શ્રી દુર્ગા ચંદ્રકળા સ્તુતિ

ધ્યાનમ્
ઉમાકાંતે રમાકાંતે એષામાસી-ન્મતિસ્સમા ।
નમામિ દીક્ષિતેંદ્રાં સ્તાન્ નયષટ્ક-વિશારદામ્ ॥

વેધોહરીશ્વરસ્તુત્યાં વિહર્ત્રીં વિંધ્યભૂધરે ।
હરપ્રાણેશ્વરીં વંદે હંત્રીં વિબુધવિદ્વિષામ્ ॥ 1 ॥

અભ્યર્થનેન સરસીરુહસંભવસ્ય
ત્યક્ત્વોદિતા ભગવદક્ષિપિધાનલીલામ્ ।
વિશ્વેશ્વરી વિપદપાકમને પુરસ્તાત્
માતા મમાસ્તુ મધુકૈટભયોર્નિહંત્રી ॥ 2 ॥

પ્રાઙ્નિર્જરેષુ નિહતૈર્નિજશક્તિલેશૈઃ
એકીભવદ્ભિરુદિતાઽખિલલોકગુપ્ત્યૈ ।
સંપન્નશસ્ત્રનિકરા ચ તદાયુધસ્થૈઃ
માતા મમાસ્તુ મહિષાંતકરી પુરસ્તાત્ ॥ 3 ॥

પ્રાલેયશૈલતનયા તનુકાંતિસંપત્
કોશોદિતા કુવલયચ્છવિચારુદેહા ।
નારાયણી નમદભીપ્સિતકલ્પવલ્લી
સુપ્રીતિમાવહતુ શુંભનિશુંભહંત્રી ॥ 4 ॥

વિશ્વેશ્વરીતિ મહિષાંતકરીતિ યસ્યાઃ
નારાયણીત્યપિ ચ નામભિરંકિતાનિ ।
સૂક્તાનિ પંકજભુવા ચ સુરર્ષિભિશ્ચ
દૃષ્ટાનિ પાવકમુખૈશ્ચ શિવાં ભજે તામ્ ॥ 5 ॥

ઉત્પત્તિદૈત્યહનનસ્તવનાત્મકાનિ
સંરક્ષકાણ્યખિલભૂતહિતાય યસ્યાઃ ।
સૂક્તાન્યશેષનિગમાંતવિદઃ પઠંતિ
તાં વિશ્વમાતરમજસ્રમભિષ્ટવીમિ ॥ 6 ॥

યે વૈપ્રચિત્તપુનરુત્થિતશુંભમુખ્યૈઃ
દુર્ભિક્ષઘોરસમયેન ચ કારિતાસુ ।
આવિષ્કૃતાસ્ત્રિજગદાર્તિષુ રૂપભેદાઃ
તૈરંબિકા સમભિરક્ષતુ માં વિપદ્ભ્યઃ ॥ 7 ॥

સૂક્તં યદીયમરવિંદભવાદિ દૃષ્ટં
આવર્ત્ય દેવ્યનુપદં સુરથઃ સમાધિઃ ।
દ્વાવપ્યવાપતુરભીષ્ટમનન્યલભ્યં
તામાદિદેવતરુણીં પ્રણમામિ મૂર્ધ્ના ॥ 8 ॥

માહિષ્મતીતનુભવં ચ રુરું ચ હંતું
આવિષ્કૃતૈર્નિજરસાદવતારભેદૈઃ ।
અષ્ટાદશાહતનવાહતકોટિસંખ્યૈઃ
અંબા સદા સમભિરક્ષતુ માં વિપદ્ભ્યઃ ॥ 9 ॥

એતચ્ચરિત્રમખિલં લિખિતં હિ યસ્યાઃ
સંપૂજિતં સદન એવ નિવેશિતં વા ।
દુર્ગં ચ તારયતિ દુસ્તરમપ્યશેષં
શ્રેયઃ પ્રયચ્છતિ ચ સર્વમુમાં ભજે તામ્ ॥ 10 ॥

યત્પૂજનસ્તુતિનમસ્કૃતિભિર્ભવંતિ
પ્રીતાઃ પિતામહરમેશહરાસ્ત્રયોઽપિ ।
તેષામપિ સ્વકગુણૈર્દદતી વપૂંષિ
તામીશ્વરસ્ય તરુણીં શરણં પ્રપદ્યે ॥ 11 ॥

કાંતારમધ્યદૃઢલગ્નતયાઽવસન્નાઃ
મગ્નાશ્ચ વારિધિજલે રિપુભિશ્ચ રુદ્ધાઃ ।
યસ્યાઃ પ્રપદ્ય ચરણૌ વિપદસ્તરંતિ
સા મે સદાઽસ્તુ હૃદિ સર્વજગત્સવિત્રી ॥ 12 ॥

બંધે વધે મહતિ મૃત્યુભયે પ્રસક્તે
વિત્તક્ષયે ચ વિવિધે ય મહોપતાપે ।
યત્પાદપૂજનમિહ પ્રતિકારમાહુઃ
સા મે સમસ્તજનની શરણં ભવાની ॥ 13 ॥

બાણાસુરપ્રહિતપન્નગબંધમોક્ષઃ
તદ્બાહુદર્પદલનાદુષયા ચ યોગઃ ।
પ્રાદ્યુમ્નિના દ્રુતમલભ્યત યત્પ્રસાદાત્
સા મે શિવા સકલમપ્યશુભં ક્ષિણોતુ ॥ 14 ॥

પાપઃ પુલસ્ત્યતનયઃ પુનરુત્થિતો માં
અદ્યાપિ હર્તુમયમાગત ઇત્યુદીતમ્ ।
યત્સેવનેન ભયમિંદિરયાઽવધૂતં
તામાદિદેવતરુણીં શરણં ગતોઽસ્મિ ॥ 15 ॥

યદ્ધ્યાનજં સુખમવાપ્યમનંતપુણ્યૈઃ
સાક્ષાત્તમચ્યુત પરિગ્રહમાશ્વવાપુઃ ।
ગોપાંગનાઃ કિલ યદર્ચનપુણ્યમાત્રાઃ
સા મે સદા ભગવતી ભવતુ પ્રસન્ના ॥ 16 ॥

રાત્રિં પ્રપદ્ય ઇતિ મંત્રવિદઃ પ્રપન્નાન્
ઉદ્બોધ્ય મૃત્યુવધિમન્યફલૈઃ પ્રલોભ્ય ।
બુદ્ધ્વા ચ તદ્વિમુખતાં પ્રતનં નયંતીં
આકાશમાદિજનનીં જગતાં ભજે તામ્ ॥ 17 ॥

દેશકાલેષુ દુષ્ટેષુ દુર્ગાચંદ્રકલાસ્તુતિઃ ।
સંધ્યયોરનુસંધેયા સર્વાપદ્વિનિવૃત્તયે ॥ 18 ॥

ઇતિ શ્રીમદપય્યદીક્ષિતવિરચિતા દુર્ગાચંદ્રકળાસ્તુતિઃ ॥