નારાયણીયં દશક 66 – ગોપીજનાહ્લાદનમ્

ઉપયાતાનાં સુદૃશાં કુસુમાયુધબાણપાતવિવશાનામ્ ।
અભિવાંછિતં વિધાતું કૃતમતિરપિ તા જગાથ વામમિવ ॥1॥

ગગનગતં મુનિનિવહં શ્રાવયિતું જગિથ કુલવધૂધર્મમ્ ।
ધર્મ્યં ખલુ તે વચનં કર્મ તુ નો નિર્મલસ્ય વિશ્વાસ્યમ્ ॥2॥

આકર્ણ્ય તે પ્રતીપાં વાણીમેણીદૃશઃ પરં દીનાઃ ।
મા મા કરુણાસિંધો પરિત્યજેત્યતિચિરં વિલેપુસ્તાઃ ॥3॥

તાસાં રુદિતૈર્લપિતૈઃ કરુણાકુલમાનસો મુરારે ત્વમ્ ।
તાભિસ્સમં પ્રવૃત્તો યમુનાપુલિનેષુ કામમભિરંતુમ્ ॥4॥

ચંદ્રકરસ્યંદલસત્સુંદરયમુનાતટાંતવીથીષુ ।
ગોપીજનોત્તરીયૈરાપાદિતસંસ્તરો ન્યષીદસ્ત્વમ્ ॥5॥

સુમધુરનર્માલપનૈઃ કરસંગ્રહણૈશ્ચ ચુંબનોલ્લાસૈઃ ।
ગાઢાલિંગનસંગૈસ્ત્વમંગનાલોકમાકુલીચકૃષે ॥6॥

વાસોહરણદિને યદ્વાસોહરણં પ્રતિશ્રુતં તાસામ્ ।
તદપિ વિભો રસવિવશસ્વાંતાનાં કાંત સુભ્રુવામદધાઃ ॥7॥

કંદલિતઘર્મલેશં કુંદમૃદુસ્મેરવક્ત્રપાથોજમ્ ।
નંદસુત ત્વાં ત્રિજગત્સુંદરમુપગૂહ્ય નંદિતા બાલાઃ ॥8॥

વિરહેષ્વંગારમયઃ શૃંગારમયશ્ચ સંગમે હિ ત્વમ્ નિતરામંગારમયસ્તત્ર પુનસ્સંગમેઽપિ ચિત્રમિદમ્ ॥9॥

રાધાતુંગપયોધરસાધુપરીરંભલોલુપાત્માનમ્ ।
આરાધયે ભવંતં પવનપુરાધીશ શમય સકલગદાન્ ॥10॥