ಶ್ರೀ ದುರ್ಗಾ ಅಥರ್ವಶೀರ್ಷಂ

ಓಂ ಸರ್ವೇ ವೈ ದೇವಾ ದೇವೀಮುಪತಸ್ಥುಃ ಕಾಸಿ ತ್ವಂ ಮಹಾದೇವೀತಿ ॥ 1 ॥

ಸಾಽಬ್ರವೀದಹಂ ಬ್ರಹ್ಮಸ್ವರೂಪಿಣೀ ।
ಮತ್ತಃ ಪ್ರಕೃತಿಪುರುಷಾತ್ಮಕಂ ಜಗತ್ ।
ಶೂನ್ಯಂ ಚಾಶೂನ್ಯಂ ಚ ॥ 2 ॥

ಅಹಮಾನಂದಾನಾನಂದೌ ।
ಅಹಂ-ವಿಁಜ್ಞಾನಾವಿಜ್ಞಾನೇ ।
ಅಹಂ ಬ್ರಹ್ಮಾಬ್ರಹ್ಮಣಿ ವೇದಿತವ್ಯೇ ।
ಅಹಂ ಪಂಚಭೂತಾನ್ಯಪಂಚಭೂತಾನಿ ।
ಅಹಮಖಿಲಂ ಜಗತ್ ॥ 3 ॥

ವೇದೋಽಹಮವೇದೋಽಹಮ್ ।
ವಿದ್ಯಾಽಹಮವಿದ್ಯಾಽಹಮ್ ।
ಅಜಾಽಹಮನಜಾಽಹಮ್ ।
ಅಧಶ್ಚೋರ್ಧ್ವಂ ಚ ತಿರ್ಯಕ್ಚಾಹಮ್ ॥ 4 ॥

ಅಹಂ ರುದ್ರೇಭಿರ್ವಸುಭಿಶ್ಚರಾಮಿ ।
ಅಹಮಾದಿತ್ಯೈರುತ ವಿಶ್ವದೇವೈಃ ।
ಅಹಂ ಮಿತ್ರಾವರುಣಾವುಭೌ ಬಿಭರ್ಮಿ ।
ಅಹಮಿಂದ್ರಾಗ್ನೀ ಅಹಮಶ್ವಿನಾವುಭೌ ॥ 5 ॥

ಅಹಂ ಸೋಮಂ ತ್ವಷ್ಟಾರಂ ಪೂಷಣಂ ಭಗಂ ದಧಾಮಿ ।
ಅಹಂ-ವಿಁಷ್ಣುಮುರುಕ್ರಮಂ ಬ್ರಹ್ಮಾಣಮುತ ಪ್ರಜಾಪತಿಂ ದಧಾಮಿ ॥ 6 ॥

ಅ॒ಹಂ ದ॑ಧಾಮಿ॒ ದ್ರವಿ॑ಣಂ ಹ॒ವಿಷ್ಮ॑ತೇ ಸುಪ್ರಾ॒ವ್ಯೇ॒3 ಯಜ॑ಮಾನಾಯ ಸುನ್ವ॒ತೇ ।
ಅ॒ಹಂ ರಾಷ್ಟ್ರೀ॑ ಸಂ॒ಗಮ॑ನೀ॒ ವಸೂ॑ನಾಂ ಚಿಕಿ॒ತುಷೀ॑ ಪ್ರಥ॒ಮಾ ಯ॒ಜ್ಞಿಯಾ॑ನಾಮ್ ।
ಅ॒ಹಂ ಸು॑ವೇ ಪಿ॒ತರ॑ಮಸ್ಯ ಮೂ॒ರ್ಧನ್ಮಮ॒ ಯೋನಿ॑ರ॒ಪ್ಸ್ವಂತಃ ಸ॑ಮು॒ದ್ರೇ ।
ಯ ಏವಂ-ವೇಁದ । ಸ ದೇವೀಂ ಸಂಪದಮಾಪ್ನೋತಿ ॥ 7 ॥

ತೇ ದೇವಾ ಅಬ್ರುವನ್ –
ನಮೋ ದೇವ್ಯೈ ಮಹಾದೇವ್ಯೈ ಶಿವಾಯೈ ಸತತಂ ನಮಃ ।
ನಮಃ ಪ್ರಕೃತ್ಯೈ ಭದ್ರಾಯೈ ನಿಯತಾಃ ಪ್ರಣತಾಃ ಸ್ಮ ತಾಮ್ ॥ 8 ॥

ತಾಮ॒ಗ್ನಿವ॑ರ್ಣಾಂ॒ ತಪ॑ಸಾ ಜ್ವಲಂ॒ತೀಂ-ವೈಁ॑ರೋಚ॒ನೀಂ ಕ॑ರ್ಮಫ॒ಲೇಷು॒ ಜುಷ್ಟಾ᳚ಮ್ ।
ದು॒ರ್ಗಾಂ ದೇ॒ವೀಂ ಶರ॑ಣಂ ಪ್ರಪ॑ದ್ಯಾಮಹೇಽಸುರಾನ್ನಾಶಯಿತ್ರ್ಯೈ ತೇ ನಮಃ ॥ 9 ॥

(ಋ.ವೇ.8.100.11)
ದೇ॒ವೀಂ-ವಾಁಚ॑ಮಜನಯಂತ ದೇ॒ವಾಸ್ತಾಂ-ವಿಁ॒ಶ್ವರೂ॑ಪಾಃ ಪ॒ಶವೋ॑ ವದಂತಿ ।
ಸಾ ನೋ॑ ಮಂ॒ದ್ರೇಷ॒ಮೂರ್ಜಂ॒ ದುಹಾ॑ನಾ ಧೇ॒ನುರ್ವಾಗ॒ಸ್ಮಾನುಪ॒ ಸುಷ್ಟು॒ತೈತು॑ ॥ 10 ॥

ಕಾಲರಾತ್ರೀಂ ಬ್ರಹ್ಮಸ್ತುತಾಂ-ವೈಁಷ್ಣವೀಂ ಸ್ಕಂದಮಾತರಮ್ ।
ಸರಸ್ವತೀಮದಿತಿಂ ದಕ್ಷದುಹಿತರಂ ನಮಾಮಃ ಪಾವನಾಂ ಶಿವಾಮ್ ॥ 11 ॥

ಮಹಾಲಕ್ಷ್ಮ್ಯೈ ಚ ವಿದ್ಮಹೇ ಸರ್ವಶಕ್ತ್ಯೈ ಚ ಧೀಮಹಿ ।
ತನ್ನೋ ದೇವೀ ಪ್ರಚೋದಯಾತ್ ॥ 12 ॥

ಅದಿತಿರ್​ಹ್ಯಜನಿಷ್ಟ ದಕ್ಷ ಯಾ ದುಹಿತಾ ತವ ।
ತಾಂ ದೇವಾ ಅನ್ವಜಾಯಂತ ಭದ್ರಾ ಅಮೃತಬಂಧವಃ ॥ 13 ॥

ಕಾಮೋ ಯೋನಿಃ ಕಮಲಾ ವಜ್ರಪಾಣಿ-
ರ್ಗುಹಾ ಹಸಾ ಮಾತರಿಶ್ವಾಭ್ರಮಿಂದ್ರಃ ।
ಪುನರ್ಗುಹಾ ಸಕಲಾ ಮಾಯಯಾ ಚ
ಪುರೂಚ್ಯೈಷಾ ವಿಶ್ವಮಾತಾದಿವಿದ್ಯೋಮ್ ॥ 14 ॥

ಏಷಾಽಽತ್ಮಶಕ್ತಿಃ ।
ಏಷಾ ವಿಶ್ವಮೋಹಿನೀ ।
ಪಾಶಾಂಕುಶಧನುರ್ಬಾಣಧರಾ ।
ಏಷಾ ಶ್ರೀಮಹಾವಿದ್ಯಾ ।
ಯ ಏವಂ-ವೇಁದ ಸ ಶೋಕಂ ತರತಿ ॥ 15 ॥

ನಮಸ್ತೇ ಅಸ್ತು ಭಗವತಿ ಮಾತರಸ್ಮಾನ್ಪಾಹಿ ಸರ್ವತಃ ॥ 16 ॥

ಸೈಷಾಷ್ಟೌ ವಸವಃ ।
ಸೈಷೈಕಾದಶ ರುದ್ರಾಃ ।
ಸೈಷಾ ದ್ವಾದಶಾದಿತ್ಯಾಃ ।
ಸೈಷಾ ವಿಶ್ವೇದೇವಾಃ ಸೋಮಪಾ ಅಸೋಮಪಾಶ್ಚ ।
ಸೈಷಾ ಯಾತುಧಾನಾ ಅಸುರಾ ರಕ್ಷಾಂಸಿ ಪಿಶಾಚಾ ಯಕ್ಷಾ ಸಿದ್ಧಾಃ ।
ಸೈಷಾ ಸತ್ತ್ವರಜಸ್ತಮಾಂಸಿ ।
ಸೈಷಾ ಬ್ರಹ್ಮವಿಷ್ಣುರುದ್ರರೂಪಿಣೀ ।
ಸೈಷಾ ಪ್ರಜಾಪತೀಂದ್ರಮನವಃ ।
ಸೈಷಾ ಗ್ರಹನಕ್ಷತ್ರಜ್ಯೋತೀಂಷಿ । ಕಲಾಕಾಷ್ಠಾದಿಕಾಲರೂಪಿಣೀ ।
ತಾಮಹಂ ಪ್ರಣೌಮಿ ನಿತ್ಯಮ್ ।
ಪಾಪಾಪಹಾರಿಣೀಂ ದೇವೀಂ ಭುಕ್ತಿಮುಕ್ತಿಪ್ರದಾಯಿನೀಮ್ ।
ಅನಂತಾಂ-ವಿಁಜಯಾಂ ಶುದ್ಧಾಂ ಶರಣ್ಯಾಂ ಶಿವದಾಂ ಶಿವಾಮ್ ॥ 17 ॥

ವಿಯದೀಕಾರಸಂ​ಯುಁಕ್ತಂ-ವೀಁತಿಹೋತ್ರಸಮನ್ವಿತಮ್ ।
ಅರ್ಧೇಂದುಲಸಿತಂ ದೇವ್ಯಾ ಬೀಜಂ ಸರ್ವಾರ್ಥಸಾಧಕಮ್ ॥ 18 ॥

ಏವಮೇಕಾಕ್ಷರಂ ಬ್ರಹ್ಮ ಯತಯಃ ಶುದ್ಧಚೇತಸಃ ।
ಧ್ಯಾಯಂತಿ ಪರಮಾನಂದಮಯಾ ಜ್ಞಾನಾಂಬುರಾಶಯಃ ॥ 19 ॥

ವಾಙ್ಮಾಯಾ ಬ್ರಹ್ಮಸೂಸ್ತಸ್ಮಾತ್ ಷಷ್ಠಂ-ವಁಕ್ತ್ರಸಮನ್ವಿತಮ್ ।
ಸೂರ್ಯೋಽವಾಮಶ್ರೋತ್ರಬಿಂದುಸಂ​ಯುಁಕ್ತಷ್ಟಾತ್ತೃತೀಯಕಃ ।
ನಾರಾಯಣೇನ ಸಮ್ಮಿಶ್ರೋ ವಾಯುಶ್ಚಾಧರಯುಕ್ತತಃ ।
ವಿಚ್ಚೇ ನವಾರ್ಣಕೋಽರ್ಣಃ ಸ್ಯಾನ್ಮಹದಾನಂದದಾಯಕಃ ॥ 20 ॥

ಹೃತ್ಪುಂಡರೀಕಮಧ್ಯಸ್ಥಾಂ ಪ್ರಾತಃಸೂರ್ಯಸಮಪ್ರಭಾಮ್ ।
ಪಾಶಾಂಕುಶಧರಾಂ ಸೌಮ್ಯಾಂ-ವಁರದಾಭಯಹಸ್ತಕಾಮ್ ।
ತ್ರಿನೇತ್ರಾಂ ರಕ್ತವಸನಾಂ ಭಕ್ತಕಾಮದುಘಾಂ ಭಜೇ ॥ 21 ॥

ನಮಾಮಿ ತ್ವಾಂ ಮಹಾದೇವೀಂ ಮಹಾಭಯವಿನಾಶಿನೀಮ್ ।
ಮಹಾದುರ್ಗಪ್ರಶಮನೀಂ ಮಹಾಕಾರುಣ್ಯರೂಪಿಣೀಮ್ ॥ 22 ॥

ಯಸ್ಯಾಃ ಸ್ವರೂಪಂ ಬ್ರಹ್ಮಾದಯೋ ನ ಜಾನಂತಿ ತಸ್ಮಾದುಚ್ಯತೇ ಅಜ್ಞೇಯಾ ।
ಯಸ್ಯಾ ಅಂತೋ ನ ಲಭ್ಯತೇ ತಸ್ಮಾದುಚ್ಯತೇ ಅನಂತಾ ।
ಯಸ್ಯಾ ಲಕ್ಷ್ಯಂ ನೋಪಲಕ್ಷ್ಯತೇ ತಸ್ಮಾದುಚ್ಯತೇ ಅಲಕ್ಷ್ಯಾ ।
ಯಸ್ಯಾ ಜನನಂ ನೋಪಲಭ್ಯತೇ ತಸ್ಮಾದುಚ್ಯತೇ ಅಜಾ ।
ಏಕೈವ ಸರ್ವತ್ರ ವರ್ತತೇ ತಸ್ಮಾದುಚ್ಯತೇ ಏಕಾ ।
ಏಕೈವ ವಿಶ್ವರೂಪಿಣೀ ತಸ್ಮಾದುಚ್ಯತೇ ನೈಕಾ ।
ಅತ ಏವೋಚ್ಯತೇ ಅಜ್ಞೇಯಾನಂತಾಲಕ್ಷ್ಯಾಜೈಕಾ ನೈಕೇತಿ ॥ 23 ॥

ಮಂತ್ರಾಣಾಂ ಮಾತೃಕಾ ದೇವೀ ಶಬ್ದಾನಾಂ ಜ್ಞಾನರೂಪಿಣೀ ।
ಜ್ಞಾನಾನಾಂ ಚಿನ್ಮಯಾತೀತಾ ಶೂನ್ಯಾನಾಂ ಶೂನ್ಯಸಾಕ್ಷಿಣೀ ।
ಯಸ್ಯಾಃ ಪರತರಂ ನಾಸ್ತಿ ಸೈಷಾ ದುರ್ಗಾ ಪ್ರಕೀರ್ತಿತಾ ॥ 24 ॥

ತಾಂ ದುರ್ಗಾಂ ದುರ್ಗಮಾಂ ದೇವೀಂ ದುರಾಚಾರವಿಘಾತಿನೀಮ್ ।
ನಮಾಮಿ ಭವಭೀತೋಽಹಂ ಸಂಸಾರಾರ್ಣವತಾರಿಣೀಮ್ ॥ 25 ॥

ಇದಮಥರ್ವಶೀರ್​ಷಂ-ಯೋಁಽಧೀತೇ ಸ ಪಂಚಾಥರ್ವಶೀರ್​ಷಜಪಫಲಮಾಪ್ನೋತಿ ।
ಇದಮಥರ್ವಶೀರ್​ಷಮಜ್ಞಾತ್ವಾ ಯೋಽರ್ಚಾಂ ಸ್ಥಾಪಯತಿ ।
ಶತಲಕ್ಷಂ ಪ್ರಜಪ್ತ್ವಾಽಪಿ ಸೋಽರ್ಚಾಸಿದ್ಧಿಂ ನ ವಿಂದತಿ ।
ಶತಮಷ್ಟೋತ್ತರಂ ಚಾಸ್ಯ ಪುರಶ್ಚರ್ಯಾವಿಧಿಃ ಸ್ಮೃತಃ ।
ದಶವಾರಂ ಪಠೇದ್ಯಸ್ತು ಸದ್ಯಃ ಪಾಪೈಃ ಪ್ರಮುಚ್ಯತೇ ।
ಮಹಾದುರ್ಗಾಣಿ ತರತಿ ಮಹಾದೇವ್ಯಾಃ ಪ್ರಸಾದತಃ । 26 ॥

ಸಾಯಮಧೀಯಾನೋ ದಿವಸಕೃತಂ ಪಾಪಂ ನಾಶಯತಿ ।
ಪ್ರಾತರಧೀಯಾನೋ ರಾತ್ರಿಕೃತಂ ಪಾಪಂ ನಾಶಯತಿ ।
ಸಾಯಂ ಪ್ರಾತಃ ಪ್ರಯುಂಜಾನೋ ಅಪಾಪೋ ಭವತಿ ।
ನಿಶೀಥೇ ತುರೀಯಸಂಧ್ಯಾಯಾಂ ಜಪ್ತ್ವಾ ವಾಕ್ಸಿದ್ಧಿರ್ಭವತಿ ।
ನೂತನಾಯಾಂ ಪ್ರತಿಮಾಯಾಂ ಜಪ್ತ್ವಾ ದೇವತಾಸಾನ್ನಿಧ್ಯಂ ಭವತಿ ।
ಪ್ರಾಣಪ್ರತಿಷ್ಠಾಯಾಂ ಜಪ್ತ್ವಾ ಪ್ರಾಣಾನಾಂ ಪ್ರತಿಷ್ಠಾ ಭವತಿ ।
ಭೌಮಾಶ್ವಿನ್ಯಾಂ ಮಹಾದೇವೀಸನ್ನಿಧೌ ಜಪ್ತ್ವಾ ಮಹಾಮೃತ್ಯುಂ ತರತಿ ।
ಸ ಮಹಾಮೃತ್ಯುಂ ತರತಿ ।
ಯ ಏವಂ-ವೇಁದ ।
ಇತ್ಯುಪನಿಷತ್ ॥ 27 ॥

ಇತಿ ದೇವ್ಯಥರ್ವಶೀರ್​ಷಮ್ ।