શ્રી સુબ્રહ્મણ્ય હૃદય સ્તોત્રમ્

અસ્ય શ્રીસુબ્રહ્મણ્યહૃદયસ્તોત્રમહામંત્રસ્ય, અગસ્ત્યો ભગવાન્ ઋષિઃ, અનુષ્ટુપ્છંદઃ, શ્રીસુબ્રહ્મણ્યો દેવતા, સૌં બીજં, સ્વાહા શક્તિઃ, શ્રીં કીલકં, શ્રીસુબ્રહ્મણ્ય પ્રસાદસિદ્ધ્યર્થે જપે વિનિયોગઃ ॥

કરન્યાસઃ –
સુબ્રહ્મણ્યાય અંગુષ્ઠાભ્યાં નમઃ ।
ષણ્મુખાય તર્જનીભ્યાં નમઃ ।
શક્તિધરાય મધ્યમાભ્યાં નમઃ ।
ષટ્કોણસંસ્થિતાય અનામિકાભ્યાં નમઃ ।
સર્વતોમુખાય કનિષ્ઠિકાભ્યાં નમઃ ।
તારકાંતકાય કરતલકરપૃષ્ઠાભ્યાં નમઃ ॥
હૃદયાદિ ન્યાસઃ –
સુબ્રહ્મણ્યાય હૃદયાય નમઃ ।
ષણ્મુખાય શિરસે સ્વાહા ।
શક્તિધરાય શિખાયૈ વષટ્ ।
ષટ્કોણસંસ્થિતાય કવચાય હુમ્ ।
સર્વતોમુખાય નેત્રત્રયાય વૌષટ્ ।
તારકાંતકાય અસ્ત્રાય ફટ્ ।
ભૂર્ભુવસ્સુવરોમિતિ દિગ્બંધઃ ॥

ધ્યાનમ્ ।
ષડ્વક્ત્રં શિખિવાહનં ત્રિનયનં ચિત્રાંબરાલંકૃતં
વજ્રં શક્તિમસિં ત્રિશૂલમભયં ખેટં ધનુશ્ચક્રકમ્ ।
પાશં કુક્કુટમંકુશં ચ વરદં દોર્ભિર્દધાનં સદા
ધ્યાયામીપ્સિત સિદ્ધિદં શિવસુતં શ્રીદ્વાદશાક્ષં ગુહમ્ ॥

લમિત્યાદિ પંચપૂજાં કુર્યાત્ ।

પીઠિકા ।
સત્યલોકે સદાનંદે મુનિભિઃ પરિવેષ્ટિતમ્ ।
પપ્રચ્છુર્મુનયઃ સર્વે બ્રહ્માણં જગતાં ગુરુમ્ ॥ 1 ॥

ભગવન્ સર્વલોકેશ સર્વજ્ઞ કમલાસન ।
સદાનંદ જ્ઞાનમૂર્તે સર્વભૂતહિતે રત ॥ 2 ॥

બહુધા પ્રોક્તમેતસ્ય ગુહસ્ય ચરિતં મહત્ ।
હૃદયં શ્રોતુમિચ્છામઃ તસ્યૈવ ક્રૌંચભેદિનઃ ॥ 3 ॥

બ્રહ્મોવાચ ।
શૃણ્વંતુ મુનયઃ સર્વે ગુહ્યાદ્ગુહ્યતરં મહત્ ।
સુબ્રહ્મણ્યસ્ય હૃદયં સર્વભૂતહિતોદયમ્ ॥ 4 ॥

સર્વાર્થસિદ્ધિદં પુણ્યં સર્વકાર્યૈક સાધનમ્ ।
ધર્માર્થકામદં ગુહ્યં ધનધાન્યપ્રવર્ધનમ્ ॥ 5 ॥

રહસ્યમેતદ્દેવાનાં અદેયં યસ્ય કસ્યચિત્ ।
સર્વમિત્રકરં ગોપ્યં તેજોબલસમન્વિતમ્ ॥ 6 ॥

પ્રવક્ષ્યામિ હિતાર્થં વઃ પરિતુષ્ટેન ચેતસા ।
હૃત્પદ્મકર્ણિકામધ્યે ધ્યાયેત્સર્વમનોહરમ્ ॥ 7 ॥

અથ હૃદયમ્ ।
સુવર્ણમંડપં દિવ્યં રત્નતોરણરાજિતમ્ ।
રત્નસ્તંભસહસ્રૈશ્ચ શોભિતં પરમાદ્ભુતમ્ ॥ 8 ॥

પરમાનંદનિલયં ભાસ્વત્સૂર્યસમપ્રભમ્ ।
દેવદાનવગંધર્વગરુડૈર્યક્ષકિન્નરૈઃ । ॥ 9 ॥

સેવાર્થમાગતૈઃ સિદ્ધૈઃ સાધ્યૈરધ્યુષિતં સદા ।
મહાયોગીંદ્રસંસેવ્યં મંદારતરુમંડિતમ્ ॥ 10 ॥

મણિવિદ્રુમવેદીભિર્મહતીભિરુદંચિતમ્ ।
તન્મધ્યેઽનંતરત્ન શ્રીચ્છટામંડલશોભિતમ્ ॥ 11 ॥

રત્નસિંહાસનં દિવ્યં રવિકોટિસમપ્રભમ્ ।
સર્વાશ્ચર્યમયં પુણ્યં સર્વતઃ સુપરિષ્કૃતમ્ ॥ 12 ॥

તન્મધ્યેઽષ્ટદલં પદ્મં ઉદ્યદર્કપ્રભોદયમ્ ।
નિગમાગમરોલંબલંબિતં ચિન્મયોદયમ્ ॥ 13 ॥

દિવ્યં તેજોમયં દિવ્યં દેવતાભિર્નમસ્કૃતમ્ ।
દેદીપ્યમાનં રુચિભિર્વિશાલં સુમનોહરમ્ ॥ 14 ॥

તન્મધ્યે સર્વલોકેશં ધ્યાયેત્સર્વાંગસુંદરમ્ ।
અનંતાદિત્યસંકાશં આશ્રિતાભીષ્ટદાયકમ્ ॥ 15 ॥

અચિંત્યજ્ઞાનવિજ્ઞાનતેજોબલસમન્વિતમ્ ।
સર્વાયુધધરં દિવ્યં સર્વાશ્ચર્યમયં ગુહમ્ ॥ 16 ॥

મહાર્હ રત્નખચિત ષટ્કિરીટવિરાજિતમ્ ।
શશાંકાર્ધકલારમ્ય સમુદ્યન્મૌળિભૂષણમ્ ॥ 17 ॥

મદનોજ્જ્વલકોદંડમંગળભ્રૂવિરાજિતમ્ ।
વિસ્તીર્ણારુણપદ્મશ્રી વિલસદ્દ્વાદશેક્ષણમ્ ॥ 18 ॥

ચારુશ્રીવર્ણસંપૂર્ણમુખશોભાવિભાસુરમ્ ।
મણિપ્રભાસમગ્રશ્રીસ્ફુરન્મકરકુંડલમ્ ॥ 19 ॥

લસદ્દર્પણદર્પાઢ્ય ગંડસ્થલવિરાજિતમ્ ।
દિવ્યકાંચનપુષ્પશ્રીનાસાપુટવિરાજિતમ્ ॥ 20 ॥

મંદહાસપ્રભાજાલમધુરાધર શોભિતમ્ ।
સર્વલક્ષણલક્ષ્મીભૃત્કંબુકંધર સુંદરમ્ ॥ 21 ॥

મહાનર્ઘમહારત્નદિવ્યહારવિરાજિતમ્ ।
સમગ્રનાગકેયૂરસન્નદ્ધભુજમંડલમ્ ॥ 22 ॥

રત્નકંકણસંભાસ્વત્કરાગ્ર શ્રીમહોજ્જ્વલમ્ ।
મહામણિકવાટાભવક્ષઃસ્થલવિરાજિતમ્ ॥ 23 ॥

અતિગાંભીર્યસંભાવ્યનાભીનવસરોરુહમ્ ।
રત્નશ્રીકલિતાબદ્ધલસન્મધ્યપ્રદેશકમ્ ॥ 24 ॥

સ્ફુરત્કનકસંવીતપીતાંબરસમાવૃતમ્ ।
શૃંગારરસસંપૂર્ણ રત્નસ્તંભોપમોરુકમ્ ॥ 25 ॥

સ્વર્ણકાહલરોચિષ્ણુ જંઘાયુગળમંડલમ્ ।
રત્નમંજીરસન્નદ્ધ રમણીય પદાંબુજમ્ ॥ 26 ॥

ભક્તાભીષ્ટપ્રદં દેવં બ્રહ્મવિષ્ણ્વાદિસંસ્તુતમ્ ।
કટાક્ષૈઃ કરુણાદક્ષૈસ્તોષયંતં જગત્પતિમ્ ॥ 27 ॥

ચિદાનંદજ્ઞાનમૂર્તિં સર્વલોકપ્રિયંકરમ્ ।
શંકરસ્યાત્મજં દેવં ધ્યાયેચ્છરવણોદ્ભવમ્ ॥ 28 ॥

અનંતાદિત્યચંદ્રાગ્નિ તેજઃ સંપૂર્ણવિગ્રહમ્ ।
સર્વલોકૈકવરદં સર્વવિદ્યાર્થતત્ત્વકમ્ ॥ 29 ॥

સર્વેશ્વરં સર્વવિભું સર્વભૂતહિતે રતમ્ ।
એવં ધ્યાત્વા તુ હૃદયં ષણ્મુખસ્ય મહાત્મનઃ ॥ 30 ॥

સર્વાન્કામાનવાપ્નોતિ સમ્યક્ જ્ઞાનં ચ વિંદતિ ।
શુચૌ દેશે સમાસીનઃ શુદ્ધાત્મા ચરિતાહ્નિકઃ ॥ 31 ॥

પ્રાઙ્મુખો યતચિત્તશ્ચ જપેદ્ધૃદયમુત્તમમ્ ।
સકૃદેવ મનું જપ્ત્વા સંપ્રાપ્નોત્યખિલં શુભમ્ ॥ 32 ॥

ઇદં સર્વાઘહરણં મૃત્યુદારિદ્ર્યનાશનમ્ ।
સર્વસંપત્કરં પુણ્યં સર્વરોગનિવારણમ્ ॥ 33 ॥

સર્વકામકરં દિવ્યં સર્વાભીષ્ટપ્રદાયકમ્ ।
પ્રજાકરં રાજ્યકરં ભાગ્યદં બહુપુણ્યદમ્ ॥ 34 ॥

ગુહ્યાદ્ગુહ્યતરં ભૂયો દેવાનામપિ દુર્લભમ્ ।
ઇદં તુ નાતપસ્કાય નાભક્તાય કદાચન ॥ 35 ॥

ન ચાશુશ્રૂષવે દેયં ન મદાંધાય કર્હિચિત્ ।
સચ્છિષ્યાય કુલીનાય સ્કંદભક્તિરતાય ચ ॥ 36 ॥

સતામભિમતાયેદં દાતવ્યં ધર્મવર્ધનમ્ ।
ય ઇદં પરમં પુણ્યં નિત્યં જપતિ માનવઃ ।
તસ્ય શ્રી ભગવાન્ સ્કંદઃ પ્રસન્નો ભવતિ ધ્રુવમ્ ॥ 37 ॥

ઇતિ શ્રીસ્કાંદપુરાણે સુબ્રહ્મણ્યહૃદયસ્તોત્રમ્ ॥