નારાયણીયં દશક 78 – દ્વારકાવાસઃ તથા રુક્મણીસંદેશપ્રાપ્તિઃ

ત્રિદિવવર્ધકિવર્ધિતકૌશલં ત્રિદશદત્તસમસ્તવિભૂતિમત્ ।
જલધિમધ્યગતં ત્વમભૂષયો નવપુરં વપુરંચિતરોચિષા ॥1॥

દદુષિ રેવતભૂભૃતિ રેવતીં હલભૃતે તનયાં વિધિશાસનાત્ ।
મહિતમુત્સવઘોષમપૂપુષઃ સમુદિતૈર્મુદિતૈઃ સહ યાદવૈઃ ॥2॥

અથ વિદર્ભસુતાં ખલુ રુક્મિણીં પ્રણયિનીં ત્વયિ દેવ સહોદરઃ ।
સ્વયમદિત્સત ચેદિમહીભુજે સ્વતમસા તમસાધુમુપાશ્રયન્ ॥3॥

ચિરધૃતપ્રણયા ત્વયિ બાલિકા સપદિ કાંક્ષિતભંગસમાકુલા ।
તવ નિવેદયિતું દ્વિજમાદિશત્ સ્વકદનં કદનંગવિનિર્મિતમ્ ॥4॥

દ્વિજસુતોઽપિ ચ તૂર્ણમુપાયયૌ તવ પુરં હિ દુરાશદુરાસદમ્ ।
મુદમવાપ ચ સાદરપૂજિતઃ સ ભવતા ભવતાપહૃતા સ્વયમ્ ॥5॥

સ ચ ભવંતમવોચત કુંડિને નૃપસુતા ખલુ રાજતિ રુક્મિણી ।
ત્વયિ સમુત્સુકયા નિજધીરતારહિતયા હિ તયા પ્રહિતોઽસ્મ્યહમ્ ॥6॥

તવ હૃતાઽસ્મિ પુરૈવ ગુણૈરહં હરતિ માં કિલ ચેદિનૃપોઽધુના ।
અયિ કૃપાલય પાલય મામિતિ પ્રજગદે જગદેકપતે તયા ॥7॥

અશરણાં યદિ માં ત્વમુપેક્ષસે સપદિ જીવિતમેવ જહામ્યહમ્ ।
ઇતિ ગિરા સુતનોરતનોત્ ભૃશં સુહૃદયં હૃદયં તવ કાતરમ્ ॥8॥

અકથયસ્ત્વમથૈનમયે સખે તદધિકા મમ મન્મથવેદના ।
નૃપસમક્ષમુપેત્ય હરામ્યહં તદયિ તાં દયિતામસિતેક્ષણામ્ ॥9॥

પ્રમુદિતેન ચ તેન સમં તદા રથગતો લઘુ કુંડિનમેયિવાન્ ।
ગુરુમરુત્પુરનાયક મે ભવાન્ વિતનુતાં તનુતાં નિખિલાપદામ્ ॥10॥