શ્રી દુર્ગા સહસ્ર નામ સ્તોત્રમ્

॥ અથ શ્રી દુર્ગા સહસ્રનામસ્તોત્રમ્ ॥

નારદ ઉવાચ –
કુમાર ગુણગંભીર દેવસેનાપતે પ્રભો ।
સર્વાભીષ્ટપ્રદં પુંસાં સર્વપાપપ્રણાશનમ્ ॥ 1॥

ગુહ્યાદ્ગુહ્યતરં સ્તોત્રં ભક્તિવર્ધકમંજસા ।
મંગલં ગ્રહપીડાદિશાંતિદં વક્તુમર્હસિ ॥ 2॥

સ્કંદ ઉવાચ –
શૃણુ નારદ દેવર્ષે લોકાનુગ્રહકામ્યયા ।
યત્પૃચ્છસિ પરં પુણ્યં તત્તે વક્ષ્યામિ કૌતુકાત્ ॥ 3॥

માતા મે લોકજનની હિમવન્નગસત્તમાત્ ।
મેનાયાં બ્રહ્મવાદિન્યાં પ્રાદુર્ભૂતા હરપ્રિયા ॥ 4॥

મહતા તપસાઽઽરાધ્ય શંકરં લોકશંકરમ્ ।
સ્વમેવ વલ્લભં ભેજે કલેવ હિ કલાનિધિમ્ ॥ 5॥

નગાનામધિરાજસ્તુ હિમવાન્ વિરહાતુરઃ ।
સ્વસુતાયાઃ પરિક્ષીણે વસિષ્ઠેન પ્રબોધિતઃ ॥ 6॥

ત્રિલોકજનની સેયં પ્રસન્ના ત્વયિ પુણ્યતઃ ।
પ્રાદુર્ભૂતા સુતાત્વેન તદ્વિયોગં શુભં ત્યજ ॥ 7॥

બહુરૂપા ચ દુર્ગેયં બહુનામ્ની સનાતની ।
સનાતનસ્ય જાયા સા પુત્રીમોહં ત્યજાધુના ॥ 8॥

ઇતિ પ્રબોધિતઃ શૈલઃ તાં તુષ્ટાવ પરાં શિવામ્ ।
તદા પ્રસન્ના સા દુર્ગા પિતરં પ્રાહ નંદિની ॥ 9॥

મત્પ્રસાદાત્પરં સ્તોત્રં હૃદયે પ્રતિભાસતામ્ ।
તેન નામ્નાં સહસ્રેણ પૂજયન્ કામમાપ્નુહિ ॥ 10॥

ઇત્યુક્ત્વાંતર્હિતાયાં તુ હૃદયે સ્ફુરિતં તદા ।
નામ્નાં સહસ્રં દુર્ગાયાઃ પૃચ્છતે મે યદુક્તવાન્ ॥ 11॥

મંગલાનાં મંગલં તદ્ દુર્ગાનામ સહસ્રકમ્ ।
સર્વાભીષ્ટપ્રદાં પુંસાં બ્રવીમ્યખિલકામદમ્ ॥ 12॥

દુર્ગાદેવી સમાખ્યાતા હિમવાનૃષિરુચ્યતે ।
છંદોનુષ્ટુપ્ જપો દેવ્યાઃ પ્રીતયે ક્રિયતે સદા ॥ 13॥

અસ્ય શ્રીદુર્ગાસ્તોત્રમહામંત્રસ્ય । હિમવાન્ ઋષિઃ । અનુષ્ટુપ્ છંદઃ ।
દુર્ગાભગવતી દેવતા । શ્રીદુર્ગાપ્રસાદસિદ્ધ્યર્થે જપે વિનિયોગઃ । ।

શ્રીભગવત્યૈ દુર્ગાયૈ નમઃ ।

દેવીધ્યાનમ્
ઓં હ્રીં કાલાભ્રાભાં કટાક્ષૈરરિકુલભયદાં મૌલિબદ્ધેંદુરેખાં
શંખં ચક્રં કૃપાણં ત્રિશિખમપિ કરૈરુદ્વહંતીં ત્રિનેત્રામ્ ।
સિંહસ્કંધાધિરૂઢાં ત્રિભુવનમખિલં તેજસા પૂરયંતીં
ધ્યાયેદ્ દુર્ગાં જયાખ્યાં ત્રિદશપરિવૃતાં સેવિતાં સિદ્ધિકામૈઃ ॥

શ્રી જયદુર્ગાયૈ નમઃ ।

ઓં શિવાથોમા રમા શક્તિરનંતા નિષ્કલાઽમલા ।
શાંતા માહેશ્વરી નિત્યા શાશ્વતા પરમા ક્ષમા ॥ 1॥

અચિંત્યા કેવલાનંતા શિવાત્મા પરમાત્મિકા ।
અનાદિરવ્યયા શુદ્ધા સર્વજ્ઞા સર્વગાઽચલા ॥ 2॥

એકાનેકવિભાગસ્થા માયાતીતા સુનિર્મલા ।
મહામાહેશ્વરી સત્યા મહાદેવી નિરંજના ॥ 3॥

કાષ્ઠા સર્વાંતરસ્થાઽપિ ચિચ્છક્તિશ્ચાત્રિલાલિતા ।
સર્વા સર્વાત્મિકા વિશ્વા જ્યોતીરૂપાક્ષરામૃતા ॥ 4॥

શાંતા પ્રતિષ્ઠા સર્વેશા નિવૃત્તિરમૃતપ્રદા ।
વ્યોમમૂર્તિર્વ્યોમસંસ્થા વ્યોમધારાઽચ્યુતાઽતુલા ॥ 5॥

અનાદિનિધનાઽમોઘા કારણાત્મકલાકુલા ।
ઋતુપ્રથમજાઽનાભિરમૃતાત્મસમાશ્રયા ॥ 6॥

પ્રાણેશ્વરપ્રિયા નમ્યા મહામહિષઘાતિની ।
પ્રાણેશ્વરી પ્રાણરૂપા પ્રધાનપુરુષેશ્વરી ॥ 7॥

સર્વશક્તિકલાઽકામા મહિષેષ્ટવિનાશિની ।
સર્વકાર્યનિયંત્રી ચ સર્વભૂતેશ્વરેશ્વરી ॥ 8॥

અંગદાદિધરા ચૈવ તથા મુકુટધારિણી ।
સનાતની મહાનંદાઽઽકાશયોનિસ્તથેચ્યતે ॥ 9॥

ચિત્પ્રકાશસ્વરૂપા ચ મહાયોગેશ્વરેશ્વરી ।
મહામાયા સદુષ્પારા મૂલપ્રકૃતિરીશિકા ॥ 10॥

સંસારયોનિઃ સકલા સર્વશક્તિસમુદ્ભવા ।
સંસારપારા દુર્વારા દુર્નિરીક્ષા દુરાસદા ॥ 11॥

પ્રાણશક્તિશ્ચ સેવ્યા ચ યોગિની પરમાકલા ।
મહાવિભૂતિર્દુર્દર્શા મૂલપ્રકૃતિસંભવા ॥ 12॥

અનાદ્યનંતવિભવા પરાર્થા પુરુષારણિઃ ।
સર્ગસ્થિત્યંતકૃચ્ચૈવ સુદુર્વાચ્યા દુરત્યયા ॥ 13॥

શબ્દગમ્યા શબ્દમાયા શબ્દાખ્યાનંદવિગ્રહા ।
પ્રધાનપુરુષાતીતા પ્રધાનપુરુષાત્મિકા ॥ 14॥

પુરાણી ચિન્મયા પુંસામિષ્ટદા પુષ્ટિરૂપિણી ।
પૂતાંતરસ્થા કૂટસ્થા મહાપુરુષસંજ્ઞિતા ॥ 15॥

જન્મમૃત્યુજરાતીતા સર્વશક્તિસ્વરૂપિણી ।
વાંછાપ્રદાઽનવચ્છિન્નપ્રધાનાનુપ્રવેશિની ॥ 16॥

ક્ષેત્રજ્ઞાઽચિંત્યશક્તિસ્તુ પ્રોચ્યતેઽવ્યક્તલક્ષણા ।
મલાપવર્જિતાઽઽનાદિમાયા ત્રિતયતત્ત્વિકા ॥ 17॥

પ્રીતિશ્ચ પ્રકૃતિશ્ચૈવ ગુહાવાસા તથોચ્યતે ।
મહામાયા નગોત્પન્ના તામસી ચ ધ્રુવા તથા ॥ 18॥

વ્યક્તાઽવ્યક્તાત્મિકા કૃષ્ણા રક્તા શુક્લા હ્યકારણા ।
પ્રોચ્યતે કાર્યજનની નિત્યપ્રસવધર્મિણી ॥ 19॥

સર્ગપ્રલયમુક્તા ચ સૃષ્ટિસ્થિત્યંતધર્મિણી ।
બ્રહ્મગર્ભા ચતુર્વિંશસ્વરૂપા પદ્મવાસિની ॥ 20॥

અચ્યુતાહ્લાદિકા વિદ્યુદ્બ્રહ્મયોનિર્મહાલયા ।
મહાલક્ષ્મી સમુદ્ભાવભાવિતાત્મામહેશ્વરી ॥ 21॥

મહાવિમાનમધ્યસ્થા મહાનિદ્રા સકૌતુકા ।
સર્વાર્થધારિણી સૂક્ષ્મા હ્યવિદ્ધા પરમાર્થદા ॥ 22॥

અનંતરૂપાઽનંતાર્થા તથા પુરુષમોહિની ।
અનેકાનેકહસ્તા ચ કાલત્રયવિવર્જિતા ॥ 23॥

બ્રહ્મજન્મા હરપ્રીતા મતિર્બ્રહ્મશિવાત્મિકા ।
બ્રહ્મેશવિષ્ણુસંપૂજ્યા બ્રહ્માખ્યા બ્રહ્મસંજ્ઞિતા ॥ 24॥

વ્યક્તા પ્રથમજા બ્રાહ્મી મહારાત્રીઃ પ્રકીર્તિતા ।
જ્ઞાનસ્વરૂપા વૈરાગ્યરૂપા હ્યૈશ્વર્યરૂપિણી ॥ 25॥

ધર્માત્મિકા બ્રહ્મમૂર્તિઃ પ્રતિશ્રુતપુમર્થિકા ।
અપાંયોનિઃ સ્વયંભૂતા માનસી તત્ત્વસંભવા ॥ 26॥

ઈશ્વરસ્ય પ્રિયા પ્રોક્તા શંકરાર્ધશરીરિણી ।
ભવાની ચૈવ રુદ્રાણી મહાલક્ષ્મીસ્તથાઽંબિકા ॥ 27॥

મહેશ્વરસમુત્પન્ના ભુક્તિમુક્તિ પ્રદાયિની ।
સર્વેશ્વરી સર્વવંદ્યા નિત્યમુક્તા સુમાનસા ॥ 28॥

મહેંદ્રોપેંદ્રનમિતા શાંકરીશાનુવર્તિની ।
ઈશ્વરાર્ધાસનગતા માહેશ્વરપતિવ્રતા ॥ 29॥

સંસારશોષિણી ચૈવ પાર્વતી હિમવત્સુતા ।
પરમાનંદદાત્રી ચ ગુણાગ્ર્યા યોગદા તથા ॥ 30॥

જ્ઞાનમૂર્તિશ્ચ સાવિત્રી લક્ષ્મીઃ શ્રીઃ કમલા તથા ।
અનંતગુણગંભીરા હ્યુરોનીલમણિપ્રભા ॥ 31॥

સરોજનિલયા ગંગા યોગિધ્યેયાઽસુરાર્દિની ।
સરસ્વતી સર્વવિદ્યા જગજ્જ્યેષ્ઠા સુમંગલા ॥ 32॥

વાગ્દેવી વરદા વર્યા કીર્તિઃ સર્વાર્થસાધિકા ।
વાગીશ્વરી બ્રહ્મવિદ્યા મહાવિદ્યા સુશોભના ॥ 33॥

ગ્રાહ્યવિદ્યા વેદવિદ્યા ધર્મવિદ્યાઽઽત્મભાવિતા ।
સ્વાહા વિશ્વંભરા સિદ્ધિઃ સાધ્યા મેધા ધૃતિઃ કૃતિઃ ॥ 34॥

સુનીતિઃ સંકૃતિશ્ચૈવ કીર્તિતા નરવાહિની ।
પૂજાવિભાવિની સૌમ્યા ભોગ્યભાગ્ ભોગદાયિની ॥ 35॥

શોભાવતી શાંકરી ચ લોલા માલાવિભૂષિતા ।
પરમેષ્ઠિપ્રિયા ચૈવ ત્રિલોકીસુંદરી માતા ॥ 36॥

નંદા સંધ્યા કામધાત્રી મહાદેવી સુસાત્ત્વિકા ।
મહામહિષદર્પઘ્ની પદ્મમાલાઽઘહારિણી ॥ 37॥

વિચિત્રમુકુટા રામા કામદાતા પ્રકીર્તિતા ।
પિતાંબરધરા દિવ્યવિભૂષણ વિભૂષિતા ॥ 38॥

દિવ્યાખ્યા સોમવદના જગત્સંસૃષ્ટિવર્જિતા ।
નિર્યંત્રા યંત્રવાહસ્થા નંદિની રુદ્રકાલિકા ॥ 39॥

આદિત્યવર્ણા કૌમારી મયૂરવરવાહિની ।
પદ્માસનગતા ગૌરી મહાકાલી સુરાર્ચિતા ॥ 40॥

અદિતિર્નિયતા રૌદ્રી પદ્મગર્ભા વિવાહના ।
વિરૂપાક્ષા કેશિવાહા ગુહાપુરનિવાસિની ॥ 41॥

મહાફલાઽનવદ્યાંગી કામરૂપા સરિદ્વરા ।
ભાસ્વદ્રૂપા મુક્તિદાત્રી પ્રણતક્લેશભંજના ॥ 42॥

કૌશિકી ગોમિની રાત્રિસ્ત્રિદશારિવિનાશિની ।
બહુરૂપા સુરૂપા ચ વિરૂપા રૂપવર્જિતા ॥ 43॥

ભક્તાર્તિશમના ભવ્યા ભવભાવવિનાશિની ।
સર્વજ્ઞાનપરીતાંગી સર્વાસુરવિમર્દિકા ॥ 44॥

પિકસ્વની સામગીતા ભવાંકનિલયા પ્રિયા ।
દીક્ષા વિદ્યાધરી દીપ્તા મહેંદ્રાહિતપાતિની ॥ 45॥

સર્વદેવમયા દક્ષા સમુદ્રાંતરવાસિની ।
અકલંકા નિરાધારા નિત્યસિદ્ધા નિરામયા ॥ 46॥

કામધેનુબૃહદ્ગર્ભા ધીમતી મૌનનાશિની ।
નિઃસંકલ્પા નિરાતંકા વિનયા વિનયપ્રદા ॥ 47॥

જ્વાલામાલા સહસ્રાઢ્યા દેવદેવી મનોમયા ।
સુભગા સુવિશુદ્ધા ચ વસુદેવસમુદ્ભવા ॥ 48॥

મહેંદ્રોપેંદ્રભગિની ભક્તિગમ્યા પરાવરા ।
જ્ઞાનજ્ઞેયા પરાતીતા વેદાંતવિષયા મતિઃ ॥ 49॥

દક્ષિણા દાહિકા દહ્યા સર્વભૂતહૃદિસ્થિતા ।
યોગમાયા વિભાગજ્ઞા મહામોહા ગરીયસી ॥ 50॥

સંધ્યા સર્વસમુદ્ભૂતા બ્રહ્મવૃક્ષાશ્રિયાદિતિઃ ।
બીજાંકુરસમુદ્ભૂતા મહાશક્તિર્મહામતિઃ ॥ 51॥

ખ્યાતિઃ પ્રજ્ઞાવતી સંજ્ઞા મહાભોગીંદ્રશાયિની ।
હીંકૃતિઃ શંકરી શાંતિર્ગંધર્વગણસેવિતા ॥ 52॥

વૈશ્વાનરી મહાશૂલા દેવસેના ભવપ્રિયા ।
મહારાત્રી પરાનંદા શચી દુઃસ્વપ્નનાશિની ॥ 53॥

ઈડ્યા જયા જગદ્ધાત્રી દુર્વિજ્ઞેયા સુરૂપિણી ।
ગુહાંબિકા ગણોત્પન્ના મહાપીઠા મરુત્સુતા ॥ 54॥

હવ્યવાહા ભવાનંદા જગદ્યોનિઃ પ્રકીર્તિતા ।
જગન્માતા જગન્મૃત્યુર્જરાતીતા ચ બુદ્ધિદા ॥ 55॥

સિદ્ધિદાત્રી રત્નગર્ભા રત્નગર્ભાશ્રયા પરા ।
દૈત્યહંત્રી સ્વેષ્ટદાત્રી મંગલૈકસુવિગ્રહા ॥ 56॥

પુરુષાંતર્ગતા ચૈવ સમાધિસ્થા તપસ્વિની ।
દિવિસ્થિતા ત્રિણેત્રા ચ સર્વેંદ્રિયમનાધૃતિઃ ॥ 57॥

સર્વભૂતહૃદિસ્થા ચ તથા સંસારતારિણી ।
વેદ્યા બ્રહ્મવિવેદ્યા ચ મહાલીલા પ્રકીર્તિતા ॥ 58॥

બ્રાહ્મણિબૃહતી બ્રાહ્મી બ્રહ્મભૂતાઽઘહારિણી ।
હિરણ્મયી મહાદાત્રી સંસારપરિવર્તિકા ॥ 59॥

સુમાલિની સુરૂપા ચ ભાસ્વિની ધારિણી તથા ।
ઉન્મૂલિની સર્વસભા સર્વપ્રત્યયસાક્ષિણી ॥ 60॥

સુસૌમ્યા ચંદ્રવદના તાંડવાસક્તમાનસા ।
સત્ત્વશુદ્ધિકરી શુદ્ધા મલત્રયવિનાશિની ॥ 61॥

જગત્ત્ત્રયી જગન્મૂર્તિસ્ત્રિમૂર્તિરમૃતાશ્રયા ।
વિમાનસ્થા વિશોકા ચ શોકનાશિન્યનાહતા ॥ 62॥

હેમકુંડલિની કાલી પદ્મવાસા સનાતની ।
સદાકીર્તિઃ સર્વભૂતશયા દેવી સતાંપ્રિયા ॥ 63॥

બ્રહ્મમૂર્તિકલા ચૈવ કૃત્તિકા કંજમાલિની ।
વ્યોમકેશા ક્રિયાશક્તિરિચ્છાશક્તિઃ પરાગતિઃ ॥ 64॥

ક્ષોભિકા ખંડિકાભેદ્યા ભેદાભેદવિવર્જિતા ।
અભિન્ના ભિન્નસંસ્થાના વશિની વંશધારિણી ॥ 65॥

ગુહ્યશક્તિર્ગુહ્યતત્ત્વા સર્વદા સર્વતોમુખી ।
ભગિની ચ નિરાધારા નિરાહારા પ્રકીર્તિતા ॥ 66॥

નિરંકુશપદોદ્ભૂતા ચક્રહસ્તા વિશોધિકા ।
સ્રગ્વિણી પદ્મસંભેદકારિણી પરિકીર્તિતા ॥ 67॥

પરાવરવિધાનજ્ઞા મહાપુરુષપૂર્વજા ।
પરાવરજ્ઞા વિદ્યા ચ વિદ્યુજ્જિહ્વા જિતાશ્રયા ॥ 68॥

વિદ્યામયી સહસ્રાક્ષી સહસ્રવદનાત્મજા ।
સહસ્રરશ્મિઃસત્વસ્થા મહેશ્વરપદાશ્રયા ॥ 69॥

જ્વાલિની સન્મયા વ્યાપ્તા ચિન્મયા પદ્મભેદિકા ।
મહાશ્રયા મહામંત્રા મહાદેવમનોરમા ॥ 70॥

વ્યોમલક્ષ્મીઃ સિંહરથા ચેકિતાનાઽમિતપ્રભા ।
વિશ્વેશ્વરી ભગવતી સકલા કાલહારિણી ॥ 71॥

સર્વવેદ્યા સર્વભદ્રા ગુહ્યા દૂઢા ગુહારણી ।
પ્રલયા યોગધાત્રી ચ ગંગા વિશ્વેશ્વરી તથા ॥ 72॥

કામદા કનકા કાંતા કંજગર્ભપ્રભા તથા ।
પુણ્યદા કાલકેશા ચ ભોક્ત્ત્રી પુષ્કરિણી તથા ॥ 73॥

સુરેશ્વરી ભૂતિદાત્રી ભૂતિભૂષા પ્રકીર્તિતા ।
પંચબ્રહ્મસમુત્પન્ના પરમાર્થાઽર્થવિગ્રહા ॥ 74॥

વર્ણોદયા ભાનુમૂર્તિર્વાગ્વિજ્ઞેયા મનોજવા ।
મનોહરા મહોરસ્કા તામસી વેદરૂપિણી ॥ 75॥

વેદશક્તિર્વેદમાતા વેદવિદ્યાપ્રકાશિની ।
યોગેશ્વરેશ્વરી માયા મહાશક્તિર્મહામયી ॥ 76॥

વિશ્વાંતઃસ્થા વિયન્મૂર્તિર્ભાર્ગવી સુરસુંદરી ।
સુરભિર્નંદિની વિદ્યા નંદગોપતનૂદ્ભવા ॥ 77॥

ભારતી પરમાનંદા પરાવરવિભેદિકા ।
સર્વપ્રહરણોપેતા કામ્યા કામેશ્વરેશ્વરી ॥ 78॥

અનંતાનંદવિભવા હૃલ્લેખા કનકપ્રભા ।
કૂષ્માંડા ધનરત્નાઢ્યા સુગંધા ગંધદાયિની ॥ 79॥

ત્રિવિક્રમપદોદ્ભૂતા ચતુરાસ્યા શિવોદયા ।
સુદુર્લભા ધનાધ્યક્ષા ધન્યા પિંગલલોચના ॥ 80॥

શાંતા પ્રભાસ્વરૂપા ચ પંકજાયતલોચના ।
ઇંદ્રાક્ષી હૃદયાંતઃસ્થા શિવા માતા ચ સત્ક્રિયા ॥ 81॥

ગિરિજા ચ સુગૂઢા ચ નિત્યપુષ્ટા નિરંતરા ।
દુર્ગા કાત્યાયની ચંડી ચંદ્રિકા કાંતવિગ્રહા ॥ 82॥

હિરણ્યવર્ણા જગતી જગદ્યંત્રપ્રવર્તિકા ।
મંદરાદ્રિનિવાસા ચ શારદા સ્વર્ણમાલિની ॥ 83॥

રત્નમાલા રત્નગર્ભા વ્યુષ્ટિર્વિશ્વપ્રમાથિની ।
પદ્માનંદા પદ્મનિભા નિત્યપુષ્ટા કૃતોદ્ભવા ॥ 84॥

નારાયણી દુષ્ટશિક્ષા સૂર્યમાતા વૃષપ્રિયા ।
મહેંદ્રભગિની સત્યા સત્યભાષા સુકોમલા ॥ 85॥

વામા ચ પંચતપસાં વરદાત્રી પ્રકીર્તિતા ।
વાચ્યવર્ણેશ્વરી વિદ્યા દુર્જયા દુરતિક્રમા ॥ 86॥

કાલરાત્રિર્મહાવેગા વીરભદ્રપ્રિયા હિતા ।
ભદ્રકાલી જગન્માતા ભક્તાનાં ભદ્રદાયિની ॥ 87॥

કરાલા પિંગલાકારા કામભેત્ત્રી મહામનાઃ ।
યશસ્વિની યશોદા ચ ષડધ્વપરિવર્તિકા ॥ 88॥

શંખિની પદ્મિની સંખ્યા સાંખ્યયોગપ્રવર્તિકા ।
ચૈત્રાદિર્વત્સરારૂઢા જગત્સંપૂરણીંદ્રજા ॥ 89॥

શુંભઘ્ની ખેચરારાધ્યા કંબુગ્રીવા બલીડિતા ।
ખગારૂઢા મહૈશ્વર્યા સુપદ્મનિલયા તથા ॥ 90॥

વિરક્તા ગરુડસ્થા ચ જગતીહૃદ્ગુહાશ્રયા ।
શુંભાદિમથના ભક્તહૃદ્ગહ્વરનિવાસિની ॥ 91॥

જગત્ત્ત્રયારણી સિદ્ધસંકલ્પા કામદા તથા ।
સર્વવિજ્ઞાનદાત્રી ચાનલ્પકલ્મષહારિણી ॥ 92॥

સકલોપનિષદ્ગમ્યા દુષ્ટદુષ્પ્રેક્ષ્યસત્તમા ।
સદ્વૃતા લોકસંવ્યાપ્તા તુષ્ટિઃ પુષ્ટિઃ ક્રિયાવતી ॥ 93॥

વિશ્વામરેશ્વરી ચૈવ ભુક્તિમુક્તિપ્રદાયિની ।
શિવાધૃતા લોહિતાક્ષી સર્પમાલાવિભૂષણા ॥ 94॥

નિરાનંદા ત્રિશૂલાસિધનુર્બાણાદિધારિણી ।
અશેષધ્યેયમૂર્તિશ્ચ દેવતાનાં ચ દેવતા ॥ 95॥

વરાંબિકા ગિરેઃ પુત્રી નિશુંભવિનિપાતિની ।
સુવર્ણા સ્વર્ણલસિતાઽનંતવર્ણા સદાધૃતા ॥ 96॥

શાંકરી શાંતહૃદયા અહોરાત્રવિધાયિકા ।
વિશ્વગોપ્ત્રી ગૂઢરૂપા ગુણપૂર્ણા ચ ગાર્ગ્યજા ॥ 97॥

ગૌરી શાકંભરી સત્યસંધા સંધ્યાત્રયીધૃતા ।
સર્વપાપવિનિર્મુક્તા સર્વબંધવિવર્જિતા ॥ 98॥

સાંખ્યયોગસમાખ્યાતા અપ્રમેયા મુનીડિતા ।
વિશુદ્ધસુકુલોદ્ભૂતા બિંદુનાદસમાદૃતા ॥ 99॥

શંભુવામાંકગા ચૈવ શશિતુલ્યનિભાનના ।
વનમાલાવિરાજંતી અનંતશયનાદૃતા ॥ 100॥

નરનારાયણોદ્ભૂતા નારસિંહી પ્રકીર્તિતા ।
દૈત્યપ્રમાથિની શંખચક્રપદ્મગદાધરા ॥ 101॥

સંકર્ષણસમુત્પન્ના અંબિકા સજ્જનાશ્રયા ।
સુવૃતા સુંદરી ચૈવ ધર્મકામાર્થદાયિની ॥ 102॥

મોક્ષદા ભક્તિનિલયા પુરાણપુરુષાદૃતા ।
મહાવિભૂતિદાઽઽરાધ્યા સરોજનિલયાઽસમા ॥ 103॥

અષ્ટાદશભુજાઽનાદિર્નીલોત્પલદલાક્ષિણી ।
સર્વશક્તિસમારૂઢા ધર્માધર્મવિવર્જિતા ॥ 104॥

વૈરાગ્યજ્ઞાનનિરતા નિરાલોકા નિરિંદ્રિયા ।
વિચિત્રગહનાધારા શાશ્વતસ્થાનવાસિની ॥ 105॥

જ્ઞાનેશ્વરી પીતચેલા વેદવેદાંગપારગા ।
મનસ્વિની મન્યુમાતા મહામન્યુસમુદ્ભવા ॥ 106॥

અમન્યુરમૃતાસ્વાદા પુરંદરપરિષ્ટુતા ।
અશોચ્યા ભિન્નવિષયા હિરણ્યરજતપ્રિયા ॥ 107॥

હિરણ્યજનની ભીમા હેમાભરણભૂષિતા ।
વિભ્રાજમાના દુર્જ્ઞેયા જ્યોતિષ્ટોમફલપ્રદા ॥ 108॥

મહાનિદ્રાસમુત્પત્તિરનિદ્રા સત્યદેવતા ।
દીર્ઘા કકુદ્મિની પિંગજટાધારા મનોજ્ઞધીઃ ॥ 109॥

મહાશ્રયા રમોત્પન્ના તમઃપારે પ્રતિષ્ઠિતા ।
ત્રિતત્ત્વમાતા ત્રિવિધા સુસૂક્ષ્મા પદ્મસંશ્રયા ॥ 110॥

શાંત્યતીતકલાઽતીતવિકારા શ્વેતચેલિકા ।
ચિત્રમાયા શિવજ્ઞાનસ્વરૂપા દૈત્યમાથિની ॥ 111॥

કાશ્યપી કાલસર્પાભવેણિકા શાસ્ત્રયોનિકા ।
ત્રયીમૂર્તિઃ ક્રિયામૂર્તિશ્ચતુર્વર્ગા ચ દર્શિની ॥ 112॥

નારાયણી નરોત્પન્ના કૌમુદી કાંતિધારિણી ।
કૌશિકી લલિતા લીલા પરાવરવિભાવિની ॥ 113॥

વરેણ્યાઽદ્ભુતમહાત્મ્યા વડવા વામલોચના ।
સુભદ્રા ચેતનારાધ્યા શાંતિદા શાંતિવર્ધિની ॥ 114॥

જયાદિશક્તિજનની શક્તિચક્રપ્રવર્તિકા ।
ત્રિશક્તિજનની જન્યા ષટ્સૂત્રપરિવર્ણિતા ॥ 115॥

સુધૌતકર્મણાઽઽરાધ્યા યુગાંતદહનાત્મિકા ।
સંકર્ષિણી જગદ્ધાત્રી કામયોનિઃ કિરીટિની ॥ 116॥

ઐંદ્રી ત્રૈલોક્યનમિતા વૈષ્ણવી પરમેશ્વરી ।
પ્રદ્યુમ્નજનની બિંબસમોષ્ઠી પદ્મલોચના ॥ 117॥

મદોત્કટા હંસગતિઃ પ્રચંડા ચંડવિક્રમા ।
વૃષાધીશા પરાત્મા ચ વિંધ્યા પર્વતવાસિની ॥ 118॥

હિમવન્મેરુનિલયા કૈલાસપુરવાસિની ।
ચાણૂરહંત્રી નીતિજ્ઞા કામરૂપા ત્રયીતનુઃ ॥ 119॥

વ્રતસ્નાતા ધર્મશીલા સિંહાસનનિવાસિની ।
વીરભદ્રાદૃતા વીરા મહાકાલસમુદ્ભવા ॥ 120॥

વિદ્યાધરાર્ચિતા સિદ્ધસાધ્યારાધિતપાદુકા ।
શ્રદ્ધાત્મિકા પાવની ચ મોહિની અચલાત્મિકા ॥ 121॥

મહાદ્ભુતા વારિજાક્ષી સિંહવાહનગામિની ।
મનીષિણી સુધાવાણી વીણાવાદનતત્પરા ॥ 122॥

શ્વેતવાહનિષેવ્યા ચ લસન્મતિરરુંધતી ।
હિરણ્યાક્ષી તથા ચૈવ મહાનંદપ્રદાયિની ॥ 123॥

વસુપ્રભા સુમાલ્યાપ્તકંધરા પંકજાનના ।
પરાવરા વરારોહા સહસ્રનયનાર્ચિતા ॥ 124॥

શ્રીરૂપા શ્રીમતી શ્રેષ્ઠા શિવનામ્ની શિવપ્રિયા ।
શ્રીપ્રદા શ્રિતકલ્યાણા શ્રીધરાર્ધશરીરિણી ॥ 125॥

શ્રીકલાઽનંતદૃષ્ટિશ્ચ હ્યક્ષુદ્રારાતિસૂદની ।
રક્તબીજનિહંત્રી ચ દૈત્યસંગવિમર્દિની ॥ 126॥

સિંહારૂઢા સિંહિકાસ્યા દૈત્યશોણિતપાયિની ।
સુકીર્તિસહિતાચ્છિન્નસંશયા રસવેદિની ॥ 127॥

ગુણાભિરામા નાગારિવાહના નિર્જરાર્ચિતા ।
નિત્યોદિતા સ્વયંજ્યોતિઃ સ્વર્ણકાયા પ્રકીર્તિતા ॥ 128॥

વજ્રદંડાંકિતા ચૈવ તથામૃતસંજીવિની ।
વજ્રચ્છન્ના દેવદેવી વરવજ્રસ્વવિગ્રહા ॥ 129॥

માંગલ્યા મંગલાત્મા ચ માલિની માલ્યધારિણી ।
ગંધર્વી તરુણી ચાંદ્રી ખડ્ગાયુધધરા તથા ॥ 130॥

સૌદામિની પ્રજાનંદા તથા પ્રોક્તા ભૃગૂદ્ભવા ।
એકાનંગા ચ શાસ્ત્રાર્થકુશલા ધર્મચારિણી ॥ 131॥

ધર્મસર્વસ્વવાહા ચ ધર્માધર્મવિનિશ્ચયા ।
ધર્મશક્તિર્ધર્મમયા ધાર્મિકાનાં શિવપ્રદા ॥ 132॥

વિધર્મા વિશ્વધર્મજ્ઞા ધર્માર્થાંતરવિગ્રહા ।
ધર્મવર્ષ્મા ધર્મપૂર્વા ધર્મપારંગતાંતરા ॥ 133॥

ધર્મોપદેષ્ટ્રી ધર્માત્મા ધર્મગમ્યા ધરાધરા ।
કપાલિની શાકલિની કલાકલિતવિગ્રહા ॥ 134॥

સર્વશક્તિવિમુક્તા ચ કર્ણિકારધરાઽક્ષરા।
કંસપ્રાણહરા ચૈવ યુગધર્મધરા તથા ॥ 135॥

યુગપ્રવર્તિકા પ્રોક્તા ત્રિસંધ્યા ધ્યેયવિગ્રહા ।
સ્વર્ગાપવર્ગદાત્રી ચ તથા પ્રત્યક્ષદેવતા ॥ 136॥

આદિત્યા દિવ્યગંધા ચ દિવાકરનિભપ્રભા ।
પદ્માસનગતા પ્રોક્તા ખડ્ગબાણશરાસના ॥ 137॥

શિષ્ટા વિશિષ્ટા શિષ્ટેષ્ટા શિષ્ટશ્રેષ્ઠપ્રપૂજિતા ।
શતરૂપા શતાવર્તા વિતતા રાસમોદિની ॥ 138॥

સૂર્યેંદુનેત્રા પ્રદ્યુમ્નજનની સુષ્ઠુમાયિની ।
સૂર્યાંતરસ્થિતા ચૈવ સત્પ્રતિષ્ઠતવિગ્રહા ॥ 139॥

નિવૃત્તા પ્રોચ્યતે જ્ઞાનપારગા પર્વતાત્મજા ।
કાત્યાયની ચંડિકા ચ ચંડી હૈમવતી તથા ॥ 140॥

દાક્ષાયણી સતી ચૈવ ભવાની સર્વમંગલા ।
ધૂમ્રલોચનહંત્રી ચ ચંડમુંડવિનાશિની ॥ 141॥

યોગનિદ્રા યોગભદ્રા સમુદ્રતનયા તથા ।
દેવપ્રિયંકરી શુદ્ધા ભક્તભક્તિપ્રવર્ધિની ॥ 142॥

ત્રિણેત્રા ચંદ્રમુકુટા પ્રમથાર્ચિતપાદુકા ।
અર્જુનાભીષ્ટદાત્રી ચ પાંડવપ્રિયકારિણી ॥ 143॥

કુમારલાલનાસક્તા હરબાહૂપધાનિકા ।
વિઘ્નેશજનની ભક્તવિઘ્નસ્તોમપ્રહારિણી ॥ 144॥

સુસ્મિતેંદુમુખી નમ્યા જયાપ્રિયસખી તથા ।
અનાદિનિધના પ્રેષ્ઠા ચિત્રમાલ્યાનુલેપના ॥ 145॥

કોટિચંદ્રપ્રતીકાશા કૂટજાલપ્રમાથિની ।
કૃત્યાપ્રહારિણી ચૈવ મારણોચ્ચાટની તથા ॥ 146॥

સુરાસુરપ્રવંદ્યાંઘ્રિર્મોહઘ્ની જ્ઞાનદાયિની ।
ષડ્વૈરિનિગ્રહકરી વૈરિવિદ્રાવિણી તથા ॥ 147॥

ભૂતસેવ્યા ભૂતદાત્રી ભૂતપીડાવિમર્દિકા ।
નારદસ્તુતચારિત્રા વરદેશા વરપ્રદા ॥ 148॥

વામદેવસ્તુતા ચૈવ કામદા સોમશેખરા ।
દિક્પાલસેવિતા ભવ્યા ભામિની ભાવદાયિની ॥ 149॥

સ્ત્રીસૌભાગ્યપ્રદાત્રી ચ ભોગદા રોગનાશિની ।
વ્યોમગા ભૂમિગા ચૈવ મુનિપૂજ્યપદાંબુજા ।
વનદુર્ગા ચ દુર્બોધા મહાદુર્ગા પ્રકીર્તિતા ॥ 150॥

ફલશ્રુતિઃ

ઇતીદં કીર્તિદં ભદ્ર દુર્ગાનામસહસ્રકમ્ ।
ત્રિસંધ્યં યઃ પઠેન્નિત્યં તસ્ય લક્ષ્મીઃ સ્થિરા ભવેત્ ॥ 1॥

ગ્રહભૂતપિશાચાદિપીડા નશ્યત્યસંશયમ્ ।
બાલગ્રહાદિપીડાયાઃ શાંતિર્ભવતિ કીર્તનાત્ ॥ 2॥

મારિકાદિમહારોગે પઠતાં સૌખ્યદં નૃણામ્ ।
વ્યવહારે ચ જયદં શત્રુબાધાનિવારકમ્ ॥ 3॥

દંપત્યોઃ કલહે પ્રાપ્તે મિથઃ પ્રેમાભિવર્ધકમ્ ।
આયુરારોગ્યદં પુંસાં સર્વસંપત્પ્રદાયકમ્ ॥ 4॥

વિદ્યાભિવર્ધકં નિત્યં પઠતામર્થસાધકમ્ ।
શુભદં શુભકાર્યેષુ પઠતાં શૃણુતામપિ ॥ 5॥

યઃ પૂજયતિ દુર્ગાં તાં દુર્ગાનામસહસ્રકૈઃ ।
પુષ્પૈઃ કુંકુમસમ્મિશ્રૈઃ સ તુ યત્કાંક્ષતે હૃદિ ॥ 6॥

તત્સર્વં સમવાપ્નોતિ નાસ્તિ નાસ્ત્યત્ર સંશયઃ ।
યન્મુખે ધ્રિયતે નિત્યં દુર્ગાનામસહસ્રકમ્ ॥ 7॥

કિં તસ્યેતરમંત્રૌઘૈઃ કાર્યં ધન્યતમસ્ય હિ ।
દુર્ગાનામસહસ્રસ્ય પુસ્તકં યદ્ગૃહે ભવેત્ ॥ 8॥

ન તત્ર ગ્રહભૂતાદિબાધા સ્યાન્મંગલાસ્પદે ।
તદ્ગૃહં પુણ્યદં ક્ષેત્રં દેવીસાન્નિધ્યકારકમ્ ॥ 9॥

એતસ્ય સ્તોત્રમુખ્યસ્ય પાઠકઃ શ્રેષ્ઠમંત્રવિત્ ।
દેવતાયાઃ પ્રસાદેન સર્વપૂજ્યઃ સુખી ભવેત્ ॥ 10॥

ઇત્યેતન્નગરાજેન કીર્તિતં મુનિસત્તમ ।
ગુહ્યાદ્ગુહ્યતરં સ્તોત્રં ત્વયિ સ્નેહાત્ પ્રકીર્તિતમ્ ॥ 11॥

ભક્તાય શ્રદ્ધધાનાય કેવલં કીર્ત્યતામિદમ્ ।
હૃદિ ધારય નિત્યં ત્વં દેવ્યનુગ્રહસાધકમ્ ॥ 12॥ ॥

ઇતિ શ્રીસ્કાંદપુરાણે સ્કંદનારદસંવાદે દુર્ગાસહસ્રનામસ્તોત્રં સંપૂર્ણમ્ ॥