નારાયણીયં દશક 98 – નિષ્કલબ્રહ્મોપાસનમ્

યસ્મિન્નેતદ્વિભાતં યત ઇદમભવદ્યેન ચેદં ય એત-
દ્યોઽસ્માદુત્તીર્ણરૂપઃ ખલુ સકલમિદં ભાસિતં યસ્ય ભાસા ।
યો વાચાં દૂરદૂરે પુનરપિ મનસાં યસ્ય દેવા મુનીંદ્રાઃ
નો વિદ્યુસ્તત્ત્વરૂપં કિમુ પુનરપરે કૃષ્ણ તસ્મૈ નમસ્તે ॥1॥

જન્માથો કર્મ નામ સ્ફુટમિહ ગુણદોષાદિકં વા ન યસ્મિન્
લોકાનામૂતયે યઃ સ્વયમનુભજતે તાનિ માયાનુસારી ।
વિભ્રચ્છક્તીરરૂપોઽપિ ચ બહુતરરૂપોઽવભાત્યદ્ભુતાત્મા
તસ્મૈ કૈવલ્યધામ્ને પરરસપરિપૂર્ણાય વિષ્ણો નમસ્તે ॥2॥

નો તિર્યંચન્ન મર્ત્યં ન ચ સુરમસુરં ન સ્ત્રિયં નો પુંમાંસં
ન દ્રવ્યં કર્મ જાતિં ગુણમપિ સદસદ્વાપિ તે રૂપમાહુઃ ।
શિષ્ટં યત્ સ્યાન્નિષેધે સતિ નિગમશતૈર્લક્ષણાવૃત્તિતસ્તત્
કૃચ્છ્રેણાવેદ્યમાનં પરમસુખમયં ભાતિ તસ્મૈ નમસ્તે ॥3॥

માયાયાં બિંબિતસ્ત્વં સૃજસિ મહદહંકારતન્માત્રભેદૈ-
ર્ભૂતગ્રામેંદ્રિયાદ્યૈરપિ સકલજગત્સ્વપ્નસંકલ્પકલ્પમ્ ।
ભૂયઃ સંહૃત્ય સર્વં કમઠ ઇવ પદાન્યાત્મના કાલશક્ત્યા
ગંભીરે જાયમાને તમસિ વિતિમિરો ભાસિ તસ્મૈ નમસ્તે ॥4॥

શબ્દબ્રહ્મેતિ કર્મેત્યણુરિતિ ભગવન્ કાલ ઇત્યાલપંતિ
ત્વામેકં વિશ્વહેતું સકલમયતયા સર્વથા કલ્પ્યમાનમ્ ।
વેદાંતૈર્યત્તુ ગીતં પુરુષપરચિદાત્માભિધં તત્તુ તત્ત્વં
પ્રેક્ષામાત્રેણ મૂલપ્રકૃતિવિકૃતિકૃત્ કૃષ્ણ તસ્મૈ નમસ્તે ॥5॥

સત્ત્વેનાસત્તયા વા ન ચ ખલુ સદસત્ત્વેન નિર્વાચ્યરૂપા
ધત્તે યાસાવવિદ્યા ગુણફણિમતિવદ્વિશ્વદૃશ્યાવભાસમ્ ।
વિદ્યાત્વં સૈવ યાતા શ્રુતિવચનલવૈર્યત્કૃપાસ્યંદલાભે
સંસારારણ્યસદ્યસ્ત્રુટનપરશુતામેતિ તસ્મૈ નમસ્તે ॥6॥

ભૂષાસુ સ્વર્ણવદ્વા જગતિ ઘટશરાવાદિકે મૃત્તિકાવ-
ત્તત્ત્વે સંચિંત્યમાને સ્ફુરતિ તદધુનાપ્યદ્વિતીયં વપુસ્તે ।
સ્વપ્નદ્રષ્ટુઃ પ્રબોધે તિમિરલયવિધૌ જીર્ણરજ્જોશ્ચ યદ્વ-
દ્વિદ્યાલાભે તથૈવ સ્ફુટમપિ વિકસેત્ કૃષ્ણ તસ્મૈ નમસ્તે ॥7॥

યદ્ભીત્યોદેતિ સૂર્યો દહતિ ચ દહનો વાતિ વાયુસ્તથાન્યે
યદ્ભીતાઃ પદ્મજાદ્યાઃ પુનરુચિતબલીનાહરંતેઽનુકાલમ્ ।
યેનૈવારોપિતાઃ પ્રાઙ્નિજપદમપિ તે ચ્યાવિતારશ્ચ પશ્ચાત્
તસ્મૈ વિશ્વં નિયંત્રે વયમપિ ભવતે કૃષ્ણ કુર્મઃ પ્રણામમ્ ॥8॥

ત્રૈલોક્યં ભાવયંતં ત્રિગુણમયમિદં ત્ર્યક્ષરસ્યૈકવાચ્યં
ત્રીશાનામૈક્યરૂપં ત્રિભિરપિ નિગમૈર્ગીયમાનસ્વરૂપમ્ ।
તિસ્રોવસ્થા વિદંતં ત્રિયુગજનિજુષં ત્રિક્રમાક્રાંતવિશ્વં
ત્રૈકાલ્યે ભેદહીનં ત્રિભિરહમનિશં યોગભેદૈર્ભજે ત્વામ્ ॥9॥

સત્યં શુદ્ધં વિબુદ્ધં જયતિ તવ વપુર્નિત્યમુક્તં નિરીહં
નિર્દ્વંદ્વં નિર્વિકારં નિખિલગુણગણવ્યંજનાધારભૂતમ્ ।
નિર્મૂલં નિર્મલં તન્નિરવધિમહિમોલ્લાસિ નિર્લીનમંત-
ર્નિસ્સંગાનાં મુનીનાં નિરુપમપરમાનંદસાંદ્રપ્રકાશમ્ ॥10॥

દુર્વારં દ્વાદશારં ત્રિશતપરિમિલત્ષષ્ટિપર્વાભિવીતં
સંભ્રામ્યત્ ક્રૂરવેગં ક્ષણમનુ જગદાચ્છિદ્ય સંધાવમાનમ્ ।
ચક્રં તે કાલરૂપં વ્યથયતુ ન તુ માં ત્વત્પદૈકાવલંબં
વિષ્ણો કારુણ્યસિંધો પવનપુરપતે પાહિ સર્વામયૌઘાત્ ॥11॥