શ્રી રાઘવેંદ્ર સ્તોત્રમ્

શ્રીપૂર્ણબોધગુરુતીર્થપયોબ્ધિપારા
કામારિમાક્ષવિષમાક્ષશિરઃ સ્પૃશંતી ।
પૂર્વોત્તરામિતતરંગચરત્સુહંસા
દેવાળિસેવિતપરાંઘ્રિપયોજલગ્ના ॥ 1 ॥

જીવેશભેદગુણપૂર્તિજગત્સુસત્ત્વ-
-નીચોચ્ચભાવમુખનક્રગણૈઃ સમેતા ।
દુર્વાદ્યજાપતિગિળૈર્ગુરુરાઘવેંદ્ર-
-વાગ્દેવતાસરિદમું વિમલી કરોતુ ॥ 2 ॥

શ્રીરાઘવેંદ્રઃ સકલપ્રદાતા
સ્વપાદકંજદ્વયભક્તિમદ્ભ્યઃ ।
અઘાદ્રિસંભેદનદૃષ્ટિવજ્રઃ
ક્ષમાસુરેંદ્રોઽવતુ માં સદાઽયમ્ ॥ 3 ॥

શ્રીરાઘવેંદ્રો હરિપાદકંજ-
-નિષેવણાલ્લબ્ધસમસ્તસંપત્ ।
દેવસ્વભાવો દિવિજદ્રુમોઽય-
-મિષ્ટપ્રદો મે સતતં સ ભૂયાત્ ॥ 4 ॥

ભવ્યસ્વરૂપો ભવદુઃખતૂલ-
-સંઘાગ્નિચર્યઃ સુખધૈર્યશાલી ।
સમસ્તદુષ્ટગ્રહનિગ્રહેશો
દુરત્યયોપપ્લવસિંધુસેતુઃ ॥ 5 ॥

નિરસ્તદોષો નિરવદ્યવેષઃ
પ્રત્યર્થિમૂકત્ત્વનિદાનભાષઃ ।
વિદ્વત્પરિજ્ઞેયમહાવિશેષો
વાગ્વૈખરીનિર્જિતભવ્યશેષઃ ॥ 6 ॥

સંતાનસંપત્પરિશુદ્ધભક્તિ-
-વિજ્ઞાનવાગ્દેહસુપાટવાદીન્ ।
દત્વા શરીરોત્થસમસ્તદોષાન્
હત્ત્વા સ નોઽવ્યાદ્ગુરુરાઘવેંદ્રઃ ॥ 7 ॥

યત્પાદોદકસંચયઃ સુરનદીમુખ્યાપગાસાદિતા-
-સંખ્યાનુત્તમપુણ્યસંઘવિલસત્પ્રખ્યાતપુણ્યાવહઃ ।
દુસ્તાપત્રયનાશનો ભુવિ મહાવંધ્યાસુપુત્રપ્રદો
વ્યંગસ્વંગસમૃદ્ધિદો ગ્રહમહાપાપાપહસ્તં શ્રયે ॥ 8 ॥

યત્પાદકંજરજસા પરિભૂષિતાંગા
યત્પાદપદ્મમધુપાયિતમાનસા યે ।
યત્પાદપદ્મપરિકીર્તનજીર્ણવાચ
-સ્તદ્દર્શનં દુરિતકાનનદાવભૂતમ્ ॥ 9 ॥

સર્વતંત્રસ્વતંત્રોઽસૌ શ્રીમધ્વમતવર્ધનઃ
વિજયીંદ્રકરાબ્જોત્થસુધીંદ્રવરપુત્રકઃ ॥ 10 ॥

શ્રીરાઘવેંદ્રો યતિરાટ્ ગુરુર્મે સ્યાદ્ભયાપહઃ
જ્ઞાનભક્તિસુપુત્રાયુર્યશઃ શ્રીપુણ્યવર્ધનઃ ॥ 11 ॥

પ્રતિવાદિજયસ્વાંતભેદચિહ્નાદરો ગુરુઃ ।
સર્વવિદ્યાપ્રવીણોઽન્યો રાઘવેંદ્રાન્ન વિદ્યતે ॥ 12 ॥

અપરોક્ષીકૃતશ્રીશઃ સમુપેક્ષિતભાવજઃ ।
અપેક્ષિતપ્રદાતાઽન્યો રાઘવેંદ્રાન્ન વિદ્યતે ॥ 13 ॥

દયાદાક્ષિણ્યવૈરાગ્યવાક્પાટવમુખાંકિતઃ ।
શાપાનુગ્રહશક્તોઽન્યો રાઘવેંદ્રાન્ન વિદ્યતે ॥ 14 ॥

અજ્ઞાનવિસ્મૃતિભ્રાંતિસંશયાઽપસ્મૃતિક્ષયાઃ ।
તંદ્રાકંપવચઃકૌંઠ્યમુખા યે ચેંદ્રિયોદ્ભવાઃ ।
દોષાસ્તે નાશમાયાંતિ રાઘવેંદ્રપ્રસાદતઃ ॥ 15 ॥

ઓં શ્રીરાઘવેંદ્રાય નમઃ ઇત્યઽષ્ટાક્ષરમંત્રતઃ ।
જપિતાદ્ભાવિતાન્નિત્યં ઇષ્ટાર્થાઃ સ્યુર્ન સંશયઃ ॥ 16 ॥

હંતુ નઃ કાયજાન્ દોષાન્ આત્માત્મીયસમુદ્ભવાન્ ।
સર્વાનપિ પુમર્થાંશ્ચ દદાતુ ગુરુરાત્મવિત્ ॥ 17 ॥

ઇતિ કાલત્રયે નિત્યં પ્રાર્થનાં યઃ કરોતિ સઃ ।
ઇહામુત્રાપ્તસર્વેષ્ટો મોદતે નાત્ર સંશયઃ ॥ 18 ॥

અગમ્યમહિમા લોકે રાઘવેંદ્રો મહાયશાઃ ।
શ્રીમધ્વમતદુગ્ધાબ્ધિચંદ્રોઽવતુ સદાઽનઘઃ ॥ 19 ॥

સર્વયાત્રાફલાવાપ્ત્યૈ યથાશક્તિપ્રદક્ષિણમ્ ।
કરોમિ તવ સિદ્ધસ્ય બૃંદાવનગતં જલમ્ ॥ 20 ॥

શિરસા ધારયામ્યદ્ય સર્વતીર્થફલાપ્તયે ।
સર્વાભીષ્ટાર્થસિદ્ધ્યર્થં નમસ્કારં કરોમ્યહમ્ ।
તવ સંકીર્તનં વેદશાસ્ત્રાર્થજ્ઞાનસિદ્ધયે ॥ 21 ॥

સંસારેઽક્ષયસાગરે પ્રકૃતિતોઽગાધે સદા દુસ્તરે
સર્વાવદ્યજલગ્રહૈરનુપમૈઃ કામાદિભંગાકુલે ।
નાનાવિભ્રમદુર્ભ્રમેઽમિતભયસ્તોમાદિફેનોત્કટે
દુઃખોત્કૃષ્ટવિષે સમુદ્ધર ગુરો મા મગ્નરૂપં સદા ॥ 22 ॥

રાઘવેંદ્રગુરુસ્તોત્રં યઃ પઠેદ્ભક્તિપૂર્વકમ્ ।
તસ્ય કુષ્ઠાદિરોગાણાં નિવૃત્તિસ્ત્વરયા ભવેત્ ॥ 23 ॥

અંધોઽપિ દિવ્યદૃષ્ટિઃ સ્યાદેડમૂકોઽપિ વાક્પતિઃ ।
પૂર્ણાયુઃ પૂર્ણસંપત્તિઃ સ્તોત્રસ્યાઽસ્ય જપાદ્ભવેત્ ॥ 24 ॥

યઃ પિબેજ્જલમેતેન સ્તોત્રેણૈવાભિમંત્રિતમ્ ।
તસ્ય કુક્ષિગતા દોષાઃ સર્વે નશ્યંતિ તત્ ક્ષણાત્ ॥ 25 ॥

યદ્વૃંદાવનમાસાદ્ય પંગુઃ ખંજોઽપિ વા જનઃ ।
સ્તોત્રેણાનેન યઃ કુર્યાત્ પ્રદક્ષિણનમસ્કૃતી ॥ 26 ॥

સ જંઘાલો ભવેદેવ ગુરુરાજપ્રસાદતઃ ।
સોમસૂર્યોપરાગે ચ પુષ્યાર્કાદિસમાગમે ॥ 27 ॥

યોઽનુત્તમમિદં સ્તોત્રમષ્ટોત્તરશતં જપેત્ ।
ભૂતપ્રેતપિશાચાદિ પીડા તસ્ય ન જાયતે ॥ 28 ॥

એતત્ સ્તોત્રં સમુચ્ચાર્ય ગુરોર્વૃંદાવનાંતિકે ।
દીપસંયોજનાજ્જ્ઞાનં પુત્રલાભો ભવેદ્ધ્રુવમ્ ॥ 29 ॥

પરવાદિજયો દિવ્યજ્ઞાનભક્ત્યાદિવર્ધનમ્ ।
સર્વાભીષ્ટપ્રવૃદ્ધિઃ સ્યાન્નાત્ર કાર્યા વિચારણા ॥ 30 ॥

રાજચોરમહાવ્યાઘ્રસર્પનક્રાદિપીડનમ્ ।
ન જાયતેઽસ્ય સ્તોત્રસ્ય પ્રભાવાન્નાત્ર સંશયઃ ॥ 31 ॥

યો ભક્ત્યા ગુરુરાઘવેંદ્રચરણદ્વંદ્વં સ્મરન્ યઃ પઠેત્
સ્તોત્રં દિવ્યમિદં સદા ન હિ ભવેત્તસ્યાસુખં કિંચન ।
કિં ત્વિષ્ટાર્થસમૃદ્ધિરેવ કમલાનાથપ્રસાદોદયાત્
કીર્તિર્દિગ્વિદિતા વિભૂતિરતુલા સાક્ષી હયાસ્યોઽત્ર હિ ॥ 32 ॥

ફલશૃતિઃ
ઇતિ શ્રી રાઘવેંદ્રાર્ય ગુરુરાજપ્રસાદતઃ ।
કૃતં સ્તોત્રમિદં પુણ્યં શ્રીમદ્ભિર્હ્યપ્પણાભિદૈઃ ॥

પૂજ્યાય રાઘવેંદ્રાય સત્યધર્મરતાય ચ ।
ભજતાં કલ્પવૃક્ષાય નમતાં કામધેનવે ॥

આપાદમૌળિપર્યંતં ગુરૂણામાકૃતિં સ્મરેત્ ।
તેન વિઘ્નઃ પ્રણશ્યંતિ સિદ્ધ્યંતિ ચ મનોરથાઃ ॥

દુર્વાદિધ્વાંતરવયે વૈષ્ણવેંદીવરેંદવે ।
શ્રીરાઘવેંદ્ર ગુરવે નમોઽત્યંતદયાળવે ॥

મૂકોઽપિ યત્પ્રસાદેન મુકુંદશયનાય તે ।
રાજરાજાયતે રિક્તો રાઘવેંદ્રં તમાશ્રયે ।

ઇતિ શ્રી અપ્પણ્ણાચાર્યવિરચિતં શ્રીરાઘવેંદ્ર સ્તોત્રં સંપૂર્ણમ્ ॥