ನಾರಾಯಣೀಯಂ ದಶಕ 43 – ತೃಣಾವರ್ತವಧಂ

ತ್ವಾಮೇಕದಾ ಗುರುಮರುತ್ಪುರನಾಥ ವೋಢುಂ
ಗಾಢಾಧಿರೂಢಗರಿಮಾಣಮಪಾರಯಂತೀ ।
ಮಾತಾ ನಿಧಾಯ ಶಯನೇ ಕಿಮಿದಂ ಬತೇತಿ
ಧ್ಯಾಯಂತ್ಯಚೇಷ್ಟತ ಗೃಹೇಷು ನಿವಿಷ್ಟಶಂಕಾ ॥1॥

ತಾವದ್ವಿದೂರಮುಪಕರ್ಣಿತಘೋರಘೋಷ-
ವ್ಯಾಜೃಂಭಿಪಾಂಸುಪಟಲೀಪರಿಪೂರಿತಾಶಃ ।
ವಾತ್ಯಾವಪುಸ್ಸ ಕಿಲ ದೈತ್ಯವರಸ್ತೃಣಾವ-
ರ್ತಾಖ್ಯೋ ಜಹಾರ ಜನಮಾನಸಹಾರಿಣಂ ತ್ವಾಮ್ ॥2॥

ಉದ್ದಾಮಪಾಂಸುತಿಮಿರಾಹತದೃಷ್ಟಿಪಾತೇ
ದ್ರಷ್ಟುಂ ಕಿಮಪ್ಯಕುಶಲೇ ಪಶುಪಾಲಲೋಕೇ ।
ಹಾ ಬಾಲಕಸ್ಯ ಕಿಮಿತಿ ತ್ವದುಪಾಂತಮಾಪ್ತಾ
ಮಾತಾ ಭವಂತಮವಿಲೋಕ್ಯ ಭೃಶಂ ರುರೋದ ॥3॥

ತಾವತ್ ಸ ದಾನವವರೋಽಪಿ ಚ ದೀನಮೂರ್ತಿ-
ರ್ಭಾವತ್ಕಭಾರಪರಿಧಾರಣಲೂನವೇಗಃ ।
ಸಂಕೋಚಮಾಪ ತದನು ಕ್ಷತಪಾಂಸುಘೋಷೇ
ಘೋಷೇ ವ್ಯತಾಯತ ಭವಜ್ಜನನೀನಿನಾದಃ ॥4॥

ರೋದೋಪಕರ್ಣನವಶಾದುಪಗಮ್ಯ ಗೇಹಂ
ಕ್ರಂದತ್ಸು ನಂದಮುಖಗೋಪಕುಲೇಷು ದೀನಃ ।
ತ್ವಾಂ ದಾನವಸ್ತ್ವಖಿಲಮುಕ್ತಿಕರಂ ಮುಮುಕ್ಷು-
ಸ್ತ್ವಯ್ಯಪ್ರಮುಂಚತಿ ಪಪಾತ ವಿಯತ್ಪ್ರದೇಶಾತ್ ॥5॥

ರೋದಾಕುಲಾಸ್ತದನು ಗೋಪಗಣಾ ಬಹಿಷ್ಠ-
ಪಾಷಾಣಪೃಷ್ಠಭುವಿ ದೇಹಮತಿಸ್ಥವಿಷ್ಠಮ್ ।
ಪ್ರೈಕ್ಷಂತ ಹಂತ ನಿಪತಂತಮಮುಷ್ಯ ವಕ್ಷ-
ಸ್ಯಕ್ಷೀಣಮೇವ ಚ ಭವಂತಮಲಂ ಹಸಂತಮ್ ॥6॥

ಗ್ರಾವಪ್ರಪಾತಪರಿಪಿಷ್ಟಗರಿಷ್ಠದೇಹ-
ಭ್ರಷ್ಟಾಸುದುಷ್ಟದನುಜೋಪರಿ ಧೃಷ್ಟಹಾಸಮ್ ।
ಆಘ್ನಾನಮಂಬುಜಕರೇಣ ಭವಂತಮೇತ್ಯ
ಗೋಪಾ ದಧುರ್ಗಿರಿವರಾದಿವ ನೀಲರತ್ನಮ್ ॥7॥

ಏಕೈಕಮಾಶು ಪರಿಗೃಹ್ಯ ನಿಕಾಮನಂದ-
ನ್ನಂದಾದಿಗೋಪಪರಿರಬ್ಧವಿಚುಂಬಿತಾಂಗಮ್ ।
ಆದಾತುಕಾಮಪರಿಶಂಕಿತಗೋಪನಾರೀ-
ಹಸ್ತಾಂಬುಜಪ್ರಪತಿತಂ ಪ್ರಣುಮೋ ಭವಂತಮ್ ॥8॥

ಭೂಯೋಽಪಿ ಕಿನ್ನು ಕೃಣುಮಃ ಪ್ರಣತಾರ್ತಿಹಾರೀ
ಗೋವಿಂದ ಏವ ಪರಿಪಾಲಯತಾತ್ ಸುತಂ ನಃ ।
ಇತ್ಯಾದಿ ಮಾತರಪಿತೃಪ್ರಮುಖೈಸ್ತದಾನೀಂ
ಸಂಪ್ರಾರ್ಥಿತಸ್ತ್ವದವನಾಯ ವಿಭೋ ತ್ವಮೇವ ॥9॥

ವಾತಾತ್ಮಕಂ ದನುಜಮೇವಮಯಿ ಪ್ರಧೂನ್ವನ್
ವಾತೋದ್ಭವಾನ್ ಮಮ ಗದಾನ್ ಕಿಮು ನೋ ಧುನೋಷಿ ।
ಕಿಂ ವಾ ಕರೋಮಿ ಪುನರಪ್ಯನಿಲಾಲಯೇಶ
ನಿಶ್ಶೇಷರೋಗಶಮನಂ ಮುಹುರರ್ಥಯೇ ತ್ವಾಮ್ ॥10॥