ನಾರಾಯಣೀಯಂ ದಶಕ 21 – ನವ ವರ್ಷಾಃ ತಥಾ ಸಪ್ತದ್ವೀಪಾಃ

ಮಧ್ಯೋದ್ಭವೇ ಭುವ ಇಲಾವೃತನಾಮ್ನಿ ವರ್ಷೇ
ಗೌರೀಪ್ರಧಾನವನಿತಾಜನಮಾತ್ರಭಾಜಿ ।
ಶರ್ವೇಣ ಮಂತ್ರನುತಿಭಿಃ ಸಮುಪಾಸ್ಯಮಾನಂ
ಸಂಕರ್ಷಣಾತ್ಮಕಮಧೀಶ್ವರ ಸಂಶ್ರಯೇ ತ್ವಾಮ್ ॥1॥

ಭದ್ರಾಶ್ವನಾಮಕ ಇಲಾವೃತಪೂರ್ವವರ್ಷೇ
ಭದ್ರಶ್ರವೋಭಿಃ ಋಷಿಭಿಃ ಪರಿಣೂಯಮಾನಮ್ ।
ಕಲ್ಪಾಂತಗೂಢನಿಗಮೋದ್ಧರಣಪ್ರವೀಣಂ
ಧ್ಯಾಯಾಮಿ ದೇವ ಹಯಶೀರ್ಷತನುಂ ಭವಂತಮ್ ॥2॥

ಧ್ಯಾಯಾಮಿ ದಕ್ಷಿಣಗತೇ ಹರಿವರ್ಷವರ್ಷೇ
ಪ್ರಹ್ಲಾದಮುಖ್ಯಪುರುಷೈಃ ಪರಿಷೇವ್ಯಮಾಣಮ್ ।
ಉತ್ತುಂಗಶಾಂತಧವಲಾಕೃತಿಮೇಕಶುದ್ಧ-
ಜ್ಞಾನಪ್ರದಂ ನರಹರಿಂ ಭಗವನ್ ಭವಂತಮ್ ॥3॥

ವರ್ಷೇ ಪ್ರತೀಚಿ ಲಲಿತಾತ್ಮನಿ ಕೇತುಮಾಲೇ
ಲೀಲಾವಿಶೇಷಲಲಿತಸ್ಮಿತಶೋಭನಾಂಗಮ್ ।
ಲಕ್ಷ್ಮ್ಯಾ ಪ್ರಜಾಪತಿಸುತೈಶ್ಚ ನಿಷೇವ್ಯಮಾಣಂ
ತಸ್ಯಾಃ ಪ್ರಿಯಾಯ ಧೃತಕಾಮತನುಂ ಭಜೇ ತ್ವಾಮ್ ॥4॥

ರಮ್ಯೇ ಹ್ಯುದೀಚಿ ಖಲು ರಮ್ಯಕನಾಮ್ನಿ ವರ್ಷೇ
ತದ್ವರ್ಷನಾಥಮನುವರ್ಯಸಪರ್ಯಮಾಣಮ್ ।
ಭಕ್ತೈಕವತ್ಸಲಮಮತ್ಸರಹೃತ್ಸು ಭಾಂತಂ
ಮತ್ಸ್ಯಾಕೃತಿಂ ಭುವನನಾಥ ಭಜೇ ಭವಂತಮ್ ॥5॥

ವರ್ಷಂ ಹಿರಣ್ಮಯಸಮಾಹ್ವಯಮೌತ್ತರಾಹ-
ಮಾಸೀನಮದ್ರಿಧೃತಿಕರ್ಮಠಕಾಮಠಾಂಗಮ್ ।
ಸಂಸೇವತೇ ಪಿತೃಗಣಪ್ರವರೋಽರ್ಯಮಾ ಯಂ
ತಂ ತ್ವಾಂ ಭಜಾಮಿ ಭಗವನ್ ಪರಚಿನ್ಮಯಾತ್ಮನ್ ॥6॥

ಕಿಂಚೋತ್ತರೇಷು ಕುರುಷು ಪ್ರಿಯಯಾ ಧರಣ್ಯಾ
ಸಂಸೇವಿತೋ ಮಹಿತಮಂತ್ರನುತಿಪ್ರಭೇದೈಃ ।
ದಂಷ್ಟ್ರಾಗ್ರಘೃಷ್ಟಘನಪೃಷ್ಠಗರಿಷ್ಠವರ್ಷ್ಮಾ
ತ್ವಂ ಪಾಹಿ ಬಿಜ್ಞನುತ ಯಜ್ಞವರಾಹಮೂರ್ತೇ ॥7॥

ಯಾಮ್ಯಾಂ ದಿಶಂ ಭಜತಿ ಕಿಂಪುರುಷಾಖ್ಯವರ್ಷೇ
ಸಂಸೇವಿತೋ ಹನುಮತಾ ದೃಢಭಕ್ತಿಭಾಜಾ ।
ಸೀತಾಭಿರಾಮಪರಮಾದ್ಭುತರೂಪಶಾಲೀ
ರಾಮಾತ್ಮಕಃ ಪರಿಲಸನ್ ಪರಿಪಾಹಿ ವಿಷ್ಣೋ ॥8॥

ಶ್ರೀನಾರದೇನ ಸಹ ಭಾರತಖಂಡಮುಖ್ಯೈ-
ಸ್ತ್ವಂ ಸಾಂಖ್ಯಯೋಗನುತಿಭಿಃ ಸಮುಪಾಸ್ಯಮಾನಃ ।
ಆಕಲ್ಪಕಾಲಮಿಹ ಸಾಧುಜನಾಭಿರಕ್ಷೀ
ನಾರಾಯಣೋ ನರಸಖಃ ಪರಿಪಾಹಿ ಭೂಮನ್ ॥9॥

ಪ್ಲಾಕ್ಷೇಽರ್ಕರೂಪಮಯಿ ಶಾಲ್ಮಲ ಇಂದುರೂಪಂ
ದ್ವೀಪೇ ಭಜಂತಿ ಕುಶನಾಮನಿ ವಹ್ನಿರೂಪಮ್ ।
ಕ್ರೌಂಚೇಽಂಬುರೂಪಮಥ ವಾಯುಮಯಂ ಚ ಶಾಕೇ
ತ್ವಾಂ ಬ್ರಹ್ಮರೂಪಮಪಿ ಪುಷ್ಕರನಾಮ್ನಿ ಲೋಕಾಃ ॥10॥

ಸರ್ವೈರ್ಧ್ರುವಾದಿಭಿರುಡುಪ್ರಕರೈರ್ಗ್ರಹೈಶ್ಚ
ಪುಚ್ಛಾದಿಕೇಷ್ವವಯವೇಷ್ವಭಿಕಲ್ಪ್ಯಮಾನೈಃ ।
ತ್ವಂ ಶಿಂಶುಮಾರವಪುಷಾ ಮಹತಾಮುಪಾಸ್ಯಃ
ಸಂಧ್ಯಾಸು ರುಂಧಿ ನರಕಂ ಮಮ ಸಿಂಧುಶಾಯಿನ್ ॥11॥

ಪಾತಾಲಮೂಲಭುವಿ ಶೇಷತನುಂ ಭವಂತಂ
ಲೋಲೈಕಕುಂಡಲವಿರಾಜಿಸಹಸ್ರಶೀರ್ಷಮ್ ।
ನೀಲಾಂಬರಂ ಧೃತಹಲಂ ಭುಜಗಾಂಗನಾಭಿ-
ರ್ಜುಷ್ಟಂ ಭಜೇ ಹರ ಗದಾನ್ ಗುರುಗೇಹನಾಥ ॥12॥