7 – ಶೀಕ್ಷಾವಲ್ಲೀ – ಕೃಷ್ಣ ಯಜುರ್ವೇದ ತೈತ್ತಿರೀಯ ಆರಣ್ಯಕ ಪಾಠಃ – ಶೀಕ್ಷಾಂ ವ್ಯಾಖ್ಯಾಸ್ಯಾಮಃ

ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಆರಣ್ಯಕೇ ಸಪ್ತಮಃ ಪ್ರಪಾಠಕಃ – ಶೀಖ್ಷಾವಲ್ಲೀ

ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ಅನುವಾಕಂ 1
ಶನ್ನೋ॑ ಮಿ॒ತ್ರ-ಶ್ಶಂ-ವಁರು॑ಣಃ । ಶನ್ನೋ॑ ಭವತ್ವರ್ಯ॒ಮಾ । ಶನ್ನ॒ ಇನ್ದ್ರೋ॒ ಬೃಹ॒ಸ್ಪತಿಃ॑ । ಶನ್ನೋ॒ ವಿಷ್ಣು॑-ರುರುಕ್ರ॒ಮಃ । ನಮೋ॒ ಬ್ರಹ್ಮ॑ಣೇ । ನಮ॑ಸ್ತೇ ವಾಯೋ । ತ್ವಮೇ॒ವ ಪ್ರ॒ತ್ಯಖ್ಷ॒-ಮ್ಬ್ರಹ್ಮಾ॑ಸಿ । ತ್ವಮೇ॒ವ ಪ್ರ॒ತ್ಯಖ್ಷ॒-ಮ್ಬ್ರಹ್ಮ॑ ವದಿಷ್ಯಾಮಿ । ಋ॒ತಂ-ವಁ॑ದಿಷ್ಯಾಮಿ । ಸ॒ತ್ಯಂ-ವಁ॑ದಿಷ್ಯಾಮಿ । ತನ್ಮಾಮ॑ವತು । ತದ್ವ॒ಕ್ತಾರ॑ಮವತು । ಅವ॑ತು॒ ಮಾಮ್ । ಅವ॑ತು ವ॒ಕ್ತಾರ᳚ಮ್ ॥ ಓಂ ಶಾನ್ತಿ॒-ಶ್ಶಾನ್ತಿ॒-ಶ್ಶಾನ್ತಿಃ॑ ॥ 1 ॥
(ಸ॒ತ್ತ್ಯಂ ಁವ॑ದಿಷ್ಯಾಮಿ॒ ಪಞ್ಚ॑ ಚ) (ಅ. 1)

ಅನುವಾಕಂ 2
ಶೀಖ್ಷಾಂ-ವ್ಯಾಁ᳚ಖ್ಯಾಸ್ಯಾ॒ಮಃ । ವರ್ಣ॒-ಸ್ಸ್ವರಃ ।
ಮಾತ್ರಾ॒ ಬಲಮ್ । ಸಾಮ॑ ಸನ್ತಾ॒ನಃ ।
ಇತ್ಯುಕ್ತ-ಶ್ಶೀ᳚ಖ್ಷಾದ್ಧ್ಯಾ॒ಯಃ ॥ 2 ॥
(ಶೀಖ್ಷಾ-ಮ್ಪಞ್ಚ॑) (ಅ. 2)
ಅನುವಾಕಂ 3
ಸ॒ಹ ನೌ॒ ಯಶಃ । ಸ॒ಹ ನೌ ಬ್ರ॑ಹ್ಮವ॒ರ್ಚಸಮ್ ॥
ಅಥಾತ-ಸ್ಸಗ್ಂಹಿತಾಯಾ ಉಪನಿಷದಂ-ವ್ಯಾಁ᳚ಖ್ಯಾಸ್ಯಾ॒ಮಃ । ಪಞ್ಚಸ್ವಧಿ-ಕ॑ರಣೇ॒ಷು । ಅಧಿಲೋಕಮಧಿ-ಜ್ಯೌತಿಷ-ಮಧಿವಿದ್ಯ-ಮಧಿಪ್ರಜ॑-ಮದ್ಧ್ಯಾ॒ತ್ಮಮ್ । ತಾ ಮಹಾಸಗ್ಂಹಿತಾ ಇ॑ತ್ಯಾಚ॒ಖ್ಷತೇ ॥ ಅಥಾ॑ಧಿ ಲೋ॒ಕಮ್ । ಪೃಥಿವೀ ಪೂ᳚ರ್ವರೂ॒ಪಮ್ । ದ್ಯೌರುತ್ತ॑ರರೂ॒ಪಮ್ । ಆಕಾ॑ಶ-ಸ್ಸ॒ನ್ಧಿಃ ॥ 3 ॥

ವಾಯು॑-ಸ್ಸನ್ಧಾ॒ನಮ್ । ಇತ್ಯ॑ಧಿ ಲೋ॒ಕಮ್ ॥
ಅಥಾ॑ಧಿ ಜ್ಯೌ॒ತಿಷಮ್ । ಅಗ್ನಿಃ ಪೂ᳚ರ್ವ ರೂ॒ಪಮ್ । ಆದಿತ್ಯ ಉತ್ತ॑ರರೂ॒ಪಮ್ । ಆ॑ಪ-ಸ್ಸ॒ನ್ಧಿಃ । ವೈದ್ಯುತ॑-ಸ್ಸನ್ಧಾ॒ನಮ್ । ಇತ್ಯ॑ಧಿ ಜ್ಯೌ॒ತಿಷಮ್ ॥ ಅಥಾ॑ಧಿ ವಿ॒ದ್ಯಮ್ । ಆಚಾರ್ಯಃ ಪೂ᳚ರ್ವ ರೂ॒ಪಮ್ ॥ 4 ॥

ಅನ್ತೇವಾಸ್ಯುತ್ತ॑ರರೂ॒ಪಮ್ । ವಿ॑ದ್ಯಾ ಸ॒ನ್ಧಿಃ ।
ಪ್ರವಚನಗ್ಂ॑ ಸನ್ಧಾ॒ನಮ್ । ಇತ್ಯ॑ಧಿ ವಿ॒ದ್ಯಮ್ ॥
ಅಥಾಧಿ॒ಪ್ರಜಮ್ । ಮಾತಾ ಪೂ᳚ರ್ವರೂ॒ಪಮ್ । ಪಿತೋತ್ತ॑ರರೂ॒ಪಮ್ । ಪ್ರ॑ಜಾ ಸ॒ನ್ಧಿಃ । ಪ್ರಜನನಗ್ಂ॑ ಸನ್ಧಾ॒ನಮ್ । ಇತ್ಯಧಿ॒ಪ್ರಜಮ್ ॥ 5 ॥

ಅಥಾದ್ಧ್ಯಾ॒ತ್ಮಮ್ । ಅಧರಾಹನುಃ ಪೂ᳚ರ್ವ ರೂ॒ಪಮ್ । ಉತ್ತರಾಹನು-ರುತ್ತ॑ರರೂ॒ಪಮ್ । ವಾ-ಖ್ಸ॒ನ್ಧಿಃ । ಜಿಹ್ವಾ॑ ಸನ್ಧಾ॒ನಮ್ । ಇತ್ಯದ್ಧ್ಯಾ॒ತ್ಮಮ್ ॥ ಇತೀ ಮಾಮ॑ಹಾ ಸ॒ಗ್ಂ॒ಹಿತಾಃ ॥ ಯ ಏವಮೇತಾ ಮಹಾಸಗ್ಂಹಿತಾ ವ್ಯಾಖ್ಯಾ॑ತಾ ವೇ॒ದ । ಸನ್ಧೀಯತೇ ಪ್ರಜ॑ಯಾ ಪ॒ಶುಭಿಃ । ಬ್ರಹ್ಮವರ್ಚ-ಸೇನಾನ್ನಾದ್ಯೇನ ಸುವರ್ಗ್ಯೇಣ॑ (ಸುವರ್ಗೇಣ॑) ಲೋಕೇ॒ನ ॥ 6 ॥
(ಸ॒ನ್ಧಿ – ರಾಚಾರ್ಯಃ ಪೂ᳚ರ್ವರೂ॒ಪ – ಮಿತ್ಯಧಿ॒ಪ್ರಜಂ – ಁಲೋ॑ಕೇ॒ನ) (ಅ. 3)

ಅನುವಾಕಂ 4
ಯ ಶ್ಛನ್ದ॑ಸಾ-ಮೃಷ॒ಭೋ ವಿ॒ಶ್ವರೂ॑ಪಃ । ಛನ್ದೋ॒ಭ್ಯೋ-ಽದ್ಧ್ಯ॒ಮೃತಾ᳚-ಥ್ಸಮ್ಬ॒ಭೂವ॑ । ಸ ಮೇನ್ದ್ರೋ॑ ಮೇ॒ಧಯಾ᳚ ಸ್ಪೃಣೋತು । ಅ॒ಮೃತ॑ಸ್ಯ ದೇವ॒ ಧಾರ॑ಣೋ ಭೂಯಾಸಮ್ ॥
ಶರೀ॑ರ-ಮ್ಮೇ॒ ವಿಚ॑ರ್​ಷಣಮ್ । ಜಿ॒ಹ್ವಾ ಮೇ॒ ಮಧು॑ಮತ್ತಮಾ । ಕರ್ಣಾ᳚ಭ್ಯಾ॒-ಮ್ಭೂರಿ॒ ವಿಶ್ರು॑ವಮ್ । ಬ್ರಹ್ಮ॑ಣಃ ಕೋ॒ಶೋ॑-ಽಸಿ ಮೇ॒ಧಯಾ ಽಪಿ॑ಹಿತಃ । ಶ್ರು॒ತ-ಮ್ಮೇ॑ ಗೋಪಾಯ ॥ ಆ॒ವಹ॑ನ್ತೀ ವಿತನ್ವಾ॒ನಾ ॥ 7 ॥
ಕು॒ರ್ವಾ॒ಣಾ ಚೀರ॑-ಮಾ॒ತ್ಮನಃ॑ । ವಾಸಾಗ್ಂ॑ಸಿ॒ ಮಮ॒ ಗಾವ॑ಶ್ಚ । ಅ॒ನ್ನ॒ಪಾ॒ನೇ ಚ॑ ಸರ್ವ॒ದಾ । ತತೋ॑ ಮೇ॒ ಶ್ರಿಯ॒-ಮಾವ॑ಹ । ಲೋ॒ಮ॒ಶಾ-ಮ್ಪ॒ಶುಭಿ॑-ಸ್ಸ॒ಹ ಸ್ವಾಹಾ᳚ ॥ ಆಮಾ॑ಯನ್ತು ಬ್ರಹ್ಮಚಾ॒ರಿಣ॒-ಸ್ಸ್ವಾಹಾ᳚ ।
ವಿಮಾ॑-ಽಽಯನ್ತು ಬ್ರಹ್ಮಚಾ॒ರಿಣ॒-ಸ್ಸ್ವಾಹಾ᳚ । ಪ್ರಮಾ॑-ಽಽಯನ್ತು ಬ್ರಹ್ಮಚಾ॒ರಿಣ॒-ಸ್ಸ್ವಾಹಾ᳚ । ದಮಾ॑ಯನ್ತು ಬ್ರಹ್ಮಚಾ॒ರಿಣ॒-ಸ್ಸ್ವಾಹಾ᳚ । ಶಮಾ॑ಯನ್ತು ಬ್ರಹ್ಮಚಾ॒ರಿಣ॒-ಸ್ಸ್ವಾಹಾ᳚ ॥ 8 ॥

ಯಶೋ॒ ಜನೇ॑-ಽಸಾನಿ॒ ಸ್ವಾಹಾ᳚ । ಶ್ರೇಯಾ॒ನ್॒. ವಸ್ಯ॑ಸೋ-ಽಸಾನಿ॒ ಸ್ವಾಹಾ᳚ ॥ ತ-ನ್ತ್ವಾ॑ ಭಗ॒ ಪ್ರವಿ॑ಶಾನಿ॒ ಸ್ವಾಹಾ᳚ । ಸ ಮಾ॑ ಭಗ॒ ಪ್ರವಿ॑ಶ॒ ಸ್ವಾಹಾ᳚ । ತಸ್ಮಿ᳚ನ-ಥ್ಸ॒ಹಸ್ರ॑ ಶಾಖೇ । ನಿಭ॑ಗಾ॒ಹ-ನ್ತ್ವಯಿ॑ ಮೃಜೇ॒ ಸ್ವಾಹಾ᳚ ॥ ಯಥಾ-ಽಽಪಃ॒ ಪ್ರವ॑ತಾ॒-ಽಽಯನ್ತಿ॑ । ಯಥಾ॒ ಮಾಸಾ॑ ಅಹರ್ಜ॒ರಮ್ ।
ಏ॒ವ-ಮ್ಮಾ-ಮ್ಬ್ರ॑ಹ್ಮಚಾ॒ರಿಣಃ॑ ।
ಧಾತ॒ರಾಯ॑ನ್ತು ಸ॒ರ್ವತ॒-ಸ್ಸ್ವಾಹಾ᳚ ॥
ಪ್ರ॒ತಿ॒ವೇ॒ಶೋ॑-ಽಸಿ॒ ಪ್ರ ಮಾ॑ ಭಾಹಿ॒ ಪ್ರ ಮಾ॑ ಪದ್ಯಸ್ವ ॥ 9 ॥
(ವಿ॒ತ॒ನ್ವಾ॒ನಾ – ಶಮಾ॑ಯನ್ತು ಬ್ರಹ್ಮಚಾ॒ರಿಣ॒-ಸ್ಸ್ವಾಹಾ॒-ಧಾತ॒ರಾಯ॑ನ್ತು ಸ॒ರ್ವತ॒-ಸ್ಸ್ವಾಹೈಕ॑-ಞ್ಚ) (ಅ. 4)
ಅನುವಾಕಂ 5
ಭೂ-ರ್ಭುವ॒-ಸ್ಸುವ॒-ರಿತಿ॒ ವಾ ಏ॒ತಾ ಸ್ತಿ॒ಸ್ರೋ ವ್ಯಾಹೃ॑ತಯಃ ॥
ತಾಸಾ॑ಮುಹಸ್ಮೈ॒ ತಾ-ಞ್ಚ॑ತು॒ರ್ಥೀಮ್ । ಮಾಹಾ॑ಚಮಸ್ಯಃ॒ ಪ್ರವೇ॑ದಯತೇ । ಮಹ॒ ಇತಿ॑ ॥ ತ-ದ್ಬ್ರಹ್ಮ॑ । ಸ ಆ॒ತ್ಮಾ । ಅಙ್ಗಾ᳚ನ್ಯ॒ನ್ಯಾ ದೇ॒ವತಾಃ᳚ ॥ ಭೂರಿತಿ॒ ವಾ ಅ॒ಯಂ-ಲೋಁ॒ಕಃ । ಭುವ॒ ಇತ್ಯ॒ನ್ತರಿ॑ಖ್ಷಮ್ । ಸುವ॒-ರಿತ್ಯ॒ಸೌ ಲೋ॒ಕಃ ॥ 10 ॥

ಮಹ॒ ಇತ್ಯಾ॑ದಿ॒ತ್ಯಃ । ಆ॒ದಿ॒ತ್ಯೇನ॒ ವಾವ ಸರ್ವೇ॑ ಲೋ॒ಕಾ ಮಹೀ॑ಯನ್ತೇ ॥ ಭೂರಿತಿ॒ ವಾ ಅ॒ಗ್ನಿಃ । ಭುವ॒ ಇತಿ॑ ವಾ॒ಯುಃ । ಸುವ॒ರಿತ್ಯಾ॑ದಿ॒ತ್ಯಃ । ಮಹ॒ ಇತಿ॑ ಚ॒ನ್ದ್ರಮಾಃ᳚ । ಚ॒ನ್ದ್ರಮ॑ಸಾ॒ ವಾವ ಸರ್ವಾ॑ಣಿ॒ ಜ್ಯೋತೀಗ್ಂ॑ಷಿ॒ ಮಹೀ॑ಯನ್ತೇ ॥ ಭೂ-ರಿತಿ॒ ವಾ ಋಚಃ॑ । ಭುವ॒ ಇತಿ॒ ಸಾಮಾ॑ನಿ ।
ಸುವ॒ ರಿತಿ॒ ಯಜೂಗ್ಂ॑ಷಿ ॥ 11 ॥

ಮಹ॒ ಇತಿ॒ ಬ್ರಹ್ಮ॑ । ಬ್ರಹ್ಮ॑ಣಾ॒ ವಾವ ಸರ್ವೇ॑ ವೇ॒ದಾ ಮಹೀ॑ಯನ್ತೇ ॥ ಭೂರಿತಿ॒ ವೈ ಪ್ರಾ॒ಣಃ । ಭುವ॒ ಇತ್ಯ॑ಪಾ॒ನಃ । ಸುವ॒ರಿತಿ॑ ವ್ಯಾ॒ನಃ । ಮಹ॒ ಇತ್ಯನ್ನ᳚ಮ್ । ಅನ್ನೇ॑ನ॒ ವಾವ ಸರ್ವೇ᳚ ಪ್ರಾ॒ಣಾ ಮಹೀ॑ಯನ್ತೇ ॥ ತಾ ವಾ ಏ॒ತಾ-ಶ್ಚತ॑ಸ್ರ ಶ್ಚತು॒ರ್ಧಾ । ಚತ॑ಸ್ರ-ಶ್ಚತಸ್ರೋ॒ ವ್ಯಾಹೃ॑ತಯಃ । ತಾ ಯೋ ವೇದ॑ ।
ಸ ವೇ॑ದ॒ ಬ್ರಹ್ಮ॑ । ಸರ್ವೇ᳚-ಽಸ್ಮೈ ದೇ॒ವಾ ಬ॒ಲಿಮಾವ॑ಹನ್ತಿ ॥ 12 ॥
(ಅ॒ಸೌ ಲೋ॒ಕೋ – ಯಜೂಗ್ಂ॑ಷಿ॒ – ವೇದ॒ ದ್ವೇ ಚ॑) (ಅ. 5)
ಅನುವಾಕಂ 6
ಸ ಯ ಏ॒ಷೋ᳚-ಽನ್ತರ್-ಹೃ॑ದಯ ಆಕಾ॒ಶಃ । ತಸ್ಮಿ॑ನ್ನ॒ಯ-ಮ್ಪುರು॑ಷೋ ಮನೋ॒ಮಯಃ॑ । ಅಮೃ॑ತೋ ಹಿರ॒ಣ್ಮಯಃ॑ ॥ ಅನ್ತ॑ರೇಣ॒ ತಾಲು॑ಕೇ । ಯ ಏ॒ಷ ಸ್ತನ॑ ಇವಾವ॒ಲಮ್ಬ॑ತೇ ।
ಸೇ᳚ನ್ದ್ರ ಯೋ॒ನಿಃ । ಯತ್ರಾ॒ಸೌ ಕೇ॑ಶಾ॒ನ್ತೋ ವಿ॒ವರ್ತ॑ತೇ । ವ್ಯ॒ಪೋಹ್ಯ॑ ಶೀರ್​ಷಕಪಾ॒ಲೇ ॥ ಭೂರಿತ್ಯ॒ಗ್ನೌ ಪ್ರತಿ॑ತಿಷ್ಠತಿ । ಭುವ॒ ಇತಿ॑ ವಾ॒ಯೌ ॥ 13 ॥

ಸುವ॒ರಿತ್ಯಾ॑ದಿ॒ತ್ಯೇ । ಮಹ॒ ಇತಿ॒ ಬ್ರಹ್ಮ॑ಣಿ । ಆ॒ಪ್ನೋತಿ॒ ಸ್ವಾರಾ᳚ಜ್ಯಮ್ । ಆ॒ಪ್ನೋತಿ॒ ಮನ॑ಸ॒ಸ್ಪತಿ᳚ಮ್ । ವಾಕ್ಪ॑ತಿ॒ ಶ್ಚಖ್ಷು॑ಷ್ಪತಿಃ । ಶ್ರೋತ್ರ॑ಪತಿ ರ್ವಿ॒ಜ್ಞಾನ॑ಪತಿಃ ।
ಏ॒ತ-ತ್ತತೋ॑ ಭವತಿ । ಆ॒ಕಾ॒ಶ ಶ॑ರೀರ॒-ಮ್ಬ್ರಹ್ಮ॑ ।
ಸ॒ತ್ಯಾತ್ಮ॑ ಪ್ರಾ॒ಣಾರಾ॑ಮ॒-ಮ್ಮನ॑ ಆನನ್ದಮ್ । ಶಾನ್ತಿ॑ ಸಮೃದ್ಧ-ಮ॒ಮೃತ᳚ಮ್ ॥
ಇತಿ॑ ಪ್ರಾಚೀನ ಯೋ॒ಗ್ಯೋಪಾ᳚ಸ್ವ ॥ 14 ॥
(ವಾ॒ಯಾ-ವ॒ಮೃತ॒ ಮೇಕ॑-ಞ್ಚ) (ಅ. 6)

ಅನುವಾಕಂ 7
ಪೃ॒ಥಿ॒ವ್ಯ॑ನ್ತರಿ॑ಖ್ಷ॒-ನ್ದ್ಯೌ-ರ್ದಿಶೋ॑-ಽವಾನ್ತರದಿ॒ಶಾಃ । ಅ॒ಗ್ನಿ-ರ್ವಾ॒ಯು-ರಾ॑ದಿ॒ತ್ಯ-ಶ್ಚ॒ನ್ದ್ರಮಾ॒ ನಖ್ಷ॑ತ್ರಾಣಿ ।
ಆಪ॒ ಓಷ॑ಧಯೋ॒ ವನ॒ಸ್ಪತ॑ಯ ಆಕಾ॒ಶ ಆ॒ತ್ಮಾ । ಇತ್ಯ॑ಧಿಭೂ॒ತಮ್ ॥ ಅಥಾದ್ಧ್ಯಾ॒ತ್ಮಮ್ । ಪ್ರಾ॒ಣೋ ವ್ಯಾ॒ನೋ॑-ಽಪಾ॒ನ ಉ॑ದಾ॒ನ-ಸ್ಸ॑ಮಾ॒ನಃ । ಚಖ್ಷು॒-ಶ್ಶ್ರೋತ್ರ॒-ಮ್ಮನೋ॒ ವಾ-ಕ್ತ್ವಕ್ ।
ಚರ್ಮ॑ ಮಾ॒ಗ್ಂ॒ ಸಗ್ಗ್​ಸ್ನಾವಾಸ್ಥಿ॑ ಮ॒ಜ್ಜಾ ॥
ಏ॒ತ ದ॑ಧಿವಿ॒ಧಾಯ॒ರ್॒ಷಿ॒ ರವೋ॑ಚತ್ ।
ಪಾಙ್ಕ್ತಂ॒-ವಾಁ ಇ॒ದಗ್ಂ ಸರ್ವ᳚ಮ್ ।
ಪಾಙ್ಕ್ತ॑ನೈ॒ವ ಪಾಙ್ಕ್ತಗ್ಗ್॑ ಸ್ಪೃಣೋ॒ತೀತಿ॑ ॥ 15 ॥
(ಸರ್ವ॒ಮೇಕ॑-ಞ್ಚ) (ಅ. 7)

ಅನುವಾಕಂ 8
ಓ-ಮಿತಿ॒ ಬ್ರಹ್ಮ॑ ॥ ಓ-ಮಿತೀ॒ದಗ್ಂ ಸರ್ವ᳚ಮ್ ॥
ಓಮಿತ್ಯೇ॒ತ-ದ॑ನುಕೃತಿ ಹಸ್ಮ॒ ವಾ ಅ॒ಪ್ಯೋ ಶ್ರಾ॑ವ॒ಯೇತ್ಯಾ-ಶ್ರಾ॑ವಯನ್ತಿ । ಓ-ಮಿತಿ॒ ಸಾಮಾ॑ನಿ ಗಾಯನ್ತಿ । ಓಗ್ಂ ಶೋಮಿತಿ॑ ಶ॒ಸ್ತ್ರಾಣಿ॑ ಶಗ್ಂಸನ್ತಿ । ಓಮಿತ್ಯ॑ದ್ಧ್ವ॒ರ್ಯುಃ ಪ್ರ॑ತಿಗ॒ರ-ಮ್ಪ್ರತಿ॑ಗೃಣಾತಿ । ಓಮಿತಿ॒ ಬ್ರಹ್ಮಾ॒ ಪ್ರಸೌ॑ತಿ ।
ಓಮಿತ್ಯ॑ಗ್ನಿಹೋ॒ತ್ರ-ಮನು॑ಜಾನಾತಿ । ಓಮಿತಿ॑ ಬ್ರಾಹ್ಮ॒ಣಃ ಪ್ರ॑ವ॒ಖ್ಷ್ಯನ್ನಾ॑ಹ॒ ಬ್ರಹ್ಮೋಪಾ᳚ಪ್ನವಾ॒ನೀತಿ॑ ।
ಬ್ರಹ್ಮೈ॒ವೋ-ಪಾ᳚ಪ್ನೋತಿ ॥ 16 ॥
(ಓ-ನ್ದಶ॑) (ಅ. 8)

ಅನುವಾಕಂ 9
ಋತ-ಞ್ಚ ಸ್ವಾದ್ಧ್ಯಾಯ ಪ್ರವ॑ಚನೇ॒ ಚ ।
ಸತ್ಯ-ಞ್ಚ ಸ್ವಾದ್ಧ್ಯಾಯ ಪ್ರವ॑ಚನೇ॒ ಚ ।
ತಪಶ್ಚ ಸ್ವಾದ್ಧ್ಯಾಯ ಪ್ರವ॑ಚನೇ॒ ಚ ।
ದಮಶ್ಚ ಸ್ವಾದ್ಧ್ಯಾಯ ಪ್ರವ॑ಚನೇ॒ ಚ ।
ಶಮಶ್ಚ ಸ್ವಾದ್ಧ್ಯಾಯ ಪ್ರವ॑ಚನೇ॒ ಚ ।
ಅಗ್ನಯಶ್ಚ ಸ್ವಾದ್ಧ್ಯಾಯ ಪ್ರವ॑ಚನೇ॒ ಚ ।
ಅಗ್ನಿಹೋತ್ರ-ಞ್ಚ ಸ್ವಾದ್ಧ್ಯಾಯ ಪ್ರವ॑ಚನೇ॒ ಚ ।
ಅತಿಥಯಶ್ಚ ಸ್ವಾದ್ಧ್ಯಾಯ ಪ್ರವ॑ಚನೇ॒ ಚ ।
ಮಾನುಷ-ಞ್ಚ ಸ್ವಾದ್ಧ್ಯಾಯ ಪ್ರವ॑ಚನೇ॒ ಚ ।
ಪ್ರಜಾ ಚ ಸ್ವಾದ್ಧ್ಯಾಯ ಪ್ರವ॑ಚನೇ॒ ಚ ।
ಪ್ರಜನಶ್ಚ ಸ್ವಾದ್ಧ್ಯಾಯ ಪ್ರವ॑ಚನೇ॒ ಚ ।
ಪ್ರಜಾತಿಶ್ಚ ಸ್ವಾದ್ಧ್ಯಾಯ ಪ್ರವ॑ಚನೇ॒ ಚ ॥
ಸತ್ಯಮಿತಿ ಸತ್ಯವಚಾ॑ ರಾಥೀ॒ ತರಃ ।
ತಪ ಇತಿ ತಪೋನಿತ್ಯಃ ಪೌ॑ರುಶಿ॒ಷ್ಟಿಃ ।
ಸ್ವಾದ್ಧ್ಯಾಯ ಪ್ರವಚನೇ ಏವೇತಿ ನಾಕೋ॑ ಮೌದ್ಗ॒ಲ್ಯಃ ।
ತದ್ಧಿ ತಪ॑ಸ್ತದ್ಧಿ॒ ತಪಃ ॥ 17 ॥
(ಪ್ರಜಾ ಚ ಸ್ವಾದ್ಧ್ಯಾಯಪ್ರವ॑ಚನೇ॒ ಚ ಷಟ್ಚ॑) (ಅ. 9)

ಅನುವಾಕಂ 10
ಅ॒ಹಂ-ವೃಁ॒ಖ್ಷಸ್ಯ॒ ರೇರಿ॑ವಾ ।
ಕೀ॒ರ್ತಿಃ ಪೃ॒ಷ್ಠ-ಙ್ಗಿ॒ರೇರಿ॑ವ ।
ಊ॒ರ್ಧ್ವ ಪ॑ವಿತ್ರೋ ವಾ॒ಜಿನೀ॑ವ ಸ್ವ॒ಮೃತ॑ಮಸ್ಮಿ । ದ್ರವಿ॑ಣ॒ಗ್ಂ॒ ಸವ॑ರ್ಚಸಮ್ । ಸುಮೇಧಾ ಅ॑ಮೃತೋ॒ಖ್ಷಿತಃ । ಇತಿ ತ್ರಿಶಙ್ಕೋ-ರ್ವೇದಾ॑ನುವ॒ಚನಮ್ ॥ 18 ॥
(ಅ॒ಹಗ್ಂ ಷಟ್) (ಅ. 10)

ಅನುವಾಕಂ 11
ವೇದಮನೂಚ್ಯಾ- ಽಚಾರ್ಯೋನ್ತೇವಾಸಿನ-ಮ॑ನುಶಾ॒ಸ್ತಿ ॥
ಸತ್ಯಂ॒-ವಁದ । ಧರ್ಮ॒-ಞ್ಚರ ॥ ಸ್ವಾದ್ಧ್ಯಾಯಾ᳚ನ್ಮಾ ಪ್ರ॒ಮದಃ । ಆಚಾರ್ಯಾಯ ಪ್ರಿಯ-ನ್ಧನಮಾಹೃತ್ಯ ಪ್ರಜಾತನ್ತು-ಮ್ಮಾ ವ್ಯ॑ವಚ್ಛೇ॒ಥ್ಸೀಃ । ಸತ್ಯಾನ್ನ ಪ್ರಮ॑ದಿತ॒ವ್ಯಮ್ । ಧರ್ಮಾನ್ನ ಪ್ರಮ॑ದಿತ॒ವ್ಯಮ್ । ಕುಶಲಾನ್ನ ಪ್ರಮ॑ದಿತ॒ವ್ಯಮ್ ।
ಭೂತ್ಯೈ ನ ಪ್ರಮ॑ದಿತ॒ವ್ಯಮ್ । ಸ್ವಾದ್ಧ್ಯಾಯ ಪ್ರವಚನಾಭ್ಯಾ-ನ್ನ ಪ್ರಮ॑ದಿತ॒ವ್ಯಮ್ ॥ 19 ॥

ದೇವಪಿತೃಕಾರ್ಯಾಭ್ಯಾ-ನ್ನ ಪ್ರಮ॑ದಿತ॒ವ್ಯಮ್ ॥
ಮಾತೃ॑ದೇವೋ॒ ಭವ । ಪಿತೃ॑ದೇವೋ॒ ಭವ ।
ಆಚಾರ್ಯ॑ ದೇವೋ॒ ಭವ । ಅತಿಥಿ॑ದೇವೋ॒ ಭವ ॥
ಯಾನ್ಯನವದ್ಯಾನಿ॑ ಕರ್ಮಾ॒ಣಿ । ತಾನಿ ಸೇವಿ॑ತವ್ಯಾ॒ನಿ ।
ನೋ ಇ॑ತರಾ॒ಣಿ ॥ ಯಾನ್ಯಸ್ಮಾಕಗ್ಂ ಸುಚ॑ರಿತಾ॒ನಿ । ತಾನಿ ತ್ವಯೋ॑ಪಾಸ್ಯಾ॒ನಿ ॥ 20 ॥

ನೋ ಇ॑ತರಾ॒ಣಿ ॥ ಯೇ ಕೇ ಚಾಸ್ಮ-ಚ್ಛ್ರೇಯಾಗ್ಂ॑ಸೋ ಬ್ರಾ॒ಹ್ಮಣಾಃ । ತೇಷಾ-ನ್ತ್ವಯಾ-ಽಽಸನೇ ನ ಪ್ರಶ್ವ॑ಸಿತ॒ವ್ಯಮ್ ॥ ಶ್ರದ್ಧ॑ಯಾ ದೇ॒ಯಮ್ । ಅಶ್ರದ್ಧ॑ಯಾ-ಽದೇ॒ಯಮ್ । ಶ್ರಿ॑ಯಾ ದೇ॒ಯಮ್ । ಹ್ರಿ॑ಯಾ ದೇ॒ಯಮ್ । ಭಿ॑ಯಾ ದೇ॒ಯಮ್ । ಸಂ​ವಿಁ॑ದಾ ದೇ॒ಯಮ್ ॥
ಅಥ ಯದಿ ತೇ ಕರ್ಮವಿಚಿಕಿಥ್ಸಾ ವಾ ವೃತ್ತ ವಿಚಿಕಿ॑ಥ್ಸಾ ವಾ॒ ಸ್ಯಾತ್ ॥ 21 ॥

ಯೇ ತತ್ರ ಬ್ರಾಹ್ಮಣಾ᳚-ಸ್ಸಮ್ಮ॒ರ॒.ಶಿನಃ । ಯುಕ್ತಾ॑ ಆಯು॒ಕ್ತಾಃ ।
ಅಲೂಖ್ಷಾ॑ ಧರ್ಮ॑ಕಾಮಾ॒-ಸ್ಸ್ಯುಃ । ಯಥಾ ತೇ॑ ತತ್ರ॑ ವರ್ತೇ॒ರನ್ನ್ । ತಥಾ ತತ್ರ॑ ವರ್ತೇ॒ಥಾಃ ॥ ಅಥಾಭ್ಯಾ᳚ಖ್ಯಾತೇ॒ಷು । ಯೇ ತತ್ರ ಬ್ರಾಹ್ಮಣಾ᳚-ಸ್ಸಮ್ಮ॒ರ್॒ಶಿನಃ । ಯುಕ್ತಾ॑ ಆಯು॒ಕ್ತಾಃ ।
ಅಲೂಖ್ಷಾ॑ ಧರ್ಮ॑ ಕಾಮಾ॒-ಸ್ಸ್ಯುಃ । ಯಥಾ ತೇ॑ ತೇಷು॑ ವರ್ತೇ॒ರನ್ನ್ ॥ 22 ॥

ತಥಾ ತೇಷು॑ ವರ್ತೇ॒ಥಾಃ ॥ ಏಷ॑ ಆದೇ॒ಶಃ ।
ಏಷ ಉ॑ಪದೇ॒ಶಃ । ಏಷಾ ವೇ॑ದೋಪ॒ನಿಷತ್ । ಏತದ॑ನುಶಾ॒ಸನಮ್ । ಏವ ಮುಪಾ॑ಸಿತ॒ವ್ಯಮ್ । ಏವ ಮುಚೈತ॑ದುಪಾ॒ಸ್ಯಮ್ ॥ 23 ॥
(ಸ್ವಾದ್ಧ್ಯಾಯಪ್ರವಚನಾಭ್ಯಾ-ನ್ನ ಪ್ರಮ॑ದಿತ॒ವ್ಯಂ – ತಾನಿತ್ವಯೋ॑ಪಾಸ್ಯಾ॒ನಿ – ಸ್ಯಾತ್ – ತೇಷು॑ ವರ್ತೇ॒ರನ್ಥ್ – +ಸ॒ಪ್ತ ಚ॑) (ಅ. 11)
ಅನುವಾಕಂ 12
ಶನ್ನೋ॑ ಮಿ॒ತ್ರ-ಶ್ಶಂ-ವಁರು॑ಣಃ । ಶನ್ನೋ॑ ಭವತ್ವರ್ಯ॒ಮಾ ।
ಶನ್ನ॒ ಇನ್ದ್ರೋ॒ ಬೃಹ॒ಸ್ಪತಿಃ॑ । ಶನ್ನೋ॒ ವಿಷ್ಣು॑ ರುರುಕ್ರ॒ಮಃ । ನಮೋ॒ ಬ್ರಹ್ಮ॑ಣೇ । ನಮ॑ಸ್ತೇ ವಾಯೋ ।
ತ್ವಮೇ॒ವ ಪ್ರ॒ತ್ಯಖ್ಷ॒-ಮ್ಬ್ರಹ್ಮಾ॑ಸಿ ।
ತ್ವಾಮೇ॒ವ ಪ್ರ॒ತ್ಯಖ್ಷ॒-ಮ್ಬ್ರಹ್ಮಾ ವಾ॑ದಿಷಮ್ ।
ಋ॒ತಮ॑ವಾದಿಷಮ್ । ಸ॒ತ್ಯಮ॑ವಾದಿಷಮ್ । ತನ್ಮಾಮಾ॑ವೀತ್ । ತದ್ವ॒ಕ್ತಾರ॑ಮಾವೀತ್ । ಆವೀ॒ನ್ಮಾಮ್ ।
ಆವೀ᳚ದ್ವ॒ಕ್ತಾರ᳚ಮ್ ॥ ಓಂ ಶಾನ್ತಿ॒-ಶ್ಶಾನ್ತಿ॒-ಶ್ಶಾನ್ತಿಃ॑ ॥ 24 ॥
(ಸ॒ತ್ಯಮ॑ವಾದಿಷ॒-ಮ್ಪಞ್ಚ॑ ಚ) (ಅ. 12)
॥ ಇತಿ ಶೀಖ್ಷಾವಲ್ಲೀ ಸಮಾಪ್ತಾ ॥

॥ ಹರಿಃ॑ ಓಮ್ ॥
॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಆರಣ್ಯಕೇ ಸಪ್ತಮಃ ಪ್ರಪಾಠಕ-ಸ್ಸಮಾಪ್ತಃ ॥