શ્રી બટુક ભૈરવ કવચં

શ્રીભૈરવ ઉવાચ ।
દેવેશિ દેહરક્ષાર્થં કારણં કથ્યતાં ધ્રુવમ્ ।
મ્રિયંતે સાધકા યેન વિના શ્મશાનભૂમિષુ ॥
રણેષુ ચાતિઘોરેષુ મહાવાયુજલેષુ ચ ।
શૃંગિમકરવજ્રેષુ જ્વરાદિવ્યાધિવહ્નિષુ ॥

શ્રીદેવ્યુવાચ ।
કથયામિ શૃણુ પ્રાજ્ઞ બટોસ્તુ કવચં શુભમ્ ।
ગોપનીયં પ્રયત્નેન માતૃજારોપમં યથા ॥
તસ્ય ધ્યાનં ત્રિધા પ્રોક્તં સાત્ત્વિકાદિપ્રભેદતઃ ।
સાત્ત્વિકં રાજસં ચૈવ તામસં દેવ તત્ શૃણુ ॥

ધ્યાનમ્ –
વંદે બાલં સ્ફટિકસદૃશં કુંડલોદ્ભાસિવક્ત્રં
દિવ્યાકલ્પૈર્નવમણિમયૈઃ કિંકિણીનૂપુરાદ્યૈઃ ।
દીપ્તાકારં વિશદવદનં સુપ્રસન્નં ત્રિનેત્રં
હસ્તાબ્જાભ્યાં બટુકમનિશં શૂલખડ્ગૌદધાનમ્ ॥ 1 ॥

ઉદ્યદ્ભાસ્કરસન્નિભં ત્રિનયનં રક્તાંગરાગસ્રજં
સ્મેરાસ્યં વરદં કપાલમભયં શૂલં દધાનં કરૈઃ ।
નીલગ્રીવમુદારભૂષણશતં શીતાંશુચૂડોજ્જ્વલં
બંધૂકારુણવાસસં ભયહરં દેવં સદા ભાવયે ॥ 2 ॥

ધ્યાયેન્નીલાદ્રિકાંતં શશિશકલધરં મુંડમાલં મહેશં
દિગ્વસ્ત્રં પિંગકેશં ડમરુમથ સૃણિં ખડ્ગશૂલાભયાનિ ।
નાગં ઘંટાં કપાલં કરસરસિરુહૈર્વિભ્રતં ભીમદંષ્ટ્રં
સર્પાકલ્પં ત્રિનેત્રં મણિમયવિલસત્કિંકિણી નૂપુરાઢ્યમ્ ॥ 3 ॥

અસ્ય વટુકભૈરવકવચસ્ય મહાકાલ ઋષિરનુષ્ટુપ્છંદઃ શ્રીવટુકભૈરવો દેવતા બં બીજં હ્રીં શક્તિરાપદુદ્ધારણાયેતિ કીલકં મમ સર્વાભીષ્ટસિદ્ધ્યર્થે વિનિયોગઃ ।

કવચમ્ –
ઓં શિરો મે ભૈરવઃ પાતુ લલાટં ભીષણસ્તથા ।
નેત્રે ચ ભૂતહનનઃ સારમેયાનુગો ભ્રુવૌ ॥ 1

ભૂતનાથશ્ચ મે કર્ણૌ કપોલૌ પ્રેતવાહનઃ ।
નાસાપુટૌ તથોષ્ઠૌ ચ ભસ્માંગઃ સર્વભૂષણઃ ॥ 2

ભીષણાસ્યો મમાસ્યં ચ શક્તિહસ્તો ગલં મમ ।
સ્કંધૌ દૈત્યરિપુઃ પાતુ બાહૂ અતુલવિક્રમઃ ॥ 3

પાણી કપાલી મે પાતુ મુંડમાલાધરો હૃદમ્ ।
વક્ષઃસ્થલં તથા શાંતઃ કામચારી સ્તનં મમ ॥ 4

ઉદરં ચ સ મે તુષ્ટઃ ક્ષેત્રેશઃ પાર્શ્વતસ્તથા ।
ક્ષેત્રપાલઃ પૃષ્ઠદેશં ક્ષેત્રાખ્યો નાભિતસ્તથા ॥ 5

કટિં પાપૌઘનાશશ્ચ બટુકો લિંગદેશકમ્ ।
ગુદં રક્ષાકરઃ પાતુ ઊરૂ રક્ષાકરઃ સદા ॥ 6

જાનૂ ચ ઘુર્ઘુરારાવો જંઘે રક્ષતુ રક્તપઃ ।
ગુલ્ફૌ ચ પાદુકાસિદ્ધઃ પાદપૃષ્ઠં સુરેશ્વરઃ ॥ 7

આપાદમસ્તકં ચૈવ આપદુદ્ધારણસ્તથા ।
સહસ્રારે મહાપદ્મે કર્પૂરધવલો ગુરુઃ ॥ 8

પાતુ માં વટુકો દેવો ભૈરવઃ સર્વકર્મસુ ।
પૂર્વ સ્યામસિતાંગો મે દિશિ રક્ષતુ સર્વદા ॥ 9

આગ્નેય્યાં ચ રુરુઃ પાતુ દક્ષિણે ચંડભૈરવઃ ।
નૈરૃત્યાં ક્રોધનઃ પાતુ મામુન્મત્તસ્તુ પશ્ચિમે ॥ 10

વાયવ્યાં મે કપાલી ચ નિત્યં પાયાત્ સુરેશ્વરઃ ।
ભીષણો ભૈરવઃ પાતૂત્તરસ્યાં દિશિ સર્વદા ॥ 11

સંહારભૈરવઃ પાતુ દિશ્યૈશાન્યાં મહેશ્વરઃ ।
ઊર્ધ્વે પાતુ વિધાતા વૈ પાતાલે નંદિકો વિભુઃ ॥ 12

સદ્યોજાતસ્તુ માં પાયાત્ સર્વતો દેવસેવિતઃ ।
વામદેવોઽવતુ પ્રીતો રણે ઘોરે તથાવતુ ॥ 13

જલે તત્પુરુષઃ પાતુ સ્થલે પાતુ ગુરુઃ સદા ।
ડાકિનીપુત્રકઃ પાતુ દારાંસ્તુ લાકિનીસુતઃ ॥ 14

પાતુ સાકલકો ભ્રાતૄન્ શ્રિયં મે સતતં ગિરઃ ।
લાકિનીપુત્રકઃ પાતુ પશૂનશ્વાનજાંસ્તથા ॥ 15

મહાકાલોઽવતુ ચ્છત્રં સૈન્યં વૈ કાલભૈરવઃ ।
રાજ્યં રાજ્યશ્રિયં પાયાત્ ભૈરવો ભીતિહારકઃ ॥ 16

રક્ષાહીનંતુ યત્ સ્થાનં વર્જિતં કવચેન ચ ।
તત્ સર્વં રક્ષ મે દેવ ત્વં યતઃ સર્વરક્ષકઃ ॥ 17

એતત્ કવચમીશાન તવ સ્નેહાત્ પ્રકાશિતમ્ ।
નાખ્યેયં નરલોકેષુ સારભૂતં ચ સુશ્રિયમ્ ॥ 18

યસ્મૈ કસ્મૈ ન દાતવ્યં કવચેશં સુદુર્લભમ્ ।
ન દેયં પરશિષ્યેભ્યઃ કૃપણેભ્યશ્ચ શંકર ॥ 19

યો દદાતિ નિષિદ્ધેભ્યઃ સ વૈ ભ્રષ્ટો ભવેદ્ધ્રુવમ્ ।
અનેન કવચેશેન રક્ષાં કૃત્વા દ્વિજોત્તમઃ ॥ 20

વિચરન્ યત્ર કુત્રાપિ વિઘ્નૌઘૈઃ પ્રાપ્યતે ન સઃ ।
મંત્રેણ મ્રિયતે યોગી કવચં યન્ન રક્ષિતઃ ॥ 21

તસ્માત્ સર્વપ્રયત્નેન દુર્લભં પાપચેતસામ્ ।
ભૂર્જે રંભાત્વચે વાપિ લિખિત્વા વિધિવત્ પ્રભો ॥ 22

ધારયેત્ પાઠયેદ્વાપિ સંપઠેદ્વાપિ નિત્યશઃ ।
સંપ્રાપ્નોતિ પ્રભાવં વૈ કવચસ્યાસ્ય વર્ણિતમ્ ॥ 23

નમો ભૈરવદેવાય સારભૂતાય વૈ નમઃ ।
નમસ્ત્રૈલોક્યનાથાય નાથનાથાય વૈ નમઃ ॥ 24

ઇતિ વિશ્વસારોદ્ધારતંત્રે આપદુદ્ધારકલ્પે ભૈરવભૈરવીસંવાદે વટુકભૈરવકવચં સમાપ્તમ્ ॥