શ્રી મનસા દેવી સ્તોત્રમ્ (મહેંદ્ર કૃતમ્)

દેવિ ત્વાં સ્તોતુમિચ્છામિ સાધ્વીનાં પ્રવરાં પરામ્ ।
પરાત્પરાં ચ પરમાં ન હિ સ્તોતું ક્ષમોઽધુના ॥ 1 ॥

સ્તોત્રાણાં લક્ષણં વેદે સ્વભાવાખ્યાનતઃ પરમ્ ।
ન ક્ષમઃ પ્રકૃતિં વક્તું ગુણાનાં તવ સુવ્રતે ॥ 2 ॥

શુદ્ધસત્ત્વસ્વરૂપા ત્વં કોપહિંસાવિવર્જિતા ।
ન ચ શપ્તો મુનિસ્તેન ત્યક્તયા ચ ત્વયા યતઃ ॥ 3 ॥

ત્વં મયા પૂજિતા સાધ્વી જનની ચ યથાઽદિતિઃ ।
દયારૂપા ચ ભગિની ક્ષમારૂપા યથા પ્રસૂઃ ॥ 4 ॥

ત્વયા મે રક્ષિતાઃ પ્રાણા પુત્રદારાઃ સુરેશ્વરિ ।
અહં કરોમિ ત્વાં પૂજ્યાં મમ પ્રીતિશ્ચ વર્ધતે ॥ 5 ॥

નિત્યં યદ્યપિ પૂજ્યા ત્વં ભવેઽત્ર જગદંબિકે ।
તથાપિ તવ પૂજાં વૈ વર્ધયામિ પુનઃ પુનઃ ॥ 6 ॥

યે ત્વામાષાઢસંક્રાંત્યાં પૂજયિષ્યંતિ ભક્તિતઃ ।
પંચમ્યાં મનસાખ્યાયાં માસાંતે વા દિને દિને ॥ 7 ॥

પુત્રપૌત્રાદયસ્તેષાં વર્ધંતે ચ ધનાનિ ચ ।
યશસ્વિનઃ કીર્તિમંતો વિદ્યાવંતો ગુણાન્વિતાઃ ॥ 8 ॥

યે ત્વાં ન પૂજયિષ્યંતિ નિંદંત્યજ્ઞાનતો જનાઃ ।
લક્ષ્મીહીના ભવિષ્યંતિ તેષાં નાગભયં સદા ॥ 9 ॥

ત્વં સ્વર્ગલક્ષ્મીઃ સ્વર્ગે ચ વૈકુંઠે કમલાકલા ।
નારાયણાંશો ભગવાન્ જરત્કારુર્મુનીશ્વરઃ ॥ 10 ॥

તપસા તેજસા ત્વાં ચ મનસા સસૃજે પિતા ।
અસ્માકં રક્ષણાયૈવ તેન ત્વં મનસાભિધા ॥ 11 ॥

મનસા દેવિ તુ શક્તા ચાત્મના સિદ્ધયોગિની ।
તેન ત્વં મનસાદેવી પૂજિતા વંદિતા ભવે ॥ 12 ॥

યાં ભક્ત્યા મનસા દેવાઃ પૂજયંત્યનિશં ભૃશમ્ ।
તેન ત્વાં મનસાદેવીં પ્રવદંતિ પુરાવિદઃ ॥ 13 ॥

સત્ત્વરૂપા ચ દેવી ત્વં શશ્વત્સત્ત્વનિષેવયા ।
યો હિ યદ્ભાવયેન્નિત્યં શતં પ્રાપ્નોતિ તત્સમમ્ ॥ 14 ॥

ઇદં સ્તોત્રં પુણ્યબીજં તાં સંપૂજ્ય ચ યઃ પઠેત્ ।
તસ્ય નાગભયં નાસ્તિ તસ્ય વંશોદ્ભવસ્ય ચ ॥ 15 ॥

વિષં ભવેત્સુધાતુલ્યં સિદ્ધસ્તોત્રં યદા પઠેત્ ।
પંચલક્ષજપેનૈવ સિદ્ધસ્તોત્રો ભવેન્નરઃ ।
સર્પશાયી ભવેત્સોઽપિ નિશ્ચિતં સર્પવાહનઃ ॥ 16 ॥

ઇતિ શ્રીબ્રહ્મવૈવર્તે મહાપુરાણે પ્રકૃતિખંડે ષટ્ચત્વારિંશોઽધ્યાયે મહેંદ્ર કૃત શ્રી મનસાદેવી સ્તોત્રમ્ ॥

આસ્તીકમુનિ મંત્રઃ
સર્પાપસર્પ ભદ્રં તે ગચ્છ સર્પ મહાવિષ ।
જનમેજયસ્ય યજ્ઞાંતે આસ્તીકવચનં સ્મર ॥