ನಾರಾಯಣೀಯಂ ದಶಕ 60 – ಗೋಪೀವಸ್ತ್ರಾಪಹರಣಂ

ಮದನಾತುರಚೇತಸೋಽನ್ವಹಂ ಭವದಂಘ್ರಿದ್ವಯದಾಸ್ಯಕಾಮ್ಯಯಾ ।
ಯಮುನಾತಟಸೀಮ್ನಿ ಸೈಕತೀಂ ತರಲಾಕ್ಷ್ಯೋ ಗಿರಿಜಾಂ ಸಮಾರ್ಚಿಚನ್ ॥1॥

ತವ ನಾಮಕಥಾರತಾಃ ಸಮಂ ಸುದೃಶಃ ಪ್ರಾತರುಪಾಗತಾ ನದೀಮ್ ।
ಉಪಹಾರಶತೈರಪೂಜಯನ್ ದಯಿತೋ ನಂದಸುತೋ ಭವೇದಿತಿ ॥2॥

ಇತಿ ಮಾಸಮುಪಾಹಿತವ್ರತಾಸ್ತರಲಾಕ್ಷೀರಭಿವೀಕ್ಷ್ಯ ತಾ ಭವಾನ್ ।
ಕರುಣಾಮೃದುಲೋ ನದೀತಟಂ ಸಮಯಾಸೀತ್ತದನುಗ್ರಹೇಚ್ಛಯಾ ॥3॥

ನಿಯಮಾವಸಿತೌ ನಿಜಾಂಬರಂ ತಟಸೀಮನ್ಯವಮುಚ್ಯ ತಾಸ್ತದಾ ।
ಯಮುನಾಜಲಖೇಲನಾಕುಲಾಃ ಪುರತಸ್ತ್ವಾಮವಲೋಕ್ಯ ಲಜ್ಜಿತಾಃ ॥4॥

ತ್ರಪಯಾ ನಮಿತಾನನಾಸ್ವಥೋ ವನಿತಾಸ್ವಂಬರಜಾಲಮಂತಿಕೇ ।
ನಿಹಿತಂ ಪರಿಗೃಹ್ಯ ಭೂರುಹೋ ವಿಟಪಂ ತ್ವಂ ತರಸಾಽಧಿರೂಢವಾನ್ ॥5॥

ಇಹ ತಾವದುಪೇತ್ಯ ನೀಯತಾಂ ವಸನಂ ವಃ ಸುದೃಶೋ ಯಥಾಯಥಮ್ ।
ಇತಿ ನರ್ಮಮೃದುಸ್ಮಿತೇ ತ್ವಯಿ ಬ್ರುವತಿ ವ್ಯಾಮುಮುಹೇ ವಧೂಜನೈಃ ॥6॥

ಅಯಿ ಜೀವ ಚಿರಂ ಕಿಶೋರ ನಸ್ತವ ದಾಸೀರವಶೀಕರೋಷಿ ಕಿಮ್ ।
ಪ್ರದಿಶಾಂಬರಮಂಬುಜೇಕ್ಷಣೇತ್ಯುದಿತಸ್ತ್ವಂ ಸ್ಮಿತಮೇವ ದತ್ತವಾನ್ ॥7॥

ಅಧಿರುಹ್ಯ ತಟಂ ಕೃತಾಂಜಲೀಃ ಪರಿಶುದ್ಧಾಃ ಸ್ವಗತೀರ್ನಿರೀಕ್ಷ್ಯ ತಾಃ ।
ವಸನಾನ್ಯಖಿಲಾನ್ಯನುಗ್ರಹಂ ಪುನರೇವಂ ಗಿರಮಪ್ಯದಾ ಮುದಾ ॥8॥

ವಿದಿತಂ ನನು ವೋ ಮನೀಷಿತಂ ವದಿತಾರಸ್ತ್ವಿಹ ಯೋಗ್ಯಮುತ್ತರಮ್ ।
ಯಮುನಾಪುಲಿನೇ ಸಚಂದ್ರಿಕಾಃ ಕ್ಷಣದಾ ಇತ್ಯಬಲಾಸ್ತ್ವಮೂಚಿವಾನ್ ॥9॥

ಉಪಕರ್ಣ್ಯ ಭವನ್ಮುಖಚ್ಯುತಂ ಮಧುನಿಷ್ಯಂದಿ ವಚೋ ಮೃಗೀದೃಶಃ ।
ಪ್ರಣಯಾದಯಿ ವೀಕ್ಷ್ಯ ವೀಕ್ಷ್ಯ ತೇ ವದನಾಬ್ಜಂ ಶನಕೈರ್ಗೃಹಂ ಗತಾಃ ॥10॥

ಇತಿ ನನ್ವನುಗೃಹ್ಯ ವಲ್ಲವೀರ್ವಿಪಿನಾಂತೇಷು ಪುರೇವ ಸಂಚರನ್ ।
ಕರುಣಾಶಿಶಿರೋ ಹರೇ ಹರ ತ್ವರಯಾ ಮೇ ಸಕಲಾಮಯಾವಲಿಮ್ ॥11॥