વારાહી સહસ્ર નામ સ્તોત્રમ્

દેવ્યુવાચ ।
શ્રીકંઠ કરુણાસિંધો દીનબંધો જગત્પતે ।
ભૂતિભૂષિતસર્વાંગ પરાત્પરતર પ્રભો ॥ 1 ॥

કૃતાંજલિપુટા ભૂત્વા પૃચ્છામ્યેકં દયાનિધે ।
આદ્યા યા ચિત્સ્વરૂપા યા નિર્વિકારા નિરંજના ॥ 2 ॥

બોધાતીતા જ્ઞાનગમ્યા કૂટસ્થાનંદવિગ્રહા ।
અગ્રાહ્યાતીંદ્રિયા શુદ્ધા નિરીહા સ્વાવભાસિકા ॥ 3 ॥

ગુણાતીતા નિષ્પ્રપંચા હ્યવાઙ્મનસગોચરા ।
પ્રકૃતિર્જગદુત્પત્તિસ્થિતિસંહારકારિણી ॥ 4 ॥

રક્ષાર્થં જગતો દેવકાર્યાર્થં વા સુરદ્વિષામ્ ।
નાશાય ધત્તે સા દેહં તત્તત્કાર્યૈકસાધકમ્ ॥ 5 ॥

તત્ર ભૂધરણાર્થાય યજ્ઞવિસ્તારહેતવે ।
વિદ્યુત્કેશહિરણ્યાક્ષબાલાકાદિવધાય ચ ॥ 6 ॥

આવિર્બભૂવ યા શક્તિર્ઘોરા ભૂદારરૂપિણી ।
વારાહી વિકટાકારા દાનવાસુરનાશિની ॥ 7 ॥

સદ્યઃ સિદ્ધિકરી દેવી ઘોરાદ્ઘોરતરા શિવા ।
તસ્યાઃ સહસ્રનામાખ્યં સ્તોત્રં મે સમુદીરય ॥ 8 ॥

કૃપાલેશોઽસ્તિ મયિ ચેદ્ભાગ્યં મે યદિ વા ભવેત્ ।
અનુગ્રાહ્યા યદ્યહં સ્યાં તદા વદ દયાનિધે ॥ 9 ॥

ઈશ્વર ઉવાચ ।
સાધુ સાધુ વરારોહે ધન્યા બહુમતાસિ મે ।
શુશ્રૂષયા સમુત્પન્ના ભક્તિઃ શ્રદ્ધાન્વિતા તવ ॥ 10 ॥

સહસ્રનામ વારાહ્યાઃ સર્વસિદ્ધિવિધાયિ ચ ।
તવ ચેન્ન પ્રવક્ષ્યામિ પ્રિયે કસ્ય વદામ્યહમ્ ॥ 11 ॥

કિંતુ ગોપ્યં પ્રયત્નેન સંરક્ષ્યં પ્રાણતોઽપિ ચ ।
વિશેષતઃ કલિયુગે ન દેયં યસ્ય કસ્યચિત્ ।
સર્વેઽન્યથા સિદ્ધિભાજો ભવિષ્યંતિ વરાનને ॥ 12 ॥

ઓં અસ્ય શ્રીવારાહીસહસ્રનામસ્તોત્રસ્ય મહાદેવ ઋષિઃ । અનુષ્ટુપ્ છંદઃ । વારાહી દેવતા । ઐં બીજમ્ । ક્રોં શક્તિઃ । હું કીલકમ્ । મમ સર્વાર્થસિદ્ધ્યર્થે જપે વિનિયોગઃ ।

ઓં વારાહી વામની વામા બગળા વાસવી વસુઃ ।
વૈદેહી વીરસૂર્બાલા વરદા વિષ્ણુવલ્લભા ॥ 13 ॥

વંદિતા વસુદા વશ્યા વ્યાત્તાસ્યા વંચિની બલા ।
વસુંધરા વીતિહોત્રા વીતરાગા વિહાયસી ॥ 14 ॥

સર્વા ખનિપ્રિયા કામ્યા કમલા કાંચની રમા ।
ધૂમ્રા કપાલિની વામા કુરુકુલ્લા કલાવતી ॥ 15 ॥

યામ્યાઽઽગ્નેયી ધરા ધન્યા ધર્મિણી ધ્યાનિની ધ્રુવા ।
ધૃતિર્લક્ષ્મીર્જયા તુષ્ટિઃ શક્તિર્મેધા તપસ્વિની ॥ 16 ॥

વેધા જયા કૃતિઃ કાંતિઃ સ્વાહા શાંતિર્દમા રતિઃ ।
લજ્જા મતિઃ સ્મૃતિર્નિદ્રા તંત્રા ગૌરી શિવા સ્વધા ॥ 17 ॥

ચંડી દુર્ગાઽભયા ભીમા ભાષા ભામા ભયાનકા ।
ભૂદારા ભયહા ભીરુર્ભૈરવી ભંગરા ભટી ॥ 18 ॥

ઘુર્ઘુરા ઘોષણા ઘોરા ઘોષિણી ઘોણસંયુતા ।
ઘનાઘના ઘર્ઘરા ચ ઘોણયુક્તાઽઘનાશિની ॥ 19 ॥

પૂર્વાગ્નેયી યાતુ યામ્યા વાયવ્યુત્તરવારુણી ।
ઐશાન્યૂર્ધ્વાધઃસ્થિતા ચ પૃષ્ઠદક્ષાગ્રવામગા ॥ 20 ॥

હૃન્નાભિબ્રહ્મરંધ્રાર્કસ્વર્ગપાતાળભૂમિગા ।
ઐં શ્રીઃ હ્રીઃ ક્લીં તીર્થગતિઃ પ્રીતિર્ધીર્ગીઃ કલાઽવ્યયા ॥ 21 ॥

ઋગ્યજુઃ સામરૂપા ચ પરા પોત્રિણ્યુદુંબરા ।
ગદાસિશક્તિચાપેષુશૂલચક્રર્ષ્ટિધારિણી ॥ 22 ॥

જરતી યુવતી બાલા ચતુરંગબલોત્કટા ।
સત્યાક્ષરા નિધિર્નેત્રી ધાત્રી પોત્રી પરા પટુઃ ॥ 23 ॥

ક્ષેત્રજ્ઞા કંપિની જ્યેષ્ઠા દુરાધર્ષા ધુરંધરા ।
માલિની માનિની માતા માનનીયા મનસ્વિની ॥ 24 ॥

મદોત્કટા મન્યુકરી મનુરૂપા મનોજવા ।
મેદસ્વિની મદ્યરતા મધુપા મંગળાઽમરા ॥ 25 ॥

માયા માતાઽઽમયહરી મૃડાની મહિળા મૃતિઃ ।
મહાદેવી મોહહરી મંજુર્મૃત્યુંજયાઽમલા ॥ 26 ॥

માંસલા માનવા મૂલા મહારાત્રિર્મદાલસા ।
મૃગાંકા મેનકા માન્યા મહિષઘ્ની મદંતિકા ॥ 27 ॥

મૂર્છામોહમૃષામોઘામદમૃત્યુમલાપહા ।
સિંહર્ક્ષમહિષવ્યાઘ્રમૃગક્રોડાનના ધુની ॥ 28 ॥

ધરિણી ધારિણી ધેનુર્ધરિત્રી ધાવની ધવા ।
ધર્મધ્વના ધ્યાનપરા ધનધાન્યધરાપ્રદા ॥ 29 ॥

પાપદોષરિપુવ્યાધિનાશિની સિદ્ધિદાયિની ।
કલાકાષ્ઠાક્ષમાપક્ષાહસ્ત્રુટિશ્વાસરૂપિણી ॥ 30 ॥

સમૃદ્ધા સુભુજા રૌદ્રી રાધા રાગા રમારણિઃ ।
રામા રતિપ્રિયા રુષ્ટા રક્ષિણી રવિમધ્યગા ॥ 31 ॥

રજની રમણી રેવા રંકિની રંજિની રમા ।
રોષા રોષવતી રૂક્ષા કરિરાજ્યપ્રદા રતા ॥ 32 ॥

રૂક્ષા રૂપવતી રાસ્યા રુદ્રાણી રણપંડિતા ।
ગંગા ચ યમુના ચૈવ સરસ્વતિસ્વસૂર્મધુઃ ॥ 33 ॥

ગંડકી તુંગભદ્રા ચ કાવેરી કૌશિકી પટુઃ ।
કટ્વોરગવતી ચારા સહસ્રાક્ષા પ્રતર્દના ॥ 34 ॥

સર્વજ્ઞા શાંકરી શાસ્ત્રી જટાધારિણ્યયોરદા ।
યાવની સૌરભી કુબ્જા વક્રતુંડા વધોદ્યતા ॥ 35 ॥

ચંદ્રાપીડા વેદવેદ્યા શંખિની નીલલોહિતા ।
ધ્યાનાતીતાઽપરિચ્છેદ્યા મૃત્યુરૂપા ત્રિવર્ગદા ॥ 36 ॥

અરૂપા બહુરૂપા ચ નાનારૂપા નતાનના ।
વૃષાકપિર્વૃષારૂઢા વૃષેશી વૃષવાહના ॥ 37 ॥

વૃષપ્રિયા વૃષાવર્તા વૃષપર્વા વૃષાકૃતિઃ ।
કોદંડિની નાગચૂડા ચક્ષુષ્યા પરમાર્થિકા ॥ 38 ॥

દુર્વાસા દુર્ગહા દેવી દુરાવાસા દુરારિહા ।
દુર્ગા રાધા દુઃખહંત્રી દુરારાધ્યા દવીયસી ॥ 39 ॥

દુરાવાસા દુષ્પ્રહસ્તા દુષ્પ્રકંપા દુરૂહિણી ।
સુવેણી રમણી શ્યામા મૃગવ્યાધાર્ઘતાપિની ॥ 40 ॥

ઉગ્રા તાર્ક્ષી પાશુપતી કૌણપી કુણપાશના । [દુર્ગા]
કપર્દિની કામકામા કમનીયા કલોજ્જ્વલા ॥ 41 ॥

કાસાવહૃત્કારકાની કંબુકંઠી કૃતાગમા ।
કર્કશા કારણા કાંતા કલ્પાઽકલ્પા કટંકટા ॥ 42 ॥

શ્મશાનનિલયા ભિન્ના ગજારુઢા ગજાપહા ।
તત્પ્રિયા તત્પરા રાયા સ્વર્ભાનુઃ કાલવંચિની ॥ 43 ॥

શાખા વિશાખા ગોશાખા સુશાખા શેષશાખિની ।
વ્યંગા શુભાંગા વામાંગા નીલાંગાઽનંગરૂપિણી ॥ 44 ॥

સાંગોપાંગા ચ સારંગા સુભાંગા રંગરૂપિણી ।
ભદ્રા સુભદ્રા ભદ્રાક્ષી સિંહિકા વિનતાઽદિતિઃ ॥ 45 ॥

હૃદ્યાઽવદ્યા સુપદ્યા ચ ગદ્યપદ્યપ્રિયા પ્રસૂઃ ।
ચર્ચિકા ભોગવત્યંબા સારસી શબરી નટી ॥ 46 ॥

યોગિની પુષ્કલાઽનંતા પરા સાંખ્યા શચી સતી ।
નિમ્નગા નિમ્નનાભિશ્ચ સહિષ્ણુર્જાગૃતી લિપિઃ ॥ 47 ॥

દમયંતી દમી દંડોદ્દંડિની દારદાયિકા ।
દીપિની દાવિની ધાત્રી દક્ષકન્યા દમ્યા દરત્ ॥ 48 ॥

દાહિની દ્રવિણી દર્વી દંડિની દંડનાયિકા ।
દાનપ્રિયા દોષહંત્રી દુઃખદારિદ્ર્યનાશિની ॥ 49 ॥

દોષદા દોષકૃદ્દોગ્ધ્રી દોહતી દેવિકાઽધના ।
દર્વીકરી દુર્વલિતા દુર્યુગાઽદ્વયવાદિની ॥ 50 ॥

ચરાચરાઽનંતવૃષ્ટિરુન્મત્તા કમલાઽલસા ।
તારિણી તારકાંતારા પરમાત્માબ્જલોચના ॥ 51 ॥

ઇંદુર્હિરણ્યકવચા વ્યવસ્થા વ્યવસાયિકા ।
ઈશનંદા નદી નાગી યક્ષિણી સર્પિણી વરી ॥ 52 ॥

સુધા સુરા વિશ્વસહા સુવર્ણાંગદધારિણી ।
જનની પ્રીતિભાગેશી સામ્રાજ્ઞી સંવિદુત્તમા ॥ 53 ॥

અમેયાઽરિષ્ટદમની પિંગળા લિંગધારિણી ।
ચામુંડા પ્લાવિની હાલા બૃહજ્જ્યોતિરુરુક્રમા ॥ 54 ॥

સુપ્રતીકા ચ સુગ્રીવા હવ્યવાહા પ્રલાપિની ।
નભસ્યા માધવી જ્યેષ્ઠા શિશિરા જ્વાલિની રુચિઃ ॥ 55 ॥

શુક્લા શુક્રા શુચા શોકા શુકી ભેકી પિકી બકી ।
પૃષદશ્વા નભોયોનિઃ સુપ્રતીકા વિભાવરી ॥ 56 ॥

ગર્વિતા ગુર્વિણી ગણ્યા ગુરુર્ગુરુધરી ગયા ।
ગંધર્વી ગણિકા ગુંદ્રા ગારુડી ગોપિકાઽગ્રગા ॥ 57 ॥

ગણેશી ગામિની ગંતા ગોપતિર્ગંધિની ગવી ।
ગર્જિતા ગાનની ગોના ગોરક્ષા ગોવિદાં ગતિઃ ॥ 58 ॥

ગ્રાથિકી ગ્રથિકૃદ્ગોષ્ઠી ગર્ભરૂપા ગુણૈષિણી ।
પારસ્કરી પાંચનદા બહુરૂપા વિરૂપિકા ॥ 59 ॥

ઊહા વ્યૂહા દુરૂહા ચ સમ્મોહા મોહહારિણી ।
યજ્ઞવિગ્રહિણી યજ્ઞા યાયજૂકા યશસ્વિની ॥ 60 ॥

અગ્નિષ્ટોમાઽત્યગ્નિષ્ટોમા વાજપેયશ્ચ ષોડશી ।
પુંડરીકાઽશ્વમેધશ્ચ રાજસૂયશ્ચ નાભસઃ ॥ 61 ॥

સ્વિષ્ટકૃદ્બહુસૌવર્ણો ગોસવશ્ચ મહાવ્રતઃ ।
વિશ્વજિદ્બ્રહ્મયજ્ઞશ્ચ પ્રાજાપત્યઃ શિલાયવઃ ॥ 62 ॥

અશ્વક્રાંતા રથક્રાંતા વિષ્ણુક્રાંતા વિભાવસુઃ ।
સૂર્યક્રાંતા ગજક્રાંતા બલિભિન્નાગયજ્ઞકઃ ॥ 63 ॥

સાવિત્રી ચાર્ધસાવિત્રી સર્વતોભદ્રવારુણા ।
આદિત્યામય ગોદોહ ગવામય મૃગામયા ॥ 64 ॥

સર્પમયઃ કાલપિંજઃ કૌંડિન્યોપનાગાહલઃ ।
અગ્નિવિદ્દ્વાદશાહસ્વોપાંશુઃ સોમ વિધો હનઃ ॥ 65 ॥

અશ્વપ્રતિગ્રહો બર્હિરથોઽભ્યુદય ઋદ્ધિરાટ્ ।
સર્વસ્વદક્ષિણો દીક્ષા સોમાખ્યા સમિદાહ્વયઃ ॥ 66 ॥

કઠાયનશ્ચ ગોદોહઃ સ્વાહાકારસ્તનૂનપાત્ ।
દંડા પુરુષ મેધશ્ચ શ્યેનો વજ્ર ઇષુર્યમઃ ॥ 67 ॥

અંગિરાઃ કંકભેરુંડા ચાંદ્રાયણપરાયણા ।
જ્યોતિષ્ટોમઃ ગુદો દર્શો નંદ્યાખ્યઃ પૌર્ણમાસિકઃ ॥ 68 ॥

ગજપ્રતિગ્રહો રાત્રિઃ સૌરભઃ શાંકલાયનઃ ।
સૌભાગ્યકૃચ્ચ કારીષો બૈદલાયનરામઠૌ ॥ 69 ॥

શોચિષ્કારી નાચિકેતઃ શાંતિકૃત્પુષ્ટિકૃત્તથા ।
વૈનતેયોચ્ચાટનૌ ચ વશીકરણ મારણે ॥ 70 ॥

ત્રૈલોક્યમોહનો વીરઃ કંદર્પબલશાતનઃ ।
શંખચૂડો ગજચ્છાયો રૌદ્રાખ્યો વિષ્ણુવિક્રમઃ ॥ 71 ॥

ભૈરવઃ કવહાખ્યશ્ચાવભૃથોઽષ્ટકપાલકઃ ।
શ્રૌષટ્ વૌષટ્ વષટ્કારઃ પાકસંસ્થા પરિશ્રુતી ॥ 72 ॥

ચયનો નરમેધશ્ચ કારીરી રત્નદાનિકા ।
સૌત્રામણી ચ ભારુંદા બાર્હસ્પત્યો બલંગમઃ ॥ 73 ॥

પ્રચેતાઃ સર્વસત્રશ્ચ ગજમેધઃ કરંભકઃ ।
હવિઃસંસ્થા સોમસંસ્થા પાકસંસ્થા ગરુત્મતી ॥ 74 ॥

સત્યસૂર્યશ્ચમસઃ સ્રુક્ સ્રુવોલૂખલ મેક્ષણી ।
ચપલો મંથની મેઢી યૂપઃ પ્રાગ્વંશકુંચિકા ॥ 75 ॥

રશ્મિરંશુશ્ચ દોભ્યશ્ચ વારુણોદઃ પવિઃ કુથા ।
આપ્તોર્યામો દ્રોણકલશો મૈત્રાવરુણ આશ્વિનઃ ॥ 76 ॥

પાત્નીવતશ્ચ મંથી ચ હારિયોજન એવ ચ ।
પ્રતિપ્રસ્થાનશુક્રૌ ચ સામિધેની સમિત્સમા ॥ 77 ॥

હોતાઽધ્વર્યુસ્તથોદ્ગાતા નેતા ત્વષ્ટા ચ યોત્રિકા ।
આગ્નીધ્રોઽચ્છાવકાષ્ટાવગ્ગ્રાવસ્તુત્પ્રતર્દકઃ ॥ 78 ॥

સુબ્રહ્મણ્યો બ્રાહ્મણશ્ચ મૈત્રાવરુણવારુણૌ ।
પ્રસ્તોતા પ્રતિપ્રસ્થાતા યજમાનો ધ્રુવંત્રિકા ॥ 79 ॥

આમિક્ષા પૃષદાજ્યં ચ હવ્યં કવ્યં ચરુઃ પયઃ ।
જુહુદ્ઘ્રાવોપભૃદ્બ્રહ્મા ત્રયી ત્રેતા તરસ્વિની ॥ 80 ॥

પુરોડાશઃ પશૂકર્ષઃ પ્રોક્ષણી બ્રહ્મયજ્ઞિની ।
અગ્નિજિહ્વા દર્ભરોમા બ્રહ્મશીર્ષા મહોદરી ॥ 81 ॥

અમૃતપ્રાશિકા નારાયણી નગ્ના દિગંબરા ।
ઓંકારિણી ચતુર્વેદરૂપા શ્રુતિરનુલ્બણા ॥ 82 ॥

અષ્ટાદશભુજા રંભા સત્યા ગગનચારિણી ।
ભીમવક્ત્રા મહાવક્ત્રા કીર્તિરાકૃષ્ણપિંગળા ॥ 83 ॥

કૃષ્ણમૂર્ધા મહામૂર્ધા ઘોરમૂર્ધા ભયાનના ।
ઘોરાનના ઘોરજિહ્વા ઘોરરાવા મહાવ્રતા ॥ 84 ॥

દીપ્તાસ્યા દીપ્તનેત્રા ચ ચંડપ્રહરણા જટી ।
સુરભી સૌલભી વીચી છાયા સંધ્યા ચ માંસલા ॥ 85 ॥

કૃષ્ણા કૃષ્ણાંબરા કૃષ્ણશારંગિણી કૃષ્ણવલ્લભા ।
ત્રાસિની મોહિની દ્વેષ્યા મૃત્યુરૂપા ભયાપહા ॥ 86 ॥

ભીષણા દાનવેંદ્રઘ્ની કલ્પકર્તા ક્ષયંકરી ।
અભયા પૃથિવી સાધ્વી કેશિની વ્યાધિજન્મહા ॥ 87 ॥

અક્ષોભ્યાઽઽહ્લાદિની કન્યા પવિત્રા રોપિણી શુભા ।
કન્યાદેવી સુરાદેવી ભીમાદેવી મદંતિકા ॥ 88 ॥

શાકંભરી મહાશ્વેતા ધૂમ્રા ધૂમ્રેશ્વરીશ્વરી ।
વીરભદ્રા મહાભદ્રા મહાદેવી મહાસુરી ॥ 89 ॥

શ્મશાનવાસિની દીપ્તા ચિતિસંસ્થા ચિતિપ્રિયા ।
કપાલહસ્તા ખટ્વાંગી ખડ્ગિની શૂલિની હલી ॥ 90 ॥

કાંતારિણી મહાયોગી યોગમાર્ગા યુગગ્રહા ।
ધૂમ્રકેતુર્મહાસ્યાયુર્યુગાનાં પરિવર્તિની ॥ 91 ॥

અંગારિણ્યંકુશકરા ઘંટાવર્ણા ચ ચક્રિણી ।
વેતાળી બ્રહ્મવેતાળી મહાવેતાળિકા તથા ॥ 92 ॥

વિદ્યારાજ્ઞી મોહરાજ્ઞી મહારાજ્ઞી મહોદરી ।
ભૂતં ભવ્યં ભવિષ્યં ચ સાંખ્યં યોગસ્તપો દમઃ ॥ 93 ॥

અધ્યાત્મં ચાધિદૈવં ચાધિભૂતાંશ એવ ચ ।
ઘંટારવા વિરૂપાક્ષી શિખિવિચ્છ્રીચયપ્રિયા ॥ 94 ॥

ખડ્ગશૂલગદાહસ્તા મહિષાસુરમર્દિની ।
માતંગી મત્તમાતંગી કૌશિકી બ્રહ્મવાદિની ॥ 95 ॥

ઉગ્રતેજા સિદ્ધસેના જૃંભિણી મોહિની તથા ।
જયા ચ વિજયા ચૈવ વિનતા કદ્રુરેવ ચ ॥ 96 ॥

ધાત્રી વિધાત્રી વિક્રાંતા ધ્વસ્તા મૂર્છા ચ મૂર્છની ।
દમની ધર્મિણી દમ્યા છેદિની તાપિની તપી ॥ 97 ॥

બંધિની બાધિની બંધા બોધાતીતા બુધપ્રિયા ।
હરિણી હારિણી હંત્રી ધરિણી ધારિણી ધરા ॥ 98 ॥

વિસાધિની સાધિની ચ સંધ્યા સંગોપની પ્રિયા ।
રેવતી કાલકર્ણી ચ સિદ્ધિર્લક્ષ્મીરરુંધતી ॥ 99 ॥

ધર્મપ્રિયા ધર્મરતિઃ ધર્મિષ્ઠા ધર્મચારિણી ।
વ્યુષ્ટિઃ ખ્યાતિઃ સિનીવાલી કુહૂઃ ઋતુમતી મૃતિઃ ॥ 100 ॥

ત્વાષ્ટ્રી વૈરોચની મૈત્રી નીરજા કૈટભેશ્વરી ।
ભ્રમણી ભ્રામણી ભ્રામા ભ્રમરી ભ્રામરી ભ્રમા ॥ 101 ॥

નિષ્કળા કલહા નીતા કૌલાકારા કળેબરા ।
વિદ્યુજ્જિહ્વા વર્ષિણી ચ હિરણ્યાક્ષનિપાતિની ॥ 102 ॥

જિતકામા કામૃગયા કોલા કલ્પાંગિની કલા । [કામગમા]
પ્રધાના તારકા તારા હિતાત્મા હિતભેદિની ॥ 103 ॥

દુરક્ષરા પરબ્રહ્મ મહાદાના મહાહવા ।
વારુણી વ્યરુણી વાણી વીણા વેણી વિહંગમા ॥ 104 ॥

મોદપ્રિયા મોદકિની પ્લવની પ્લાવિની પ્લુતિઃ ।
અજરા લોહિતા લાક્ષા પ્રતપ્તા વિશ્વભોજિની ॥ 105 ॥

મનો બુદ્ધિરહંકારઃ ક્ષેત્રજ્ઞા ક્ષેત્રપાલિકા ।
ચતુર્વેદા ચતુર્ભારા ચતુરંતા ચરુપ્રિયા ॥ 106 ॥

ચર્વિણી ચોરિણી ચારી શાંકરી ચર્મભૈરવી ।
નિર્લેપા નિષ્પ્રપંચા ચ પ્રશાંતા નિત્યવિગ્રહા ॥ 107 ॥

સ્તવ્યા સ્તવપ્રિયા વ્યાળા ગુરુરાશ્રિતવત્સલા ।
નિષ્કળંકા નિરાલંબા નિર્દ્વંદ્વા નિષ્પરિગ્રહા ॥ 108 ॥

નિર્ગુણા નિર્મલા નિત્યા નિરીહા નિરઘા નવા ।
નિરિંદ્રિયા નિરાભાસા નિર્મોહા નીતિનાયિકા ॥ 109 ॥

નિરિંધના નિષ્કળા ચ લીલાકારા નિરામયા ।
મુંડા વિરૂપા વિકૃતા પિંગળાક્ષી ગુણોત્તરા ॥ 110 ॥

પદ્મગર્ભા મહાગર્ભા વિશ્વગર્ભા વિલક્ષણા ।
પરમાત્મા પરેશાની પરા પારા પરંતપા ॥ 111 ॥

સંસારસેતુઃ ક્રૂરાક્ષી મૂર્છામુક્તા મનુપ્રિયા । [મગ્ના]
વિસ્મયા દુર્જયા દક્ષા દનુહંત્રી દયાલયા ॥ 112 ॥

પરબ્રહ્માઽઽનંદરૂપા સર્વસિદ્ધિવિધાયિની । ઓમ્ ।
એવમુડ્ડામરાતંત્રાન્મયોદ્ધૃત્ય પ્રકાશિતમ્ ॥ 113 ॥

ગોપનીયં પ્રયત્નેન નાખ્યેયં યસ્ય કસ્યચિત્ ।
યદીચ્છસિ દ્રુતં સિદ્ધિમૈશ્વર્યં ચિરજીવિતામ્ ॥ 114 ॥

આરોગ્યં નૃપસમ્માનં દાનાન્યસ્ય તુ કીર્તયેત્ ।
નામ્નાં સહસ્રં વારાહ્યાઃ મયા તે સમુદીરિતમ્ ॥ 115 ॥

યઃ પઠેચ્છૃણુયાદ્વાપિ સર્વપાપૈઃ પ્રમુચ્યતે ।
અશ્વમેધસહસ્રસ્ય વાજપેયશતસ્ય ચ ॥ 116 ॥

પુંડરીકાયુતસ્યાપિ ફલં પાઠાત્ પ્રજાયતે ।
પઠતઃ સર્વભાવેન સર્વા સ્યુઃ સિદ્ધયઃ કરે ॥ 117 ॥

જાયતે મહદૈશ્વર્યં સર્વેષાં દયિતો ભવેત્ ।
ઘનસારાયતે વહ્નિરગાધોબ્ધિઃ કણાયતે ॥ 118 ॥

સિદ્ધયશ્ચ તૃણાયંતે વિષમપ્યમૃતાયતે ।
હારાયંતે મહાસર્પાઃ સિંહઃ ક્રીડામૃગાયતે ॥ 119 ॥

દાસાયંતે મહીપાલા જગન્મિત્રાયતેઽખિલમ્ ।
તસ્માન્નામ્નાં સહસ્રેણ સ્તુતા સા જગદંબિકા ।
પ્રયચ્છત્યખિલાન્ કામાન્ દેહાંતે પરમાં ગતિમ્ ॥ 120 ॥

ઇતિ ઉડ્ડામરતંત્રે શ્રી આદિવારાહી સહસ્રનામ સ્તોત્રમ્ ॥