ನಾರಾಯಣೀಯಂ ದಶಕ 8 – ಪ್ರಲಯವರ್ಣನಂ

ಏವಂ ತಾವತ್ ಪ್ರಾಕೃತಪ್ರಕ್ಷಯಾಂತೇ
ಬ್ರಾಹ್ಮೇ ಕಲ್ಪೇ ಹ್ಯಾದಿಮೇ ಲಬ್ಧಜನ್ಮಾ ।
ಬ್ರಹ್ಮಾ ಭೂಯಸ್ತ್ವತ್ತ ಏವಾಪ್ಯ ವೇದಾನ್
ಸೃಷ್ಟಿಂ ಚಕ್ರೇ ಪೂರ್ವಕಲ್ಪೋಪಮಾನಾಮ್ ॥1॥

ಸೋಽಯಂ ಚತುರ್ಯುಗಸಹಸ್ರಮಿತಾನ್ಯಹಾನಿ
ತಾವನ್ಮಿತಾಶ್ಚ ರಜನೀರ್ಬಹುಶೋ ನಿನಾಯ ।
ನಿದ್ರಾತ್ಯಸೌ ತ್ವಯಿ ನಿಲೀಯ ಸಮಂ ಸ್ವಸೃಷ್ಟೈ-
ರ್ನೈಮಿತ್ತಿಕಪ್ರಲಯಮಾಹುರತೋಽಸ್ಯ ರಾತ್ರಿಮ್ ॥2॥

ಅಸ್ಮಾದೃಶಾಂ ಪುನರಹರ್ಮುಖಕೃತ್ಯತುಲ್ಯಾಂ
ಸೃಷ್ಟಿಂ ಕರೋತ್ಯನುದಿನಂ ಸ ಭವತ್ಪ್ರಸಾದಾತ್ ।
ಪ್ರಾಗ್ಬ್ರಾಹ್ಮಕಲ್ಪಜನುಷಾಂ ಚ ಪರಾಯುಷಾಂ ತು
ಸುಪ್ತಪ್ರಬೋಧನಸಮಾಸ್ತಿ ತದಾಽಪಿ ಸೃಷ್ಟಿಃ ॥3॥

ಪಂಚಾಶದಬ್ದಮಧುನಾ ಸ್ವವಯೋರ್ಧರೂಪ-
ಮೇಕಂ ಪರಾರ್ಧಮತಿವೃತ್ಯ ಹಿ ವರ್ತತೇಽಸೌ ।
ತತ್ರಾಂತ್ಯರಾತ್ರಿಜನಿತಾನ್ ಕಥಯಾಮಿ ಭೂಮನ್
ಪಶ್ಚಾದ್ದಿನಾವತರಣೇ ಚ ಭವದ್ವಿಲಾಸಾನ್ ॥4॥

ದಿನಾವಸಾನೇಽಥ ಸರೋಜಯೋನಿಃ
ಸುಷುಪ್ತಿಕಾಮಸ್ತ್ವಯಿ ಸನ್ನಿಲಿಲ್ಯೇ ।
ಜಗಂತಿ ಚ ತ್ವಜ್ಜಠರಂ ಸಮೀಯು-
ಸ್ತದೇದಮೇಕಾರ್ಣವಮಾಸ ವಿಶ್ವಮ್ ॥5॥

ತವೈವ ವೇಷೇ ಫಣಿರಾಜಿ ಶೇಷೇ
ಜಲೈಕಶೇಷೇ ಭುವನೇ ಸ್ಮ ಶೇಷೇ ।
ಆನಂದಸಾಂದ್ರಾನುಭವಸ್ವರೂಪಃ
ಸ್ವಯೋಗನಿದ್ರಾಪರಿಮುದ್ರಿತಾತ್ಮಾ ॥6॥

ಕಾಲಾಖ್ಯಶಕ್ತಿಂ ಪ್ರಲಯಾವಸಾನೇ
ಪ್ರಬೋಧಯೇತ್ಯಾದಿಶತಾ ಕಿಲಾದೌ ।
ತ್ವಯಾ ಪ್ರಸುಪ್ತಂ ಪರಿಸುಪ್ತಶಕ್ತಿ-
ವ್ರಜೇನ ತತ್ರಾಖಿಲಜೀವಧಾಮ್ನಾ ॥7॥

ಚತುರ್ಯುಗಾಣಾಂ ಚ ಸಹಸ್ರಮೇವಂ
ತ್ವಯಿ ಪ್ರಸುಪ್ತೇ ಪುನರದ್ವಿತೀಯೇ ।
ಕಾಲಾಖ್ಯಶಕ್ತಿಃ ಪ್ರಥಮಪ್ರಬುದ್ಧಾ
ಪ್ರಾಬೋಧಯತ್ತ್ವಾಂ ಕಿಲ ವಿಶ್ವನಾಥ ॥8॥

ವಿಬುಧ್ಯ ಚ ತ್ವಂ ಜಲಗರ್ಭಶಾಯಿನ್
ವಿಲೋಕ್ಯ ಲೋಕಾನಖಿಲಾನ್ ಪ್ರಲೀನಾನ್ ।
ತೇಷ್ವೇವ ಸೂಕ್ಷ್ಮಾತ್ಮತಯಾ ನಿಜಾಂತಃ –
ಸ್ಥಿತೇಷು ವಿಶ್ವೇಷು ದದಾಥ ದೃಷ್ಟಿಮ್ ॥9॥

ತತಸ್ತ್ವದೀಯಾದಯಿ ನಾಭಿರಂಧ್ರಾ-
ದುದಂಚಿತಂ ಕಿಂಚನ ದಿವ್ಯಪದ್ಮಮ್ ।
ನಿಲೀನನಿಶ್ಶೇಷಪದಾರ್ಥಮಾಲಾ-
ಸಂಕ್ಷೇಪರೂಪಂ ಮುಕುಲಾಯಮಾನಮ್ ॥10॥

ತದೇತದಂಭೋರುಹಕುಡ್ಮಲಂ ತೇ
ಕಲೇವರಾತ್ ತೋಯಪಥೇ ಪ್ರರೂಢಮ್ ।
ಬಹಿರ್ನಿರೀತಂ ಪರಿತಃ ಸ್ಫುರದ್ಭಿಃ
ಸ್ವಧಾಮಭಿರ್ಧ್ವಾಂತಮಲಂ ನ್ಯಕೃಂತತ್ ॥11॥

ಸಂಫುಲ್ಲಪತ್ರೇ ನಿತರಾಂ ವಿಚಿತ್ರೇ
ತಸ್ಮಿನ್ ಭವದ್ವೀರ್ಯಧೃತೇ ಸರೋಜೇ ।
ಸ ಪದ್ಮಜನ್ಮಾ ವಿಧಿರಾವಿರಾಸೀತ್
ಸ್ವಯಂಪ್ರಬುದ್ಧಾಖಿಲವೇದರಾಶಿಃ ॥12॥

ಅಸ್ಮಿನ್ ಪರಾತ್ಮನ್ ನನು ಪಾದ್ಮಕಲ್ಪೇ
ತ್ವಮಿತ್ಥಮುತ್ಥಾಪಿತಪದ್ಮಯೋನಿಃ ।
ಅನಂತಭೂಮಾ ಮಮ ರೋಗರಾಶಿಂ
ನಿರುಂಧಿ ವಾತಾಲಯವಾಸ ವಿಷ್ಣೋ ॥13॥