નારાયણીયં દશક 74 – ભગવતઃ મથુરાપુરીપ્રવેશમ્

સંપ્રાપ્તો મથુરાં દિનાર્ધવિગમે તત્રાંતરસ્મિન્ વસ-
ન્નારામે વિહિતાશનઃ સખિજનૈર્યાતઃ પુરીમીક્ષિતુમ્ ।
પ્રાપો રાજપથં ચિરશ્રુતિધૃતવ્યાલોકકૌતૂહલ-
સ્ત્રીપુંસોદ્યદગણ્યપુણ્યનિગલૈરાકૃષ્યમાણો નુ કિમ્ ॥1॥

ત્વત્પાદદ્યુતિવત્ સરાગસુભગાઃ ત્વન્મૂર્તિવદ્યોષિતઃ
સંપ્રાપ્તા વિલસત્પયોધરરુચો લોલા ભવત્ દૃષ્ટિવત્ ।
હારિણ્યસ્ત્વદુરઃસ્થલીવદયિ તે મંદસ્મિતપ્રૌઢિવ-
ન્નૈર્મલ્યોલ્લસિતાઃ કચૌઘરુચિવદ્રાજત્કલાપાશ્રિતાઃ ॥2॥

તાસામાકલયન્નપાંગવલનૈર્મોદં પ્રહર્ષાદ્ભુત-
વ્યાલોલેષુ જનેષુ તત્ર રજકં કંચિત્ પટીં પ્રાર્થયન્ ।
કસ્તે દાસ્યતિ રાજકીયવસનં યાહીતિ તેનોદિતઃ
સદ્યસ્તસ્ય કરેણ શીર્ષમહૃથાઃ સોઽપ્યાપ પુણ્યાં ગતિમ્ ॥3॥

ભૂયો વાયકમેકમાયતમતિં તોષેણ વેષોચિતં
દાશ્વાંસં સ્વપદં નિનેથ સુકૃતં કો વેદ જીવાત્મનામ્ ।
માલાભિઃ સ્તબકૈઃ સ્તવૈરપિ પુનર્માલાકૃતા માનિતો
ભક્તિં તેન વૃતાં દિદેશિથ પરાં લક્ષ્મીં ચ લક્ષ્મીપતે ॥4॥

કુબ્જામબ્જવિલોચનાં પથિપુનર્દૃષ્ટ્વાઽંગરાગે તયા
દત્તે સાધુ કિલાંગરાગમદદાસ્તસ્યા મહાંતં હૃદિ ।
ચિત્તસ્થામૃજુતામથ પ્રથયિતું ગાત્રેઽપિ તસ્યાઃ સ્ફુટં
ગૃહ્ણન્ મંજુ કરેણ તામુદનયસ્તાવજ્જગત્સુંદરીમ્ ॥5॥

તાવન્નિશ્ચિતવૈભવાસ્તવ વિભો નાત્યંતપાપા જના
યત્કિંચિદ્દદતે સ્મ શક્ત્યનુગુણં તાંબૂલમાલ્યાદિકમ્ ।
ગૃહ્ણાનઃ કુસુમાદિ કિંચન તદા માર્ગે નિબદ્ધાંજલિ-
ર્નાતિષ્ઠં બત હા યતોઽદ્ય વિપુલામાર્તિં વ્રજામિ પ્રભો ॥6॥

એષ્યામીતિ વિમુક્તયાઽપિ ભગવન્નાલેપદાત્ર્યા તયા
દૂરાત્ કાતરયા નિરીક્ષિતગતિસ્ત્વં પ્રાવિશો ગોપુરમ્ ।
આઘોષાનુમિતત્વદાગમમહાહર્ષોલ્લલદ્દેવકી-
વક્ષોજપ્રગલત્પયોરસમિષાત્ત્વત્કીર્તિરંતર્ગતા ॥7॥

આવિષ્ટો નગરીં મહોત્સવવતીં કોદંડશાલાં વ્રજન્
માધુર્યેણ નુ તેજસા નુ પુરુષૈર્દૂરેણ દત્તાંતરઃ ।
સ્રગ્ભિર્ભૂષિતમર્ચિતં વરધનુર્મા મેતિ વાદાત્ પુરઃ
પ્રાગૃહ્ણાઃ સમરોપયઃ કિલ સમાક્રાક્ષીરભાંક્ષીરપિ ॥8॥

શ્વઃ કંસક્ષપણોત્સવસ્ય પુરતઃ પ્રારંભતૂર્યોપમ-
શ્ચાપધ્વંસમહાધ્વનિસ્તવ વિભો દેવાનરોમાંચયત્ ।
કંસસ્યાપિ ચ વેપથુસ્તદુદિતઃ કોદંડખંડદ્વયી-
ચંડાભ્યાહતરક્ષિપૂરુષરવૈરુત્કૂલિતોઽભૂત્ ત્વયા ॥9॥

શિષ્ટૈર્દુષ્ટજનૈશ્ચ દૃષ્ટમહિમા પ્રીત્યા ચ ભીત્યા તતઃ
સંપશ્યન્ પુરસંપદં પ્રવિચરન્ સાયં ગતો વાટિકામ્ ।
શ્રીદામ્ના સહ રાધિકાવિરહજં ખેદં વદન્ પ્રસ્વપ-
ન્નાનંદન્નવતારકાર્યઘટનાદ્વાતેશ સંરક્ષ મામ્ ॥10॥