ಸಕಲ ಜನನೀ ಸ್ತವಃ

ಅಜಾನಂತೋ ಯಾಂತಿ ಕ್ಷಯಮವಶಮನ್ಯೋನ್ಯಕಲಹೈ-
-ರಮೀ ಮಾಯಾಗ್ರಂಥೌ ತವ ಪರಿಲುಠಂತಃ ಸಮಯಿನಃ ।
ಜಗನ್ಮಾತರ್ಜನ್ಮಜ್ವರಭಯತಮಃ ಕೌಮುದಿ ವಯಂ
ನಮಸ್ತೇ ಕುರ್ವಾಣಾಃ ಶರಣಮುಪಯಾಮೋ ಭಗವತೀಮ್ ॥ 1 ॥

ವಚಸ್ತರ್ಕಾಗಮ್ಯಸ್ವರಸಪರಮಾನಂದವಿಭವ-
-ಪ್ರಬೋಧಾಕಾರಾಯ ದ್ಯುತಿತುಲಿತನೀಲೋತ್ಪಲರುಚೇ ।
ಶಿವಾದ್ಯಾರಾಧ್ಯಾಯ ಸ್ತನಭರವಿನಮ್ರಾಯ ಸತತಂ
ನಮಸ್ತಸ್ಮೈ ಕಸ್ಮೈಚನ ಭವತು ಮುಗ್ಧಾಯ ಮಹಸೇ ॥ 2 ॥

ಅನಾದ್ಯಂತಾಭೇದಪ್ರಣಯರಸಿಕಾಪಿ ಪ್ರಣಯಿನೀ
ಶಿವಸ್ಯಾಸೀರ್ಯತ್ತ್ವಂ ಪರಿಣಯವಿಧೌ ದೇವಿ ಗೃಹಿಣೀ ।
ಸವಿತ್ರೀ ಭೂತಾನಾಮಪಿ ಯದುದಭೂಃ ಶೈಲತನಯಾ
ತದೇತತ್ಸಂಸಾರಪ್ರಣಯನಮಹಾನಾಟಕಮುಖಮ್ ॥ 3 ॥

ಬ್ರುವಂತ್ಯೇಕೇ ತತ್ತ್ವಂ ಭಗವತಿ ಸದನ್ಯೇ ವಿದುರಸ-
-ತ್ಪರೇ ಮಾತಃ ಪ್ರಾಹುಸ್ತವ ಸದಸದನ್ಯೇ ಸುಕವಯಃ ।
ಪರೇ ನೈತತ್ಸರ್ವಂ ಸಮಭಿದಧತೇ ದೇವಿ ಸುಧಿಯ-
-ಸ್ತದೇತತ್ತ್ವನ್ಮಾಯಾವಿಲಸಿತಮಶೇಷಂ ನನು ಶಿವೇ ॥ 4 ॥

ಲುಠದ್ಗುಂಜಾಹಾರಸ್ತನಭರನಮನ್ಮಧ್ಯಲತಿಕಾ-
-ಮುದಂಚದ್ಧರ್ಮಾಂಭಃ ಕಣಗುಣಿತವಕ್ತ್ರಾಂಬುಜರುಚಮ್ ।
ಶಿವಂ ಪಾರ್ಥತ್ರಾಣಪ್ರವಣಮೃಗಯಾಕಾರಗುಣಿತಂ
ಶಿವಾಮನ್ವಗ್ಯಾಂತೀಂ ಶರಣಮಹಮನ್ವೇಮಿ ಶಬರೀಮ್ ॥ 5 ॥

ಮಿಥಃ ಕೇಶಾಕೇಶಿಪ್ರಥನನಿಧನಾಸ್ತರ್ಕಘಟನಾಃ
ಬಹುಶ್ರದ್ಧಾಭಕ್ತಿಪ್ರಣತಿವಿಷಯಾಃ ಶಾಸ್ತ್ರವಿಧಯಃ ।
ಪ್ರಸೀದ ಪ್ರತ್ಯಕ್ಷೀಭವ ಗಿರಿಸುತೇ ದೇಹಿ ಶರಣಂ
ನಿರಾಲಂಬಂ ಚೇತಃ ಪರಿಲುಠತಿ ಪಾರಿಪ್ಲವಮಿದಮ್ ॥ 6 ॥

ಶುನಾಂ ವಾ ವಹ್ನೇರ್ವಾ ಖಗಪರಿಷದೋ ವಾ ಯದಶನಂ
ಕದಾ ಕೇನ ಕ್ವೇತಿ ಕ್ವಚಿದಪಿ ನ ಕಶ್ಚಿತ್ಕಲಯತಿ ।
ಅಮುಷ್ಮಿನ್ವಿಶ್ವಾಸಂ ವಿಜಹಿಹಿ ಮಮಾಹ್ನಾಯ ವಪುಷಿ
ಪ್ರಪದ್ಯೇಥಾಶ್ಚೇತಃ ಸಕಲಜನನೀಮೇವ ಶರಣಮ್ ॥ 7 ॥

ತಟಿತ್ಕೋಟಿಜ್ಯೋತಿರ್ದ್ಯುತಿದಲಿತಷಡ್ಗ್ರಂಥಿಗಹನಂ
ಪ್ರವಿಷ್ಟಂ ಸ್ವಾಧಾರಂ ಪುನರಪಿ ಸುಧಾವೃಷ್ಟಿವಪುಷಾ ।
ಕಿಮಪ್ಯಷ್ಟಾವಿಂಶತ್ಕಿರಣಸಕಲೀಭೂತಮನಿಶಂ
ಭಜೇ ಧಾಮ ಶ್ಯಾಮಂ ಕುಚಭರನತಂ ಬರ್ಬರಕಚಮ್ ॥ 8 ॥

ಚತುಷ್ಪತ್ರಾಂತಃ ಷಡ್ದಲಪುಟಭಗಾಂತಸ್ತ್ರಿವಲಯ-
-ಸ್ಫುರದ್ವಿದ್ಯುದ್ವಹ್ನಿದ್ಯುಮಣಿನಿಯುತಾಭದ್ಯುತಿಲತೇ ।
ಷಡಶ್ರಂ ಭಿತ್ತ್ವಾದೌ ದಶದಲಮಥ ದ್ವಾದಶದಲಂ
ಕಲಾಶ್ರಂ ಚ ದ್ವ್ಯಶ್ರಂ ಗತವತಿ ನಮಸ್ತೇ ಗಿರಿಸುತೇ ॥ 9 ॥

ಕುಲಂ ಕೇಚಿತ್ಪ್ರಾಹುರ್ವಪುರಕುಲಮನ್ಯೇ ತವ ಬುಧಾಃ
ಪರೇ ತತ್ಸಂಭೇದಂ ಸಮಭಿದಧತೇ ಕೌಲಮಪರೇ ।
ಚತುರ್ಣಾಮಪ್ಯೇಷಾಮುಪರಿ ಕಿಮಪಿ ಪ್ರಾಹುರಪರೇ
ಮಹಾಮಾಯೇ ತತ್ತ್ವಂ ತವ ಕಥಮಮೀ ನಿಶ್ಚಿನುಮಹೇ ॥ 10 ॥

ಷಡಧ್ವಾರಣ್ಯಾನೀಂ ಪ್ರಲಯರವಿಕೋಟಿಪ್ರತಿರುಚಾ
ರುಚಾ ಭಸ್ಮೀಕೃತ್ಯ ಸ್ವಪದಕಮಲಪ್ರಹ್ವಶಿರಸಾಮ್ ।
ವಿತನ್ವಾನಃ ಶೈವಂ ಕಿಮಪಿ ವಪುರಿಂದೀವರರುಚಿಃ
ಕುಚಾಭ್ಯಾಮಾನಮ್ರಸ್ತವ ಪುರುಷಕಾರೋ ವಿಜಯತೇ ॥ 11 ॥

ಪ್ರಕಾಶಾನಂದಾಭ್ಯಾಮವಿದಿತಚರೀಂ ಮಧ್ಯಪದವೀಂ
ಪ್ರವಿಶ್ಯೈತದ್ದ್ವಂದ್ವಂ ರವಿಶಶಿಸಮಾಖ್ಯಂ ಕಬಲಯನ್ ।
ಪ್ರಪದ್ಯೋರ್ಧ್ವಂ ನಾದಂ ಲಯದಹನಭಸ್ಮೀಕೃತಕುಲಃ
ಪ್ರಸಾದಾತ್ತೇ ಜಂತುಃ ಶಿವಮಕುಲಮಂಬ ಪ್ರವಿಶತಿ ॥ 12 ॥

ಮನುಷ್ಯಾಸ್ತಿರ್ಯಂಚೋ ಮರುತ ಇತಿ ಲೋಕತ್ರಯಮಿದಂ
ಭವಾಂಭೋಧೌ ಮಗ್ನಂ ತ್ರಿಗುಣಲಹರೀಕೋಟಿಲುಠಿತಮ್ ।
ಕಟಾಕ್ಷಶ್ಚೇದ್ಯತ್ರ ಕ್ವಚನ ತವ ಮಾತಃ ಕರುಣಯಾ
ಶರೀರೀ ಸದ್ಯೋಽಯಂ ವ್ರಜತಿ ಪರಮಾನಂದತನುತಾಮ್ ॥ 13 ॥

ಪ್ರಿಯಂಗುಶ್ಯಾಮಾಂಗೀಮರುಣತರವಾಸಂ ಕಿಸಲಯಾಂ
ಸಮುನ್ಮೀಲನ್ಮುಕ್ತಾಫಲವಹಲನೇಪಥ್ಯಸುಭಗಾಮ್ ।
ಸ್ತನದ್ವಂದ್ವಸ್ಫಾರಸ್ತಬಕನಮಿತಾಂ ಕಲ್ಪಲತಿಕಾಂ
ಸಕೃದ್ಧ್ಯಾಯಂತಸ್ತ್ವಾಂ ದಧತಿ ಶಿವಚಿಂತಾಮಣಿಪದಮ್ ॥ 14 ॥

ಷಡಾಧಾರಾವರ್ತೈರಪರಿಮಿತಮಂತ್ರೋರ್ಮಿಪಟಲೈಃ
ಲಸನ್ಮುದ್ರಾಫೇನೈರ್ಬಹುವಿಧಲಸದ್ದೈವತಝಷೈಃ ।
ಕ್ರಮಸ್ರೋತೋಭಿಸ್ತ್ವಂ ವಹಸಿ ಪರನಾದಾಮೃತನದೀ
ಭವಾನಿ ಪ್ರತ್ಯಗ್ರಾ ಶಿವಚಿದಮೃತಾಬ್ಧಿಪ್ರಣಯಿನೀ ॥ 15 ॥

ಮಹೀಪಾಥೋವಹ್ನಿಶ್ವಸನವಿಯದಾತ್ಮೇಂದುರವಿಭಿ-
-ರ್ವಪುರ್ಭಿಗ್ರಸ್ತಾಶೈರಪಿ ತವ ಕಿಯಾನಂಬ ಮಹಿಮಾ ।
ಅಮೂನ್ಯಾಲೋಕ್ಯಂತೇ ಭಗವತಿ ನ ಕುತ್ರಾಪ್ಯಣುತಮಾ-
-ಮವಸ್ಥಾಂ ಪ್ರಾಪ್ತಾನಿ ತ್ವಯಿ ತು ಪರಮವ್ಯೋಮವಪುಷಿ ॥ 16 ॥

ಕಲಾಮಾಜ್ಞಾಂ ಪ್ರಜ್ಞಾಂ ಸಮಯಮನುಭೂತಿಂ ಸಮರಸಂ
ಗುರುಂ ಪಾರಂಪರ್ಯಂ ವಿನಯಮುಪದೇಶಂ ಶಿವಪದಮ್ ।
ಪ್ರಮಾಣಂ ನಿರ್ವಾಣಂ ಪ್ರಕೃತಿಮಭಿಭೂತಿಂ ಪರಗುಹಾಂ
ವಿಧಿಂ ವಿದ್ಯಾಮಾಹುಃ ಸಕಲಜನನೀಮೇವ ಮುನಯಃ ॥ 17 ॥

ಪ್ರಲೀನೇ ಶಬ್ದೌಘೇ ತದನು ವಿರತೇ ಬಿಂದುವಿಭವೇ
ತತಸ್ತತ್ತ್ವೇ ಚಾಷ್ಟಧ್ವನಿಭಿರನಪಾಯಿನ್ಯಧಿಗತೇ ।
ಶ್ರಿತೇ ಶಾಕ್ತೇ ಪರ್ವಣ್ಯನುಕಲಿತಚಿನ್ಮಾತ್ರ ಗಹನಾಂ
ಸ್ವಸಂವಿತ್ತಿಂ ಯೋಗೀ ರಸಯತಿ ಶಿವಾಖ್ಯಾಂ ಭಗವತೀಮ್ ॥ 18 ॥

ಪರಾನಂದಾಕಾರಾಂ ನಿರವಧಿಶಿವೈಶ್ವರ್ಯವಪುಷಂ
ನಿರಾಕಾರಾಂ ಜ್ಞಾನಪ್ರಕೃತಿಮಪರಿಚ್ಛಿನ್ನಕರುಣಾಮ್ ।
ಸವಿತ್ರೀಂ ಲೋಕಾನಾಂ ನಿರತಿಶಯಧಾಮಾಸ್ಪದಪದಾಂ
ಭವೋ ವಾ ಮೋಕ್ಷೋ ವಾ ಭವತು ಭವತೀಮೇವ ಭಜತಾಮ್ ॥ 19 ॥

ಜಗತ್ಕಾಯೇ ಕೃತ್ವಾ ತದಪಿ ಹೃದಯೇ ತಚ್ಚ ಪುರುಷೇ
ಪುಮಾಂಸಂ ಬಿಂದುಸ್ಥಂ ತದಪಿ ವಿಯದಾಖ್ಯೇ ಚ ಗಹನೇ ।
ತದೇತದ್ಜ್ಞಾನಾಖ್ಯೇ ತದಪಿ ಪರಮಾನಂದಗಹನೇ
ಮಹಾವ್ಯೋಮಾಕಾರೇ ತ್ವದನುಭವಶೀಲೋ ವಿಜಯತೇ ॥ 20 ॥

ವಿಧೇ ವೇದ್ಯೇ ವಿದ್ಯೇ ವಿವಿಧಸಮಯೇ ವೇದಗುಲಿಕೇ
ವಿಚಿತ್ರೇ ವಿಶ್ವಾದ್ಯೇ ವಿನಯಸುಲಭೇ ವೇದಜನನಿ ।
ಶಿವಜ್ಞೇ ಶೂಲಸ್ಥೇ ಶಿವಪದವದಾನ್ಯೇ ಶಿವನಿಧೇ
ಶಿವೇ ಮಾತರ್ಮಹ್ಯಂ ತ್ವಯಿ ವಿತರ ಭಕ್ತಿಂ ನಿರುಪಮಾಮ್ ॥ 21 ॥

ವಿಧೇರ್ಮುಂಡಂ ಹೃತ್ವಾ ಯದಕುರುತ ಪಾತ್ರಂ ಕರತಲೇ
ಹರಿಂ ಶೂಲಪ್ರೋತಂ ಯದಗಮಯದಂಸಾಭರಣತಾಮ್ ।
ಅಲಂಚಕ್ರೇ ಕಂಠಂ ಯದಪಿ ಗರಲೇನಾಂಬ ಗಿರಿಶಃ
ಶಿವಸ್ಥಾಯಾಃ ಶಕ್ತೇಸ್ತದಿದಮಖಿಲಂ ತೇ ವಿಲಸಿತಮ್ ॥ 22 ॥

ವಿರಿಂಚ್ಯಾಖ್ಯಾ ಮಾತಃ ಸೃಜಸಿ ಹರಿಸಂಜ್ಞಾ ತ್ವಮವಸಿ
ತ್ರಿಲೋಕೀಂ ರುದ್ರಾಖ್ಯಾ ಹರಸಿ ವಿದಧಾಸೀಶ್ವರದಶಾಮ್ ।
ಭವಂತೀ ನಾದಾಖ್ಯಾ ವಿಹರಸಿ ಚ ಪಾಶೌಘದಲನೀ
ತ್ವಮೇವೈಕಾಽನೇಕಾ ಭವಸಿ ಕೃತಿಭೇದೈರ್ಗಿರಿಸುತೇ ॥ 23 ॥

ಮುನೀನಾಂ ಚೇತೋಭಿಃ ಪ್ರಮೃದಿತಕಷಾಯೈರಪಿ ಮನಾ-
-ಗಶಕ್ಯಂ ಸಂಸ್ಪ್ರಷ್ಟುಂ ಚಕಿತಚಕಿತೈರಂಬ ಸತತಮ್ ।
ಶ್ರುತೀನಾಂ ಮೂರ್ಧಾನಃ ಪ್ರಕೃತಿಕಠಿನಾಃ ಕೋಮಲತರೇ
ಕಥಂ ತೇ ವಿಂದಂತೇ ಪದಕಿಸಲಯೇ ಪಾರ್ವತಿ ಪದಮ್ ॥ 24 ॥

ತಟಿದ್ವಲ್ಲೀಂ ನಿತ್ಯಾಮಮೃತಸರಿತಂ ಪಾರರಹಿತಾಂ
ಮಲೋತ್ತೀರ್ಣಾಂ ಜ್ಯೋತ್ಸ್ನಾಂ ಪ್ರಕೃತಿಮಗುಣಗ್ರಂಥಿಗಹನಾಮ್ ।
ಗಿರಾಂ ದೂರಾಂ ವಿದ್ಯಾಮವಿನತಕುಚಾಂ ವಿಶ್ವಜನನೀ-
-ಮಪರ್ಯಂತಾಂ ಲಕ್ಷ್ಮೀಮಭಿದಧತಿ ಸಂತೋ ಭಗವತೀಮ್ ॥ 25 ॥

ಶರೀರಂ ಕ್ಷಿತ್ಯಂಭಃ ಪ್ರಭೃತಿರಚಿತಂ ಕೇವಲಮಚಿತ್
ಸುಖಂ ದುಃಖಂ ಚಾಯಂ ಕಲಯತಿ ಪುಮಾಂಶ್ಚೇತನ ಇತಿ ।
ಸ್ಫುಟಂ ಜಾನಾನೋಽಪಿ ಪ್ರಭವತಿ ನ ದೇಹೀ ರಹಯಿತುಂ
ಶರೀರಾಹಂಕಾರಂ ತವ ಸಮಯಬಾಹ್ಯೋ ಗಿರಿಸುತೇ ॥ 26 ॥

ಪಿತಾ ಮಾತಾ ಭ್ರಾತಾ ಸುಹೃದನುಚರಃ ಸದ್ಮ ಗೃಹಿಣೀ
ವಪುಃ ಕ್ಷೇತ್ರಂ ಮಿತ್ರಂ ಧನಮಪಿ ಯದಾ ಮಾಂ ವಿಜಹತಿ ।
ತದಾ ಮೇ ಭಿಂದಾನಾ ಸಪದಿ ಭಯಮೋಹಾಂಧತಮಸಂ
ಮಹಾಜ್ಯೋತ್ಸ್ನೇ ಮಾತರ್ಭವ ಕರುಣಯಾ ಸನ್ನಿಧಿಕರೀ ॥ 27 ॥

ಸುತಾ ದಕ್ಷಸ್ಯಾದೌ ಕಿಲ ಸಕಲಮಾತಸ್ತ್ವಮುದಭೂಃ
ಸದೋಷಂ ತಂ ಹಿತ್ವಾ ತದನು ಗಿರಿರಾಜಸ್ಯ ದುಹಿತಾ ।
ಅನಾದ್ಯಂತಾ ಶಂಭೋರಪೃಥಗಪಿ ಶಕ್ತಿರ್ಭಗವತೀ
ವಿವಾಹಾಜ್ಜಾಯಾಸೀತ್ಯಹಹ ಚರಿತಂ ವೇತ್ತಿ ತವ ಕಃ ॥ 28 ॥

ಕಣಾಸ್ತ್ವದ್ದೀಪ್ತೀನಾಂ ರವಿಶಶಿಕೃಶಾನುಪ್ರಭೃತಯಃ
ಪರಂ ಬ್ರಹ್ಮ ಕ್ಷುದ್ರಂ ತವ ನಿಯತಮಾನಂದಕಣಿಕಾ ।
ಶಿವಾದಿ ಕ್ಷಿತ್ಯಂತಂ ತ್ರಿವಲಯತನೋಃ ಸರ್ವಮುದರೇ
ತವಾಸ್ತೇ ಭಕ್ತಸ್ಯ ಸ್ಫುರಸಿ ಹೃದಿ ಚಿತ್ರಂ ಭಗವತಿ ॥ 29 ॥

ಪುರಃ ಪಶ್ಚಾದಂತರ್ಬಹಿರಪರಿಮೇಯಂ ಪರಿಮಿತಂ
ಪರಂ ಸ್ಥೂಲಂ ಸೂಕ್ಷ್ಮಂ ಸಕಲಮಕುಲಂ ಗುಹ್ಯಮಗುಹಮ್ ।
ದವೀಯೋ ನೇದೀಯಃ ಸದಸದಿತಿ ವಿಶ್ವಂ ಭಗವತೀ
ಸದಾ ಪಶ್ಯಂತ್ಯಾಖ್ಯಾಂ ವಹಸಿ ಭುವನಕ್ಷೋಭಜನನೀಮ್ ॥ 30 ॥

ಪ್ರವಿಶ್ಯ ತ್ವನ್ಮಾರ್ಗಂ ಸಹಜದಯಯಾ ದೇಶಿಕದೃಶಾ
ಷಡಧ್ವಧ್ವಾಂತೌಘಚ್ಛಿದುರಗಣನಾತೀತಕರುಣಾಮ್ ।
ಪರಾಮಾಜ್ಞಾಕಾರಾಂ ಸಪದಿ ಶಿವಯಂತೀಂ ಶಿವತನುಂ
ಸ್ವಮಾತ್ಮಾನಂ ಧನ್ಯಾಶ್ಚಿರಮುಪಲಭಂತೇ ಭಗವತೀಮ್ ॥ 31 ॥

ಮಯೂಖಾಃ ಪೂಷ್ಣೀವ ಜ್ವಲನ ಇವ ತದ್ದೀಪ್ತಿಕಣಿಕಾಃ
ಪಯೋಧೌ ಕಲ್ಲೋಲಾಃ ಪ್ರತಿಹತಮಹಿಮ್ನೀವ ಪೃಷತಃ ।
ಉದೇತ್ಯೋದೇತ್ಯಾಂಬ ತ್ವಯಿ ಸಹ ನಿಜೈಃ ಸಾತ್ತ್ವಿಕಗುಣೈ-
-ರ್ಭಜಂತೇ ತತ್ತ್ವೌಘಾಃ ಪ್ರಶಮಮನುಕಲ್ಪಂ ಪರವಶಾಃ ॥ 32 ॥

ವಿಧುರ್ವಿಷ್ಣುರ್ಬ್ರಹ್ಮಾ ಪ್ರಕೃತಿರಣುರಾತ್ಮಾ ದಿನಕರಃ
ಸ್ವಭಾವೋ ಜೈನೇಂದ್ರಃ ಸುಗತಮುನಿರಾಕಾಶಮಲಿನಃ ।
ಶಿವಃ ಶಕ್ತಿಶ್ಚೇತಿ ಶ್ರುತಿವಿಷಯತಾಂ ತಾಮುಪಗತಾಂ
ವಿಕಲ್ಪೈರೇಭಿಸ್ತ್ವಾಮಭಿದಧತಿ ಸಂತೋ ಭಗವತೀಮ್ ॥ 33 ॥

ಶಿವಸ್ತ್ವಂ ಶಕ್ತಿಸ್ತ್ವಂ ತ್ವಮಸಿ ಸಮಯಾ ತ್ವಂ ಸಮಯಿನೀ
ತ್ವಮಾತ್ಮಾ ತ್ವಂ ದೀಕ್ಷಾ ತ್ವಮಯಮಣಿಮಾದಿರ್ಗುಣಗಣಃ ।
ಅವಿದ್ಯಾ ತ್ವಂ ವಿದ್ಯಾ ತ್ವಮಸಿ ನಿಖಿಲಂ ತ್ವಂ ಕಿಮಪರಂ
ಪೃಥಕ್ತತ್ತ್ವಂ ತ್ವತ್ತೋ ಭಗವತಿ ನ ವೀಕ್ಷಾಮಹ ಇಮೇ ॥ 34 ॥

ತ್ವಯಾಸೌ ಜಾನೀತೇ ರಚಯತಿ ಭವತ್ಯೈವ ಸತತಂ
ತ್ವಯೈವೇಚ್ಛತ್ಯಂಬ ತ್ವಮಸಿ ನಿಖಿಲಾ ಯಸ್ಯ ತನವಃ ।
ಜಗತ್ಸಾಮ್ಯಂ ಶಂಭೋರ್ವಹಸಿ ಪರಮವ್ಯೋಮವಪುಷಃ
ತಥಾಪ್ಯರ್ಧಂ ಭೂತ್ವಾ ವಿಹರಸಿ ಶಿವಸ್ಯೇತಿ ಕಿಮಿದಮ್ ॥ 35 ॥

ಅಸಂಖ್ಯೈಃ ಪ್ರಾಚೀನೈರ್ಜನನಿ ಜನನೈಃ ಕರ್ಮವಿಲಯಾ-
-ತ್ಸಕೃಜ್ಜನ್ಮನ್ಯಂತೇ ಗುರುವಪುಷಮಾಸಾದ್ಯ ಗಿರಿಶಮ್ ।
ಅವಾಪ್ಯಾಜ್ಞಾಂ ಶೈವೀಂ ಶಿವತನುಮಪಿ ತ್ವಾಂ ವಿದಿತವಾ-
-ನ್ನಯೇಯಂ ತ್ವತ್ಪೂಜಾಸ್ತುತಿವಿರಚನೇನೈವ ದಿವಸಾನ್ ॥ 36 ॥

ಯತ್ಷಟ್ಪತ್ರಂ ಕಮಲಮುದಿತಂ ತಸ್ಯ ಯಾ ಕರ್ಣಿಕಾಖ್ಯಾ
ಯೋನಿಸ್ತಸ್ಯಾಃ ಪ್ರಥಿತಮುದರೇ ಯತ್ತದೋಂಕಾರಪೀಠಮ್ ।
ತಸ್ಯಾಪ್ಯಂತಃ ಕುಚಭರನತಾಂ ಕುಂಡಲೀತಿ ಪ್ರಸಿದ್ಧಾಂ
ಶ್ಯಾಮಾಕಾರಾಂ ಸಕಲಜನನೀಂ ಸಂತತಂ ಭಾವಯಾಮಿ ॥ 37 ॥

ಭುವಿ ಪಯಸಿ ಕೃಶಾನೌ ಮಾರುತೇ ಖೇ ಶಶಾಂಕೇ
ಸವಿತರಿ ಯಜಮಾನೇಽಪ್ಯಷ್ಟಧಾ ಶಕ್ತಿರೇಕಾ ।
ವಹಸಿ ಕುಚಭರಾಭ್ಯಾಂ ಯಾವನಮ್ರಾಪಿ ವಿಶ್ವಂ
ಸಕಲಜನನಿ ಸಾ ತ್ವಂ ಪಾಹಿ ಮಾಮಿತ್ಯವಾಚ್ಯಮ್ ॥ 38 ॥

ಇತಿ ಶ್ರೀಕಾಳಿದಾಸ ವಿರಚಿತ ಪಂಚಸ್ತವ್ಯಾಂ ಪಂಚಮಃ ಸಕಲಜನನೀಸ್ತವಃ ।