8 – ಬ್ರಹ್ಮಾನನ್ದವಲ್ಲೀ – ಕೃಷ್ಣ ಯಜುರ್ವೇದ ತೈತ್ತಿರೀಯ ಆರಣ್ಯಕ ಪಾಠಃ – ಬ್ರಹ್ಮವಿದಾಪ್ನೋತಿ ಪರಂ

ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಆರಣ್ಯಕೇ ಅಷ್ಟಮಃ ಪ್ರಪಾಠಕಃ – ಬ್ರಹ್ಮಾನನ್ದವಲ್ಲೀ

ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ಬ್ರಹ್ಮಾನನ್ದ ವಲ್ಲೀ

ಅನುವಾಕಂ 13
ಸ॒ಹ ನಾ॑ ವವತು । ಸ॒ಹ ನೌ॑ ಭುನಕ್ತು । ಸ॒ಹ ವೀ॒ರ್ಯ॑-ಙ್ಕರವಾವಹೈ । ತೇ॒ಜ॒ಸ್ವಿನಾ॒ ವಧೀ॑ತಮಸ್ತು॒ ಮಾ ವಿ॑ದ್ವಿಷಾ॒ವಹೈ᳚ ॥ ಓಂ ಶಾನ್ತಿ॒-ಶ್ಶಾನ್ತಿ॒-ಶ್ಶಾನ್ತಿಃ॑ ॥ 25 ॥
(ಸ॒ಹ ಪಞ್ಚ॑) (ಅ. 13)

ಅನುವಾಕಂ 14
ಬ್ರ॒ಹ್ಮ॒ವಿದಾ᳚ಪ್ನೋತಿ॒ ಪರ᳚ಮ್ ॥
ತದೇ॒ಷಾ-ಽಭ್ಯು॑ಕ್ತಾ । ಸ॒ತ್ಯ-ಞ್ಜ್ಞಾ॒ನ-ಮ॑ನ॒ನ್ತ-ಮ್ಬ್ರಹ್ಮ॑ ।
ಯೋ ವೇದ॒ ನಿಹಿ॑ತ॒-ಙ್ಗುಹಾ॑ಯಾ-ಮ್ಪರ॒ಮೇ ವ್ಯೋ॑ಮನ್ನ್ ।
ಸೋ᳚-ಽಶ್ನುತೇ॒ ಸರ್ವಾ॒ನ್ ಕಾಮಾ᳚ನ್-ಥ್ಸ॒ಹ । ಬ್ರಹ್ಮ॑ಣಾ ವಿಪ॒ಶ್ಚಿತೇತಿ॑ ॥
ತಸ್ಮಾ॒ದ್ವಾ ಏ॒ತಸ್ಮಾ॑ದಾ॒ತ್ಮನ॑ ಆಕಾ॒ಶ-ಸ್ಸಮ್ಭೂ॑ತಃ । ಆ॒ಕಾ॒ಶಾ-ದ್ವಾ॒ಯುಃ । ವಾ॒ಯೋರ॒ಗ್ನಿಃ । ಅ॒ಗ್ನೇರಾಪಃ॑ । ಅ॒ದ್ಭ್ಯಃ ಪೃ॑ಥಿ॒ವೀ । ಪೃ॒ಥಿ॒ವ್ಯಾ ಓಷ॑ಧಯಃ ।
ಓಷ॑ಧೀ॒ಭ್ಯೋ-ಽನ್ನ᳚ಮ್ । ಅನ್ನಾ॒-ತ್ಪುರು॑ಷಃ ॥
ಸ ವಾ ಏಷ ಪುರುಷೋ-ಽನ್ನ॑ರಸ॒ಮಯಃ ॥ ತಸ್ಯೇದ॑ಮೇವ॒ ಶಿರಃ । ಅಯ-ನ್ದಖ್ಷಿ॑ಣಃ ಪ॒ಖ್ಷಃ । ಅಯಮುತ್ತ॑ರಃ ಪ॒ಖ್ಷಃ । ಅಯಮಾತ್ಮಾ᳚ । ಇದ-ಮ್ಪುಚ್ಛ॑-ಮ್ಪ್ರತಿ॒ಷ್ಠಾ ॥ ತದಪ್ಯೇಷ ಶ್ಲೋ॑ಕೋ ಭ॒ವತಿ ॥ 26 ॥

ಅನ್ನಾ॒ದ್ವೈ ಪ್ರ॒ಜಾಃ ಪ್ರ॒ಜಾಯ॑ನ್ತೇ । ಯಾಃ ಕಾಶ್ಚ॑ ಪೃಥಿ॒ವೀಗ್​ ಶ್ರಿ॒ತಾಃ । ಅಥೋ॒ ಅನ್ನೇ॑ನೈ॒ವ ಜೀ॑ವನ್ತಿ । ಅಥೈ॑ನ॒ದಪಿ॑ಯನ್ತ್ಯನ್ತ॒ತಃ । ಅನ್ನ॒ಗ್ಂ॒ ಹಿ ಭೂ॒ತಾನಾ॒-ಞ್ಜ್ಯೇಷ್ಠ᳚ಮ್ । ತಸ್ಮಾ᳚-ಥ್ಸರ್ವೌಷ॒ಧ ಮು॑ಚ್ಯತೇ ।
ಸರ್ವಂ॒-ವೈಁ ತೇ-ಽನ್ನ॑ಮಾಪ್ನುವನ್ತಿ । ಯೇ-ಽನ್ನ॒-ಮ್ಬ್ರಹ್ಮೋ॒ಪಾಸ॑ತೇ । ಅನ್ನ॒ಗ್ಂ॒ ಹಿ ಭೂ॒ತಾನಾ॒-ಞ್ಜ್ಯೇಷ್ಠ᳚ಮ್ । ತಸ್ಮಾ᳚-ಥ್ಸರ್ವೌಷ॒ಧ ಮು॑ಚ್ಯತೇ । ಅನ್ನಾ᳚-ದ್ಭೂ॒ತಾನಿ॒ ಜಾಯ॑ನ್ತೇ । ಜಾತಾ॒ನ್ಯನ್ನೇ॑ನ ವರ್ಧನ್ತೇ ।
ಅದ್ಯತೇ-ಽತ್ತಿ ಚ॑ ಭೂತಾ॒ನಿ । ತಸ್ಮಾದನ್ನ-ನ್ತದುಚ್ಯ॑ತ ಇ॒ತಿ ॥
ತಸ್ಮಾದ್ವಾ ಏತಸ್ಮಾ-ದನ್ನ॑ರಸ॒ಮಯಾತ್ ।
ಅನ್ಯೋ-ಽನ್ತರ ಆತ್ಮಾ᳚ ಪ್ರಾಣ॒ ಮಯಃ । ತೇನೈ॑ಷ ಪೂ॒ರ್ಣಃ ॥
ಸ ವಾ ಏಷ ಪುರುಷವಿ॑ಧ ಏ॒ವ । ತಸ್ಯ ಪುರು॑ಷ ವಿ॒ಧತಾಮ್ ।
ಅನ್ವಯ॑-ಮ್ಪುರುಷ॒ ವಿಧಃ । ತಸ್ಯ ಪ್ರಾಣ॑ ಏವ॒ ಶಿರಃ ॥
ವ್ಯಾನೋ ದಖ್ಷಿ॑ಣಃ ಪ॒ಖ್ಷಃ । ಅಪಾನ ಉತ್ತ॑ರಃ ಪ॒ಖ್ಷಃ ।
ಆಕಾ॑ಶ ಆ॒ತ್ಮಾ । ಪೃಥಿವೀ ಪುಚ್ಛ॑-ಮ್ಪ್ರತಿ॒ಷ್ಠಾ ॥
ತದಪ್ಯೇಷ ಶ್ಲೋ॑ಕೋ ಭ॒ವತಿ ॥ 27 ॥

ಪ್ರಾ॒ಣ-ನ್ದೇ॒ವಾ ಅನು॒ಪ್ರಾಣ॑ನ್ತಿ । ಮ॒ನು॒ಷ್ಯಾಃ᳚ ಪ॒ಶವ॑ಶ್ಚ॒ ಯೇ । ಪ್ರಾ॒ಣೋ ಹಿ ಭೂ॒ತಾನಾ॒ಮಾಯುಃ॑ । ತಸ್ಮಾ᳚-ಥ್ಸರ್ವಾಯು॒ಷ ಮು॑ಚ್ಯತೇ । ಸರ್ವ॑ಮೇ॒ವ ತ॒ ಆಯು॑ರ್ಯನ್ತಿ ।
ಯೇ ಪ್ರಾ॒ಣ-ಮ್ಬ್ರಹ್ಮೋ॒ಪಾಸ॑ತೇ ।
ಪ್ರಾಣೋ ಹಿ ಭೂತಾ॑ನಾಮಾ॒ಯುಃ । ತಸ್ಮಾ-ಥ್ಸರ್ವಾಯುಷ-ಮುಚ್ಯ॑ತ ಇ॒ತಿ ॥ ತಸ್ಯೈಷ ಏವ ಶಾರೀ॑ರ ಆ॒ತ್ಮಾ । ಯಃ॑ ಪೂರ್ವ॒ಸ್ಯ ॥
ತಸ್ಮಾದ್ವಾ ಏತಸ್ಮಾ᳚-ತ್ಪ್ರಾಣ॒ಮಯಾತ್ । ಅನ್ಯೋ-ಽನ್ತರ ಆತ್ಮಾ॑ ಮನೋ॒ಮಯಃ । ತೇನೈ॑ಷ ಪೂ॒ರ್ಣಃ ॥ ಸ ವಾ ಏಷ ಪುರುಷವಿ॑ಧ ಏ॒ವ । ತಸ್ಯ ಪುರು॑ಷವಿ॒ಧತಾಮ್ ।
ಅನ್ವಯ॑-ಮ್ಪುರುಷ॒ವಿಧಃ । ತಸ್ಯ ಯಜು॑ರೇವ॒ ಶಿರಃ । ಋಗ್ ದಖ್ಷಿ॑ಣಃ ಪ॒ಖ್ಷಃ । ಸಾಮೋತ್ತ॑ರಃ ಪ॒ಖ್ಷಃ । ಆದೇ॑ಶ ಆ॒ತ್ಮಾ । ಅಥರ್ವಾಙ್ಗಿರಸಃ ಪುಚ್ಛ॑-ಮ್ಪ್ರತಿ॒ಷ್ಠಾ ॥
ತದಪ್ಯೇಷ ಶ್ಲೋ॑ಕೋ ಭ॒ವತಿ ॥ 28 ॥

ಯತೋ॒ ವಾಚೋ॒ ನಿವ॑ರ್ತನ್ತೇ । ಅಪ್ರಾ᳚ಪ್ಯ॒ ಮನ॑ಸಾ ಸ॒ಹ । ಆನನ್ದ-ಮ್ಬ್ರಹ್ಮ॑ಣೋ ವಿ॒ದ್ವಾನ್ । ನ ಬಿಭೇತಿ ಕದಾ॑ಚನೇ॒ತಿ ॥ ತಸ್ಯೈಷ ಏವ ಶಾರೀ॑ರ ಆ॒ತ್ಮಾ । ಯಃ॑ ಪೂರ್ವ॒ಸ್ಯ ॥
ತಸ್ಮಾದ್ವಾ ಏತಸ್ಮಾ᳚-ನ್ಮನೋ॒ಮಯಾತ್ । ಅನ್ಯೋ-ಽನ್ತರ ಆತ್ಮಾ ವಿ॑ಜ್ಞಾನ॒ಮಯಃ । ತೇನೈ॑ಷ ಪೂ॒ರ್ಣಃ ॥ ಸ ವಾ ಏಷ ಪುರುಷವಿ॑ಧ ಏ॒ವ । ತಸ್ಯ ಪುರು॑ಷ ವಿ॒ಧತಾಮ್ ।
ಅನ್ವಯ॑-ಮ್ಪುರುಷ॒ ವಿಧಃ । ತಸ್ಯ ಶ್ರ॑ದ್ಧೈವ॒ ಶಿರಃ । ಋತ-ನ್ದಖ್ಷಿ॑ಣಃ ಪ॒ಖ್ಷಃ । ಸತ್ಯಮುತ್ತ॑ರಃ ಪ॒ಖ್ಷಃ । ಯೋ॑ಗ ಆ॒ತ್ಮಾ । ಮಹಃ ಪುಚ್ಛ॑-ಮ್ಪ್ರತಿ॒ಷ್ಠಾ ॥ ತದಪ್ಯೇಷ ಶ್ಲೋ॑ಕೋ ಭ॒ವತಿ ॥ 29 ॥

ವಿ॒ಜ್ಞಾನಂ॑-ಯಁ॒ಜ್ಞ-ನ್ತ॑ನುತೇ । ಕರ್ಮಾ॑ಣಿ ತನು॒ತೇ-ಽಪಿ॑ ಚ । ವಿ॒ಜ್ಞಾನ॑-ನ್ದೇ॒ವಾ-ಸ್ಸರ್ವೇ᳚ । ಬ್ರಹ್ಮ॒ ಜ್ಯೇಷ್ಠ॒-ಮುಪಾ॑ಸತೇ । ವಿ॒ಜ್ಞಾನ॒-ಮ್ಬ್ರಹ್ಮ॒ ಚೇ-ದ್ವೇದ॑ । ತಸ್ಮಾ॒ಚ್ಚೇನ್ನ ಪ್ರ॒ಮಾದ್ಯ॑ತಿ । ಶ॒ರೀರೇ॑ ಪಾಪ್ಮ॑ನೋ ಹಿ॒ತ್ವಾ । ಸರ್ವಾನ್-ಕಾಮಾನ್-ಥ್ಸಮಶ್ನು॑ತ ಇ॒ತಿ ॥ ತಸ್ಯೈಷ ಏವ ಶಾರೀ॑ರ ಆ॒ತ್ಮಾ । ಯಃ॑ ಪೂರ್ವ॒ಸ್ಯ ॥ ತಸ್ಮಾದ್ವಾ ಏತಸ್ಮಾ-ದ್ವಿ॑ಜ್ಞಾನ॒ಮಯಾತ್ । ಅನ್ಯೋ-ಽನ್ತರ ಆತ್ಮಾ॑-ಽಽನನ್ದ॒ಮಯಃ । ತೇನೈ॑ಷ ಪೂ॒ರ್ಣಃ ॥ ಸ ವಾ ಏಷ ಪುರುಷವಿ॑ಧ ಏ॒ವ । ತಸ್ಯ ಪುರು॑ಷವಿ॒ಧತಾಮ್ ।
ಅನ್ವಯ॑-ಮ್ಪುರುಷ॒ವಿಧಃ । ತಸ್ಯ ಪ್ರಿಯ॑-ಮೇವ॒ ಶಿರಃ ।
ಮೋದೋ ದಖ್ಷಿ॑ಣಃ ಪ॒ಖ್ಷಃ ।
ಪ್ರಮೋದ ಉತ್ತ॑ರಃ ಪ॒ಖ್ಷಃ । ಆನ॑ನ್ದ ಆ॒ತ್ಮಾ ।
ಬ್ರಹ್ಮ ಪುಚ್ಛ॑-ಮ್ಪ್ರತಿ॒ಷ್ಠಾ ॥
ತದಪ್ಯೇಷ ಶ್ಲೋ॑ಕೋ ಭ॒ವತಿ ॥ 30 ॥

ಅಸ॑ನ್ನೇ॒ವ ಸ॑ ಭವತಿ । ಅಸ॒-ದ್ಬ್ರಹ್ಮೇತಿ॒ ವೇದ॒ ಚೇತ್ ।
ಅಸ್ತಿ ಬ್ರಹ್ಮೇತಿ॑ ಚೇ-ದ್ವೇ॒ದ । ಸನ್ತಮೇನ-ನ್ತತೋ ವಿ॑ದುರಿ॒ತಿ ॥
ತಸ್ಯೈಷ ಏವ ಶಾರೀ॑ರ ಆ॒ತ್ಮಾ । ಯಃ॑ ಪೂರ್ವ॒ಸ್ಯ ॥ ಅಥಾತೋ॑-ಽನು ಪ್ರ॒ಶ್ನಾಃ ॥ ಉ॒ತಾ ವಿ॒ದ್ವಾ ನ॒ಮುಂ-ಲೋಁ॒ಕ-ಮ್ಪ್ರೇತ್ಯ॑ । ಕಶ್ಚ॒ನ ಗ॑ಚ್ಛ॒ತೀ(3) । ಆಹೋ॑ ವಿ॒ದ್ವಾನ॒ಮುಂ-ಲೋಁ॒ಕ-ಮ್ಪ್ರೇತ್ಯ॑ । ಕಶ್ಚಿ॒-ಥ್ಸಮ॑ಶ್ನು॒ತಾ(3) ಉ॒ ॥ ಸೋ॑-ಽಕಾಮಯತ ।
ಬ॒ಹುಸ್ಯಾ॒-ಮ್ಪ್ರಜಾ॑ಯೇ॒ಯೇತಿ॑ । ಸ ತಪೋ॑-ಽತಪ್ಯತ । ಸ ತಪ॑ಸ್ತ॒ಪ್ತ್ವಾ । ಇ॒ದಗ್ಂ ಸರ್ವ॑-ಮಸೃಜತ ॥ ಯದಿ॒ದ-ಙ್ಕಿಞ್ಚ॑ । ತಥ್ಸೃ॒ಷ್ಟ್ವಾ । ತದೇ॒ವಾನು॒ ಪ್ರಾವಿ॑ಶತ್ ॥ ತದ॑ನುಪ್ರ॒ವಿಶ್ಯ॑ । ಸಚ್ಚ॒ ತ್ಯಚ್ಚಾ॑ಭವತ್ । ನಿ॒ರುಕ್ತ॒-ಞ್ಚಾ ನಿ॑ರುಕ್ತ-ಞ್ಚ ।
ನಿ॒ಲಯ॑ನ॒-ಞ್ಚಾ ನಿ॑ಲಯನ-ಞ್ಚ । ವಿ॒ಜ್ಞಾನ॒-ಞ್ಚಾ ವಿ॑ಜ್ಞಾನ-ಞ್ಚ । ಸತ್ಯ-ಞ್ಚಾನೃತ-ಞ್ಚ ಸ॑ತ್ಯ-ಮ॒ಭವತ್ ॥ ಯದಿ॑ದ-ಙ್ಕಿ॒ಞ್ಚ ।
ತಥ್ಸತ್ಯ-ಮಿ॑ತ್ಯಾ ಚ॒ಖ್ಷತೇ ॥ ತದಪ್ಯೇಷ ಶ್ಲೋ॑ಕೋ ಭ॒ವತಿ ॥ 31 ॥

ಅಸ॒ದ್ವಾ ಇ॒ದಮಗ್ರ॑ ಆಸೀತ್ । ತತೋ॒ ವೈ ಸದ॑ಜಾಯತ ।
ತದಾತ್ಮಾನಗ್ಗ್​ ಸ್ವಯ॑-ಮಕು॒ರುತ । ತಸ್ಮಾ-ತ್ತ-ಥ್ಸುಕೃತಮುಚ್ಯ॑ತ ಇ॒ತಿ ॥ ಯದ್ವೈ॑ ತ-ಥ್ಸು॒ಕೃತಮ್ । ರ॑ಸೋ ವೈ॒ ಸಃ । ರಸಗ್ಗ್​ ಹ್ಯೇವಾಯಂ-ಲಁಬ್ಧ್ವಾ-ಽಽನ॑ನ್ದೀ ಭ॒ವತಿ ॥
ಕೋ ಹ್ಯೇವಾನ್ಯಾ᳚-ತ್ಕಃ ಪ್ರಾ॒ಣ್ಯಾತ್ । ಯದೇಷ ಆಕಾಶ ಆನ॑ನ್ದೋ ನ॒ ಸ್ಯಾತ್ । ಏಷ ಹ್ಯೇವಾನ॑ನ್ದಯಾ॒ತಿ ॥ ಯ॒ದಾ ಹ್ಯೇ॑ವೈಷ॒ ಏತಸ್ಮಿ-ನ್ನದೃಶ್ಯೇ ಽನಾತ್ಮ್ಯೇ ಽನಿರುಕ್ತೇ ಽನಿಲಯನೇ ಽಭಯಂ
ಪ್ರತಿ॑ಷ್ಠಾಂ-ವಿಁ॒ನ್ದತೇ । ಅಥ ಸೋ-ಽಭಯ-ಙ್ಗ॑ತೋ ಭ॒ವತಿ ॥
ಯ॒ದಾ ಹ್ಯೇ॑ವೈಷ॒ ಏತಸ್ಮಿ-ನ್ನುದರ-ಮನ್ತ॑ರ-ಙ್ಕು॒ರುತೇ ।
ಅಥ ತಸ್ಯ ಭ॑ಯ-ಮ್ಭ॒ವತಿ ॥ ತತ್ತ್ವೇವ ಭಯಂ-ವಿಁದುಷೋ-ಽಮ॑ನ್ವಾನ॒ಸ್ಯ ॥
ತದಪ್ಯೇಷ ಶ್ಲೋ॑ಕೋ ಭ॒ವತಿ ॥ 32 ॥

ಭೀ॒ಷಾ-ಽಸ್ಮಾ॒-ದ್ವಾತಃ॑ ಪವತೇ । ಭೀ॒ಷೋದೇ॑ತಿ॒ ಸೂರ್ಯಃ॑ ।
ಭೀಷಾ-ಽಸ್ಮಾ-ದಗ್ನಿ॑-ಶ್ಚೇನ್ದ್ರ॒ಶ್ಚ । ಮೃತ್ಯು-ರ್ಧಾವತಿ ಪಞ್ಚ॑ಮ ಇ॒ತಿ ॥ ಸೈಷಾ-ಽಽನನ್ದಸ್ಯ ಮೀಮಾಗ್ಂ॑ಸಾ ಭ॒ವತಿ ॥ ಯುವಾ ಸ್ಯಾ-ಥ್ಸಾಧು ಯು॑ವಾ-ಽದ್ಧ್ಯಾ॒ಯಕಃ । ಆಶಿಷ್ಠೋ ದೃಢಿಷ್ಠೋ॑ ಬಲಿ॒ಷ್ಠಃ । ತಸ್ಯೇಯ-ಮ್ಪೃಥಿವೀ ಸರ್ವಾ ವಿತ್ತಸ್ಯ॑ ಪೂರ್ಣಾ॒ ಸ್ಯಾತ್ ।
ಸ ಏಕೋ ಮಾನುಷ॑ ಆನ॒ನ್ದಃ ॥ ತೇ ಯೇ ಶತ-ಮ್ಮಾನುಷಾ॑ ಆನ॒ನ್ದಾಃ । ॥ 33-ಽ ॥

ಸ ಏಕೋ ಮನುಷ್ಯ-ಗನ್ಧರ್ವಾಣಾ॑-ಮಾನ॒ನ್ದಃ । ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ ॥ ತೇ ಯೇ ಶತ-ಮ್ಮನುಷ್ಯ-ಗನ್ಧರ್ವಾಣಾ॑-ಮಾನ॒ನ್ದಾಃ । ಸ ಏಕೋ ದೇವ-ಗನ್ಧರ್ವಾಣಾ॑-ಮಾನ॒ನ್ದಃ । ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ ॥
ತೇ ಯೇ ಶತ-ನ್ದೇವ-ಗನ್ಧರ್ವಾಣಾ॑-ಮಾನ॒ನ್ದಾಃ ।
ಸ ಏಕಃ ಪಿತೃಣಾ-ಞ್ಚಿರಲೋಕ-ಲೋಕಾನಾ॑-ಮಾನ॒ನ್ದಃ ।
ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ ॥
ತೇ ಯೇ ಶತ-ಮ್ಪಿತೃಣಾ-ಞ್ಚಿರಲೋಕ-ಲೋಕಾನಾ॑-ಮಾನ॒ನ್ದಾಃ ।
ಸ ಏಕ ಆಜಾನಜಾನಾ-ನ್ದೇವಾನಾ॑-ಮಾನ॒ನ್ದಃ । ॥ 33.ಬ್ ॥

ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ ॥
ತೇ ಯೇ ಶತ-ಮಾಜಾನ-ಜಾನಾ-ನ್ದೇವಾನಾ॑ ಮಾನ॒ನ್ದಾಃ ।
ಸ ಏಕಃ ಕರ್ಮ-ದೇವಾನಾ-ನ್ದೇವಾನಾ॑-ಮಾನ॒ನ್ದಃ ।
ಯೇ ಕರ್ಮಣಾ ದೇವಾನ॑ಪಿ ಯ॒ನ್ತಿ । ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ ॥ ತೇ ಯೇ ಶತ-ಙ್ಕರ್ಮದೇವಾನಾ-ನ್ದೇವಾನಾ॑-ಮಾನ॒ನ್ದಾಃ । ಸ ಏಕೋ ದೇವಾನಾ॑-ಮಾನ॒ನ್ದಃ । ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ ॥ ತೇ ಯೇ ಶತ-ನ್ದೇವಾನಾ॑-ಮಾನ॒ನ್ದಾಃ । ಸ ಏಕ ಇನ್ದ್ರ॑ಸ್ಯಾನ॒ನ್ದಃ । ॥ 33.ಚ್ ॥

ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ ॥ ತೇ ಯೇ ಶತಮಿನ್ದ್ರ॑-ಸ್ಯಾ-ಽಽನ॒ನ್ದಾಃ । ಸ ಏಕೋ ಬೃಹಸ್ಪತೇ॑-ರಾನ॒ನ್ದಃ । ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ ॥
ತೇ ಯೇ ಶತ-ಮ್ಬೃಹಸ್ಪತೇ॑ ರಾನ॒ನ್ದಾಃ । ಸ ಏಕಃ ಪ್ರಜಾಪತೇ॑-ರಾನ॒ನ್ದಃ । ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ ॥ ತೇ ಯೇ ಶತ-ಮ್ಪ್ರಜಾಪತೇ॑-ರಾನ॒ನ್ದಾಃ । ಸ ಏಕೋ ಬ್ರಹ್ಮಣ॑ ಆನ॒ನ್ದಃ । ಶ್ರೋತ್ರಿಯಸ್ಯ ಚಾಕಾಮ॑ಹತ॒ಸ್ಯ ॥ 33.ದ್ ॥

ಸ ಯಶ್ಚಾ॑ಯ-ಮ್ಪು॒ರುಷೇ । ಯಶ್ಚಾಸಾ॑-ವಾದಿ॒ತ್ಯೇ । ಸ ಏಕಃ॑ ॥
ಸ ಯ॑ ಏವಂ॒-ವಿಁತ್ । ಅಸ್ಮಾಲ್ಲೋ॑ಕಾ-ತ್ಪ್ರೇ॒ತ್ಯ ।
ಏತಮನ್ನಮಯ-ಮಾತ್ಮಾನ-ಮುಪ॑ಸಙ್ಕ್ರಾ॒ಮತಿ ।
ಏತ-ಮ್ಪ್ರಾಣಮಯ-ಮಾತ್ಮಾನ-ಮುಪ॑ಸಙ್ಕ್ರಾ॒ಮತಿ ।
ಏತ-ಮ್ಮನೋಮಯ-ಮಾತ್ಮಾನ-ಮುಪ॑ಸಙ್ಕ್ರಾ॒ಮತಿ ।
ಏತಂ-ವಿಁಜ್ಞಾನಮಯ-ಮಾತ್ಮಾನ-ಮುಪ॑ಸಙ್ಕ್ರಾ॒ಮತಿ ।
ಏತಮಾನನ್ದಮಯ-ಮಾತ್ಮಾನ-ಮುಪ॑ಸಙ್ಕ್ರಾ॒ಮತಿ ॥
ತದಪ್ಯೇಷ ಶ್ಲೋ॑ಕೋ ಭ॒ವತಿ ॥ 33ಎ ॥

ಯತೋ॒ ವಾಚೋ॒ ನಿವ॑ರ್ತನ್ತೇ । ಅಪ್ರಾ᳚ಪ್ಯ॒ ಮನ॑ಸಾ ಸ॒ಹ । ಆನನ್ದ-ಮ್ಬ್ರಹ್ಮ॑ಣೋ ವಿ॒ದ್ವಾನ್ । ನ ಬಿಭೇತಿ ಕುತ॑ಶ್ಚನೇ॒ತಿ ॥ ಏತಗ್ಂ ಹ ವಾ ವ॑ ನ ತ॒ಪತಿ । ಕಿಮಹಗ್ಂ ಸಾಧು॑ ನಾಕ॒ರವಮ್ । ಕಿಮಹ-ಮ್ಪಾಪ-ಮಕರ॑ವ-ಮಿ॒ತಿ ॥
ಸ ಯ ಏವಂ-ವಿಁದ್ವಾನೇತೇ ಆತ್ಮಾ॑ನಗ್ಗ್​ ಸ್ಪೃ॒ಣುತೇ ॥
ಉ॒ಭೇ ಹ್ಯೇ॑ವೈಷ॒ ಏತೇ ಆತ್ಮಾ॑ನಗ್ಗ್​ ಸ್ಪೃ॒ಣುತೇ ।
ಯ ಏ॒ವಂ-ವೇಁದ॑ ॥ ಇತ್ಯು॑ಪ॒ನಿಷ॑ತ್ ॥ 34 ॥

ಸ॒ಹ ನಾ॑ ವವತು । ಸ॒ಹ ನೌ॑ ಭುನಕ್ತು । ಸ॒ಹ ವೀ॒ರ್ಯ॑-ಙ್ಕರವಾವಹೈ । ತೇ॒ಜ॒ಸ್ವಿನಾ॒ ವಧೀ॑ತಮಸ್ತು॒ ಮಾ ವಿ॑ದ್ವಿಷಾ॒ವಹೈ᳚ ॥ ಓಂ ಶಾನ್ತಿ॒-ಶ್ಶಾನ್ತಿ॒-ಶ್ಶಾನ್ತಿಃ॑ ॥
(ಬ್ರ॒ಹ್ಮ॒ವಿದಿದಮಯಮಿದಮೇಕ॑ವಿಗ್ಂಶತಿಃ ।
ಅನ್ನಾ॒ ದನ್ನ॑ರಸ॒ಮಯಾ-ತ್ಪ್ರಾಣೋ॒ ವ್ಯಾನೋ-ಽಪಾನ ಆಕಾ॑ಶಃ॒ ಪೃಥಿವೀ ಪುಚ್ಛ॒ಗ್ಂ॒ ಷಡ್ವಿಗ್ಂ॑ಶತಿಃ ।
ಪ್ರಾ॒ಣ-ಮ್ಪ್ರಾ॑ಣ॒ಮಯಾ-ನ್ಮ॑ನೋ॒ ಯಜು॒ರ್॒ ಋ-ಖ್ಸಾಮಾದೇ॒ಶೋ-ಽಥರ್ವಾಙ್ಗಿರಸಃ ಪುಚ್ಛ॒-ನ್ದ್ವಾವಿಗ್ಂ॑ಶತಿಃ ।
ಯತ॑-ಶ್ಶ್ರ॒ದ್ಧರ್ತಗ್ಂ ಸತ್ಯಂ ಁಯೋ॑ಗೋ॒ ಮಹೋ॑-ಽಷ್ಟಾದ॑ಶ । ವಿ॒ಜ್ಞಾನ॒-ಮ್ಪ್ರಿಯ॒-ಮ್ಮೋದಃ ಪ್ರಮೋದ ಆನ॑ನ್ದೋ॒ ಬ್ರಹ್ಮ ಪುಚ್ಛ॒-ನ್ದ್ವಾವಿಗ್ಂ॑ಶತಿಃ ।
ಅಸ॑ನ್ನೇ॒ವಾಥಾಷ್ಟಾವಿ ಗ್ಂ॑ಶತಿಃ । ಅಸ॒-ಥ್ಷೋಡ॑ಶ ।
ಭೀ॒ಷಾ-ಽಸ್ಮಾ॒-ನ್ಮಾನುಷೋ॒ ಮನುಷ್ಯಗನ್ಧರ್ವಾಣಾ॒-ನ್ದೇವಗನ್ಧರ್ವಾಣಾ॒-ಮ್ಪಿತೃಣಾಮ್ಚಿರಲೋಕಲೋಕಾನಾ॒ ಮಾಜಾನಜಾನಾ-ಙ್ಕರ್ಮದೇವಾನಾಂ ಁಯೇ ಕರ್ಮಣಾ ದೇವಾನಾ॒ಮಿನ್ದ್ರ॑ಸ್ಯ॒ ಬೃಹಸ್ಪತೇಃ॒ ಪ್ರಜಾಪತೇ॒-ರ್ಬ್ರಹ್ಮಣ॒-ಸ್ಸ ಯಶ್ವ॑ ಸಙ್ಕ್ರಾ॒ಮತ್ಯೇಕ॑ಪಞ್ಚಾ॒ಶತ್ ।
ಯತಃ॒ ಕುತ॑ಶ್ಚ॒ ನೈತಮೇಕಾ॑ದಶ॒ ನವ॑) (ಅ. 14)
॥ ಇತಿ ಬ್ರಹ್ಮಾನನ್ದವಲ್ಲೀ ಸಮಾಪ್ತಾ ॥

॥ ಹರಿಃ॑ ಓಮ್ ॥
॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಆರಣ್ಯಕೇ ಅಷ್ಟಮಃ ಪ್ರಪಾಠಕ-ಸ್ಸಮಾಪ್ತಃ ॥