વાસુદેવ સ્તોત્રમ્ (મહાભારતમ્)

(શ્રીમહાભારતે ભીષ્મપર્વણિ પંચષષ્ટિતમોઽધ્યાયે શ્લો: 47)

વિશ્વાવસુર્વિશ્વમૂર્તિર્વિશ્વેશો
વિષ્વક્સેનો વિશ્વકર્મા વશી ચ ।
વિશ્વેશ્વરો વાસુદેવોઽસિ તસ્મા-
-દ્યોગાત્માનં દૈવતં ત્વામુપૈમિ ॥ 47 ॥

જય વિશ્વ મહાદેવ જય લોકહિતેરત ।
જય યોગીશ્વર વિભો જય યોગપરાવર ॥ 48 ॥

પદ્મગર્ભ વિશાલાક્ષ જય લોકેશ્વરેશ્વર ।
ભૂતભવ્યભવન્નાથ જય સૌમ્યાત્મજાત્મજ ॥ 49 ॥

અસંખ્યેયગુણાધાર જય સર્વપરાયણ ।
નારાયણ સુદુષ્પાર જય શાર્ઙ્ગધનુર્ધર ॥ 50 ॥

જય સર્વગુણોપેત વિશ્વમૂર્તે નિરામય ।
વિશ્વેશ્વર મહાબાહો જય લોકાર્થતત્પર ॥ 51 ॥

મહોરગવરાહાદ્ય હરિકેશ વિભો જય ।
હરિવાસ દિશામીશ વિશ્વાવાસામિતાવ્યય ॥ 52 ॥

વ્યક્તાવ્યક્તામિતસ્થાન નિયતેંદ્રિય સત્ક્રિય ।
અસંખ્યેયાત્મભાવજ્ઞ જય ગંભીરકામદ ॥ 53 ॥

અનંતવિદિત બ્રહ્મન્ નિત્યભૂતવિભાવન ।
કૃતકાર્ય કૃતપ્રજ્ઞ ધર્મજ્ઞ વિજયાવહ ॥ 54 ॥

ગુહ્યાત્મન્ સર્વયોગાત્મન્ સ્ફુટ સંભૂત સંભવ ।
ભૂતાદ્ય લોકતત્ત્વેશ જય ભૂતવિભાવન ॥ 55 ॥

આત્મયોને મહાભાગ કલ્પસંક્ષેપતત્પર ।
ઉદ્ભાવનમનોભાવ જય બ્રહ્મજનપ્રિય ॥ 56 ॥

નિસર્ગસર્ગનિરત કામેશ પરમેશ્વર ।
અમૃતોદ્ભવ સદ્ભાવ મુક્તાત્મન્ વિજયપ્રદ ॥ 57 ॥

પ્રજાપતિપતે દેવ પદ્મનાભ મહાબલ ।
આત્મભૂત મહાભૂત સત્વાત્મન્ જય સર્વદા ॥ 58 ॥

પાદૌ તવ ધરા દેવી દિશો બાહુ દિવં શિરઃ ।
મૂર્તિસ્તેઽહં સુરાઃ કાયશ્ચંદ્રાદિત્યૌ ચ ચક્ષુષી ॥ 59 ॥

બલં તપશ્ચ સત્યં ચ કર્મ ધર્માત્મજં તવ ।
તેજોઽગ્નિઃ પવનઃ શ્વાસ આપસ્તે સ્વેદસંભવાઃ ॥ 60 ॥

અશ્વિનૌ શ્રવણૌ નિત્યં દેવી જિહ્વા સરસ્વતી ।
વેદાઃ સંસ્કારનિષ્ઠા હિ ત્વયીદં જગદાશ્રિતમ્ ॥ 61 ॥

ન સંખ્યા ન પરીમાણં ન તેજો ન પરાક્રમમ્ ।
ન બલં યોગયોગીશ જાનીમસ્તે ન સંભવમ્ ॥ 62 ॥

ત્વદ્ભક્તિનિરતા દેવ નિયમૈસ્ત્વાં સમાશ્રિતાઃ ।
અર્ચયામઃ સદા વિષ્ણો પરમેશં મહેશ્વરમ્ ॥ 63 ॥

ઋષયો દેવગંધર્વા યક્ષરાક્ષસપન્નગાઃ ।
પિશાચા માનુષાશ્ચૈવ મૃગપક્ષિસરીસૃપાઃ ॥ 64 ॥

એવમાદિ મયા સૃષ્ટં પૃથિવ્યાં ત્વત્પ્રસાદજમ્ ।
પદ્મનાભ વિશાલાક્ષ કૃષ્ણ દુઃખપ્રણાશન ॥ 65 ॥

ત્વં ગતિઃ સર્વભૂતાનાં ત્વં નેતા ત્વં જગદ્ગુરુઃ ।
ત્વત્પ્રસાદેન દેવેશ સુખિનો વિબુધાઃ સદા ॥ 66 ॥

પૃથિવી નિર્ભયા દેવ ત્વત્પ્રસાદાત્સદાઽભવત્ ।
તસ્માદ્ભવ વિશાલાક્ષ યદુવંશવિવર્ધનઃ ॥ 67 ॥

ધર્મસંસ્થાપનાર્થાય દૈત્યાનાં ચ વધાય ચ ।
જગતો ધારણાર્થાય વિજ્ઞાપ્યં કુરુ મે પ્રભો ॥ 68 ॥

યત્તત્પરમકં ગુહ્યં ત્વત્પ્રસાદાદિદં વિભો ।
વાસુદેવ તદેતત્તે મયોદ્ગીતં યથાતથમ્ ॥ 69 ॥

સૃષ્ટ્વા સંકર્ષણં દેવં સ્વયમાત્માનમાત્મના ।
કૃષ્ણ ત્વમાત્મનો સાક્ષી પ્રદ્યુમ્નં ચાત્મસંભવમ્ ॥ 70 ॥

પ્રદ્યુમ્નાદનિરુદ્ધં ત્વં યં વિદુર્વિષ્ણુમવ્યયમ્ ।
અનિરુદ્ધોઽસૃજન્માં વૈ બ્રહ્માણં લોકધારિણમ્ ॥ 71 ॥

વાસુદેવમયઃ સોઽહં ત્વયૈવાસ્મિ વિનિર્મિતઃ ।
[તસ્માદ્યાચામિ લોકેશ ચતુરાત્માનમાત્મના।]
વિભજ્ય ભાગશોઽઽત્માનં વ્રજ માનુષતાં વિભો ॥ 72 ॥

તત્રાસુરવધં કૃત્વા સર્વલોકસુખાય વૈ ।
ધર્મં પ્રાપ્ય યશઃ પ્રાપ્ય યોગં પ્રાપ્સ્યસિ તત્ત્વતઃ ॥ 73 ॥

ત્વાં હિ બ્રહ્મર્ષયો લોકે દેવાશ્ચામિતવિક્રમ ।
તૈસ્તૈર્હિ નામભિર્યુક્તા ગાયંતિ પરમાત્મકમ્ ॥ 74 ॥

સ્થિતાશ્ચ સર્વે ત્વયિ ભૂતસંઘાઃ
કૃત્વાશ્રયં ત્વાં વરદં સુબાહો ।
અનાદિમધ્યાંતમપારયોગં
લોકસ્ય સેતું પ્રવદંતિ વિપ્રાઃ ॥ 75 ॥

ઇતિ શ્રીમહાભારતે ભીષ્મપર્વણિ પંચષષ્ટિતમોઽધ્યાયે વાસુદેવ સ્તોત્રમ્ ।