ಶ್ರೀ ಕಾಳಿಕಾ ಸಹಸ್ರ ನಾಮ ಸ್ತೋತ್ರಂ

ಶ್ರೀ ಶಿವ ಉವಾಚ ।
ಕಥಿತೋಽಯಂ ಮಹಾಮಂತ್ರಃ ಸರ್ವಮಂತ್ರೋತ್ತಮೋತ್ತಮಃ ।
ಯಾಮಾಸಾದ್ಯ ಮಯಾ ಪ್ರಾಪ್ತಮೈಶ್ವರ್ಯಪದಮುತ್ತಮಮ್ ॥ 1 ॥

ಸಂಯುಕ್ತಃ ಪರಯಾ ಭಕ್ತ್ಯಾ ಯಥೋಕ್ತ ವಿಧಿನಾ ಭವಾನ್ ।
ಕುರುತಾಮರ್ಚನಂ ದೇವ್ಯಾಸ್ತ್ರೈಲೋಕ್ಯವಿಜಿಗೀಷಯಾ ॥ 2 ॥

ಶ್ರೀಪರಶುರಾಮ ಉವಾಚ ।
ಪ್ರಸನ್ನೋ ಯದಿ ಮೇ ದೇವ ಪರಮೇಶ ಪುರಾತನ ।
ರಹಸ್ಯಂ ಪರಮಂ ದೇವ್ಯಾಃ ಕೃಪಯಾ ಕಥಯ ಪ್ರಭೋ ॥ 3 ॥

ವಿನಾರ್ಚನಂ ವಿನಾ ಹೋಮಂ ವಿನಾ ನ್ಯಾಸಂ ವಿನಾ ಬಲಿಮ್ ।
ವಿನಾ ಗಂಧಂ ವಿನಾ ಪುಷ್ಪಂ ವಿನಾ ನಿತ್ಯೋದಿತಾಂ ಕ್ರಿಯಾಮ್ ॥ 4 ॥

ಪ್ರಾಣಾಯಾಮಂ ವಿನಾ ಧ್ಯಾನಂ ವಿನಾ ಭೂತವಿಶೋಧನಮ್ ।
ವಿನಾ ದಾನಂ ವಿನಾ ಜಾಪಂ ಯೇನ ಕಾಳೀ ಪ್ರಸೀದತಿ ॥ 5 ॥

ಶ್ರೀ ಶಿವ ಉವಾಚ ।
ಪೃಷ್ಟಂ ತ್ವಯೋತ್ತಮಂ ಪ್ರಾಜ್ಞ ಭೃಗುವಂಶ ಸಮುದ್ಭವ ।
ಭಕ್ತಾನಾಮಪಿ ಭಕ್ತೋಽಸಿ ತ್ವಮೇವ ಸಾಧಯಿಷ್ಯಸಿ ॥ 6 ॥

ದೇವೀಂ ದಾನವಕೋಟಿಘ್ನೀಂ ಲೀಲಯಾ ರುಧಿರಪ್ರಿಯಾಮ್ ।
ಸದಾ ಸ್ತೋತ್ರಪ್ರಿಯಾಮುಗ್ರಾಂ ಕಾಮಕೌತುಕಲಾಲಸಾಮ್ ॥ 7 ॥

ಸರ್ವದಾಽಽನಂದಹೃದಯಾಮಾಸವೋತ್ಸವ ಮಾನಸಾಮ್ ।
ಮಾಧ್ವೀಕ ಮತ್ಸ್ಯಮಾಂಸಾನುರಾಗಿಣೀಂ ವೈಷ್ಣವೀಂ ಪರಾಮ್ ॥ 8 ॥

ಶ್ಮಶಾನವಾಸಿನೀಂ ಪ್ರೇತಗಣನೃತ್ಯಮಹೋತ್ಸವಾಮ್ ।
ಯೋಗಪ್ರಭಾವಾಂ ಯೋಗೇಶೀಂ ಯೋಗೀಂದ್ರಹೃದಯಸ್ಥಿತಾಮ್ ॥ 9 ॥

ತಾಮುಗ್ರಕಾಳಿಕಾಂ ರಾಮ ಪ್ರಸೀದಯಿತುಮರ್ಹಸಿ ।
ತಸ್ಯಾಃ ಸ್ತೋತ್ರಂ ಪರಂ ಪುಣ್ಯಂ ಸ್ವಯಂ ಕಾಳ್ಯಾ ಪ್ರಕಾಶಿತಮ್ ॥ 10 ॥

ತವ ತತ್ ಕಥಯಿಷ್ಯಾಮಿ ಶ್ರುತ್ವಾ ವತ್ಸಾವಧಾರಯ ।
ಗೋಪನೀಯಂ ಪ್ರಯತ್ನೇನ ಪಠನೀಯಂ ಪರಾತ್ಪರಮ್ ॥ 11 ॥

ಯಸ್ಯೈಕಕಾಲಪಠನಾತ್ ಸರ್ವೇ ವಿಘ್ನಾಃ ಸಮಾಕುಲಾಃ ।
ನಶ್ಯಂತಿ ದಹನೇ ದೀಪ್ತೇ ಪತಂಗಾ ಇವ ಸರ್ವತಃ ॥ 12 ॥

ಗದ್ಯಪದ್ಯಮಯೀ ವಾಣೀ ತಸ್ಯ ಗಂಗಾಪ್ರವಾಹವತ್ ।
ತಸ್ಯ ದರ್ಶನಮಾತ್ರೇಣ ವಾದಿನೋ ನಿಷ್ಪ್ರಭಾಂ ಗತಾಃ ॥ 13 ॥

ತಸ್ಯ ಹಸ್ತೇ ಸದೈವಾಸ್ತಿ ಸರ್ವಸಿದ್ಧಿರ್ನ ಸಂಶಯಃ ।
ರಾಜಾನೋಽಪಿ ಚ ದಾಸತ್ವಂ ಭಜಂತೇ ಕಿಂ ಪರೇ ಜನಾಃ ॥ 14 ॥

ನಿಶೀಥೇ ಮುಕ್ತಕೇಶಸ್ತು ನಗ್ನಃ ಶಕ್ತಿಸಮಾಹಿತಃ ।
ಮನಸಾ ಚಿಂತಯೇತ್ ಕಾಳೀಂ ಮಹಾಕಾಳೇನ ಚಾಲಿತಾಮ್ ॥ 15 ॥

ಪಠೇತ್ ಸಹಸ್ರನಾಮಾಖ್ಯಂ ಸ್ತೋತ್ರಂ ಮೋಕ್ಷಸ್ಯ ಸಾಧನಮ್ ।
ಪ್ರಸನ್ನಾ ಕಾಳಿಕಾ ತಸ್ಯ ಪುತ್ರತ್ವೇನಾನುಕಂಪತೇ ॥ 16 ॥

ಯಥಾ ಬ್ರಹ್ಮಮೃತೈರ್ಬ್ರಹ್ಮಕುಸುಮೈಃ ಪೂಜಿತಾ ಪರಾ ।
ಪ್ರಸೀದತಿ ತಥಾನೇನ ಸ್ತುತಾ ಕಾಳೀ ಪ್ರಸೀದತಿ ॥ 17 ॥

ವಿನಿಯೋಗಃ –
ಅಸ್ಯ ಶ್ರೀ ದಕ್ಷಿಣಕಾಲಿಕಾ ಸಹಸ್ರನಾಮ ಸ್ತೋತ್ರಸ್ಯ ಮಹಾಕಾಲಭೈರವ ಋಷಿಃ ಅನುಷ್ಟುಪ್ ಛಂದಃ ಶ್ಮಶಾನಕಾಳೀ ದೇವತಾ ಧರ್ಮಾರ್ಥಕಾಮಮೋಕ್ಷಾರ್ಥೇ ಪಾಠೇ ವಿನಿಯೋಗಃ ।

ಧ್ಯಾನಂ –
ಶವಾರೂಢಾಂ ಮಹಾಭೀಮಾಂ ಘೋರದಂಷ್ಟ್ರಾಂ ಹಸನ್ಮುಖೀಂ
ಚತುರ್ಭುಜಾಂ ಖಡ್ಗಮುಂಡವರಾಭಯಕರಾಂ ಶಿವಾಮ್ ।
ಮುಂಡಮಾಲಾಧರಾಂ ದೇವೀಂ ಲಲಾಜ್ಜಿಹ್ವಾಂ ದಿಗಂಬರಾಂ
ಏವಂ ಸಂಚಿಂತಯೇತ್ಕಾಳೀಂ ಶ್ಮಶಾನಾಲಯವಾಸಿನೀಮ್ ॥

ಸ್ತೋತ್ರಂ –
ಶ್ಮಶಾನಕಾಳಿಕಾ ಕಾಳೀ ಭದ್ರಕಾಳೀ ಕಪಾಲಿನೀ ।
ಗುಹ್ಯಕಾಳೀ ಮಹಾಕಾಳೀ ಕುರುಕುಲ್ಲಾ ವಿರೋಧಿನೀ ॥ 1 ॥

ಕಾಳಿಕಾ ಕಾಳರಾತ್ರಿಶ್ಚ ಮಹಾಕಾಲನಿತಂಬಿನೀ ।
ಕಾಲಭೈರವಭಾರ್ಯಾ ಚ ಕುಲವರ್ತ್ಮಪ್ರಕಾಶಿನೀ ॥ 2 ॥

ಕಾಮದಾ ಕಾಮಿನೀ ಕನ್ಯಾ ಕಮನೀಯಸ್ವರೂಪಿಣೀ ।
ಕಸ್ತೂರೀರಸಲಿಪ್ತಾಂಗೀ ಕುಂಜರೇಶ್ವರಗಾಮಿನೀ ॥ 3 ॥

ಕಕಾರವರ್ಣಸರ್ವಾಂಗೀ ಕಾಮಿನೀ ಕಾಮಸುಂದರೀ ।
ಕಾಮಾರ್ತಾ ಕಾಮರೂಪಾ ಚ ಕಾಮಧೇನುಃ ಕಳಾವತೀ ॥ 4 ॥

ಕಾಂತಾ ಕಾಮಸ್ವರೂಪಾ ಚ ಕಾಮಾಖ್ಯಾ ಕುಲಕಾಮಿನೀ ।
ಕುಲೀನಾ ಕುಲವತ್ಯಂಬಾ ದುರ್ಗಾ ದುರ್ಗತಿನಾಶಿನೀ ॥ 5 ॥

ಕೌಮಾರೀ ಕಲಜಾ ಕೃಷ್ಣಾ ಕೃಷ್ಣದೇಹಾ ಕೃಶೋದರೀ ।
ಕೃಶಾಂಗೀ ಕುಲಿಶಾಂಗೀ ಚ ಕ್ರೀಂಕಾರೀ ಕಮಲಾ ಕಲಾ ॥ 6 ॥

ಕರಾಳಾಸ್ಯಾ ಕರಾಳೀ ಚ ಕುಲಕಾಂತಾಽಪರಾಜಿತಾ ।
ಉಗ್ರಾ ಉಗ್ರಪ್ರಭಾ ದೀಪ್ತಾ ವಿಪ್ರಚಿತ್ತಾ ಮಹಾಬಲಾ ॥ 7 ॥

ನೀಲಾ ಘನಾ ಮೇಘನಾದಾ ಮಾತ್ರಾ ಮುದ್ರಾ ಮಿತಾಮಿತಾ ।
ಬ್ರಾಹ್ಮೀ ನಾರಾಯಣೀ ಭದ್ರಾ ಸುಭದ್ರಾ ಭಕ್ತವತ್ಸಲಾ ॥ 8 ॥

ಮಾಹೇಶ್ವರೀ ಚ ಚಾಮುಂಡಾ ವಾರಾಹೀ ನಾರಸಿಂಹಿಕಾ ।
ವಜ್ರಾಂಗೀ ವಜ್ರಕಂಕಾಳೀ ನೃಮುಂಡಸ್ರಗ್ವಿಣೀ ಶಿವಾ ॥ 9 ॥

ಮಾಲಿನೀ ನರಮುಂಡಾಲೀ ಗಲದ್ರಕ್ತವಿಭೂಷಣಾ ।
ರಕ್ತಚಂದನಸಿಕ್ತಾಂಗೀ ಸಿಂದೂರಾರುಣಮಸ್ತಕಾ ॥ 10 ॥

ಘೋರರೂಪಾ ಘೋರದಂಷ್ಟ್ರಾ ಘೋರಾಘೋರತರಾ ಶುಭಾ ।
ಮಹಾದಂಷ್ಟ್ರಾ ಮಹಾಮಾಯಾ ಸುದತೀ ಯುಗದಂತುರಾ ॥ 11 ॥

ಸುಲೋಚನಾ ವಿರೂಪಾಕ್ಷೀ ವಿಶಾಲಾಕ್ಷೀ ತ್ರಿಲೋಚನಾ ।
ಶಾರದೇಂದುಪ್ರಸನ್ನಾಸ್ಯಾ ಸ್ಫುರತ್ಸ್ಮೇರಾಂಬುಜೇಕ್ಷಣಾ ॥ 12 ॥

ಅಟ್ಟಹಾಸಪ್ರಫುಲ್ಲಾಸ್ಯಾ ಸ್ಮೇರವಕ್ತ್ರಾ ಸುಭಾಷಿಣೀ ।
ಪ್ರಫುಲ್ಲಪದ್ಮವದನಾ ಸ್ಮಿತಾಸ್ಯಾ ಪ್ರಿಯಭಾಷಿಣೀ ॥ 13 ॥

ಕೋಟರಾಕ್ಷೀ ಕುಲಶ್ರೇಷ್ಠಾ ಮಹತೀ ಬಹುಭಾಷಿಣೀ ।
ಸುಮತಿಃ ಕುಮತಿಶ್ಚಂಡಾ ಚಂಡಮುಂಡಾತಿವೇಗಿನೀ ॥ 14 ॥

ಸುಕೇಶೀ ಮುಕ್ತಕೇಶೀ ಚ ದೀರ್ಘಕೇಶೀ ಮಹಾಕಚಾ ।
ಪ್ರೇತದೇಹಾಕರ್ಣಪೂರಾ ಪ್ರೇತಪಾಣಿಸುಮೇಖಲಾ ॥ 15 ॥

ಪ್ರೇತಾಸನಾ ಪ್ರಿಯಪ್ರೇತಾ ಪುಣ್ಯದಾ ಕುಲಪಂಡಿತಾ ।
ಪುಣ್ಯಾಲಯಾ ಪುಣ್ಯದೇಹಾ ಪುಣ್ಯಶ್ಲೋಕಾ ಚ ಪಾವನೀ ॥ 16 ॥

ಪೂತಾ ಪವಿತ್ರಾ ಪರಮಾ ಪರಾ ಪುಣ್ಯವಿಭೂಷಣಾ ।
ಪುಣ್ಯನಾಮ್ನೀ ಭೀತಿಹರಾ ವರದಾ ಖಡ್ಗಪಾಣಿನೀ ॥ 17 ॥

ನೃಮುಂಡಹಸ್ತಾ ಶಾಂತಾ ಚ ಛಿನ್ನಮಸ್ತಾ ಸುನಾಸಿಕಾ ।
ದಕ್ಷಿಣಾ ಶ್ಯಾಮಲಾ ಶ್ಯಾಮಾ ಶಾಂತಾ ಪೀನೋನ್ನತಸ್ತನೀ ॥ 18 ॥

ದಿಗಂಬರಾ ಘೋರರಾವಾ ಸೃಕ್ಕಾಂತರಕ್ತವಾಹಿನೀ ।
ಘೋರರಾವಾ ಶಿವಾಸಂಗಾ ನಿಃಸಂಗಾ ಮದನಾತುರಾ ॥ 19 ॥

ಮತ್ತಾ ಪ್ರಮತ್ತಾ ಮದನಾ ಸುಧಾಸಿಂಧುನಿವಾಸಿನೀ ।
ಅತಿಮತ್ತಾ ಮಹಾಮತ್ತಾ ಸರ್ವಾಕರ್ಷಣಕಾರಿಣೀ ॥ 20 ॥

ಗೀತಪ್ರಿಯಾ ವಾದ್ಯರತಾ ಪ್ರೇತನೃತ್ಯಪರಾಯಣಾ ।
ಚತುರ್ಭುಜಾ ದಶಭುಜಾ ಅಷ್ಟಾದಶಭುಜಾ ತಥಾ ॥ 21 ॥

ಕಾತ್ಯಾಯನೀ ಜಗನ್ಮಾತಾ ಜಗತೀ ಪರಮೇಶ್ವರೀ ।
ಜಗದ್ಬಂಧುರ್ಜಗದ್ಧಾತ್ರೀ ಜಗದಾನಂದಕಾರಿಣೀ ॥ 22 ॥

ಜಗಜ್ಜೀವವತೀ ಹೈಮವತೀ ಮಾಯಾ ಮಹಾಲಯಾ ।
ನಾಗಯಜ್ಞೋಪವೀತಾಂಗೀ ನಾಗಿನೀ ನಾಗಶಾಯಿನೀ ॥ 23 ॥

ನಾಗಕನ್ಯಾ ದೇವಕನ್ಯಾ ಗಾಂಧಾರೀ ಕಿನ್ನರೀ ಸುರೀ ।
ಮೋಹರಾತ್ರೀ ಮಹಾರಾತ್ರೀ ದಾರುಣಾಮಾಸುರಾಸುರೀ ॥ 24 ॥

ವಿದ್ಯಾಧರೀ ವಸುಮತೀ ಯಕ್ಷಿಣೀ ಯೋಗಿನೀ ಜರಾ ।
ರಾಕ್ಷಸೀ ಡಾಕಿನೀ ವೇದಮಯೀ ವೇದವಿಭೂಷಣಾ ॥ 25 ॥

ಶ್ರುತಿಸ್ಮೃತಿಮಹಾವಿದ್ಯಾ ಗುಹ್ಯವಿದ್ಯಾ ಪುರಾತನೀ ।
ಚಿಂತ್ಯಾಽಚಿಂತ್ಯಾ ಸ್ವಧಾ ಸ್ವಾಹಾ ನಿದ್ರಾ ತಂದ್ರಾ ಚ ಪಾರ್ವತೀ ॥ 26 ॥

ಅಪರ್ಣಾ ನಿಶ್ಚಲಾ ಲೋಲಾ ಸರ್ವವಿದ್ಯಾ ತಪಸ್ವಿನೀ ।
ಗಂಗಾ ಕಾಶೀ ಶಚೀ ಸೀತಾ ಸತೀ ಸತ್ಯಪರಾಯಣಾ ॥ 27 ॥

ನೀತಿಃ ಸುನೀತಿಃ ಸುರುಚಿಸ್ತುಷ್ಟಿಃ ಪುಷ್ಟಿರ್ಧೃತಿಃ ಕ್ಷಮಾ ।
ವಾಣೀ ಬುದ್ಧಿರ್ಮಹಾಲಕ್ಷ್ಮೀ ಲಕ್ಷ್ಮೀರ್ನೀಲಸರಸ್ವತೀ ॥ 28 ॥

ಸ್ರೋತಸ್ವತೀ ಸ್ರೋತವತೀ ಮಾತಂಗೀ ವಿಜಯಾ ಜಯಾ ।
ನದೀ ಸಿಂಧುಃ ಸರ್ವಮಯೀ ತಾರಾ ಶೂನ್ಯನಿವಾಸಿನೀ ॥ 29 ॥

ಶುದ್ಧಾ ತರಂಗಿಣೀ ಮೇಧಾ ಲಾಕಿನೀ ಬಹುರೂಪಿಣೀ ।
ಸದಾನಂದಮಯೀ ಸತ್ಯಾ ಸರ್ವಾನಂದಸ್ವರೂಪಿಣೀ ॥ 30 ॥

ಸುನಂದಾ ನಂದಿನೀ ಸ್ತುತ್ಯಾ ಸ್ತವನೀಯಾ ಸ್ವಭಾವಿನೀ ।
ರಂಕಿಣೀ ಟಂಕಿಣೀ ಚಿತ್ರಾ ವಿಚಿತ್ರಾ ಚಿತ್ರರೂಪಿಣೀ ॥ 31 ॥

ಪದ್ಮಾ ಪದ್ಮಾಲಯಾ ಪದ್ಮಸುಖೀ ಪದ್ಮವಿಭೂಷಣಾ ।
ಶಾಕಿನೀ ಹಾಕಿನೀ ಕ್ಷಾಂತಾ ರಾಕಿಣೀ ರುಧಿರಪ್ರಿಯಾ ॥ 32 ॥

ಭ್ರಾಂತಿರ್ಭವಾನೀ ರುದ್ರಾಣೀ ಮೃಡಾನೀ ಶತ್ರುಮರ್ದಿನೀ ।
ಉಪೇಂದ್ರಾಣೀ ಮಹೇಶಾನೀ ಜ್ಯೋತ್ಸ್ನಾ ಚೇಂದ್ರಸ್ವರೂಪಿಣೀ ॥ 33 ॥

ಸೂರ್ಯಾತ್ಮಿಕಾ ರುದ್ರಪತ್ನೀ ರೌದ್ರೀ ಸ್ತ್ರೀ ಪ್ರಕೃತಿಃ ಪುಮಾನ್ ।
ಶಕ್ತಿಃ ಸೂಕ್ತಿರ್ಮತಿಮತೀ ಭುಕ್ತಿರ್ಮುಕ್ತಿಃ ಪತಿವ್ರತಾ ॥ 34 ॥

ಸರ್ವೇಶ್ವರೀ ಸರ್ವಮಾತಾ ಶರ್ವಾಣೀ ಹರವಲ್ಲಭಾ ।
ಸರ್ವಜ್ಞಾ ಸಿದ್ಧಿದಾ ಸಿದ್ಧಾ ಭಾವ್ಯಾ ಭವ್ಯಾ ಭಯಾಪಹಾ ॥ 35 ॥

ಕರ್ತ್ರೀ ಹರ್ತ್ರೀ ಪಾಲಯಿತ್ರೀ ಶರ್ವರೀ ತಾಮಸೀ ದಯಾ ।
ತಮಿಸ್ರಾ ಯಾಮಿನೀಸ್ಥಾ ಚ ಸ್ಥಿರಾ ಧೀರಾ ತಪಸ್ವಿನೀ ॥ 36 ॥

ಚಾರ್ವಂಗೀ ಚಂಚಲಾ ಲೋಲಜಿಹ್ವಾ ಚಾರುಚರಿತ್ರಿಣೀ ।
ತ್ರಪಾ ತ್ರಪಾವತೀ ಲಜ್ಜಾ ನಿರ್ಲಜ್ಜಾ ಹ್ರೀಂ ರಜೋವತೀ ॥ 37 ॥

ಸತ್ತ್ವವತೀ ಧರ್ಮನಿಷ್ಠಾ ಶ್ರೇಷ್ಠಾ ನಿಷ್ಠುರವಾದಿನೀ ।
ಗರಿಷ್ಠಾ ದುಷ್ಟಸಂಹರ್ತ್ರೀ ವಿಶಿಷ್ಟಾ ಶ್ರೇಯಸೀ ಘೃಣಾ ॥ 38 ॥

ಭೀಮಾ ಭಯಾನಕಾ ಭೀಮನಾದಿನೀ ಭೀಃ ಪ್ರಭಾವತೀ ।
ವಾಗೀಶ್ವರೀ ಶ್ರೀರ್ಯಮುನಾ ಯಜ್ಞಕರ್ತ್ರೀ ಯಜುಃಪ್ರಿಯಾ ॥ 39 ॥

ಋಕ್ಸಾಮಾಥರ್ವನಿಲಯಾ ರಾಗಿಣೀ ಶೋಭನಸ್ವರಾ ।
ಕಲಕಂಠೀ ಕಂಬುಕಂಠೀ ವೇಣುವೀಣಾಪರಾಯಣಾ ॥ 40 ॥

ವಂಶಿನೀ ವೈಷ್ಣವೀ ಸ್ವಚ್ಛಾ ಧಾತ್ರೀ ತ್ರಿಜಗದೀಶ್ವರೀ ।
ಮಧುಮತೀ ಕುಂಡಲಿನೀ ಋದ್ಧಿಃ ಸಿದ್ಧಿಃ ಶುಚಿಸ್ಮಿತಾ ॥ 41 ॥

ರಂಭೋರ್ವಶೀ ರತೀ ರಾಮಾ ರೋಹಿಣೀ ರೇವತೀ ರಮಾ ।
ಶಂಖಿನೀ ಚಕ್ರಿಣೀ ಕೃಷ್ಣಾ ಗದಿನೀ ಪದ್ಮಿನೀ ತಥಾ ॥ 42 ॥

ಶೂಲಿನೀ ಪರಿಘಾಸ್ತ್ರಾ ಚ ಪಾಶಿನೀ ಶಾರ್ಙ್ಗಪಾಣಿನೀ ।
ಪಿನಾಕಧಾರಿಣೀ ಧೂಮ್ರಾ ಶರಭೀ ವನಮಾಲಿನೀ ॥ 43 ॥

ವಜ್ರಿಣೀ ಸಮರಪ್ರೀತಾ ವೇಗಿನೀ ರಣಪಂಡಿತಾ ।
ಜಟಿನೀ ಬಿಂಬಿನೀ ನೀಲಾ ಲಾವಣ್ಯಾಂಬುಧಿಚಂದ್ರಿಕಾ ॥ 44 ॥

ಬಲಿಪ್ರಿಯಾ ಸದಾಪೂಜ್ಯಾ ಪೂರ್ಣಾ ದೈತ್ಯೇಂದ್ರಮಾಥಿನೀ ।
ಮಹಿಷಾಸುರಸಂಹಂತ್ರೀ ವಾಸಿನೀ ರಕ್ತದಂತಿಕಾ ॥ 45 ॥

ರಕ್ತಪಾ ರುಧಿರಾಕ್ತಾಂಗೀ ರಕ್ತಖರ್ಪರಹಸ್ತಿನೀ ।
ರಕ್ತಪ್ರಿಯಾ ಮಾಂಸರುಚಿರ್ವಾಸವಾಸಕ್ತಮಾನಸಾ ॥ 46 ॥

ಗಲಚ್ಛೋಣಿತಮುಂಡಾಲಿಕಂಠಮಾಲಾವಿಭೂಷಣಾ ।
ಶವಾಸನಾ ಚಿತಾಂತಸ್ಥಾ ಮಾಹೇಶೀ ವೃಷವಾಹಿನೀ ॥ 47 ॥

ವ್ಯಾಘ್ರತ್ವಗಂಬರಾ ಚೀನಚೇಲಿನೀ ಸಿಂಹವಾಹಿನೀ ।
ವಾಮದೇವೀ ಮಹಾದೇವೀ ಗೌರೀ ಸರ್ವಜ್ಞಭಾವಿನೀ ॥ 48 ॥

ಬಾಲಿಕಾ ತರುಣೀ ವೃದ್ಧಾ ವೃದ್ಧಮಾತಾ ಜರಾತುರಾ ।
ಸುಭ್ರುರ್ವಿಲಾಸಿನೀ ಬ್ರಹ್ಮವಾದಿನೀ ಬ್ರಾಹ್ಮಣೀ ಮಹೀ ॥ 49 ॥

ಸ್ವಪ್ನವತೀ ಚಿತ್ರಲೇಖಾ ಲೋಪಾಮುದ್ರಾ ಸುರೇಶ್ವರೀ ।
ಅಮೋಘಾಽರುಂಧತೀ ತೀಕ್ಷ್ಣಾ ಭೋಗವತ್ಯನುವಾದಿನೀ ॥ 50 ॥

ಮಂದಾಕಿನೀ ಮಂದಹಾಸಾ ಜ್ವಾಲಾಮುಖ್ಯಸುರಾಂತಕಾ ।
ಮಾನದಾ ಮಾನಿನೀ ಮಾನ್ಯಾ ಮಾನನೀಯಾ ಮದೋದ್ಧತಾ ॥ 51 ॥

ಮದಿರಾ ಮದಿರಾನ್ಮಾದಾ ಮೇಧ್ಯಾ ನವ್ಯಾ ಪ್ರಸಾದಿನೀ ।
ಸುಮಧ್ಯಾಽನಂತಗುಣಿನೀ ಸರ್ವಲೋಕೋತ್ತಮೋತ್ತಮಾ ॥ 52 ॥

ಜಯದಾ ಜಿತ್ವರಾ ಜೈತ್ರೀ ಜಯಶ್ರೀರ್ಜಯಶಾಲಿನೀ ।
ಸುಖದಾ ಶುಭದಾ ಸತ್ಯಾ ಸಭಾಸಂಕ್ಷೋಭಕಾರಿಣೀ ॥ 53 ॥

ಶಿವದೂತೀ ಭೂತಿಮತೀ ವಿಭೂತಿರ್ಭೀಷಣಾನನಾ ।
ಕೌಮಾರೀ ಕುಲಜಾ ಕುಂತೀ ಕುಲಸ್ತ್ರೀ ಕುಲಪಾಲಿಕಾ ॥ 54 ॥

ಕೀರ್ತಿರ್ಯಶಸ್ವಿನೀ ಭೂಷಾ ಭೂಷ್ಯಾ ಭೂತಪತಿಪ್ರಿಯಾ ।
ಸಗುಣಾ ನಿರ್ಗುಣಾ ಧೃಷ್ಟಾ ನಿಷ್ಠಾ ಕಾಷ್ಠಾ ಪ್ರತಿಷ್ಠಿತಾ ॥ 55 ॥

ಧನಿಷ್ಠಾ ಧನದಾ ಧನ್ಯಾ ವಸುಧಾ ಸ್ವಪ್ರಕಾಶಿನೀ ।
ಉರ್ವೀ ಗುರ್ವೀ ಗುರುಶ್ರೇಷ್ಠಾ ಸಗುಣಾ ತ್ರಿಗುಣಾತ್ಮಿಕಾ ॥ 56 ॥

ಮಹಾಕುಲೀನಾ ನಿಷ್ಕಾಮಾ ಸಕಾಮಾ ಕಾಮಜೀವನಾ ।
ಕಾಮದೇವಕಲಾ ರಾಮಾಽಭಿರಾಮಾ ಶಿವನರ್ತಕೀ ॥ 57 ॥

ಚಿಂತಾಮಣಿಃ ಕಲ್ಪಲತಾ ಜಾಗ್ರತೀ ದೀನವತ್ಸಲಾ ।
ಕಾರ್ತಿಕೀ ಕೀರ್ತಿಕಾ ಕೃತ್ಯಾ ಅಯೋಧ್ಯಾ ವಿಷಮಾ ಸಮಾ ॥ 58 ॥

ಸುಮಂತ್ರಾ ಮಂತ್ರಿಣೀ ಘೂರ್ಣಾ ಹ್ಲಾದಿನೀ ಕ್ಲೇಶನಾಶಿನೀ ।
ತ್ರೈಲೋಕ್ಯಜನನೀ ಹೃಷ್ಟಾ ನಿರ್ಮಾಂಸಾ ಮನೋರೂಪಿಣೀ ॥ 59 ॥

ತಡಾಗನಿಮ್ನಜಠರಾ ಶುಷ್ಕಮಾಂಸಾಸ್ಥಿಮಾಲಿನೀ ।
ಅವಂತೀ ಮಥುರಾ ಮಾಯಾ ತ್ರೈಲೋಕ್ಯಪಾವನೀಶ್ವರೀ ॥ 60 ॥

ವ್ಯಕ್ತಾಽವ್ಯಕ್ತಾಽನೇಕಮೂರ್ತಿಃ ಶರ್ವರೀ ಭೀಮನಾದಿನೀ ।
ಕ್ಷೇಮಂಕರೀ ಶಂಕರೀ ಚ ಸರ್ವಸಮ್ಮೋಹಕಾರಿಣೀ ॥ 61 ॥

ಊರ್ಧ್ವತೇಜಸ್ವಿನೀ ಕ್ಲಿನ್ನಾ ಮಹಾತೇಜಸ್ವಿನೀ ತಥಾ ।
ಅದ್ವೈತಾ ಭೋಗಿನೀ ಪೂಜ್ಯಾ ಯುವತೀ ಸರ್ವಮಂಗಳಾ ॥ 62 ॥

ಸರ್ವಪ್ರಿಯಂಕರೀ ಭೋಗ್ಯಾ ಧರಣೀ ಪಿಶಿತಾಶನಾ ।
ಭಯಂಕರೀ ಪಾಪಹರಾ ನಿಷ್ಕಳಂಕಾ ವಶಂಕರೀ ॥ 63 ॥

ಆಶಾ ತೃಷ್ಣಾ ಚಂದ್ರಕಲಾ ನಿದ್ರಾನ್ಯಾ ವಾಯುವೇಗಿನೀ ।
ಸಹಸ್ರಸೂರ್ಯಸಂಕಾಶಾ ಚಂದ್ರಕೋಟಿಸಮಪ್ರಭಾ ॥ 64 ॥

ವಹ್ನಿಮಂಡಲಸಂಸ್ಥಾ ಚ ಸರ್ವತತ್ತ್ವಪ್ರತಿಷ್ಠಿತಾ ।
ಸರ್ವಾಚಾರವತೀ ಸರ್ವದೇವಕನ್ಯಾಧಿದೇವತಾ ॥ 65 ॥

ದಕ್ಷಕನ್ಯಾ ದಕ್ಷಯಜ್ಞನಾಶಿನೀ ದುರ್ಗತಾರಿಕಾ ।
ಇಜ್ಯಾ ಪೂಜ್ಯಾ ವಿಭಾ ಭೂತಿಃ ಸತ್ಕೀರ್ತಿರ್ಬ್ರಹ್ಮರೂಪಿಣೀ ॥ 66 ॥

ರಂಭೋರುಶ್ಚತುರಾ ರಾಕಾ ಜಯಂತೀ ಕರುಣಾ ಕುಹುಃ ।
ಮನಸ್ವಿನೀ ದೇವಮಾತಾ ಯಶಸ್ಯಾ ಬ್ರಹ್ಮಚಾರಿಣೀ ॥ 67 ॥

ಋದ್ಧಿದಾ ವೃದ್ಧಿದಾ ವೃದ್ಧಿಃ ಸರ್ವಾದ್ಯಾ ಸರ್ವದಾಯಿನೀ ।
ಆಧಾರರೂಪಿಣೀ ಧ್ಯೇಯಾ ಮೂಲಾಧಾರನಿವಾಸಿನೀ ॥ 68 ॥

ಅಜ್ಞಾ ಪ್ರಜ್ಞಾ ಪೂರ್ಣಮನಾಶ್ಚಂದ್ರಮುಖ್ಯನುಕೂಲಿನೀ ।
ವಾವದೂಕಾ ನಿಮ್ನನಾಭಿಃ ಸತ್ಯಾ ಸಂಧ್ಯಾ ದೃಢವ್ರತಾ ॥ 69 ॥

ಆನ್ವೀಕ್ಷಿಕೀ ದಂಡನೀತಿಸ್ತ್ರಯೀ ತ್ರಿದಿವಸುಂದರೀ ।
ಜ್ವಲಿನೀ ಜ್ವಾಲಿನೀ ಶೈಲತನಯಾ ವಿಂಧ್ಯವಾಸಿನೀ ॥ 70 ॥

ಅಮೇಯಾ ಖೇಚರೀ ಧೈರ್ಯಾ ತುರೀಯಾ ವಿಮಲಾಽಽತುರಾ ।
ಪ್ರಗಲ್ಭಾ ವಾರುಣೀ ಛಾಯಾ ಶಶಿನೀ ವಿಸ್ಫುಲಿಂಗಿನೀ ॥ 71 ॥

ಭುಕ್ತಿಃ ಸಿದ್ಧಿಃ ಸದಾಪ್ರಾಪ್ತಿಃ ಪ್ರಾಕಾಮ್ಯಾ ಮಹಿಮಾಽಣಿಮಾ ।
ಇಚ್ಛಾಸಿದ್ಧಿರ್ವಿಸಿದ್ಧಾ ಚ ವಶಿತ್ವೋರ್ಧ್ವನಿವಾಸಿನೀ ॥ 72 ॥

ಲಘಿಮಾ ಚೈವ ಗಾಯತ್ರೀ ಸಾವಿತ್ರೀ ಭುವನೇಶ್ವರೀ ।
ಮನೋಹರಾ ಚಿತಾ ದಿವ್ಯಾ ದೇವ್ಯುದಾರಾ ಮನೋರಮಾ ॥ 73 ॥

ಪಿಂಗಳಾ ಕಪಿಲಾ ಜಿಹ್ವಾರಸಜ್ಞಾ ರಸಿಕಾ ರಸಾ ।
ಸುಷುಮ್ನೇಡಾ ಭೋಗವತೀ ಗಾಂಧಾರೀ ನರಕಾಂತಕಾ ॥ 74 ॥

ಪಾಂಚಾಲೀ ರುಕ್ಮಿಣೀ ರಾಧಾರಾಧ್ಯಾ ಭೀಮಾಧಿರಾಧಿಕಾ ।
ಅಮೃತಾ ತುಲಸೀ ವೃಂದಾ ಕೈಟಭೀ ಕಪಟೇಶ್ವರೀ ॥ 75 ॥

ಉಗ್ರಚಂಡೇಶ್ವರೀ ವೀರಾ ಜನನೀ ವೀರಸುಂದರೀ ।
ಉಗ್ರತಾರಾ ಯಶೋದಾಖ್ಯಾ ದೈವಕೀ ದೇವಮಾನಿತಾ ॥ 76 ॥

ನಿರಂಜನಾ ಚಿತ್ರದೇವೀ ಕ್ರೋಧಿನೀ ಕುಲದೀಪಿಕಾ ।
ಕುಲವಾಗೀಶ್ವರೀ ವಾಣೀ ಮಾತೃಕಾ ದ್ರಾವಿಣೀ ದ್ರವಾ ॥ 77 ॥

ಯೋಗೇಶ್ವರೀ ಮಹಾಮಾರೀ ಭ್ರಾಮರೀ ಬಿಂದುರೂಪಿಣೀ ।
ದೂತೀ ಪ್ರಾಣೇಶ್ವರೀ ಗುಪ್ತಾ ಬಹುಲಾ ಚಮರೀ ಪ್ರಭಾ ॥ 78 ॥

ಕುಬ್ಜಿಕಾ ಜ್ಞಾನಿನೀ ಜ್ಯೇಷ್ಠಾ ಭುಶುಂಡೀ ಪ್ರಕಟಾ ತಿಥಿಃ ।
ದ್ರವಿಣೀ ಗೋಪನೀ ಮಾಯಾ ಕಾಮಬೀಜೇಶ್ವರೀ ಕ್ರಿಯಾ ॥ 79 ॥

ಶಾಂಭವೀ ಕೇಕರಾ ಮೇನಾ ಮೂಷಲಾಸ್ತ್ರಾ ತಿಲೋತ್ತಮಾ ।
ಅಮೇಯವಿಕ್ರಮಾ ಕ್ರೂರಾ ಸಂಪತ್ಶಾಲಾ ತ್ರಿಲೋಚನಾ ॥ 80 ॥

ಸ್ವಸ್ತಿರ್ಹವ್ಯವಹಾ ಪ್ರೀತಿರುಷ್ಮಾ ಧೂಮ್ರಾರ್ಚಿರಂಗದಾ ।
ತಪಿನೀ ತಾಪಿನೀ ವಿಶ್ವಾ ಭೋಗದಾ ಧಾರಿಣೀ ಧರಾ ॥ 81 ॥

ತ್ರಿಖಂಡಾ ಬೋಧಿನೀ ವಶ್ಯಾ ಸಕಲಾ ಶಬ್ದರೂಪಿಣೀ ।
ಬೀಜರೂಪಾ ಮಹಾಮುದ್ರಾ ಯೋಗಿನೀ ಯೋನಿರೂಪಿಣೀ ॥ 82 ॥

ಅನಂಗಕುಸುಮಾಽನಂಗಮೇಖಲಾಽನಂಗರೂಪಿಣೀ ।
ವಜ್ರೇಶ್ವರೀ ಚ ಜಯಿನೀ ಸರ್ವದ್ವಂದ್ವಕ್ಷಯಂಕರೀ ॥ 83 ॥

ಷಡಂಗಯುವತೀ ಯೋಗಯುಕ್ತಾ ಜ್ವಾಲಾಂಶುಮಾಲಿನೀ ।
ದುರಾಶಯಾ ದುರಾಧಾರಾ ದುರ್ಜಯಾ ದುರ್ಗರೂಪಿಣೀ ॥ 84 ॥

ದುರಂತಾ ದುಷ್ಕೃತಿಹರಾ ದುರ್ಧ್ಯೇಯಾ ದುರತಿಕ್ರಮಾ ।
ಹಂಸೇಶ್ವರೀ ತ್ರಿಕೋಣಸ್ಥಾ ಶಾಕಂಭರ್ಯನುಕಂಪಿನೀ ॥ 85 ॥

ತ್ರಿಕೋಣನಿಲಯಾ ನಿತ್ಯಾ ಪರಮಾಮೃತರಂಜಿತಾ ।
ಮಹಾವಿದ್ಯೇಶ್ವರೀ ಶ್ವೇತಾ ಭೇರುಂಡಾ ಕುಲಸುಂದರೀ ॥ 86 ॥

ತ್ವರಿತಾ ಭಕ್ತಿಸಂಸಕ್ತಾ ಭಕ್ತವಶ್ಯಾ ಸನಾತನೀ ।
ಭಕ್ತಾನಂದಮಯೀ ಭಕ್ತಭಾವಿಕಾ ಭಕ್ತಶಂಕರೀ ॥ 87 ॥

ಸರ್ವಸೌಂದರ್ಯನಿಲಯಾ ಸರ್ವಸೌಭಾಗ್ಯಶಾಲಿನೀ ।
ಸರ್ವಸಂಭೋಗಭವನಾ ಸರ್ವಸೌಖ್ಯನಿರೂಪಿಣೀ ॥ 88 ॥

ಕುಮಾರೀಪೂಜನರತಾ ಕುಮಾರೀವ್ರತಚಾರಿಣೀ ।
ಕುಮಾರೀಭಕ್ತಿಸುಖಿನೀ ಕುಮಾರೀರೂಪಧಾರಿಣೀ ॥ 89 ॥

ಕುಮಾರೀಪೂಜಕಪ್ರೀತಾ ಕುಮಾರೀಪ್ರೀತಿದಾ ಪ್ರಿಯಾ ।
ಕುಮಾರೀಸೇವಕಾಸಂಗಾ ಕುಮಾರೀಸೇವಕಾಲಯಾ ॥ 90 ॥

ಆನಂದಭೈರವೀ ಬಾಲಭೈರವೀ ಬಟುಭೈರವೀ ।
ಶ್ಮಶಾನಭೈರವೀ ಕಾಲಭೈರವೀ ಪುರಭೈರವೀ ॥ 91 ॥

ಮಹಾಭೈರವಪತ್ನೀ ಚ ಪರಮಾನಂದಭೈರವೀ ।
ಸುಧಾನಂದಭೈರವೀ ಚ ಉನ್ಮಾದಾನಂದಭೈರವೀ ॥ 92 ॥

ಮುಕ್ತಾನಂದಭೈರವೀ ಚ ತಥಾ ತರುಣಭೈರವೀ ।
ಜ್ಞಾನಾನಂದಭೈರವೀ ಚ ಅಮೃತಾನಂದಭೈರವೀ ॥ 93 ॥

ಮಹಾಭಯಂಕರೀ ತೀವ್ರಾ ತೀವ್ರವೇಗಾ ತಪಸ್ವಿನೀ ।
ತ್ರಿಪುರಾ ಪರಮೇಶಾನೀ ಸುಂದರೀ ಪುರಸುಂದರೀ ॥ 94 ॥

ತ್ರಿಪುರೇಶೀ ಪಂಚದಶೀ ಪಂಚಮೀ ಪುರವಾಸಿನೀ ।
ಮಹಾಸಪ್ತದಶೀ ಚೈವ ಷೋಡಶೀ ತ್ರಿಪುರೇಶ್ವರೀ ॥ 95 ॥

ಮಹಾಂಕುಶಸ್ವರೂಪಾ ಚ ಮಹಾಚಕ್ರೇಶ್ವರೀ ತಥಾ ।
ನವಚಕ್ರೇಶ್ವರೀ ಚಕ್ರೇಶ್ವರೀ ತ್ರಿಪುರಮಾಲಿನೀ ॥ 96 ॥

ರಾಜರಾಜೇಶ್ವರೀ ಧೀರಾ ಮಹಾತ್ರಿಪುರಸುಂದರೀ ।
ಸಿಂದೂರಪೂರರುಚಿರಾ ಶ್ರೀಮತ್ತ್ರಿಪುರಸುಂದರೀ ॥ 97 ॥

ಸರ್ವಾಂಗಸುಂದರೀ ರಕ್ತಾರಕ್ತವಸ್ತ್ರೋತ್ತರೀಯಿಣೀ ।
ಜವಾಯಾವಕಸಿಂದೂರರಕ್ತಚಂದನಧಾರಿಣೀ ॥ 98 ॥

ಜವಾಯಾವಕಸಿಂದೂರರಕ್ತಚಂದನರೂಪಧೃಕ್ ।
ಚಾಮರೀ ಬಾಲಕುಟಿಲನಿರ್ಮಲಾ ಶ್ಯಾಮಕೇಶಿನೀ ॥ 99 ॥

ವಜ್ರಮೌಕ್ತಿಕರತ್ನಾಢ್ಯಾ ಕಿರೀಟಮುಕುಟೋಜ್ಜ್ವಲಾ ।
ರತ್ನಕುಂಡಲಸಂಯುಕ್ತಸ್ಫುರದ್ಗಂಡಮನೋರಮಾ ॥ 100 ॥

ಕುಂಜರೇಶ್ವರಕುಂಭೋತ್ಥಮುಕ್ತಾರಂಜಿತನಾಸಿಕಾ ।
ಮುಕ್ತಾವಿದ್ರುಮಮಾಣಿಕ್ಯಹಾರಾಢ್ಯಸ್ತನಮಂಡಲಾ ॥ 101 ॥

ಸೂರ್ಯಕಾಂತೇಂದುಕಾಂತಾಢ್ಯಸ್ಪರ್ಶಾಶ್ಮಕಂಠಭೂಷಣಾ ।
ಬೀಜಪೂರಸ್ಫುರದ್ಬೀಜದಂತಪಂಕ್ತಿರನುತ್ತಮಾ ॥ 102 ॥

ಕಾಮಕೋದಂಡಕಾಭುಗ್ನಭ್ರೂಕಟಾಕ್ಷಪ್ರವರ್ಷಿಣೀ ।
ಮಾತಂಗಕುಂಭವಕ್ಷೋಜಾ ಲಸತ್ಕೋಕನದೇಕ್ಷಣಾ ॥ 103 ॥

ಮನೋಜ್ಞಶಷ್ಕುಲೀಕರ್ಣಾ ಹಂಸೀಗತಿವಿಡಂಬಿನೀ ।
ಪದ್ಮರಾಗಾಂಗದಜ್ಯೋತಿರ್ದೋಶ್ಚತುಷ್ಕಪ್ರಕಾಶಿನೀ ॥ 104 ॥

ನಾನಾಮಣಿಪರಿಸ್ಫೂರ್ಜಚ್ಛುದ್ಧಕಾಂಚನಕಂಕಣಾ ।
ನಾಗೇಂದ್ರದಂತನಿರ್ಮಾಣವಲಯಾಂಕಿತಪಾಣಿನೀ ॥ 105 ॥

ಅಂಗುರೀಯಕಚಿತ್ರಾಂಗೀ ವಿಚಿತ್ರಕ್ಷುದ್ರಘಂಟಿಕಾ ।
ಪಟ್ಟಾಂಬರಪರೀಧಾನಾ ಕಲಮಂಜೀರಶಿಂಜಿನೀ ॥ 106 ॥

ಕರ್ಪೂರಾಗರುಕಸ್ತೂರೀಕುಂಕುಮದ್ರವಲೇಪಿತಾ ।
ವಿಚಿತ್ರರತ್ನಪೃಥಿವೀಕಲ್ಪಶಾಖಿತಲಸ್ಥಿತಾ ॥ 107 ॥

ರತ್ನದ್ವೀಪಸ್ಫುರದ್ರತ್ನಸಿಂಹಾಸನವಿಲಾಸಿನೀ ।
ಷಟ್ಚಕ್ರಭೇದನಕರೀ ಪರಮಾನಂದರೂಪಿಣೀ ॥ 108 ॥

ಸಹಸ್ರದಳಪದ್ಮಾಂತಶ್ಚಂದ್ರಮಂಡಲವರ್ತಿನೀ ।
ಬ್ರಹ್ಮರೂಪಾ ಶಿವಕ್ರೋಡಾ ನಾನಾಸುಖವಿಲಾಸಿನೀ ॥ 109 ॥

ಹರವಿಷ್ಣುವಿರಿಂಚೀಂದ್ರಗ್ರಹನಾಯಕಸೇವಿತಾ ।
ಶಿವಾ ಶೈವಾ ಚ ರುದ್ರಾಣೀ ತಥೈವ ಶಿವವಾದಿನೀ ॥ 110 ॥

ಮಾತಂಗಿನೀ ಶ್ರೀಮತೀ ಚ ತಥೈವಾನಂಗಮೇಖಲಾ ।
ಡಾಕಿನೀ ಯೋಗಿನೀ ಚೈವ ತಥೋಪಯೋಗಿನೀ ಮತಾ ॥ 111 ॥

ಮಾಹೇಶ್ವರೀ ವೈಷ್ಣವೀ ಚ ಭ್ರಾಮರೀ ಶಿವರೂಪಿಣೀ ।
ಅಲಂಬುಷಾ ವೇಗವತೀ ಕ್ರೋಧರೂಪಾ ಸುಮೇಖಲಾ ॥ 112 ॥

ಗಾಂಧಾರೀ ಹಸ್ತಜಿಹ್ವಾ ಚ ಇಡಾ ಚೈವ ಶುಭಂಕರೀ ।
ಪಿಂಗಳಾ ಬ್ರಹ್ಮದೂತೀ ಚ ಸುಷುಮ್ನಾ ಚೈವ ಗಂಧಿನೀ ॥ 113 ॥

ಆತ್ಮಯೋನಿರ್ಬ್ರಹ್ಮಯೋನಿರ್ಜಗದ್ಯೋನಿರಯೋನಿಜಾ ।
ಭಗರೂಪಾ ಭಗಸ್ಥಾತ್ರೀ ಭಗಿನೀ ಭಗರೂಪಿಣೀ ॥ 114 ॥

ಭಗಾತ್ಮಿಕಾ ಭಗಾಧಾರರೂಪಿಣೀ ಭಗಮಾಲಿನೀ ।
ಲಿಂಗಾಖ್ಯಾ ಚೈವ ಲಿಂಗೇಶೀ ತ್ರಿಪುರಾ ಭೈರವೀ ತಥಾ ॥ 115 ॥

ಲಿಂಗಗೀತಿಃ ಸುಗೀತಿಶ್ಚ ಲಿಂಗಸ್ಥಾ ಲಿಂಗರೂಪಧೃಕ್ ।
ಲಿಂಗಮಾನಾ ಲಿಂಗಭವಾ ಲಿಂಗಲಿಂಗಾ ಚ ಪಾರ್ವತೀ ॥ 116 ॥

ಭಗವತೀ ಕೌಶಿಕೀ ಚ ಪ್ರೇಮಾ ಚೈವ ಪ್ರಿಯಂವದಾ ।
ಗೃಧ್ರರೂಪಾ ಶಿವಾರೂಪಾ ಚಕ್ರಿಣೀ ಚಕ್ರರೂಪಧೃಕ್ ॥ 117 ॥

ಲಿಂಗಾಭಿಧಾಯಿನೀ ಲಿಂಗಪ್ರಿಯಾ ಲಿಂಗನಿವಾಸಿನೀ ।
ಲಿಂಗಸ್ಥಾ ಲಿಂಗನೀ ಲಿಂಗರೂಪಿಣೀ ಲಿಂಗಸುಂದರೀ ॥ 118 ॥

ಲಿಂಗಗೀತಿರ್ಮಹಾಪ್ರೀತಾ ಭಗಗೀತಿರ್ಮಹಾಸುಖಾ ।
ಲಿಂಗನಾಮಸದಾನಂದಾ ಭಗನಾಮಸದಾಗತಿಃ ॥ 119 ॥

ಲಿಂಗಮಾಲಾಕಂಠಭೂಷಾ ಭಗಮಾಲಾವಿಭೂಷಣಾ ।
ಭಗಲಿಂಗಾಮೃತಪ್ರೀತಾ ಭಗಲಿಂಗಸ್ವರೂಪಿಣೀ ॥ 120 ॥

ಭಗಲಿಂಗಸ್ಯ ರೂಪಾ ಚ ಭಗಲಿಂಗಸುಖಾವಹಾ ।
ಸ್ವಯಂಭೂಕುಸುಮಪ್ರೀತಾ ಸ್ವಯಂಭೂಕುಸುಮಾರ್ಚಿತಾ ॥ 121 ॥

ಸ್ವಯಂಭೂಕುಸುಮಪ್ರಾಣಾ ಸ್ವಯಂಭೂಪುಷ್ಪತರ್ಪಿತಾ ।
ಸ್ವಯಂಭೂಪುಷ್ಪಘಟಿತಾ ಸ್ವಯಂಭೂಪುಷ್ಪಧಾರಿಣೀ ॥ 122 ॥

ಸ್ವಯಂಭೂಪುಷ್ಪತಿಲಕಾ ಸ್ವಯಂಭೂಪುಷ್ಪಚರ್ಚಿತಾ ।
ಸ್ವಯಂಭೂಪುಷ್ಪನಿರತಾ ಸ್ವಯಂಭೂಕುಸುಮಗ್ರಹಾ ॥ 123 ॥

ಸ್ವಯಂಭೂಪುಷ್ಪಯಜ್ಞಾಂಶಾ ಸ್ವಯಂಭೂಕುಸುಮಾತ್ಮಿಕಾ ।
ಸ್ವಯಂಭೂಪುಷ್ಪನಿಚಿತಾ ಸ್ವಯಂಭೂಕುಸುಮಪ್ರಿಯಾ ॥ 124 ॥

ಸ್ವಯಂಭೂಕುಸುಮಾದಾನಲಾಲಸೋನ್ಮತ್ತಮಾನಸಾ ।
ಸ್ವಯಂಭೂಕುಸುಮಾನಂದಲಹರೀಸ್ನಿಗ್ಧದೇಹಿನೀ ॥ 125 ॥

ಸ್ವಯಂಭೂಕುಸುಮಾಧಾರಾ ಸ್ವಯಂಭೂಕುಸುಮಾಕುಲಾ ।
ಸ್ವಯಂಭೂಪುಷ್ಪನಿಲಯಾ ಸ್ವಯಂಭೂಪುಷ್ಪವಾಸಿನೀ ॥ 126 ॥

ಸ್ವಯಂಭೂಕುಸುಮಸ್ನಿಗ್ಧಾ ಸ್ವಯಂಭೂಕುಸುಮಾತ್ಮಿಕಾ ।
ಸ್ವಯಂಭೂಪುಷ್ಪಕರಿಣೀ ಸ್ವಯಂಭೂಪುಷ್ಪವಾಣಿಕಾ ॥ 127 ॥

ಸ್ವಯಂಭೂಕುಸುಮಧ್ಯಾನಾ ಸ್ವಯಂಭೂಕುಸುಮಪ್ರಭಾ ।
ಸ್ವಯಂಭೂಕುಸುಮಜ್ಞಾನಾ ಸ್ವಯಂಭೂಪುಷ್ಪಭಾಗಿನೀ ॥ 128 ॥

ಸ್ವಯಂಭೂಕುಸುಮೋಲ್ಲಾಸಾ ಸ್ವಯಂಭೂಪುಷ್ಪವರ್ಷಿಣೀ ।
ಸ್ವಯಂಭೂಕುಸುಮೋತ್ಸಾಹಾ ಸ್ವಯಂಭೂಪುಷ್ಪರೂಪಿಣೀ ॥ 129 ॥

ಸ್ವಯಂಭೂಕುಸುಮೋನ್ಮಾದಾ ಸ್ವಯಂಭೂಪುಷ್ಪಸುಂದರೀ ।
ಸ್ವಯಂಭೂಕುಸುಮಾರಾಧ್ಯಾ ಸ್ವಯಂಭೂಕುಸುಮೋದ್ಭವಾ ॥ 130 ॥

ಸ್ವಯಂಭೂಕುಸುಮಾವ್ಯಗ್ರಾ ಸ್ವಯಂಭೂಪುಷ್ಪಪೂರ್ಣಿತಾ ।
ಸ್ವಯಂಭೂಪೂಜಕಪ್ರಾಜ್ಞಾ ಸ್ವಯಂಭೂಹೋತೃಮಾತೃಕಾ ॥ 131 ॥

ಸ್ವಯಂಭೂದಾತೃರಕ್ಷಿತ್ರೀ ಸ್ವಯಂಭೂರಕ್ತತಾರಿಕಾ ।
ಸ್ವಯಂಭೂಪೂಜಕಗ್ರಸ್ತಾ ಸ್ವಯಂಭೂಪೂಜಕಪ್ರಿಯಾ ॥ 132 ॥

ಸ್ವಯಂಭೂವಂದಕಾಧಾರಾ ಸ್ವಯಂಭೂನಿಂದಕಾಂತಕಾ ।
ಸ್ವಯಂಭೂಪ್ರದಸರ್ವಸ್ವಾ ಸ್ವಯಂಭೂಪ್ರದಪುತ್ರಿಣೀ ॥ 133 ॥

ಸ್ವಯಂಭೂಪ್ರದಸಸ್ಮೇರಾ ಸ್ವಯಂಭೂತಶರೀರಿಣೀ ।
ಸರ್ವಕಾಲೋದ್ಭವಪ್ರೀತಾ ಸರ್ವಕಾಲೋದ್ಭವಾತ್ಮಿಕಾ ॥ 134 ॥

ಸರ್ವಕಾಲೋದ್ಭವೋದ್ಭಾವಾ ಸರ್ವಕಾಲೋದ್ಭವೋದ್ಭವಾ ।
ಕುಂಡಪುಷ್ಪಸದಾಪ್ರೀತಾ ಕುಂಡಪುಷ್ಪಸದಾರತಿಃ ॥ 135 ॥

ಕುಂಡಗೋಲೋದ್ಭವಪ್ರಾಣಾ ಕುಂಡಗೋಲೋದ್ಭವಾತ್ಮಿಕಾ ।
ಸ್ವಯಂಭೂರ್ವಾ ಶಿವಾ ಧಾತ್ರೀ ಪಾವನೀ ಲೋಕಪಾವನೀ ॥ 136 ॥

ಕೀರ್ತಿರ್ಯಶಸ್ವಿನೀ ಮೇಧಾ ವಿಮೇಧಾ ಶುಕ್ರಸುಂದರೀ ।
ಅಶ್ವಿನೀ ಕೃತ್ತಿಕಾ ಪುಷ್ಯಾ ತೇಜಸ್ಕಾ ಚಂದ್ರಮಂಡಲಾ ॥ 137 ॥

ಸೂಕ್ಷ್ಮಾಽಸೂಕ್ಷ್ಮಾ ಬಲಾಕಾ ಚ ವರದಾ ಭಯನಾಶಿನೀ ।
ವರದಾಽಭಯದಾ ಚೈವ ಮುಕ್ತಿಬಂಧವಿನಾಶಿನೀ ॥ 138 ॥

ಕಾಮುಕಾ ಕಾಮದಾ ಕಾಂತಾ ಕಾಮಾಖ್ಯಾ ಕುಲಸುಂದರೀ ।
ದುಃಖದಾ ಸುಖದಾ ಮೋಕ್ಷಾ ಮೋಕ್ಷದಾರ್ಥಪ್ರಕಾಶಿನೀ ॥ 139 ॥

ದುಷ್ಟಾದುಷ್ಟಮತಿಶ್ಚೈವ ಸರ್ವಕಾರ್ಯವಿನಾಶಿನೀ ।
ಶುಕ್ರಾಧಾರಾ ಶುಕ್ರರೂಪಾ ಶುಕ್ರಸಿಂಧುನಿವಾಸಿನೀ ॥ 140 ॥

ಶುಕ್ರಾಲಯಾ ಶುಕ್ರಭೋಗಾ ಶುಕ್ರಪೂಜಾಸದಾರತಿಃ ।
ಶುಕ್ರಪೂಜ್ಯಾ ಶುಕ್ರಹೋಮಸಂತುಷ್ಟಾ ಶುಕ್ರವತ್ಸಲಾ ॥ 141 ॥

ಶುಕ್ರಮೂರ್ತಿಃ ಶುಕ್ರದೇಹಾ ಶುಕ್ರಪೂಜಕಪುತ್ರಿಣೀ ।
ಶುಕ್ರಸ್ಥಾ ಶುಕ್ರಿಣೀ ಶುಕ್ರಸಂಸ್ಪೃಹಾ ಶುಕ್ರಸುಂದರೀ ॥ 142 ॥

ಶುಕ್ರಸ್ನಾತಾ ಶುಕ್ರಕರೀ ಶುಕ್ರಸೇವ್ಯಾಽತಿಶುಕ್ರಿಣೀ ।
ಮಹಾಶುಕ್ರಾ ಶುಕ್ರಭವಾ ಶುಕ್ರವೃಷ್ಟಿವಿಧಾಯಿನೀ ॥ 143 ॥

ಶುಕ್ರಾಭಿಧೇಯಾ ಶುಕ್ರಾರ್ಹಾ ಶುಕ್ರವಂದಕವಂದಿತಾ ।
ಶುಕ್ರಾನಂದಕರೀ ಶುಕ್ರಸದಾನಂದಾಭಿಧಾಯಿಕಾ ॥ 144 ॥

ಶುಕ್ರೋತ್ಸವಾ ಸದಾಶುಕ್ರಪೂರ್ಣಾ ಶುಕ್ರಮನೋರಮಾ ।
ಶುಕ್ರಪೂಜಕಸರ್ವಸ್ವಾ ಶುಕ್ರನಿಂದಕನಾಶಿನೀ ॥ 145 ॥

ಶುಕ್ರಾತ್ಮಿಕಾ ಶುಕ್ರಸಂವತ್ ಶುಕ್ರಾಕರ್ಷಣಕಾರಿಣೀ ।
ಶಾರದಾ ಸಾಧಕಪ್ರಾಣಾ ಸಾಧಕಾಸಕ್ತಮಾನಸಾ ॥ 146 ॥

ಸಾಧಕೋತ್ತಮಸರ್ವಸ್ವಾ ಸಾಧಕಾಭಕ್ತರಕ್ತಪಾ ।
ಸಾಧಕಾನಂದಸಂತೋಷಾ ಸಾಧಕಾನಂದಕಾರಿಣೀ ॥ 147 ॥

ಆತ್ಮವಿದ್ಯಾ ಬ್ರಹ್ಮವಿದ್ಯಾ ಪರಬ್ರಹ್ಮಸ್ವರೂಪಿಣೀ ।
ತ್ರಿಕೂಟಸ್ಥಾ ಪಂಚಕೂಟಾ ಸರ್ವಕೂಟಶರೀರಿಣೀ ॥ 148 ॥

ಸರ್ವವರ್ಣಮಯೀ ವರ್ಣಜಪಮಾಲಾವಿಧಾಯಿನೀ ।
ಇತಿ ಶ್ರೀಕಾಳಿಕಾನಾಮಸಹಸ್ರಂ ಶಿವಭಾಷಿತಮ್ ॥ 149 ॥

ಗುಹ್ಯಾದ್ಗುಹ್ಯತರಂ ಸಾಕ್ಷಾನ್ಮಹಾಪಾತಕನಾಶನಮ್ ।
ಪೂಜಾಕಾಲೇ ನಿಶೀಥೇ ಚ ಸಂಧ್ಯಯೋರುಭಯೋರಪಿ ॥ 150 ॥

ಲಭತೇ ಗಾಣಪತ್ಯಂ ಸ ಯಃ ಪಠೇತ್ ಸಾಧಕೋತ್ತಮಃ ।
ಯಃ ಪಠೇತ್ ಪಾಠಯೇದ್ವಾಪಿ ಶೃಣೋತಿ ಶ್ರಾವಯೇದಪಿ ॥ 151 ॥

ಸರ್ವಪಾಪವಿನಿರ್ಮುಕ್ತಃ ಸ ಯಾತಿ ಕಾಳಿಕಾಪುರಮ್ ।
ಶ್ರದ್ಧಯಾಽಶ್ರದ್ಧಯಾ ವಾಪಿ ಯಃ ಕಶ್ಚಿನ್ಮಾನವಃ ಸ್ಮರೇತ್ ॥ 152 ॥

ದುರ್ಗಂ ದುರ್ಗಶತಂ ತೀರ್ತ್ವಾ ಸ ಯಾತಿ ಪರಮಾಂಗತಿಮ್ ।
ವಂಧ್ಯಾ ವಾ ಕಾಕವಂಧ್ಯಾ ವಾ ಮೃತವತ್ಸಾ ಚ ಯಾಂಗನಾ ॥ 153 ॥

ಶ್ರುತ್ವಾ ಸ್ತೋತ್ರಮಿದಂ ಪುತ್ರಾನ್ ಲಭತೇ ಚಿರಜೀವಿನಃ ।
ಯಂ ಯಂ ಕಾಮಯತೇ ಕಾಮಂ ಪಠನ್ ಸ್ತೋತ್ರಮನುತ್ತಮಮ್ ।
ದೇವೀಪಾದಪ್ರಸಾದೇನ ತತ್ತದಾಪ್ನೋತಿ ನಿಶ್ಚಿತಮ್ ॥ 154 ॥

ಇತಿ ಶ್ರೀಕಾಳಿಕಾಕುಲಸರ್ವಸ್ವೇ ಹರಪರಶುರಾಮಸಂವಾದೇ ಶ್ರೀ ಕಾಳಿಕಾ ಸಹಸ್ರನಾಮ ಸ್ತೋತ್ರಮ್ ।