સરસ્વતી કવચમ્

(બ્રહ્મવૈવર્ત મહાપુરાણાંતર્ગતં)

ભૃગુરુવાચ ।
બ્રહ્મન્બ્રહ્મવિદાંશ્રેષ્ઠ બ્રહ્મજ્ઞાનવિશારદ ।
સર્વજ્ઞ સર્વજનક સર્વપૂજકપૂજિત ॥ 60

સરસ્વત્યાશ્ચ કવચં બ્રૂહિ વિશ્વજયં પ્રભો ।
અયાતયામમંત્રાણાં સમૂહો યત્ર સંયુતઃ ॥ 61 ॥

બ્રહ્મોવાચ ।
શૃણુ વત્સ પ્રવક્ષ્યામિ કવચં સર્વકામદમ્ ।
શ્રુતિસારં શ્રુતિસુખં શ્રુત્યુક્તં શ્રુતિપૂજિતમ્ ॥ 62 ॥

ઉક્તં કૃષ્ણેન ગોલોકે મહ્યં વૃંદાવને વને ।
રાસેશ્વરેણ વિભુના રાસે વૈ રાસમંડલે ॥ 63 ॥

અતીવ ગોપનીયંચ કલ્પવૃક્ષસમં પરમ્ ।
અશ્રુતાદ્ભુતમંત્રાણાં સમૂહૈશ્ચ સમન્વિતમ્ ॥ 64 ॥

યદ્ધૃત્વા પઠનાદ્બ્રહ્મન્બુદ્ધિમાંશ્ચ બૃહસ્પતિઃ ।
યદ્ધૃત્વા ભગવાંછુક્રઃ સર્વદૈત્યેષુ પૂજિતઃ ॥ 65 ॥

પઠનાદ્ધારણાદ્વાગ્મી કવીંદ્રો વાલ્મિકી મુનિઃ ।
સ્વાયંભુવો મનુશ્ચૈવ યદ્ધૃત્વા સર્વપૂજિતાઃ ॥ 66 ॥

કણાદો ગૌતમઃ કણ્વઃ પાણિનિઃ શાકટાયનઃ ।
ગ્રંથં ચકાર યદ્ધૃત્વા દક્ષઃ કાત્યાયનઃ સ્વયમ્ ॥ 67 ॥

ધૃત્વા વેદવિભાગંચ પુરાણાન્યખિલાનિ ચ ।
ચકાર લીલામાત્રેણ કૃષ્ણદ્વૈપાયનઃ સ્વયમ્ ॥ 68 ॥

શાતાતપશ્ચ સંવર્તો વસિષ્ઠશ્ચ પરાશરઃ ।
યદ્ધૃત્વા પઠનાદ્ગ્રંથં યાજ્ઞવલ્ક્યશ્ચકાર સઃ ॥ 69 ॥

ઋષ્યશૃંગો ભરદ્વાજશ્ચાસ્તીકો દેવલસ્તથા ।
જૈગીષવ્યોઽથ જાબાલિર્યદ્ધૃત્વા સર્વપૂજિતઃ ॥ 70 ॥

કવચસ્યાસ્ય વિપ્રેંદ્ર ઋષિરેષ પ્રજાપતિઃ ।
સ્વયં બૃહસ્પતિશ્છંદો દેવો રાસેશ્વરઃ પ્રભુઃ ॥ 71 ॥

સર્વતત્ત્વપરિજ્ઞાને સર્વાર્થેઽપિ ચ સાધને ।
કવિતાસુ ચ સર્વાસુ વિનિયોગઃ પ્રકીર્તિતઃ ॥ 72 ॥

( કવચં )
ઓં હ્રીં સરસ્વત્યૈ સ્વાહા શિરો મે પાતુ સર્વતઃ ।
શ્રીં વાગ્દેવતાયૈ સ્વાહા ભાલં મે સર્વદાઽવતુ ॥ 73 ॥

ઓં હ્રીં સરસ્વત્યૈ સ્વાહેતિ શ્રોત્રે પાતુ નિરંતરમ્ ।
ઓં શ્રીં હ્રીં ભગવત્યૈ સરસ્વત્યૈ સ્વાહા નેત્રયુગ્મં સદાઽવતુ ॥ 74 ॥

ઐં હ્રીં વાગ્વાદિન્યૈ સ્વાહા નાસાં મે સર્વદાઽવતુ ।
હ્રીં વિદ્યાધિષ્ઠાતૃદેવ્યૈ સ્વાહા ચોંષ્ઠ સદાઽવતુ ॥ 75 ॥

ઓં શ્રીં હ્રીં બ્રાહ્મ્યૈ સ્વાહેતિ દંતપંક્તિં સદાઽવતુ ।
ઐમિત્યેકાક્ષરો મંત્રો મમ કંઠં સદાઽવતુ ॥ 76 ॥

ઓં શ્રીં હ્રીં પાતુ મે ગ્રીવાં સ્કંધં મે શ્રીં સદાઽવતુ ।
ઓં હ્રીં વિદ્યાધિષ્ઠાતૃદેવ્યૈ સ્વાહા વક્ષઃ સદાઽવતુ ॥ 77 ॥

ઓં હ્રીં વિદ્યાસ્વરૂપાયૈ સ્વાહા મે પાતુ નાભિકામ્ ।
ઓં હ્રીં ક્લીં વાણ્યૈ સ્વાહેતિ મમ પૃષ્ઠં સદાઽવતુ ॥ 78 ॥

ઓં સર્વવર્ણાત્મિકાયૈ પાદયુગ્મં સદાઽવતુ ।
ઓં રાગાધિષ્ઠાતૃદેવ્યૈ સર્વાંગં મે સદાઽવતુ ॥ 79 ॥

ઓં સર્વકંઠવાસિન્યૈ સ્વાહા પ્રચ્યાં સદાઽવતુ ।
ઓં હ્રીં જિહ્વાગ્રવાસિન્યૈ સ્વાહાઽગ્નિદિશિ રક્ષતુ ॥ 80 ॥

ઓં ઐં હ્રીં શ્રીં સરસ્વત્યૈ બુધજનન્યૈ સ્વાહા ।
સતતં મંત્રરાજોઽયં દક્ષિણે માં સદાઽવતુ ॥ 81 ॥

ઓં હ્રીં શ્રીં ત્ર્યક્ષરો મંત્રો નૈરૃત્યાં મે સદાઽવતુ ।
કવિજિહ્વાગ્રવાસિન્યૈ સ્વાહા માં વારુણેઽવતુ ॥ 82 ॥

ઓં સદંબિકાયૈ સ્વાહા વાયવ્યે માં સદાઽવતુ ।
ઓં ગદ્યપદ્યવાસિન્યૈ સ્વાહા મામુત્તરેઽવતુ ॥ 83 ॥

ઓં સર્વશાસ્ત્રવાસિન્યૈ સ્વાહૈશાન્યાં સદાઽવતુ ।
ઓં હ્રીં સર્વપૂજિતાયૈ સ્વાહા ચોર્ધ્વં સદાઽવતુ ॥ 84 ॥

ઐં હ્રીં પુસ્તકવાસિન્યૈ સ્વાહાઽધો માં સદાવતુ ।
ઓં ગ્રંથબીજરૂપાયૈ સ્વાહા માં સર્વતોઽવતુ ॥ 85 ॥

ઇતિ તે કથિતં વિપ્ર સર્વમંત્રૌઘવિગ્રહમ્ ।
ઇદં વિશ્વજયં નામ કવચં બ્રહ્મારૂપકમ્ ॥ 86 ॥

પુરા શ્રુતં ધર્મવક્ત્રાત્પર્વતે ગંધમાદને ।
તવ સ્નેહાન્મયાઽઽખ્યાતં પ્રવક્તવ્યં ન કસ્યચિત્ ॥ 87 ॥

ગુરુમભ્યર્ચ્ય વિધિવદ્વસ્ત્રાલંકારચંદનૈઃ ।
પ્રણમ્ય દંડવદ્ભૂમૌ કવચં ધારયેત્સુધીઃ ॥ 88 ॥

પંચલક્ષજપેનૈવ સિદ્ધં તુ કવચં ભવેત્ ।
યદિ સ્યાત્સિદ્ધકવચો બૃહસ્પતિ સમો ભવેત્ ॥ 89 ॥

મહાવાગ્મી કવીંદ્રશ્ચ ત્રૈલોક્યવિજયી ભવેત્ ।
શક્નોતિ સર્વં જેતું સ કવચસ્ય પ્રભાવતઃ ॥ 90 ॥

ઇદં તે કાણ્વશાખોક્તં કથિતં કવચં મુને ।
સ્તોત્રં પૂજાવિધાનં ચ ધ્યાનં વૈ વંદનં તથા ॥ 91 ॥

ઇતિ શ્રી બ્રહ્મવૈવર્તે મહાપુરાણે પ્રકૃતિખંડે નારદનારાયણસંવાદે સરસ્વતીકવચં નામ ચતુર્થોઽધ્યાયઃ ।