ഭീഷ്മ കൃത ഭഗവത് സ്തുതിഃ (ശ്രീ കൃഷ്ണ സ്തുതിഃ)

ഭീഷ്മ ഉവാച ।
ഇതി മതിരുപകല്പിതാ വിതൃഷ്ണാ
ഭഗവതി സാത്വതപുംഗവേ വിഭൂമ്നി ।
സ്വസുഖമുപഗതേ ക്വചിദ്വിഹര്തും
പ്രകൃതിമുപേയുഷി യദ്ഭവപ്രവാഹഃ ॥ 1 ॥

ത്രിഭുവനകമനം തമാലവര്ണം
രവികരഗൌരവരാംബരം ദധാനേ ।
വപുരലകകുലാവൃതാനനാബ്ജം
വിജയസഖേ രതിരസ്തു മേഽനവദ്യാ ॥ 2 ॥

യുധി തുരഗരജോവിധൂമ്രവിഷ്വക്
കചലുലിതശ്രമവാര്യലംകൃതാസ്യേ ।
മമ നിശിതശരൈർവിഭിദ്യമാന
ത്വചി വിലസത്കവചേഽസ്തു കൃഷ്ണ ആത്മാ ॥ 3 ॥

സപദി സഖിവചോ നിശമ്യ മധ്യേ
നിജപരയോര്ബലയോ രഥം നിവേശ്യ ।
സ്ഥിതവതി പരസൈനികായുരക്ഷ്ണാ
ഹൃതവതി പാര്ഥസഖേ രതിര്മമാസ്തു ॥ 4 ॥

വ്യവഹിത പൃഥനാമുഖം നിരീക്ഷ്യ
സ്വജനവധാദ്വിമുഖസ്യ ദോഷബുദ്ധ്യാ ।
കുമതിമഹരദാത്മവിദ്യയാ യ-
-ശ്ചരണരതിഃ പരമസ്യ തസ്യ മേഽസ്തു ॥ 5 ॥

സ്വനിഗമമപഹായ മത്പ്രതിജ്ഞാം
ഋതമധികര്തുമവപ്ലുതോ രഥസ്ഥഃ ।
ധൃതരഥചരണോഽഭ്യയാച്ചലദ്ഗുഃ
ഹരിരിവ ഹംതുമിഭം ഗതോത്തരീയഃ ॥ 6 ॥

ശിതവിശിഖഹതോ വിശീര്ണദംശഃ
ക്ഷതജപരിപ്ലുത ആതതായിനോ മേ ।
പ്രസഭമഭിസസാര മദ്വധാര്ഥം
സ ഭവതു മേ ഭഗവാന് ഗതിര്മുകുംദഃ ॥ 7 ॥

വിജയരഥകുടുംബ ആത്തതോത്രേ
ധൃതഹയരശ്മിനി തച്ഛ്രിയേക്ഷണീയേ ।
ഭഗവതി രതിരസ്തു മേ മുമൂര്ഷോഃ
യമിഹ നിരീക്ഷ്യ ഹതാഃ ഗതാഃ സരൂപമ് ॥ 8 ॥

ലലിത ഗതി വിലാസ വല്ഗുഹാസ
പ്രണയ നിരീക്ഷണ കല്പിതോരുമാനാഃ ।
കൃതമനുകൃതവത്യ ഉന്മദാംധാഃ
പ്രകൃതിമഗന് കില യസ്യ ഗോപവധ്വഃ ॥ 9 ॥

മുനിഗണനൃപവര്യസംകുലേഽംതഃ
സദസി യുധിഷ്ഠിരരാജസൂയ ഏഷാമ് ।
അര്ഹണമുപപേദ ഈക്ഷണീയോ
മമ ദൃശിഗോചര ഏഷ ആവിരാത്മാ ॥ 10 ॥

തമിമമഹമജം ശരീരഭാജാം
ഹൃദി ഹൃദി ധിഷ്ടിതമാത്മകല്പിതാനാമ് ।
പ്രതിദൃശമിവ നൈകധാഽര്കമേകം
സമധിഗതോഽസ്മി വിധൂതഭേദമോഹഃ ॥ 11 ॥

ഇതി ശ്രീമദ്ഭാഗവതേ മഹാപുരാണേ പ്രഥമസ്കംധേ നവമോഽധ്യായേ ഭീഷ്മകൃത ഭഗവത് സ്തുതിഃ ।