શ્રી લલિતા ત્રિશતિ સ્તોત્રમ્

અસ્ય શ્રીલલિતા ત્રિશતીસ્તોત્ર મહામંત્રસ્ય, ભગવાન્ હયગ્રીવ ઋષિઃ, અનુષ્ટુપ્ છંદઃ, શ્રીલલિતામહાત્રિપુરસુંદરી દેવતા, ઐં બીજં, સૌઃ શક્તિઃ, ક્લીં કીલકં, મમ ચતુર્વિધપુરુષાર્થફલસિદ્ધ્યર્થે જપે વિનિયોગઃ ।
ઐમિત્યાદિભિરંગન્યાસકરન્યાસાઃ કાર્યાઃ ।

ધ્યાનમ્ ।
અતિમધુરચાપહસ્તા-
-મપરિમિતામોદબાણસૌભાગ્યામ્ ।
અરુણામતિશયકરુણા-
-મભિનવકુલસુંદરીં વંદે ।

શ્રી હયગ્રીવ ઉવાચ ।
કકારરૂપા કલ્યાણી કલ્યાણગુણશાલિની ।
કલ્યાણશૈલનિલયા કમનીયા કલાવતી ॥ 1 ॥

કમલાક્ષી કલ્મષઘ્ની કરુણામૃતસાગરા ।
કદંબકાનનાવાસા કદંબકુસુમપ્રિયા ॥ 2 ॥

કંદર્પવિદ્યા કંદર્પજનકાપાંગવીક્ષણા ।
કર્પૂરવીટિસૌરભ્યકલ્લોલિતકકુપ્તટા ॥ 3 ॥

કલિદોષહરા કંજલોચના કમ્રવિગ્રહા ।
કર્માદિસાક્ષિણી કારયિત્રી કર્મફલપ્રદા ॥ 4 ॥

એકારરૂપા ચૈકાક્ષર્યેકાનેકાક્ષરાકૃતિઃ ।
એતત્તદિત્યનિર્દેશ્યા ચૈકાનંદચિદાકૃતિઃ ॥ 5 ॥

એવમિત્યાગમાબોધ્યા ચૈકભક્તિમદર્ચિતા ।
એકાગ્રચિત્તનિર્ધ્યાતા ચૈષણારહિતાદૃતા ॥ 6 ॥

એલાસુગંધિચિકુરા ચૈનઃકૂટવિનાશિની ।
એકભોગા ચૈકરસા ચૈકૈશ્વર્યપ્રદાયિની ॥ 7 ॥

એકાતપત્રસામ્રાજ્યપ્રદા ચૈકાંતપૂજિતા ।
એધમાનપ્રભા ચૈજદનેકજગદીશ્વરી ॥ 8 ॥

એકવીરાદિસંસેવ્યા ચૈકપ્રાભવશાલિની ।
ઈકારરૂપા ચેશિત્રી ચેપ્સિતાર્થપ્રદાયિની ॥ 9 ॥

ઈદૃગિત્યવિનિર્દેશ્યા ચેશ્વરત્વવિધાયિની ।
ઈશાનાદિબ્રહ્મમયી ચેશિત્વાદ્યષ્ટસિદ્ધિદા ॥ 10 ॥

ઈક્ષિત્રીક્ષણસૃષ્ટાંડકોટિરીશ્વરવલ્લભા ।
ઈડિતા ચેશ્વરાર્ધાંગશરીરેશાધિદેવતા ॥ 11 ॥

ઈશ્વરપ્રેરણકરી ચેશતાંડવસાક્ષિણી ।
ઈશ્વરોત્સંગનિલયા ચેતિબાધાવિનાશિની ॥ 12 ॥

ઈહાવિરહિતા ચેશશક્તિરીષત્સ્મિતાનના ।
લકારરૂપા લલિતા લક્ષ્મીવાણીનિષેવિતા ॥ 13 ॥

લાકિની લલનારૂપા લસદ્દાડિમપાટલા ।
લલંતિકાલસત્ફાલા લલાટનયનાર્ચિતા ॥ 14 ॥

લક્ષણોજ્જ્વલદિવ્યાંગી લક્ષકોટ્યંડનાયિકા ।
લક્ષ્યાર્થા લક્ષણાગમ્યા લબ્ધકામા લતાતનુઃ ॥ 15 ॥

લલામરાજદલિકા લંબિમુક્તાલતાંચિતા ।
લંબોદરપ્રસૂર્લભ્યા લજ્જાઢ્યા લયવર્જિતા ॥ 16 ॥

હ્રીં‍કારરૂપા હ્રીં‍કારનિલયા હ્રીં‍પદપ્રિયા ।
હ્રીં‍કારબીજા હ્રીં‍કારમંત્રા હ્રીં‍કારલક્ષણા ॥ 17 ॥

હ્રીં‍કારજપસુપ્રીતા હ્રીં‍મતી હ્રીં‍વિભૂષણા ।
હ્રીં‍શીલા હ્રીં‍પદારાધ્યા હ્રીં‍ગર્ભા હ્રીં‍પદાભિધા ॥ 18 ॥

હ્રીં‍કારવાચ્યા હ્રીં‍કારપૂજ્યા હ્રીં‍કારપીઠિકા ।
હ્રીં‍કારવેદ્યા હ્રીં‍કારચિંત્યા હ્રીં હ્રીં‍શરીરિણી ॥ 19 ॥

હકારરૂપા હલધૃક્પૂજિતા હરિણેક્ષણા ।
હરપ્રિયા હરારાધ્યા હરિબ્રહ્મેંદ્રવંદિતા ॥ 20 ॥

હયારૂઢાસેવિતાંઘ્રિર્હયમેધસમર્ચિતા ।
હર્યક્ષવાહના હંસવાહના હતદાનવા ॥ 21 ॥

હત્યાદિપાપશમની હરિદશ્વાદિસેવિતા ।
હસ્તિકુંભોત્તુંગકુચા હસ્તિકૃત્તિપ્રિયાંગના ॥ 22 ॥

હરિદ્રાકુંકુમાદિગ્ધા હર્યશ્વાદ્યમરાર્ચિતા ।
હરિકેશસખી હાદિવિદ્યા હાલામદાલસા ॥ 23 ॥

સકારરૂપા સર્વજ્ઞા સર્વેશી સર્વમંગલા ।
સર્વકર્ત્રી સર્વભર્ત્રી સર્વહંત્રી સનાતના ॥ 24 ॥

સર્વાનવદ્યા સર્વાંગસુંદરી સર્વસાક્ષિણી ।
સર્વાત્મિકા સર્વસૌખ્યદાત્રી સર્વવિમોહિની ॥ 25 ॥

સર્વાધારા સર્વગતા સર્વાવગુણવર્જિતા ।
સર્વારુણા સર્વમાતા સર્વભૂષણભૂષિતા ॥ 26 ॥

કકારાર્થા કાલહંત્રી કામેશી કામિતાર્થદા ।
કામસંજીવની કલ્યા કઠિનસ્તનમંડલા ॥ 27 ॥

કરભોરૂઃ કલાનાથમુખી કચજિતાંબુદા ।
કટાક્ષસ્યંદિકરુણા કપાલિપ્રાણનાયિકા ॥ 28 ॥

કારુણ્યવિગ્રહા કાંતા કાંતિધૂતજપાવલિઃ ।
કલાલાપા કંબુકંઠી કરનિર્જિતપલ્લવા ॥ 29 ॥

કલ્પવલ્લીસમભુજા કસ્તૂરીતિલકાંચિતા ।
હકારાર્થા હંસગતિર્હાટકાભરણોજ્જ્વલા ॥ 30 ॥

હારહારિકુચાભોગા હાકિની હલ્યવર્જિતા ।
હરિત્પતિસમારાધ્યા હઠાત્કારહતાસુરા ॥ 31 ॥

હર્ષપ્રદા હવિર્ભોક્ત્રી હાર્દસંતમસાપહા ।
હલ્લીસલાસ્યસંતુષ્ટા હંસમંત્રાર્થરૂપિણી ॥ 32 ॥

હાનોપાદાનનિર્મુક્તા હર્ષિણી હરિસોદરી ।
હાહાહૂહૂમુખસ્તુત્યા હાનિવૃદ્ધિવિવર્જિતા ॥ 33 ॥

હય્યંગવીનહૃદયા હરિગોપારુણાંશુકા ।
લકારાખ્યા લતાપૂજ્યા લયસ્થિત્યુદ્ભવેશ્વરી ॥ 34 ॥

લાસ્યદર્શનસંતુષ્ટા લાભાલાભવિવર્જિતા ।
લંઘ્યેતરાજ્ઞા લાવણ્યશાલિની લઘુસિદ્ધિદા ॥ 35 ॥

લાક્ષારસસવર્ણાભા લક્ષ્મણાગ્રજપૂજિતા ।
લભ્યેતરા લબ્ધભક્તિસુલભા લાંગલાયુધા ॥ 36 ॥

લગ્નચામરહસ્તશ્રીશારદાપરિવીજિતા ।
લજ્જાપદસમારાધ્યા લંપટા લકુલેશ્વરી ॥ 37 ॥

લબ્ધમાના લબ્ધરસા લબ્ધસંપત્સમુન્નતિઃ ।
હ્રીં‍કારિણી હ્રીં‍કારાદ્યા હ્રીં‍મધ્યા હ્રીં‍શિખામણિઃ ॥ 38 ॥

હ્રીં‍કારકુંડાગ્નિશિખા હ્રીં‍કારશશિચંદ્રિકા ।
હ્રીં‍કારભાસ્કરરુચિર્હ્રીં‍કારાંભોદચંચલા ॥ 39 ॥

હ્રીં‍કારકંદાંકુરિકા હ્રીં‍કારૈકપરાયણા ।
હ્રીં‍કારદીર્ઘિકાહંસી હ્રીં‍કારોદ્યાનકેકિની ॥ 40 ॥

હ્રીં‍કારારણ્યહરિણી હ્રીં‍કારાવાલવલ્લરી ।
હ્રીં‍કારપંજરશુકી હ્રીં‍કારાંગણદીપિકા ॥ 41 ॥

હ્રીં‍કારકંદરાસિંહી હ્રીં‍કારાંભોજભૃંગિકા ।
હ્રીં‍કારસુમનોમાધ્વી હ્રીં‍કારતરુમંજરી ॥ 42 ॥

સકારાખ્યા સમરસા સકલાગમસંસ્તુતા ।
સર્વવેદાંતતાત્પર્યભૂમિઃ સદસદાશ્રયા ॥ 43 ॥

સકલા સચ્ચિદાનંદા સાધ્યા સદ્ગતિદાયિની ।
સનકાદિમુનિધ્યેયા સદાશિવકુટુંબિની ॥ 44 ॥

સકાલાધિષ્ઠાનરૂપા સત્યરૂપા સમાકૃતિઃ ।
સર્વપ્રપંચનિર્માત્રી સમનાધિકવર્જિતા ॥ 45 ॥

સર્વોત્તુંગા સંગહીના સગુણા સકલેષ્ટદા ।
કકારિણી કાવ્યલોલા કામેશ્વરમનોહરા ॥ 46 ॥

કામેશ્વરપ્રાણનાડી કામેશોત્સંગવાસિની ।
કામેશ્વરાલિંગિતાંગી કામેશ્વરસુખપ્રદા ॥ 47 ॥

કામેશ્વરપ્રણયિની કામેશ્વરવિલાસિની ।
કામેશ્વરતપઃસિદ્ધિઃ કામેશ્વરમનઃપ્રિયા ॥ 48 ॥

કામેશ્વરપ્રાણનાથા કામેશ્વરવિમોહિની ।
કામેશ્વરબ્રહ્મવિદ્યા કામેશ્વરગૃહેશ્વરી ॥ 49 ॥

કામેશ્વરાહ્લાદકરી કામેશ્વરમહેશ્વરી ।
કામેશ્વરી કામકોટિનિલયા કાંક્ષિતાર્થદા ॥ 50 ॥

લકારિણી લબ્ધરૂપા લબ્ધધીર્લબ્ધવાંછિતા ।
લબ્ધપાપમનોદૂરા લબ્ધાહંકારદુર્ગમા ॥ 51 ॥

લબ્ધશક્તિર્લબ્ધદેહા લબ્ધૈશ્વર્યસમુન્નતિઃ ।
લબ્ધવૃદ્ધિર્લબ્ધલીલા લબ્ધયૌવનશાલિની ॥ 52 ॥

લબ્ધાતિશયસર્વાંગસૌંદર્યા લબ્ધવિભ્રમા ।
લબ્ધરાગા લબ્ધપતિર્લબ્ધનાનાગમસ્થિતિઃ ॥ 53 ॥

લબ્ધભોગા લબ્ધસુખા લબ્ધહર્ષાભિપૂરિતા ।
હ્રીં‍કારમૂર્તિર્હ્રીં‍કારસૌધશૃંગકપોતિકા ॥ 54 ॥

હ્રીં‍કારદુગ્ધાબ્ધિસુધા હ્રીં‍કારકમલેંદિરા ।
હ્રીં‍કારમણિદીપાર્ચિર્હ્રીં‍કારતરુશારિકા ॥ 55 ॥

હ્રીં‍કારપેટકમણિર્હ્રીં‍કારાદર્શબિંબિતા ।
હ્રીં‍કારકોશાસિલતા હ્રીં‍કારાસ્થાનનર્તકી ॥ 56 ॥

હ્રીં‍કારશુક્તિકામુક્તામણિર્હ્રીં‍કારબોધિતા ।
હ્રીં‍કારમયસૌવર્ણસ્તંભવિદ્રુમપુત્રિકા ॥ 57 ॥

હ્રીં‍કારવેદોપનિષદ્ હ્રીં‍કારાધ્વરદક્ષિણા ।
હ્રીં‍કારનંદનારામનવકલ્પકવલ્લરી ॥ 58 ॥

હ્રીં‍કારહિમવદ્ગંગા હ્રીં‍કારાર્ણવકૌસ્તુભા ।
હ્રીં‍કારમંત્રસર્વસ્વા હ્રીં‍કારપરસૌખ્યદા ॥ 59 ॥

ઉત્તરપીઠિકા (ફલશૃતિઃ)
હયગ્રીવ ઉવાચ ।
ઇત્યેવં તે મયાખ્યાતં દેવ્યા નામશતત્રયમ્ ।
રહસ્યાતિરહસ્યત્વાદ્ગોપનીયં ત્વયા મુને ॥ 1 ॥

શિવવર્ણાનિ નામાનિ શ્રીદેવ્યા કથિતાનિ હિ ।
શક્ત્યક્ષરાણિ નામાનિ કામેશકથિતાનિ ચ ॥ 2 ॥

ઉભયાક્ષરનામાનિ હ્યુભાભ્યાં કથિતાનિ વૈ ।
તદન્યૈર્ગ્રથિતં સ્તોત્રમેતસ્ય સદૃશં કિમુ ॥ 3 ॥

નાનેન સદૃશં સ્તોત્રં શ્રીદેવીપ્રીતિદાયકમ્ ।
લોકત્રયેઽપિ કલ્યાણં સંભવેન્નાત્ર સંશયઃ ॥ 4 ॥

સૂત ઉવાચ ।
ઇતિ હયમુખગીતં સ્તોત્રરાજં નિશમ્ય
પ્રગલિતકલુષોઽભૂચ્ચિત્તપર્યાપ્તિમેત્ય ।
નિજગુરુમથ નત્વા કુંભજન્મા તદુક્તં
પુનરધિકરહસ્યં જ્ઞાતુમેવં જગાદ ॥ 5 ॥

અગસ્ત્ય ઉવાચ ।
અશ્વાનન મહાભાગ રહસ્યમપિ મે વદ ।
શિવવર્ણાનિ કાન્યત્ર શક્તિવર્ણાનિ કાનિ હિ ॥ 6 ॥

ઉભયોરપિ વર્ણાનિ કાનિ વા વદ દેશિક ।
ઇતિ પૃષ્ટઃ કુંભજેન હયગ્રીવોઽવદત્પુનઃ ॥ 7 ॥

હયગ્રીવ ઉવાચ ।
તવ ગોપ્યં કિમસ્તીહ સાક્ષાદંબાનુશાસનાત્ ।
ઇદં ત્વતિરહસ્યં તે વક્ષ્યામિ શૃણુ કુંભજ ॥ 8 ॥

એતદ્વિજ્ઞાનમાત્રેણ શ્રીવિદ્યા સિદ્ધિદા ભવેત્ ।
કત્રયં હદ્વયં ચૈવ શૈવો ભાગઃ પ્રકીર્તિતઃ ॥ 9 ॥

શક્ત્યક્ષરાણિ શેષાણિ હ્રીંકાર ઉભયાત્મકઃ ।
એવં વિભાગમજ્ઞાત્વા યે વિદ્યાજપશાલિનઃ ॥ 10 ॥

ન તેષાં સિદ્ધિદા વિદ્યા કલ્પકોટિશતૈરપિ ।
ચતુર્ભિઃ શિવચક્રૈશ્ચ શક્તિચક્રૈશ્ચ પંચભિઃ ॥ 11 ॥

નવચક્રૈશ્ચ સંસિદ્ધં શ્રીચક્રં શિવયોર્વપુઃ ।
ત્રિકોણમષ્ટકોણં ચ દશકોણદ્વયં તથા ॥ 12 ॥

ચતુર્દશારં ચૈતાનિ શક્તિચક્રાણિ પંચ ચ ।
બિંદુશ્ચાષ્ટદલં પદ્મં પદ્મં ષોડશપત્રકમ્ ॥ 13 ॥

ચતુરશ્રં ચ ચત્વારિ શિવચક્રાણ્યનુક્રમાત્ ।
ત્રિકોણે બૈંદવં શ્લિષ્ટં અષ્ટારેઽષ્ટદલાંબુજમ્ ॥ 14 ॥

દશારયોઃ ષોડશારં ભૂગૃહં ભુવનાશ્રકે ।
શૈવાનામપિ શાક્તાનાં ચક્રાણાં ચ પરસ્પરમ્ ॥ 15 ॥

અવિનાભાવસંબંધં યો જાનાતિ સ ચક્રવિત્ ।
ત્રિકોણરૂપિણી શક્તિર્બિંદુરૂપપરઃ શિવઃ ॥ 16 ॥

અવિનાભાવસંબંધં તસ્માદ્બિંદુત્રિકોણયોઃ ।
એવં વિભાગમજ્ઞાત્વા શ્રીચક્રં યઃ સમર્ચયેત્ ॥ 17 ॥

ન તત્ફલમવાપ્નોતિ લલિતાંબા ન તુષ્યતિ ।
યે ચ જાનંતિ લોકેઽસ્મિન્ શ્રીવિદ્યાચક્રવેદિનઃ ॥ 18 ॥

સામન્યવેદિનઃ સર્વે વિશેષજ્ઞોઽતિદુર્લભઃ ।
સ્વયંવિદ્યાવિશેષજ્ઞો વિશેષજ્ઞં સમર્ચયેત્ ॥ 19 ॥

તસ્મૈ દેયં તતો ગ્રાહ્યમશક્તસ્તસ્ય દાપયેત્ ।
અંધં તમઃ પ્રવિશંતિ યેઽવિદ્યાં સમુપાસતે ॥ 20 ॥

ઇતિ શ્રુતિરપાહૈતાનવિદ્યોપાસકાન્પુનઃ ।
વિદ્યાન્યોપાસકાનેવ નિંદત્યારુણિકી શ્રુતિઃ ॥ 21 ॥

અશ્રુતા સશ્રુતાસશ્ચ યજ્વાનો યેઽપ્યયજ્વનઃ ।
સ્વર્યંતો નાપેક્ષંતે ઇંદ્રમગ્નિં ચ યે વિદુઃ ॥ 22 ॥

સિકતા ઇવ સંયંતિ રશ્મિભિઃ સમુદીરિતાઃ ।
અસ્માલ્લોકાદમુષ્માચ્ચેત્યાહ ચારણ્યકશ્રુતિઃ ॥ 23 ॥

યસ્ય નો પશ્ચિમં જન્મ યદિ વા શંકરઃ સ્વયમ્ ।
તેનૈવ લભ્યતે વિદ્યા શ્રીમત્પંચદશાક્ષરી ॥ 24 ॥

ઇતિ મંત્રેષુ બહુધા વિદ્યાયા મહિમોચ્યતે ।
મોક્ષૈકહેતુવિદ્યા તુ શ્રીવિદ્યા નાત્ર સંશયઃ ॥ 25 ॥

ન શિલ્પાદિજ્ઞાનયુક્તે વિદ્વચ્છબ્ધઃ પ્રયુજ્યતે ।
મોક્ષૈકહેતુવિદ્યા સા શ્રીવિદ્યૈવ ન સંશયઃ ॥ 26 ॥

તસ્માદ્વિદ્યાવિદેવાત્ર વિદ્વાન્વિદ્વાનિતીર્યતે ।
સ્વયં વિદ્યાવિદે દદ્યાત્ખ્યાપયેત્તદ્ગુણાન્સુધીઃ ॥ 27 ॥

સ્વયંવિદ્યારહસ્યજ્ઞો વિદ્યામાહાત્મ્યવેદ્યપિ ।
વિદ્યાવિદં નાર્ચયેચ્ચેત્કો વા તં પૂજયેજ્જનઃ ॥ 28 ॥

પ્રસંગાદિદમુક્તં તે પ્રકૃતં શૃણુ કુંભજ ।
યઃ કીર્તયેત્સકૃદ્ભક્ત્યા દિવ્યનામશતત્રયમ્ ॥ 29 ॥

તસ્ય પુણ્યમહં વક્ષ્યે શૃણુ ત્વં કુંભસંભવ ।
રહસ્યનામસાહસ્રપાઠે યત્ફલમીરિતમ્ ॥ 30 ॥

તત્ફલં કોટિગુણિતમેકનામજપાદ્ભવેત્ ।
કામેશ્વરીકામેશાભ્યાં કૃતં નામશતત્રયમ્ ॥ 31 ॥

નાન્યેન તુલયેદેતત્ સ્તોત્રેણાન્યકૃતેન ચ ।
શ્રિયઃ પરંપરા યસ્ય ભાવિ વા ચોત્તરોત્તરમ્ ॥ 32 ॥

તેનૈવ લભ્યતે ચૈતત્પશ્ચાચ્છ્રેયઃ પરીક્ષયેત્ ।
અસ્યા નામ્નાં ત્રિશત્યાસ્તુ મહિમા કેન વર્ણ્યતે ॥ 33 ॥

યા સ્વયં શિવયોર્વક્ત્રપદ્માભ્યાં પરિનિઃસૃતા ।
નિત્યં ષોડશસંખ્યાકાન્વિપ્રાનાદૌ તુ ભોજયેત્ ॥ 34 ॥

અભ્યક્તાંસ્તિલતૈલેન સ્નાતાનુષ્ણેન વારિણા ।
અભ્યર્ચ્ય ગંધપુષ્પાદ્યૈઃ કામેશ્વર્યાદિનામભિઃ ॥ 35 ॥

સૂપાપૂપૈઃ શર્કરાદ્યૈઃ પાયસૈઃ ફલસંયુતૈઃ ।
વિદ્યાવિદો વિશેષેણ ભોજયેત્ષોડશ દ્વિજાન્ ॥ 36 ॥

એવં નિત્યાર્ચનં કુર્યાદાદૌ બ્રાહ્મણભોજનમ્ ।
ત્રિશતીનામભિઃ પશ્ચાદ્બ્રાહ્મણાન્ક્રમશોઽર્ચયેત્ ॥ 37 ॥

તૈલાભ્યંગાદિકં દત્વા વિભવે સતિ ભક્તિતઃ ।
શુક્લપ્રતિપદારભ્ય પૌર્ણમાસ્યવધિ ક્રમાત્ ॥ 38 ॥

દિવસે દિવસે વિપ્રા ભોજ્યા વિંશતિસંખ્યયા ।
દશભિઃ પંચભિર્વાપિ ત્રિભિરેકેન વા દિનૈઃ ॥ 39 ॥

ત્રિંશત્ષષ્ટિઃ શતં વિપ્રાઃ સંભોજ્યાસ્ત્રિશતં ક્રમાત્ ।
એવં યઃ કુરુતે ભક્ત્યા જન્મમધ્યે સકૃન્નરઃ ॥ 40 ॥

તસ્યૈવ સફલં જન્મ મુક્તિસ્તસ્ય કરે સ્થિરા ।
રહસ્યનામસાહસ્રભોજનેઽપ્યેવમેવ હિ ॥ 41 ॥

આદૌ નિત્યબલિં કુર્યાત્પશ્ચાદ્બ્રાહ્મણભોજનમ્ ।
રહસ્યનામસાહસ્રમહિમા યો મયોદિતઃ ॥ 42 ॥

સ શીકરાણુરત્નૈકનામ્નો મહિમવારિધેઃ ।
વાગ્દેવીરચિતે નામસાહસ્રે યદ્યદીરિતમ્ ॥ 43 ॥

તત્ફલં કોટિગુણિતં નામ્નોઽપ્યેકસ્ય કીર્તનાત્ ।
એતદન્યૈર્જપૈઃ સ્તોત્રૈરર્ચનૈર્યત્ફલં ભવેત્ ॥ 44 ॥

તત્ફલં કોટિગુણિતં ભવેન્નામશતત્રયાત્ ।
વાગ્દેવીરચિતે સ્તોત્રે તાદૃશો મહિમા યદિ ॥ 45 ॥

સાક્ષાત્કામેશકામેશીકૃતેઽસ્મિન્ગૃહ્યતામિતિ ।
સકૃત્સંકીર્તનાદેવ નામ્નામસ્મિન્ શતત્રયે ॥ 46 ॥

ભવેચ્ચિત્તસ્ય પર્યાપ્તિર્ન્યૂનમન્યાનપેક્ષિણી ।
ન જ્ઞાતવ્યમિતોઽપ્યન્યત્ર જપ્તવ્યં ચ કુંભજ ॥ 47 ॥

યદ્યત્સાધ્યતમં કાર્યં તત્તદર્થમિદં જપેત્ ।
તત્તત્ફલમવાપ્નોતિ પશ્ચાત્કાર્યં પરીક્ષયેત્ ॥ 48 ॥

યે યે પ્રયોગાસ્તંત્રેષુ તૈસ્તૈર્યત્સાધ્યતે ફલમ્ ।
તત્સર્વં સિધ્યતિ ક્ષિપ્રં નામત્રિશતકીર્તનાત્ ॥ 49 ॥

આયુષ્કરં પુષ્ટિકરં પુત્રદં વશ્યકારકમ્ ।
વિદ્યાપ્રદં કીર્તિકરં સુકવિત્વપ્રદાયકમ્ ॥ 50 ॥

સર્વસંપત્પ્રદં સર્વભોગદં સર્વસૌખ્યદમ્ ।
સર્વાભીષ્ટપ્રદં ચૈવ દેવ્યા નામશતત્રયમ્ ॥ 51 ॥

એતજ્જપપરો ભૂયાન્નાન્યદિચ્છેત્કદાચન ।
એતત્કીર્તનસંતુષ્ટા શ્રીદેવી લલિતાંબિકા ॥ 52 ॥

ભક્તસ્ય યદ્યદિષ્ટં સ્યાત્તત્તત્પૂરયતે ધ્રુવમ્ ।
તસ્માત્કુંભોદ્ભવ મુને કીર્તય ત્વમિદં સદા ॥ 53 ॥

નાપરં કિંચિદપિ તે બોદ્ધવ્યમવશિષ્યતે ।
ઇતિ તે કથિતં સ્તોત્રં લલિતાપ્રીતિદાયકમ્ ॥ 54 ॥

નાવિદ્યાવેદિને બ્રૂયાન્નાભક્તાય કદાચન ।
ન શઠાય ન દુષ્ટાય નાવિશ્વાસાય કર્હિચિત્ ॥ 56 ॥

યો બ્રૂયાત્ત્રિશતીં નામ્નાં તસ્યાનર્થો મહાન્ભવેત્ ।
ઇત્યાજ્ઞા શાંકરી પ્રોક્તા તસ્માદ્ગોપ્યમિદં ત્વયા ॥ 57 ॥

લલિતાપ્રેરિતેનૈવ મયોક્તં સ્તોત્રમુત્તમમ્ ।
રહસ્યનામસાહસ્રાદપિ ગોપ્યમિદં મુને ॥ 58 ॥

સૂત ઉવાચ ।
એવમુક્ત્વા હયગ્રીવઃ કુંભજં તાપસોત્તમમ્ ।
સ્તોત્રેણાનેન લલિતાં સ્તુત્વા ત્રિપુરસુંદરીમ્ ।
આનંદલહરીમગ્નમાનસઃ સમવર્તત ॥ 59 ॥

ઇતિ બ્રહ્માંડપુરાણે ઉત્તરખંડે હયગ્રીવાગસ્ત્યસંવાદે લલિતોપાખ્યાને સ્તોત્રખંડે શ્રીલલિતાત્રિશતીસ્તોત્રરત્નમ્ ।