નારાયણીયં દશક 75 – કંસવધ

પ્રાતઃ સંત્રસ્તભોજક્ષિતિપતિવચસા પ્રસ્તુતે મલ્લતૂર્યે
સંઘે રાજ્ઞાં ચ મંચાનભિયયુષિ ગતે નંદગોપેઽપિ હર્મ્યમ્ ।
કંસે સૌધાધિરૂઢે ત્વમપિ સહબલઃ સાનુગશ્ચારુવેષો
રંગદ્વારં ગતોઽભૂઃ કુપિતકુવલયાપીડનાગાવલીઢમ્ ॥1॥

પાપિષ્ઠાપેહિ માર્ગાદ્દ્રુતમિતિ વચસા નિષ્ઠુરક્રુદ્ધબુદ્ધે-
રંબષ્ઠસ્ય પ્રણોદાદધિકજવજુષા હસ્તિના ગૃહ્યમાણઃ ।
કેલીમુક્તોઽથ ગોપીકુચકલશચિરસ્પર્ધિનં કુંભમસ્ય
વ્યાહત્યાલીયથાસ્ત્વં ચરણભુવિ પુનર્નિર્ગતો વલ્ગુહાસી ॥2॥

હસ્તપ્રાપ્યોઽપ્યગમ્યો ઝટિતિ મુનિજનસ્યેવ ધાવન્ ગજેંદ્રં
ક્રીડન્નાપાત્ય ભૂમૌ પુનરભિપતતસ્તસ્ય દંતં સજીવમ્ ।
મૂલાદુન્મૂલ્ય તન્મૂલગમહિતમહામૌક્તિકાન્યાત્મમિત્રે
પ્રાદાસ્ત્વં હારમેભિર્લલિતવિરચિતં રાધિકાયૈ દિશેતિ ॥3॥

ગૃહ્ણાનં દંતમંસે યુતમથ હલિના રંગમંગાવિશંતં
ત્વાં મંગલ્યાંગભંગીરભસહૃતમનોલોચના વીક્ષ્ય લોકાઃ ।
હંહો ધન્યો હિ નંદો નહિ નહિ પશુપાલાંગના નો યશોદા
નો નો ધન્યેક્ષણાઃ સ્મસ્ત્રિજગતિ વયમેવેતિ સર્વે શશંસુઃ ॥4॥

પૂર્ણં બ્રહ્મૈવ સાક્ષાન્નિરવધિ પરમાનંદસાંદ્રપ્રકાશં
ગોપેશુ ત્વં વ્યલાસીર્ન ખલુ બહુજનૈસ્તાવદાવેદિતોઽભૂઃ ।
દૃષ્ટ્વાઽથ ત્વાં તદેદંપ્રથમમુપગતે પુણ્યકાલે જનૌઘાઃ
પૂર્ણાનંદા વિપાપાઃ સરસમભિજગુસ્ત્વત્કૃતાનિ સ્મૃતાનિ ॥5॥

ચાણૂરો મલ્લવીરસ્તદનુ નૃપગિરા મુષ્ટિકો મુષ્ટિશાલી
ત્વાં રામં ચાભિપેદે ઝટઝટિતિ મિથો મુષ્ટિપાતાતિરૂક્ષમ્ ।
ઉત્પાતાપાતનાકર્ષણવિવિધરણાન્યાસતાં તત્ર ચિત્રં
મૃત્યોઃ પ્રાગેવ મલ્લપ્રભુરગમદયં ભૂરિશો બંધમોક્ષાન્ ॥6॥

હા ધિક્ કષ્ટં કુમારૌ સુલલિતવપુષૌ મલ્લવીરૌ કઠોરૌ
ન દ્રક્ષ્યામો વ્રજામસ્ત્વરિતમિતિ જને ભાષમાણે તદાનીમ્ ।
ચાણૂરં તં કરોદ્ભ્રામણવિગલદસું પોથયામાસિથોર્વ્યાં
પિષ્ટોઽભૂન્મુષ્ટિકોઽપિ દ્રુતમથ હલિના નષ્ટશિષ્ટૈર્દધાવે ॥7॥

કંસ સંવાર્ય તૂર્યં ખલમતિરવિદન્ કાર્યમાર્યાન્ પિતૃંસ્તા-
નાહંતું વ્યાપ્તમૂર્તેસ્તવ ચ સમશિષદ્દૂરમુત્સારણાય ।
રુષ્ટો દુષ્ટોક્તિભિસ્ત્વં ગરુડ ઇવ ગિરિં મંચમંચન્નુદંચત્-
ખડ્ગવ્યાવલ્ગદુસ્સંગ્રહમપિ ચ હઠાત્ પ્રાગ્રહીરૌગ્રસેનિમ્ ॥8॥

સદ્યો નિષ્પિષ્ટસંધિં ભુવિ નરપતિમાપાત્ય તસ્યોપરિષ્ટા-
ત્ત્વય્યાપાત્યે તદૈવ ત્વદુપરિ પતિતા નાકિનાં પુષ્પવૃષ્ટિઃ ।
કિં કિં બ્રૂમસ્તદાનીં સતતમપિ ભિયા ત્વદ્ગતાત્મા સ ભેજે
સાયુજ્યં ત્વદ્વધોત્થા પરમ પરમિયં વાસના કાલનેમેઃ ॥9॥

તદ્ભ્રાતૃનષ્ટ પિષ્ટ્વા દ્રુતમથ પિતરૌ સન્નમન્નુગ્રસેનં
કૃત્વા રાજાનમુચ્ચૈર્યદુકુલમખિલં મોદયન્ કામદાનૈઃ ।
ભક્તાનામુત્તમં ચોદ્ધવમમરગુરોરાપ્તનીતિં સખાયં
લબ્ધ્વા તુષ્ટો નગર્યાં પવનપુરપતે રુંધિ મે સર્વરોગાન્ ॥10॥