શ્રી કામાક્ષી સ્તોત્રમ્

કલ્પાનોકહપુષ્પજાલવિલસન્નીલાલકાં માતૃકાં
કાંતાં કંજદળેક્ષણાં કલિમલપ્રધ્વંસિનીં કાળિકામ્ ।
કાંચીનૂપુરહારદામસુભગાં કાંચીપુરીનાયિકાં
કામાક્ષીં કરિકુંભસન્નિભકુચાં વંદે મહેશપ્રિયામ્ ॥ 1 ॥

કાશાભાં શુકભાસુરાં પ્રવિલસત્કોશાતકી સન્નિભાં
ચંદ્રાર્કાનલલોચનાં સુરુચિરાલંકારભૂષોજ્જ્વલામ્ ।
બ્રહ્મશ્રીપતિવાસવાદિમુનિભિઃ સંસેવિતાંઘ્રિદ્વયાં
કામાક્ષીં ગજરાજમંદગમનાં વંદે મહેશપ્રિયામ્ ॥ 2 ॥

ઐં ક્લીં સૌરિતિ યાં વદંતિ મુનયસ્તત્ત્વાર્થરૂપાં પરાં
વાચામાદિમકારણં હૃદિ સદા ધ્યાયંતિ યાં યોગિનઃ ।
બાલાં ફાલવિલોચનાં નવજપાવર્ણાં સુષુમ્નાશ્રિતાં
કામાક્ષીં કલિતાવતંસસુભગાં વંદે મહેશપ્રિયામ્ ॥ 3 ॥

યત્પાદાંબુજરેણુલેશમનિશં લબ્ધ્વા વિધત્તે વિધિ-
-ર્વિશ્વં તત્પરિપાતિ વિષ્ણુરખિલં યસ્યાઃ પ્રસાદાચ્ચિરમ્ ।
રુદ્રઃ સંહરતિ ક્ષણાત્તદખિલં યન્માયયા મોહિતઃ
કામાક્ષીમતિચિત્રચારુચરિતાં વંદે મહેશપ્રિયામ્ ॥ 4 ॥

સૂક્ષ્માત્સૂક્ષ્મતરાં સુલક્ષિતતનું ક્ષાંતાક્ષરૈર્લક્ષિતાં
વીક્ષાશિક્ષિતરાક્ષસાં ત્રિભુવનક્ષેમંકરીમક્ષયામ્ ।
સાક્ષાલ્લક્ષણલક્ષિતાક્ષરમયીં દાક્ષાયણીં સાક્ષિણીં
કામાક્ષીં શુભલક્ષણૈઃ સુલલિતાં વંદે મહેશપ્રિયામ્ ॥ 5 ॥

ઓંકારાંગણદીપિકામુપનિષત્પ્રાસાદપારાવતીં
આમ્નાયાંબુધિચંદ્રિકામઘતમઃપ્રધ્વંસહંસપ્રભામ્ ।
કાંચીપટ્ટણપંજરાંતરશુકીં કારુણ્યકલ્લોલિનીં
કામાક્ષીં શિવકામરાજમહિષીં વંદે મહેશપ્રિયામ્ ॥ 6 ॥

હ્રીંકારાત્મકવર્ણમાત્રપઠનાદૈંદ્રીં શ્રિયં તન્વતીં
ચિન્માત્રાં ભુવનેશ્વરીમનુદિનં ભિક્ષાપ્રદાનક્ષમામ્ ।
વિશ્વાઘૌઘનિવારિણીં વિમલિનીં વિશ્વંભરાં માતૃકાં
કામાક્ષીં પરિપૂર્ણચંદ્રવદનાં વંદે મહેશપ્રિયામ્ ॥ 7 ॥

વાગ્દેવીતિ ચ યાં વદંતિ મુનયઃ ક્ષીરાબ્ધિકન્યેતિ ચ
ક્ષોણીભૃત્તનયેતિ ચ શ્રુતિગિરો યાં આમનંતિ સ્ફુટમ્ ।
એકાનેકફલપ્રદાં બહુવિધાઽઽકારાસ્તનૂસ્તન્વતીં
કામાક્ષીં સકલાર્તિભંજનપરાં વંદે મહેશપ્રિયામ્ ॥ 8 ॥

માયામાદિમકારણં ત્રિજગતામારાધિતાંઘ્રિદ્વયાં
આનંદામૃતવારિરાશિનિલયાં વિદ્યાં વિપશ્ચિદ્ધિયામ્ ।
માયામાનુષરૂપિણીં મણિલસન્મધ્યાં મહામાતૃકાં
કામાક્ષીં કરિરાજમંદગમનાં વંદે મહેશપ્રિયામ્ ॥ 9 ॥

કાંતા કામદુઘા કરીંદ્રગમના કામારિવામાંકગા
કલ્યાણી કલિતાવતારસુભગા કસ્તૂરિકાચર્ચિતા
કંપાતીરરસાલમૂલનિલયા કારુણ્યકલ્લોલિની
કલ્યાણાનિ કરોતુ મે ભગવતી કાંચીપુરીદેવતા ॥ 10 ॥

ઇતિ શ્રી કામાક્ષી સ્તોત્રમ્ ।