ನಾರಾಯಣೀಯಂ ದಶಕ 20 – ಋಷಭಯೋಗೀಶ್ವರಚರಿತಂ

ಪ್ರಿಯವ್ರತಸ್ಯ ಪ್ರಿಯಪುತ್ರಭೂತಾ-
ದಾಗ್ನೀಧ್ರರಾಜಾದುದಿತೋ ಹಿ ನಾಭಿಃ ।
ತ್ವಾಂ ದೃಷ್ಟವಾನಿಷ್ಟದಮಿಷ್ಟಿಮಧ್ಯೇ
ತವೈವ ತುಷ್ಟ್ಯೈ ಕೃತಯಜ್ಞಕರ್ಮಾ ॥1॥

ಅಭಿಷ್ಟುತಸ್ತತ್ರ ಮುನೀಶ್ವರೈಸ್ತ್ವಂ
ರಾಜ್ಞಃ ಸ್ವತುಲ್ಯಂ ಸುತಮರ್ಥ್ಯಮಾನಃ ।
ಸ್ವಯಂ ಜನಿಷ್ಯೇಽಹಮಿತಿ ಬ್ರುವಾಣ-
ಸ್ತಿರೋದಧಾ ಬರ್ಹಿಷಿ ವಿಶ್ವಮೂರ್ತೇ ॥2॥

ನಾಭಿಪ್ರಿಯಾಯಾಮಥ ಮೇರುದೇವ್ಯಾಂ
ತ್ವಮಂಶತೋಽಭೂಃ ೠಷಭಾಭಿಧಾನಃ ।
ಅಲೋಕಸಾಮಾನ್ಯಗುಣಪ್ರಭಾವ-
ಪ್ರಭಾವಿತಾಶೇಷಜನಪ್ರಮೋದಃ ॥3॥

ತ್ವಯಿ ತ್ರಿಲೋಕೀಭೃತಿ ರಾಜ್ಯಭಾರಂ
ನಿಧಾಯ ನಾಭಿಃ ಸಹ ಮೇರುದೇವ್ಯಾ ।
ತಪೋವನಂ ಪ್ರಾಪ್ಯ ಭವನ್ನಿಷೇವೀ
ಗತಃ ಕಿಲಾನಂದಪದಂ ಪದಂ ತೇ ॥4॥

ಇಂದ್ರಸ್ತ್ವದುತ್ಕರ್ಷಕೃತಾದಮರ್ಷಾ-
ದ್ವವರ್ಷ ನಾಸ್ಮಿನ್ನಜನಾಭವರ್ಷೇ ।
ಯದಾ ತದಾ ತ್ವಂ ನಿಜಯೋಗಶಕ್ತ್ಯಾ
ಸ್ವವರ್ಷಮೇನದ್ವ್ಯದಧಾಃ ಸುವರ್ಷಮ್ ॥5॥

ಜಿತೇಂದ್ರದತ್ತಾಂ ಕಮನೀಂ ಜಯಂತೀ-
ಮಥೋದ್ವಹನ್ನಾತ್ಮರತಾಶಯೋಽಪಿ ।
ಅಜೀಜನಸ್ತತ್ರ ಶತಂ ತನೂಜಾ-
ನೇಷಾಂ ಕ್ಷಿತೀಶೋ ಭರತೋಽಗ್ರಜನ್ಮಾ ॥6॥

ನವಾಭವನ್ ಯೋಗಿವರಾ ನವಾನ್ಯೇ
ತ್ವಪಾಲಯನ್ ಭಾರತವರ್ಷಖಂಡಾನ್ ।
ಸೈಕಾ ತ್ವಶೀತಿಸ್ತವ ಶೇಷಪುತ್ರ-
ಸ್ತಪೋಬಲಾತ್ ಭೂಸುರಭೂಯಮೀಯುಃ ॥7॥

ಉಕ್ತ್ವಾ ಸುತೇಭ್ಯೋಽಥ ಮುನೀಂದ್ರಮಧ್ಯೇ
ವಿರಕ್ತಿಭಕ್ತ್ಯನ್ವಿತಮುಕ್ತಿಮಾರ್ಗಮ್ ।
ಸ್ವಯಂ ಗತಃ ಪಾರಮಹಂಸ್ಯವೃತ್ತಿ-
ಮಧಾ ಜಡೋನ್ಮತ್ತಪಿಶಾಚಚರ್ಯಾಮ್ ॥8॥

ಪರಾತ್ಮಭೂತೋಽಪಿ ಪರೋಪದೇಶಂ
ಕುರ್ವನ್ ಭವಾನ್ ಸರ್ವನಿರಸ್ಯಮಾನಃ ।
ವಿಕಾರಹೀನೋ ವಿಚಚಾರ ಕೃತ್ಸ್ನಾಂ
ಮಹೀಮಹೀನಾತ್ಮರಸಾಭಿಲೀನಃ ॥9॥

ಶಯುವ್ರತಂ ಗೋಮೃಗಕಾಕಚರ್ಯಾಂ
ಚಿರಂ ಚರನ್ನಾಪ್ಯ ಪರಂ ಸ್ವರೂಪಮ್ ।
ದವಾಹೃತಾಂಗಃ ಕುಟಕಾಚಲೇ ತ್ವಂ
ತಾಪಾನ್ ಮಮಾಪಾಕುರು ವಾತನಾಥ ॥10॥