്മുഹൂര്തമപി യഃ സ്മരതി സ്വരൂപം
ലാക്ഷാരസപ്രസരതംതുനിഭം ഭവത്യാഃ ।
ധ്യായംത്യനന്യമനസസ്തമനംഗതപ്താഃ
പ്രദ്യുമ്നസീമ്നി സുഭഗത്വഗുണം തരുണ്യഃ ॥ 14 ॥

യോഽയം ചകാസ്തി ഗഗനാര്ണവരത്നമിംദുഃ
യോഽയം സുരാസുരഗുരുഃ പുരുഷഃ പുരാണഃ ।
യദ്വാമമര്ധമിദമംധകസൂദനസ്യ
ദേവി ത്വമേവ തദിതി പ്രതിപാദയംതി ॥ 15 ॥

ഇച്ഛാനുരൂപമനുരൂപഗുണപ്രകര്ഷ
സംകര്ഷിണി ത്വമഭിമൃശ്യ യദാ ബിഭര്ഷി ।
ജായേത സ ത്രിഭുവനൈക ഗുരുസ്തദാനീം
ദേവഃ ശിവോഽപി ഭുവനത്രയസൂത്രധാരഃ ॥ 16 ॥

ധ്യാതാസി ഹൈമവതി യേന ഹിമാംശുരശ്മി-
-മാലാമലദ്യുതിരകല്മഷമാനസേന ।
തസ്യാവിലംബമനവദ്യമനംതകല്പം
അല്പൈര്ദിനൈഃ സൃജസി സുംദരി വാഗ്വിലാസമ് ॥ 17 ॥

ആധാരമാരുതനിരോധവശേന യേഷാം
സിംദൂരരംജിതസരോജഗുണാനുകാരി ।
ദീപ്തം ഹൃദി സ്ഫുരതി ദേവി വപുസ്ത്വദീയം
ധ്യായംതി താനിഹ സമീഹിതസിദ്ധിസാര്ഥാഃ ॥ 18 ॥

യേ ചിംതയംത്യരുണമംഡലമധ്യവര്തി
രൂപം തവാംബ നവയാവകപംകപിംഗമ് ।
തേഷാം സദൈവ കുസുമായുധബാണഭിന്ന-
-വക്ഷഃസ്ഥലാ മൃഗദൃശോ വശഗാ ഭവംതി ॥ 19 ॥

ത്വാമൈംദവീമിവ കലാമനുഫാലദേശം
ഉദ്ഭാസിതാംബരതലാമവലോകയംതഃ ।
സദ്യോ ഭവാനി സുധിയഃ കവയോ ഭവംതി
ത്വം ഭാവനാഹിതധിയാം കുലകാമധേനുഃ ॥ 20 ॥

ശർവാണി സർവജനവംദിതപാദപദ്മേ
പദ്മച്ഛദദ്യുതിവിഡംബിതനേത്രലക്ഷ്മി ।
നിഷ്പാപമൂര്തിജനമാനസരാജഹംസി
ഹംസി ത്വമാപദമനേകവിധാം ജനസ്യ ॥ 21 ॥

ഉത്തപ്തഹേമരുചിരേ ത്രിപുരേ പുനീഹി
ചേതശ്ചിരംതനമഘൌഘവനം ലുനീഹി ।
കാരാഗൃഹേ നിഗലബംധനയംത്രിതസ്യ
ത്വത്സംസ്മൃതൌ ഝടിതി മേ നിഗലാസ്ത്രുടംതി ॥ 22 ॥

ത്വാം വ്യാപിനീതി സുമനാ ഇതി കുംഡലീതി
ത്വാം കാമിനീതി കമലേതി കലാവതീതി ।
ത്വാം മാലിനീതി ലലിതേത്യപരാജിതേതി
ദേവി സ്തുവംതി വിജയേതി ജയേത്യുമേതി ॥ 23 ॥

ഉദ്ദാമകാമപരമാര്ഥസരോജഖംഡ-
ചംഡദ്യുതിദ്യുതിമപാസിതഷഡ്വികാരാമ് ।
മോഹദ്വിപേംദ്രകദനോദ്യതബോധസിംഹ-
-ലീലാഗുഹാം ഭഗവതീം ത്രിപുരാം നമാമി ॥ 24 ॥

ഗണേശവടുകസ്തുതാ രതിസഹായകാമാന്വിതാ
സ്മരാരിവരവിഷ്ടരാ കുസുമബാണബാണൈര്യുതാ ।
അനംഗകുസുമാദിഭിഃ പരിവൃതാ ച സിദ്ധൈസ്ത്രിഭിഃ
കദംബവനമധ്യഗാ ത്രിപുരസുംദരീ പാതു നഃ ॥ 25 ॥

രുദ്രാണി വിദ്രുമമയീം പ്രതിമാമിവ ത്വാം
യേ ചിംതയംത്യരുണകാംതിമനന്യരൂപാമ് ।
താനേത്യ പക്ഷ്മലദൃശഃ പ്രസഭം ഭജംതേ
കംഠാവസക്തമൃദുബാഹുലതാസ്തരുണ്യഃ ॥ 26 ॥

ത്വദ്രൂപൈകനിരൂപണപ്രണയിതാബംധോ ദൃശോസ്ത്വദ്ഗുണ-
-ഗ്രാമാകര്ണനരാഗിതാ ശ്രവണയോസ്ത്വത്സംസ്മൃതിശ്ചേതസി ।
ത്വത്പാദാര്ചനചാതുരീ കരയുഗേ ത്വത്കീര്തിതം വാചി മേ
കുത്രാപി ത്വദുപാസനവ്യസനിതാ മേ ദേവി മാ ശാമ്യതു ॥ 27 ॥

ത്വദ്രൂപമുല്ലസിതദാഡിമപുഷ്പരക്തം
ഉദ്ഭാവയേന്മദനദൈവതമക്ഷരം യഃ ।
തം രൂപഹീനമപി മന്മഥനിർവിശേഷം
ആലോകയംത്യുരുനിതംബതടാസ്തരുണ്യഃ ॥ 28 ॥

ബ്രഹ്മേംദ്രരുദ്രഹരിചംദ്രസഹസ്രരശ്മി-
-സ്കംദദ്വിപാനനഹുതാശനവംദിതായൈ ।
വാഗീശ്വരി ത്രിഭുവനേശ്വരി വിശ്വമാതഃ
അംതര്ബഹിശ്ച കൃതസംസ്ഥിതയേ നമസ്തേ ॥ 29 ॥

കസ്തോത്രമേതദനുവാസരമീശ്വരായാഃ
ശ്രേയസ്കരം പഠതി വാ യദി വാ ശൃണോതി ।
തസ്യേപ്സിതം ഫലതി രാജഭിരീഡ്യതേഽസൌ
ജായേത സ പ്രിയതമോ മദിരേക്ഷണാനാമ് ॥ 30 ॥

ഇതി ശ്രീകാളിദാസ വിരചിത പംചസ്തവ്യാം ദ്വിതീയഃ ചര്ചാസ്തവഃ ।