ಶ್ರೀ ರಾಮ ತಾಂಡವ ಸ್ತೋತ್ರಂ

॥ ಇಂದ್ರಾದಯೋ ಊಚುಃ ॥

ಜಟಾಕಟಾಹಯುಕ್ತಮುಂಡಪ್ರಾಂತವಿಸ್ತೃತಂ ಹರೇಃ
ಅಪಾಂಗಕ್ರುದ್ಧದರ್ಶನೋಪಹಾರ ಚೂರ್ಣಕುಂತಲಃ ।
ಪ್ರಚಂಡವೇಗಕಾರಣೇನ ಪಿಂಜಲಃ ಪ್ರತಿಗ್ರಹಃ
ಸ ಕ್ರುದ್ಧತಾಂಡವಸ್ವರೂಪಧೃಗ್ವಿರಾಜತೇ ಹರಿಃ ॥ 1 ॥

ಅಥೇಹ ವ್ಯೂಹಪಾರ್ಷ್ಣಿಪ್ರಾಗ್ವರೂಥಿನೀ ನಿಷಂಗಿನಃ
ತಥಾಂಜನೇಯೃಕ್ಷಭೂಪಸೌರಬಾಲಿನಂದನಾಃ ।
ಪ್ರಚಂಡದಾನವಾನಲಂ ಸಮುದ್ರತುಲ್ಯನಾಶಕಾಃ
ನಮೋಽಸ್ತುತೇ ಸುರಾರಿಚಕ್ರಭಕ್ಷಕಾಯ ಮೃತ್ಯವೇ ॥ 2 ॥

ಕಲೇವರೇ ಕಷಾಯವಾಸಹಸ್ತಕಾರ್ಮುಕಂ ಹರೇಃ
ಉಪಾಸನೋಪಸಂಗಮಾರ್ಥಧೃಗ್ವಿಶಾಖಮಂಡಲಮ್ ।
ಹೃದಿ ಸ್ಮರನ್ ದಶಾಕೃತೇಃ ಕುಚಕ್ರಚೌರ್ಯಪಾತಕಂ
ವಿದಾರ್ಯತೇ ಪ್ರಚಂಡತಾಂಡವಾಕೃತಿಃ ಸ ರಾಘವಃ ॥ 3 ॥

ಪ್ರಕಾಂಡಕಾಂಡಕಾಂಡಕರ್ಮದೇಹಛಿದ್ರಕಾರಣಂ
ಕುಕೂಟಕೂಟಕೂಟಕೌಣಪಾತ್ಮಜಾಭಿಮರ್ದನಮ್ ।
ತಥಾಗುಣಂಗುಣಂಗುಣಂಗುಣಂಗುಣೇನ ದರ್ಶಯನ್
ಕೃಪೀಟಕೇಶಲಂಘ್ಯಮೀಶಮೇಕರಾಘವಂ ಭಜೇ ॥ 4 ॥

ಸವಾನರಾನ್ವಿತಃ ತಥಾಪ್ಲುತಂ ಶರೀರಮಸೃಜಾ
ವಿರೋಧಿಮೇದಸಾಗ್ರಮಾಂಸಗುಲ್ಮಕಾಲಖಂಡನೈಃ ।
ಮಹಾಸಿಪಾಶಶಕ್ತಿದಂಡಧಾರಕೈಃ ನಿಶಾಚರೈಃ
ಪರಿಪ್ಲುತಂ ಕೃತಂ ಶವೈಶ್ಚ ಯೇನ ಭೂಮಿಮಂಡಲಮ್ ॥ 5 ॥

ವಿಶಾಲದಂಷ್ಟ್ರಕುಂಭಕರ್ಣಮೇಘರಾವಕಾರಕೈಃ
ತಥಾಹಿರಾವಣಾದ್ಯಕಂಪನಾತಿಕಾಯಜಿತ್ವರೈಃ ।
ಸುರಕ್ಷಿತಾಂ ಮನೋರಮಾಂ ಸುವರ್ಣಲಂಕನಾಗರೀಂ
ನಿಜಾಸ್ತ್ರಸಂಕುಲೈರಭೇದ್ಯಕೋಟಮರ್ದನಂ ಕೃತಃ ॥ 6 ॥

ಪ್ರಬುದ್ಧಬುದ್ಧಯೋಗಿಭಿಃ ಮಹರ್ಷಿಸಿದ್ಧಚಾರಣೈಃ
ವಿದೇಹಜಾಪ್ರಿಯಃ ಸದಾನುತೋ ಸ್ತುತೋ ಚ ಸ್ವಸ್ತಿಭಿಃ ।
ಪುಲಸ್ತ್ಯನಂದನಾತ್ಮಜಸ್ಯ ಮುಂಡರುಂಡಛೇದನಂ
ಸುರಾರಿಯೂಥಭೇದನಂ ವಿಲೋಕಯಾಮಿ ಸಾಂಪ್ರತಮ್ ॥ 7 ॥

ಕರಾಲಕಾಲರೂಪಿಣಂ ಮಹೋಗ್ರಚಾಪಧಾರಿಣಂ
ಕುಮೋಹಗ್ರಸ್ತಮರ್ಕಟಾಚ್ಛಭಲ್ಲತ್ರಾಣಕಾರಣಮ್ ।
ವಿಭೀಷಣಾದಿಭಿಃ ಸದಾಭಿಷೇಣನೇಽಭಿಚಿಂತಕಂ
ಭಜಾಮಿ ಜಿತ್ವರಂ ತಥೋರ್ಮಿಲಾಪತೇಃ ಪ್ರಿಯಾಗ್ರಜಮ್ ॥ 8 ॥

ಇತಸ್ತತಃ ಮುಹುರ್ಮುಹುಃ ಪರಿಭ್ರಮಂತಿ ಕೌಂತಿಕಾಃ
ಅನುಪ್ಲವಪ್ರವಾಹಪ್ರಾಸಿಕಾಶ್ಚ ವೈಜಯಂತಿಕಾಃ ।
ಮೃಧೇ ಪ್ರಭಾಕರಸ್ಯ ವಂಶಕೀರ್ತಿನೋಽಪದಾನತಾಂ
ಅಭಿಕ್ರಮೇಣ ರಾಘವಸ್ಯ ತಾಂಡವಾಕೃತೇಃ ಗತಾಃ ॥ 9 ॥

ನಿರಾಕೃತಿಂ ನಿರಾಮಯಂ ತಥಾದಿಸೃಷ್ಟಿಕಾರಣಂ
ಮಹೋಜ್ಜ್ವಲಂ ಅಜಂ ವಿಭುಂ ಪುರಾಣಪೂರುಷಂ ಹರಿಮ್ ।
ನಿರಂಕುಶಂ ನಿಜಾತ್ಮಭಕ್ತಜನ್ಮಮೃತ್ಯುನಾಶಕಂ
ಅಧರ್ಮಮಾರ್ಗಘಾತಕಂ ಕಪೀಶವ್ಯೂಹನಾಯಕಮ್ ॥ 10 ॥

ಕರಾಲಪಾಲಿಚಕ್ರಶೂಲತೀಕ್ಷ್ಣಭಿಂದಿಪಾಲಕೈಃ
ಕುಠಾರಸರ್ವಲಾಸಿಧೇನುಕೇಲಿಶಲ್ಯಮುದ್ಗರೈಃ ।
ಸುಪುಷ್ಕರೇಣ ಪುಷ್ಕರಾಂಚ ಪುಷ್ಕರಾಸ್ತ್ರಮಾರಣೈಃ
ಸದಾಪ್ಲುತಂ ನಿಶಾಚರೈಃ ಸುಪುಷ್ಕರಂಚ ಪುಷ್ಕರಮ್ ॥ 11 ॥

ಪ್ರಪನ್ನಭಕ್ತರಕ್ಷಕಂ ವಸುಂಧರಾತ್ಮಜಾಪ್ರಿಯಂ
ಕಪೀಶವೃಂದಸೇವಿತಂ ಸಮಸ್ತದೂಷಣಾಪಹಮ್ ।
ಸುರಾಸುರಾಭಿವಂದಿತಂ ನಿಶಾಚರಾಂತಕಂ ವಿಭುಂ
ಜಗತ್ಪ್ರಶಸ್ತಿಕಾರಣಂ ಭಜೇಹ ರಾಮಮೀಶ್ವರಮ್ ॥ 12 ॥

॥ ಇತಿ ಶ್ರೀಭಾಗವತಾನಂದಗುರುಣಾ ವಿರಚಿತೇ ಶ್ರೀರಾಘವೇಂದ್ರಚರಿತೇ
ಇಂದ್ರಾದಿ ದೇವಗಣೈಃ ಕೃತಂ ಶ್ರೀರಾಮತಾಂಡವಸ್ತೋತ್ರಂ ಸಂಪೂರ್ಣಮ್ ॥