નારાયણીયં દશક 84 – સમંતપંચકતીર્થયાત્રા – બંધુમિત્રાદિ સમાગમમ્

ક્વચિદથ તપનોપરાગકાલે પુરિ નિદધત્ કૃતવર્મકામસૂનૂ ।
યદુકુલમહિલાવૃતઃ સુતીર્થં સમુપગતોઽસિ સમંતપંચકાખ્યમ્ ॥1॥

બહુતરજનતાહિતાય તત્ર ત્વમપિ પુનન્ વિનિમજ્ય તીર્થતોયમ્ ।
દ્વિજગણપરિમુક્તવિત્તરાશિઃ સમમિલથાઃ કુરુપાંડવાદિમિત્રૈઃ ॥2॥

તવ ખલુ દયિતાજનૈઃ સમેતા દ્રુપદસુતા ત્વયિ ગાઢભક્તિભારા ।
તદુદિતભવદાહૃતિપ્રકારૈઃ અતિમુમુદે સમમન્યભામિનીભિઃ ॥3॥

તદનુ ચ ભગવન્ નિરીક્ષ્ય ગોપાનતિકુતુકાદુપગમ્ય માનયિત્વા।
ચિરતરવિરહાતુરાંગરેખાઃ પશુપવધૂઃ સરસં ત્વમન્વયાસીઃ ॥4॥

સપદિ ચ ભવદીક્ષણોત્સવેન પ્રમુષિતમાનહૃદાં નિતંબિનીનામ્ ।
અતિરસપરિમુક્તકંચુલીકે પરિચયહૃદ્યતરે કુચે ન્યલૈષીઃ ॥5॥

રિપુજનકલહૈઃ પુનઃ પુનર્મે સમુપગતૈરિયતી વિલંબનાઽભૂત્ ।
ઇતિ કૃતપરિરંભણેત્વયિ દ્રાક્ અતિવિવશા ખલુ રાધિકા નિલિલ્યે ॥6॥

અપગતવિરહવ્યથાસ્તદા તા રહસિ વિધાય દદાથ તત્ત્વબોધમ્ ।
પરમસુખચિદાત્મકોઽહમાત્મેત્યુદયતુ વઃ સ્ફુટમેવ ચેતસીતિ ॥7॥

સુખરસપરિમિશ્રિતો વિયોગઃ કિમપિ પુરાઽભવદુદ્ધવોપદેશૈઃ ।
સમભવદમુતઃ પરં તુ તાસાં પરમસુખૈક્યમયી ભવદ્વિચિંતા ॥8॥

મુનિવરનિવહૈસ્તવાથ પિત્રા દુરિતશમાય શુભાનિ પૃચ્છ્યમાનૈઃ ।
ત્વયિ સતિ કિમિદં શુભાંતરૈઃ રિત્યુરુહસિતૈરપિ યાજિતસ્તદાઽસૌ ॥9॥

સુમહતિ યજને વિતાયમાને પ્રમુદિતમિત્રજને સહૈવ ગોપાઃ ।
યદુજનમહિતાસ્ત્રિમાસમાત્રં ભવદનુષંગરસં પુરેવ ભેજુ ઃ ॥10॥

વ્યપગમસમયે સમેત્ય રાધાં દૃઢમુપગૂહ્ય નિરીક્ષ્ય વીતખેદામ્ ।
પ્રમુદિતહૃદયઃ પુરં પ્રયાતઃ પવનપુરેશ્વર પાહિ માં ગદેભ્યઃ ॥11॥