નારાયણીયં દશક 9 – બ્રહ્મણઃ તપઃ તથા લોકસૃષ્ટિઃ

સ્થિતસ્સ કમલોદ્ભવસ્તવ હિ નાભિપંકેરુહે
કુતઃ સ્વિદિદમંબુધાવુદિતમિત્યનાલોકયન્ ।
તદીક્ષણકુતૂહલાત્ પ્રતિદિશં વિવૃત્તાનન-
શ્ચતુર્વદનતામગાદ્વિકસદષ્ટદૃષ્ટ્યંબુજામ્ ॥1॥

મહાર્ણવવિઘૂર્ણિતં કમલમેવ તત્કેવલં
વિલોક્ય તદુપાશ્રયં તવ તનું તુ નાલોકયન્ ।
ક એષ કમલોદરે મહતિ નિસ્સહાયો હ્યહં
કુતઃ સ્વિદિદંબુજં સમજનીતિ ચિંતામગાત્ ॥2॥

અમુષ્ય હિ સરોરુહઃ કિમપિ કારણં સંભ્વે-
દિતિ સ્મ કૃતનિશ્ચયસ્સ ખલુ નાલરંધ્રાધ્વના ।
સ્વયોગબલવિદ્યયા સમવરૂઢવાન્ પ્રૌઢધી –
સ્ત્વદીયમતિમોહનં ન તુ કલેવરં દૃષ્ટવાન્ ॥3॥

તતઃ સકલનાલિકાવિવરમાર્ગગો માર્ગયન્
પ્રયસ્ય શતવત્સરં કિમપિ નૈવ સંદૃષ્ટવાન્ ।
નિવૃત્ય કમલોદરે સુખનિષણ્ણ એકાગ્રધીઃ
સમાધિબલમાદધે ભવદનુગ્રહૈકાગ્રહી ॥4॥

શતેન પરિવત્સરૈર્દૃઢસમાધિબંધોલ્લસત્-
પ્રબોધવિશદીકૃતઃ સ ખલુ પદ્મિનીસંભવઃ ।
અદૃષ્ટચરમદ્ભુતં તવ હિ રૂપમંતર્દૃશા
વ્યચષ્ટ પરિતુષ્ટધીર્ભુજગભોગભાગાશ્રયમ્ ॥5॥

કિરીટમુકુટોલ્લસત્કટકહારકેયૂરયુઙ્-
મણિસ્ફુરિતમેખલં સુપરિવીતપીતાંબરમ્ ।
કલાયકુસુમપ્રભં ગલતલોલ્લસત્કૌસ્તુભં
વપુસ્તદયિ ભાવયે કમલજન્મે દર્શિતમ્ ॥6॥

શ્રુતિપ્રકરદર્શિતપ્રચુરવૈભવ શ્રીપતે
હરે જય જય પ્રભો પદમુપૈષિ દિષ્ટ્યા દૃશોઃ ।
કુરુષ્વ ધિયમાશુ મે ભુવનનિર્મિતૌ કર્મઠા-
મિતિ દ્રુહિણવર્ણિતસ્વગુણબંહિમા પાહિ મામ્ ॥7॥

લભસ્વ ભુવનત્રયીરચનદક્ષતામક્ષતાં
ગૃહાણ મદનુગ્રહં કુરુ તપશ્ચ ભૂયો વિધે ।
ભવત્વખિલસાધની મયિ ચ ભક્તિરત્યુત્કટે-
ત્યુદીર્ય ગિરમાદધા મુદિતચેતસં વેધસમ્ ॥8॥

શતં કૃતતપાસ્તતઃ સ ખલુ દિવ્યસંવત્સરા-
નવાપ્ય ચ તપોબલં મતિબલં ચ પૂર્વાધિકમ્ ।
ઉદીક્ષ્ય કિલ કંપિતં પયસિ પંકજં વાયુના
ભવદ્બલવિજૃંભિતઃ પવનપાથસી પીતવાન્ ॥9॥

તવૈવ કૃપયા પુનસ્સરસિજેન તેનૈવ સઃ
પ્રકલ્પ્ય ભુવનત્રયીં પ્રવવૃતે પ્રજાનિર્મિતૌ ।
તથાવિધકૃપાભરો ગુરુમરુત્પુરાધીશ્વર
ત્વમાશુ પરિપાહિ માં ગુરુદયોક્ષિતૈરીક્ષિતૈઃ ॥10॥